ئەو دەربڕینەی سەرەوە قسەی مێدیاکارێکی کەناڵی ڕوداوە کە ئێستا بە شێوەیەکی ڕانەگەیەنراو و لەنەبوونی کەناڵێکی ئۆپۆزسیۆن دا زۆر بە بەرنامەیەکی تۆکمە کار لەسەر سۆزی خەڵک ئەکات .

ئەو وێرانکاریەی کە حکومەتەکەی ئەو و خاوەنی ئەو کەناڵە و حیزب و بنەماڵەکەیان لێی بەرپرسە ئەم دێت بە زمانێکی ڕەخنەئامێز نەک لەسەرە گەورەکان بەڵکو بەسوک کردنی بەرپرسانی بەشی خوارەوەی حکومەت ،ئەوانەی بێکەسن، بێپشتیوانن ، یان ماستاوچین و وەزعەکەیان قبوڵە ئەیانهێنێتە سەر شاشەکەی ڕووداو ، بەمەش ڕق و توڕەیی خەڵک تاڕاددەیەک بەتاڵ ئەکاتەوە .

ئەو کەناڵەی هەموومان ئەزانین خاوەندارێتیەکەی ئەگەڕێتەوە بۆ نێچیرڤان بارزانی بەس لەسەرحسابی قوت و گیرفانی خەڵک. کاروچالاکیەکانیشی هێندەی خزمەتی ئەجێندای دەرەکی و خودی بنەماڵەی بارزانی و لەناو ئەوانیشدا باڵی نێچیرڤان ئەکات ، نیو هێندە کاریگەری ئەرێنی لەسەر بەرەوپێشبردن و دروستبونی متمانە بە ڕاگەیاندنی کوردی نەبووە .

ئەوان بەجددی زۆر باش ئەزانن کە چۆن ئاڕاستەی ناڕەزایەتی و خاڵە لاوازەکانی کۆمەڵگە لەبەرژەوەندی تەسکی خۆیان بگۆڕن. شارەزان لە هەڵمژینی سۆزی ئەو دەنگە ساویلکانەی کە پێیان وایە کەناڵێکی بێ ڕکابەرە و وەک فریادڕەسێک بۆ خزمەتی دەنگی ناڕازی ئەیبینن !

بۆیە منیش بەزەییم بەو جۆرە مەخلوقەدا دێتەوە.

باسەکەی من لێرەدا تەنها خودی ئەو کەناڵە نیە بەڵکو لەسەر هەموو ئاستە ژینگەیی و ژیاری و سیاسی و ئابووری و خزمەتگوزاریەکان بەزەییم بە حاڵی کورد دا دێتەوە.

بەڕاستی جێگەی بەزەییە لەسایەی ئەو هەموو داهاتەدا سروشتی و دەستی کارەدا هاوڵاتی نەک ژیانێکی خۆشگوزەرانی نیە بەڕێژەی یەک لەسەر سەدی ژیانی شاهەنشاهی باب و بەرەبابەکانی حیزب و نەوەی بنەماڵەکان بەڵکو پێداویستیە زۆر سادەکانی ژیانیشی پێ ڕەوا نابینرێت کەچی هەر ئەو هاوڵاتیە داماوە پێشبڕکێیەتی لەسەر وەسف و گرتنی سێڵفی لەگەڵ دەسەڵاتداراندا ، گریان و واوەیلایەتی بۆ تەوقەیەک لەگەڵیاندا !

بەزەییم بە حاڵی ئەو میللەتەدا دێتەوە مەلاکانی مێزەری دینیان لەسەر کردووە ، کەچی لەبەردەم نەخوێنەوارێکی حیزب دا دانیشتوون و تەڵقینیان ئەدا ، ئەوانیش بە ڕازێنراوەیی و لەژێر ناوی گەیاندنی دینەوە ئەجێندای ژەهراوی حیزبەکانیان ئەگوازنەوە بۆ گوێ و مێشک و دڵی گوێگرەکانیان .

پاش چەندین ساڵ ژیانی وانەبێژی و بە چەند سەدهەزارێکی ڕەمزی ئەکرێن بەگرێبەست کە هیچ جیاوازیەکی بنەڕەتی نیە لەگەڵ وانەبێژی لەڕووی ئیمتیازات و مووچەوە کەچی نوێنەرەکانی ئەوان بەردەوام بەشان و باڵی سەرۆکی حکومەت و وەزیری پەروەردەکەیاندا هەڵدەدەن و چەپکەگوڵیان بۆ ئەبەن و شیعر و شانامەیان بەسەردا ئەڵێن لەجیاتی موحاسەبەکردنیان و دادگایی کردنیان لەسەر بەهەدەردانی چەندین ساڵەی ژیانیان کە قەرەبوو ناکرێتەوە !

بەزەییم بە عەقڵی هەموو ئەو دەنگدەرانەدا دێتەوە کە پاش چەندین ساڵ لەو حوکمە چەوسێنەر و برسیکەرە کەچی هەر بەدەهۆڵی درۆ سواوەکانی کەسانی حیزبەکان هەڵئەپەڕن !

بەزەییم بە پەڕلەمانێک دا دێتەوە کە هێندە بێ ئەرزش کراوە ئەرکە ڕاستەقینەکەی خۆی لە یاسادانان و بەدواداچوونەوە بووە بە گاڵتەجاڕی تیکتکۆچی و بەندبێژ و سەربەخۆی خەتمائیلی حیزبی و ناپسپۆڕ و کەسانی نەخوێنەوار .

بەزەییم بە حاڵی میللەتێکدا دێتەوە کە شەڕی مان و نەمانی و سەرتاسەری لەگەڵ گۆڕانکاری و خۆڕێکخستەوە وخود هۆشیارکردنەوە دەستپێکردووە ، نازانم بۆ دانووی لەگەڵ خود ئازادکردن دا ناکوڵێ ؟!

جێگەی بەزەییە میللەتێک کەسانێکیان کردووە بە سەروەر و سەرکردە و براگەوەری خۆی کە هیچ کاریزمایەتیەکیان تێدانیە جگە لەوەی کە چەوسێنەر و فرۆشیارێکی باشی خاک و خزمەتکارێکی کارامەی وڵاتانی بەرژەوەندخوازن .

بەڕاستی جێگەی بەزەییە میللەتێک هیچ خزمەتگوزاریەکی نیە کەلەئاستی مرۆڤبوونیاندا بێت ، لەملاوە بەهەواڵی دوومانگ سێ مانگ جارێک مووچەوە مەشغوڵ کراوە کاتێکیش یەک مووچە وەرئەگرێت هەزار سوپاسی دەسەڵاتداران ئەکەن و هیچیان لە دڵدا نامێنێت ! ئەوە ساویلکەییە !

بەزەییم بەمیللەتێکدا دێتەوە ئەو هێزە کۆنەپارێز و بەسەرچوو و شمولیانە وەک پارێزەری شکۆی تاک و سەرچاوەی ڕزقیان ئەبینن و ئیرادەیەکی جددیان نیە بیانکەن بە ڕابووردوو.

هەزاران جار و بەهەزاران هۆکار ، بەزەییم بەو میللەتە دا دێتەوە.