دیوێکی تری ئاوێنەکان

داڕمانی کۆمپانیایەکی تری ستەم لە ڕۆژهەڵاتی ناوەڕاستدا

ئەمڕۆ ڕژێمێکی تری ستەمکار رووخا و چووە زبڵدانی مێژووەوە، وەک ڕەوشە ئاساییەکەی ستەمکاریی.

لە ڕاستیدا ئەم جۆرە ڕژێمانە وەک دوکان و کۆمپانیا و کێڵگەیەکن تایبەت بە کەسێک و ماڵبات و خێزانێک، بۆیە لەگەڵ ڕووخانی سەرەکەیدا، ئێدی هەموو چوارقورنەکەی لەگەڵ دیارنەمانی ئەودا دادەڕمێن.

وەک دوکانێک کە ئاگری تێبەربێت و 

کارخانەیەک مایەپووچ بێت و

 کێڵگەیەک لافاو  بیبات.

سووریا یا شام، کە بە پایتەختەکەشیان دەگووت(شام)، ئەمە خۆی نیشانەی ئەوەیە کە هەموو شام، بریتییە لە دیمەشق چوونکە ئەوێ نیشتەجێی(دکتاتۆر و خێزانەکەی) بوو.

لە باشوور لای ئێمە، مۆدێلێکی تر هەیە ستەمکاران خۆیان و خێزانەکانیان ماڵیان لەوێیە، مۆدێلی گردنشینی، بۆ نموونە: 

گردەکەی سەری ڕەش، لە هەولێر

گرەکەی دەباشان، لە سلێمانی

دکتاتۆرەکانی ئێمە وەک قەل و داڵ بەسەر گردەوە دەنیشنەوە!!!.

بەشار ڕۆشت و یادگارەکانی لە:

زیندان و 

گۆڕستانی غەریبان و 

گیرفانی بەتاڵی 

زۆرینەی خەڵکی سووریادا جێهێشت.

کاتێکیش ستەمکارانی کوردیی باشووری، ڕەشەبای تووڕەیی خەڵک، دامودەزگا و ماڵ و بازاڕ و ڕەفتار و ناویان هەڵدەپێچیت و فڕییان دەداتە ناو دۆڵی پڕ لە خاشاکی مێژووی خیانەت و کورد کوشتنیانەوە، ئەوەی لێیان جێدەمێنێ:

مافی نەسەندراوەی ئەنفالکراوان و

هەناسەی کوژراوی هەڵەبجەییەکان و

پڕچی بڕاوی کچانی ژەنگالی و

خوێنی ڕژاوی لاوانی کورد و

پارەی دزراوی منداڵانی کورد و

گۆڕی غەریبی کوردانی ڕۆژهەڵات، باکوور و ڕۆژئاوایە

شکۆی شکاوی هێزەکانیانە بەرانبەر چەتەکانی داعش

کەواسووریی بەر لەشکری توورکیایانە

ژنان و کچانی سلیکۆنی زۆریانە

تەویلەی ئەسپە ڕەخشەکانیانە 

زیندانەکانی ژێر زەمینیانە

ئۆتۆمۆبیلی دوا مۆدێلیانە

پاڵاوگەی لە کارکەوتووی نەوتی دزراومانە 

زمانێکی کوردیی سەقەتکراومانە

• ئەگەر گەلێک لە زەمانی (زانست و هۆش) دا بە دوای کتێب و بەسەرهاتی کۆن و خورافە و چیرۆکی ئەفسانەیدا وێڵ بێت، هەموو لات و گەجەر و گوجەرێک دەتوانن خۆیانیان لێ بکەن بە خوا، بە پاڵەوان بە سەرکردەی بێ هاوتا!!!..

• ئەگەر ڕۆشنبیران و هونەرمەندانی گەلێک بوونە قەرەقۆزی ڕژێمێک، شایەری دەربارێک و بارکێشی دکتاتۆرێک، هەموو گەجەر و گوجەرێک دەتوانن خۆیانیان لێ بکەن بە خوا، بە پاڵەوان بە سەرکردەی بێ هاوتا!!!..

• ئەگەر پیاوانی ئاینی گەلێک بوونە، حیکایەتخوانی چیرۆکە سواوەکان و نزاگۆی شا و وەلی ئەمرەکانیان، هەموو گەجەر و گوجەرێک دەتوانن خۆیانیان لێ بکەن بە خوا، بە پاڵەوان بە سەرکردەی بێ هاوتا!!!..

لەم ناوچەیەدا کە پڕە لە خەلیفە، ئەمیر، ئیمام، سەرکردە، ڕابەر، سکرتێری حیزب و باوکی ڕۆحی و …… هتد. بەشار دەڕوا و یەشار دێت، ئەسەد ئەڕوا و چەقەڵ دێ، نە ئەسەد و نە چەقەڵیش، هیچ پەنجەرەیەک بە ڕووی(هۆشێکی ئازاد) دا ناکەنەوە، چوونکە کاری ئەوان نەهۆشە و نە ئازادی بەڵکو  خواردنی مرۆڤە، لە پلەی یەکدا:

ـ  ژن بۆ خواردن، 

ـ پیاو بۆ ڕابووردن، 

ـ دایکان و منداڵ بۆ وێرانکردنی داهاتووی گەلان.

٨/١٢/٢٠٢٤ بەشار ئەسەد، قەلفڕی پێکرا، جارێکە زووە بزانین، ئەو قەل و داڵەی ئۆردووگان پەروەردەی کردوون، چۆن دەفڕن!!!.

بەڵام ئەوەی  کە بۆ ئێمە ئاشکرایە و لە مێژووی سیاسەتی کوردیدا بێهاوتایە، ئەو دسپلین و دووربینییەی بەڕێوەبەرێتی خۆسەریی ڕۆژئاوایە.

ساڵی ١٩٧٥ مانگی ٣ ڕۆژی ٢٠ سەرکردەیەتی شۆڕشی کورد، بەو خەڵکەی لە دەوری خڕ ببوونەوە و باوەڕی خۆیان پێدا بوو، گووتی: 

ـ ئێدی ئاشمان بەتاڵ کرد و هەر کەس بچێتەوە بۆ ماڵی خۆی و ئێمەش دەچینەوە بۆ ماڵی خۆمان لە کەرەج.

ساڵی ٢٠٢٤ مانگی ١٢ ڕۆژی ٨، مەزڵووم کۆبانێ، بانگی لە شەڕڤانانی ئازادیخوازی یەپەگە و یەپەژە کرد:

ـ لە دەوری (گەڕەکی شێخ مەقسوود لە حەلەب) خڕ ببنەوە بۆ پاراستنی گیان و سامانی دانیشتوانی کورد لەو گەڕەکە.

ئێوە بڕوانن ( نرخی ژیانی تاکی کورد) لە لای ئازادیخوازانی ڕۆژئاڤا و (نرخی ژیانی تاکی کورد) لای سەرکردەیەتی سیاسی لە باشووردا!!!.

ئەمە گرنگترین پرێنسیپی مرۆییە لەلای ئازادیخوازانی باکووریی و ڕۆژئاڤا کە بەهەر نرخێک بووە دەبێ ژیانی تاکی کورد پارێزراو بێت، ئەگەر بە پێشکەشکردنی گیانی شەڕڤانێکیش بووە، ئەمەی شەڕڤانان دەیکەن پڕاوپڕیی وشەی (پاڵەوان) بوونە، مەزڵووم کۆبانێ و ئەو شەڕڤانانە نەگەڕانەوە

(بۆ ماڵی خۆیان) تا دوا کوردیان لە مەترسی چەتەکانی ئۆردووگان، ڕزگار کرد، پاڵەوانێتی ئەمەیە. ئەمەیە پاڵەوانێتی(پاراستنی ژیانی تاکی کورد).

• ئەوەی لە ١٩٧٥، ١٩٨٥، ١٩٩٥، ٢٠٠٥ و ٢٠٢٥ دا لە باشوور بەرانبەر تاکی کورد 

کرا/ دەکرێت، سووکایەتییە بە ژیانی تاکی کورد، بێنرخبوونی ( ژیانی تاکی کورد) ە بۆ سەرکردەیەتی حیزبی باشووری و ڕۆژهەڵاتی. 

کەواتە:

ڕۆژ و ڕۆژگارەکانتان باش ئازادیخوازانی یەپەگە و یەپەژە.

دەستومەچەکتان باش، (بێریتان)ەکانی قەندیلیی.

ئازادیتان باش، ژنانی دلێری ڕۆژهەڵاتی.