- تۆ بڵێی گۆڕان ، تابوتی خۆی و ووشەی ئۆپۆزسیۆن ، بزمارڕێژ کردبێت؟

- تۆ بڵێی بزوتنەوەی گۆڕان پاداشتی نۆبڵ بۆ جنێوی تازە وەربگرێت؟

- تۆبڵێی بزوتنەوەی گۆڕانیش (کۆپی ڕایت)ی بەخێزانکردنی حیزبی،  وەرگرتبێت؟

١ -  بزوتنەوەی گۆڕان، ھیوای خەڵکی کپ کرد و بڕوای خەڵکی بەسیاسەت لەق کرد!

٢ - پێش دروست بونی گۆڕان ، پارە دەبارێ (وەک دەڵێن کاتی پارە بارینەکە) ، بە پەیمانی درۆی بزوتنەوەی گۆڕان کە موچە بۆ کابانی ماڵ دابین دەکەن! کەچی موچەی ھاوسەرانی کابانی ماڵیشیان بڕی!  یان موچەیان کرد بە نیوەموچە !

٣ -  بزوتنەوەی گۆڕان ، چاوی خەڵکی کردەوە کەڕەخنە لەدەستەڵات بگرن !! بەڵام نوێنەرانی گۆڕان ، ڕەخنەیان کردە شەڕە بوتڵی ئاو  لە ناو پەرلەماندا و شکۆی پەرلەمانیشیان شکاند ! وە لەجیاتی مرۆڤی سیاسی و خاوەن بڕوانامە، بنێرن بۆ پەرلەمان ، کەچی لوقمەقازی فرۆشیان ناردە پەرلەمان!

٤ - کاتێک سەرۆکی پەرلەمانی ھەر ووڵاتێک ،دەچێت بۆ ووڵاتێکی بیانی ، ئەوا بەرگری لەماف و بەرژەوەندی و ئابوری ووڵاتەکەی دەکات ، کەچی دکتۆر یوسف (سەرۆکی پەرلەمان پێشوو) و عەلی حمە ساڵح (ئەندام پەرلەمانی پێشوو گۆڕان) وە سۆران عمر (ئەندام پەرلەمانی یەکگرتوو) ، کە چوون بۆ ئەوروپا ، ڕەخنەی زۆریان لە دەستەڵات دەگرت ! سیاسیەکانی ئەوروپاش پێیان سەیرە کە ئەوان خۆیان لەدەستەڵاتدان و ڕەخنە لە حوکومەت دەگرن ! بەوەش بەھای پەرلەمان و  سیاسەت و دیبلۆماسی کوردیان ھێنایە خوارەوە !

٥ - من لەو بڕوایەدام  ، ئەگەر پاداشتی نۆبڵ بۆ جنێوی تازە ھەبوایە !، ئەوا زۆربەی ئەندامانی گۆڕان ئەو پاداشتی داھێنانی جنێوە تازەیەیان ، وەردەگرت چونکە زۆر زۆر لێھاتوون بۆ دۆزینەوە جنێوی تازە و سوکردنی سیاسیەکانی تر یان دەستەڵات لە تەلەفزیۆنەکانیان یا ڕاگەیاندنەکانیانەوە !

٦ - کە گۆڕان ڕەخنە لە دەستەڵات دەگرت و باسی سەروەت و سامانی خێزانەکانی دەستەڵاتیان دەکرد و بەخێڵەکیانی دەستەڵاتیان ناودەبرد  و باسی داگیرکردنی گرد و زەویان دەکرد ! کەچی گۆڕان خۆی کۆپی ئەو ڕەفتارانەی ئەوانی دوبارە کردەوە و گۆڕان خۆشی بوو بە بەشێک لەو سیاسەتە چەوتەی ئەوان بەچەوت و خێڵەکی و خێزانی ، ناویان دەبرد !

٧ - گۆڕان ھەوڵی دا،  دەرگا بکاتەوە بۆ کۆمەڵە گەنجێک ، بۆ ناو پلە بەرزەکانی سیاسەت، بەڵام بە بێ پەروەردەکردنیان بۆ بەرژەوەندی نەتەوەیی و ھەستی نەتەوایەتی (وەک تێگەیشتن لە مانای سیاسەت !  وە چۆنیەتی پیادەکردنی سیاسەت لە کاتە باش و خراپەکاندا ! وە چۆنیەتی مامەڵەکردن لەگەڵ کێشە نیشتمانی و بەرژەوەندی بەرزی  نەتەوەیی ! جیاکردنەوەی لە ھەڵوێستی کەسی و حیزبی بەرتەسک) ، ئەوەش وایکرد کە گەنجەکان خۆیان و ھەڵوێستیان ، بدۆڕێنن و ھەھدێک جار بۆ جیابونەوە ، وە ھەندێک لە ئەندامانیان چونە باوەشی حیزبەکانی ترەوە! بەوەش بۆچونی خۆیان و دروشمە بریقەدارەکانی ، گۆڕانیشیان دۆڕاند !

٨ - تۆبڵێی ئەم مێژووەی گۆڕانیش وەک ئەو ھەموو مێژووە پڕ ئازارەی کوردستان ! پارتەکانی تر و ئۆپۆزیسیۆنی تازە و کۆن ، نەتوانن وانەی سیاسی لێ وەربگرن ؟ وە تۆ بڵێی ئێستا کاتی ئەوە ھاتبێت ، کە سیاسەتی پەروەردە و سیاسەتی و نەتەوەیی و پەروەردەی حیزبی بگۆڕدرێت؟؟  ھەتا پلانێکی گشتگر بۆ پەروەردە دابڕێژرێت کە ھاونیشتمانان ،لە بەھاو نرخی کاری حیزب و ئۆپۆزسیۆن و بەرژەوەندی بەرزی نەتەوەیی و نیشتمانی تێبگەن ؟ وە خەڵکیش نرخ و پاداشت  بۆ ھەڵوێستی نیشتمانی دابنێن؟