پاش ئەوەی ورچە سپییەکەی سەهۆڵبەندانی باکوور گۆلکێکی دەریایی ڕاو دەکات و ژەمێکی یەکجار گەورە و چەور دەخوات، دەچێت پاڵی لێ دەداتەوە و خەمی نییە و هەتا چەند مانگی دیکە برسی نابێتەوە.

پێش ئەوەی بکەوێتە خەوێکی قووڵ، دەستەکانی دەخاتە ژێر چەناگەی و بیر دەکاتەوە ئەو سروشتە جوانە وەک من سپییە و لەپێناو مندا دروست کراوە، ئەگەر ئەو جیهانە سپی نەبووایە، یان من ڕەنگێکی دیکەم هەبووایە، ئەوا نێچیرەکانم بەئاسانی منیان دەبینی و ڕایان دەکرد لێم، بەمەش لەبرسان دەمردم.

کەواتە خوایەکی لە شێوەی خۆم سپی هەیە بەناوی خوای سەهۆڵەکە کە هەموو شتێکی بۆمن ئاسان کردووە، ئەو گۆلک و ئاژەڵانەی دیکە کە خۆراکی منن هەمووی خوا سپییەکەم بەمنی بەخشیووە.

ئەوەیە بیرکردنەوەی ئایندار کە وا دەزانێت ئەو زەوییە بەو شێوەیە جوانە هەر لەسەرەتاوە وا ساز و ئامادە کراوە کە بگونجێت لەگەڵ پێوەر و پێداویستییەکانی مرۆڤ، وەک چۆن کاتێک هاتووە سەیری چیا و ئاو و ڕووبار و ئەو هەموو ڕوەک و میوەیە و گۆشتە خۆشەی باڵندە و ئاژەڵانی کردووە کە (خوا) بۆی دروست کردووە.

بەڵام لەڕاستیدا تەواو بابەتەکە پێچەوانەیە، زەوی خۆی ڕێک نەخستووە و لەسەرەتای دروستبوونی یەک پارچە ئاگر و بەردی تواوە بووە، چیا و ڕووبار و دارستانەکانی بەهەزاران و ملیۆنان قۆناخ بەمەی ئەمڕۆکە گەیشتوون، هەروەها ڕوەک و ئاژەڵانیش بە سەدان ملیۆن ساڵ لە پەرەسەندن و خۆگونجاندن و گۆڕانی بەردەوام و کارەسات و قڕبوونی یەک بەدوای یەک، ئینجا ئەمەی ئێستەیان لێ پەیدا بووە. لەبەر نەبوونی توانی خۆگونجاندن لەگەڵ ژینگەی دەوروبەر و کێشە و گرفتی جۆراوجۆر، پتر لە 99%ی تێکرای ئەو جۆرانەی (دەیان ملیار جۆر) کە لەسەر زەویدا ژیاون لەناوچوونە و بەیەکجارەکی بنەبڕ بوونە.

ئەگەر سەرنج بدەینە شتگەلەکانی گەردوون دەبینین کە هەر هەمووی بە تێپەڕبوونی ملیاران ساڵ لە چاککردنەوە و لابردنی هەڵە، ئینجا بوونە بەشت، مرۆڤیش هەر ئاوا بووە و دەتوانین بڵێین ئەوەی مرۆڤ کردوویەتی باشتر و خێراتریش بووە.

بە نموونە، دروستکردنی ئۆتۆمبیل بە سەد ساڵ لە هەڵە و ڕاستکردنەوەی چەندجارە، لە سەقەتی و ناڕێکییەوە دەست پێ کراوە و ئەمڕۆکە ئۆتۆمبیلی زۆر نایاب بە بەرهەم دەهێندرێت.

بەڵام سەیری سروشت بکە بە نێزیکەی چوار ملیار ساڵ ئینجا مرۆڤێکی دڕندەی ناشیرینی دروست کردووە، لەسەری هەتا بنی پێیەوە ناڕێکی و سەقەتی و نەخۆشی و دەرد و بەڵایە.

باشە ئەگەر خوایەکی کامڵ و تەواو و بێ کەموکوڕی بوونی هەبێ، بۆچی بە قۆناخ و چاککردن و ڕاستکردنەوەی هەڵە بوونەوەرەکان دروست دەکات؟

بۆچی کە خۆی ڕێکوپێکە شتەکانیشی وەک خۆی ڕاستەوخۆ و بە یەک هەنگاو بە ڕێکوپێکی دروست ناکات؟