لە لایڤێکی ڕووداودا، ئیدریس بارزانی کوڕی نێچیرڤان بارزانی سەرۆکی هەرێمی کوردستان و ئەندازیاری ئاوەدانی کوردستان ١٠٠ کورسی خوێندنی پێشکەش بە خوێندکارانی کوردستان کرد بۆ خوێندنی ماستەر لە دەرەوەی وڵات. لە بنەرەتدا هەر کارێک بۆ پتەوکردنی ژێرخانی زانستی و ئەکادیمی کوردستان پیرۆز و جێی بایەخە بەڵام گرنگە لەم بابەتەدا کۆمەڵێک بابەت تاوتوێ بکەین.

تێکڕای نرخی خوێندن لە دەرەوەی وڵات بە ٣٥ هەزار دۆلار دەخەمڵێنرێت ئەگەر زۆرترین ژمارەی خوێندکاران بنێردرێن بۆ وڵاتانی نرخ مامناوەند ئینجا تێچووەکەی دەکاتە ٣،٥ ملیۆن دۆلار. بەلایەنی کەمەوە نیو ملیۆن دۆلار بۆ خەرجی گشتی و جێبەجێکردنی پڕۆژەکە، ژمارەکە نزیک دەبێتەوە لە چوار ملیۆن دۆلار.

ئیدریس بارزانی بە کەسێکی دەستکراوە و دڵفراوان ناسراوە، بۆ نموونە لە ڕێکەوتی ٢٧/٠٨/٢٠١٧ لە بێڤرلی هیلس، یەکێک لە گرانبەهاترین ناوچەکانی جیهان لە ئەمەریکا تەنیا بۆ یەک کاتژمێر ٣٧٥ هەزار دۆلاری خەرجکرد. بە زمانی بازاڕی ٣٧.٥ دەفتەر دۆلار.

ڕۆژێک پێش ئەو ڕێکەوتە و لە ٢٦/٠٨/٢٠١٧ دا لە سوپەرمارکێتێکی تردا لە هەمان ناوچە سەبەتەیەکی پڕکرد لە جلوبەرگ و هەندێ جل و پۆشاکی وەرزشی بە بەهای ٢٨،٨٦٣ دۆلار، واتە دوو دەفتەر و ٨٨ گەڵآ.

هەر ئیدریس بارزانی، کوڕە دەست و دڵفراوانەکەی نێچیرڤان بارزانی لەم ئینڤۆیس- رەسیدانەی بۆ کاتژمێر و جلوبەرگەکان خەرجیکردوە ناونیشانی کۆشکێکی داناوە کە پێدەچێت هی خۆی یاخود باوکی بێت و بەهاکەی لە بازاڕدا ٦.٥ ملیۆن دۆلارە. 

لە ناکاوێکدا لە ساڵی ٢٠٢٠ ئیدریس نێچیرڤان بارزانی بوو بە خاوەنی ٩.٩٪یی پشکەکانی بانکی نێودەوڵەتی کوردستان و تەنیا دوای هەژدە مانگ ئەم پشکانەی بە بەهای ٣٩ ملیار دینار، ٣٥ ملیۆن دۆلار فرۆشتەوە!

ئەوەمان لەبیرنەچێت ئیدریس بارزانی کەسێکی ئەکادیمیە، هەر لەگەڵ دەرچوونی لە زانکۆ، لە ساڵی ٢٠١٩ بەدەر لە هەموو ڕێنماییەکانی خوێندنی باڵا بۆ دانانی سەرۆکی زانکۆکان، لە تەمەنی تەنکە ڕیش و سمێڵدا کرا بە سەرۆکی ڕاوێژکار لە زانکۆی کوردستان کە تا ئێستا ساخنەبۆتەوە گشتییە یاخود تایبەتە. 

هەموو ئەمانە بەدەر لە فەندە ملیۆن دۆلاریەکانی وڵات و ڕێکخراوە بیانیەکان بۆ ئاوارەکان و هەژارانی کوردستان و ئاوارەکان بۆ دەزگای ڕوانگە، جەوێکی وایان ڕەخساندووە کە ئیدریس بڕیارێک لە لایڤێکدا بدات نە وەزیری خوێندنی باڵا، نە سەرۆکی حکومەت بوێری ئەوەیان تێدابێت بیدەن!