ئومێد بەڕۆشکی ڕۆژنامەنووس و چالاکوانێکی کارامە و دەنگێکی بەهێز و بەرگریکارێکی مافەکانی مرۆڤە . ئەو هەموو هەوڵێک ئەدات لەڕێگەی نوسین و چالاکیەکانیەوە بۆئەوەی دیموکراسی و ئازادی لە کوردستان بەرقەرابێت بەبێ گوێدانە بەربەستەکانی ژیانی کە بۆی دروست ئەکرێت .چالاکییەکانی ئەو بەشێکە لە هەوڵدان بۆ جیهانێکی باشتر و دادپەروەر.

ئەوەی جێگەی سەرنجە دەسەڵاتێکی ملهوڕ و کەڕ و کاسی وەک دەسەڵاتی باشوور نایەوێت نەخۆی نە هاوڵاتیان ئەو هەوڵ و هاوارانە ببیستێ تا خەڵک هۆشیار و چاوکراوە نەبێتەوە لەو زوڵمانەی کە بەنهێنی و ئاشکرا پیادەی ئەکەن. ئەمەش لەپێناوی هەرچی زیاتر مانەوە و دەستگرتن بە کورسی و بەرژەوەندیەکانی خۆیان و بنەماڵە و حیزبەکانیانەوە . 

٣٠ ی ١ ی ٢٠٢٥ بۆ چەندینجار و وەک کرداری لەمێژیینە و هەمیشەیی خۆیان گوێبیستی بڕیاڕە گاڵتەجاریەکانی دادگای خێڵی بارزان بووینەوە کە سزای زیندانی کردنی ئەو چالاکوانە قارەمانەی دەرکردووە بۆ ماوەی شەش مانگ بەبیانوویەکی زۆر گاڵتەجاڕانە و ئاست نزم و ناوبۆش کە ئەویش یاسای خراپ بەکارهێنانی مۆبایلە !

گوایە کە لە پۆستێکی فەیس بووک داوای ئازادی بۆ مرۆڤەکانی تر و هاوڕێیانی تری لە بادینان کردووە و ئەمەش کاریگەری بۆسەر ئەمن و ئاسایشی کوردستان هەیە ! ئەو بەناو دادگایە کە خۆی مەترسیە بۆسەر ژیانی تاک بەتاکی کوردستان ئازادی بە مەترسی بۆسەر خۆی ئەبینێ بۆیە بەنیسبەت ئەوانەوە ئەو هاوار و نوسینە هێڵی سوورە بۆ ئەوان .

سزای پۆستێک شەش مانگ زیندانی و چەندین جاری تر گرتن و ترساندن و هەڕەشەکردن بێت ئەی ئەپرسم :

سزای فرۆشتنی ٥١ ٪ ی خاک و بەتاڵانبردنی سەروەت و سامانی نەوەکانی داهاتوو چیە ؟

سزای بەکوشتدانی دەیان هەزار کەس لە شەڕی ناوخۆ دا چیە ؟

سزای سەرهەڵگرتنی ئەو هەموو سامانە مرۆیی و گەنج و مناڵ و خێزانانەی کە لەتاو زوڵمی ئێوە ڕائەکەن و خۆیان ئەدەنە دەست شەپۆلە بێڕەحمەکانی دەریا و کۆچ ئەکەن چییە؟!

ئەی سزای بڕینی قوتی ئەو مامۆستا و فەرمانبەرانە چییە کە تا نوسینی ئەم بابەتە لەژێر خێمەی سارد و سڕدان و مانیان لەخواردن و خواردنەوە گرتووە تا دەسەڵاتە نابووت و بێڕەحمەکان ئاوڕێکیان لێبدەنەوە و قوتی دزراویان بۆ بگەڕێننەوە ؟!

ئەی کێ ئەوانە سزابدات کە کەرامەتی تاکی کورد ئەتکئەکەن ؟

ئەی کێ ئەو بەناو سەرکردانە سزا بدات لە کاتی بوونی کەمتەرخەمی لەکارەکانیاندا ؟!

ئەی کێ خودی دادگا سزا بدات کە بووە بە مقاشێک بۆ بەدیهێنانی مەرامەکانی حیزب و بنەماڵە و بەرەبابەکانیان ؟!

ژیانێکی کورتی بەکەرامەت زۆر شانازیترە وەک لە ژیانێکی درێژی پڕ سەرشۆری و نەهامەتی و زوڵم . بۆیە داوا لە هاوڵاتیانی وڵاتەکەم لەناوخۆی ووڵات و چالاکوان و ڕەوەندی دەرەوەی وڵات ئەکەم بەبێ هیچ ترس و سڵەمینەوەیەک پشتگیری خەباتی مەدەنیانەی ئەوانە بن کە خەمخۆر و داکۆکیکاری سەرسەختی دۆزی ڕەوای کوردن و ئەیانەوێت میللەت لەتاو زوڵم و زۆری دەسەڵات ڕزگاربکەن و هەوڵی هۆشیارکردنەوەی گشتی ئەدەن و دۆزە ڕەواکانی میللەتەکان ئەگەیەنن بە لایەنە پەیوەندیدارەکان چ لەناوخۆ چ لەدەرەوەی ووڵات .

هەمومان ببینە پاڵپشت بۆ هەرچی فشاری زیاترە بۆ ئازادکردنی بەڕۆشکی و زیندانیانی تری ڕێگەی ماف و ئازادی و بەدیهێنانی ئامانجەکانی خەباتی مامۆستایان و مووچەخۆران و هاوڵاتیان.