* ئەی ئەو پێکەوەکارکردنە، بۆ بەرژەوەندی نەتەوەیی چییە؟

* ئەی بۆ بەرژەوەندی ئابوری و بۆ ئاسودەیی خەڵکی و پێشکەوتنی کوردستان چییە؟

+ پێکەوە کارکردنی لایەنە کوردییەکان بۆ پێشکەوتن و سەقامگیری کوردستان لە چەند بوارێکدا گرنگییەکی زۆری  لە ڕووی سیاسی و ئابووری و کۆمەڵایەتییەوە هەیە! ئەمەش ھەندێک لەو گۆشانەیە کە دەتوانن بەرژەوەندی نەتەوەیی کورد و خۆشگوزەرانی خەڵکی بەرەوپێش ببەن ! بەڵام ئەگەر لایەنەکان بتوانن ( یان بیانەوێت)  پێکەوە کاربکەن!

١ - بەرژەوەندی نەتەوەیی و سەقامگیری سیاسی :

+ یەکگرتوویی لە بەرامبەر هەڕەشە دەرەکییەکان: کوردستان دەکەوێتە ناوچەیەکی ئاڵۆزی جیۆپۆلەتیکی (عێراق، ئێران، تورکیا، سوریا)، کە گوشار و دەستوەردانی دەرەکی دەتوانێت ڕێگری لە پێشکەوتن بکات (نەک ھەر پێشکەوتن ، بەڵکو ھەندێک جاریش دراوسێکان بە درۆن و موشەک ، کوردستانیش وێرانی دەکەن )!  ئەگەر حزبە کوردییەکان بە دابەشبوون بمێننەوە ! ئەوا هێزە دەرەکییەکان بە ئاسانی دەتوانن ئەو دابەشبوونە ناوخۆییەکان بقۆزنەوە! بەڵام ئەگەر حیزبەکان پێکەوە کاربکەن،  ئەوا کورد( وەک نەتەوە) دەتوانێت بەرامبەر بە زلهێزە ناوچەییەکان بەهێزتر بنێت و دەنگێکی کاریگەرترشی هەبێت لەسەر ئاستی نێودەوڵەتیدا !.

+ بەهێزتر کردنی فیدراڵی و سەروەری : پێکەوەکارکردنی حیزبەکان، دەتوانن ببنە هۆی ستراتیژێکی هاوبەش بۆ زامنکردنی فیدڕاڵیەکی ڕاستەقینە و مافێکی زیاتر بۆ کورد لە چوارچێوەی عێراقدا !.  ئەمەش پێگەی سیاسی کوردستان بەهێز دەکات و یارمەتیدەرەیش دەبێت بۆ ئاسانکردن و  بەدواداچوونی سەروەری زیاتر یان مافی زیاتر یان پێگەی ڕاستەقینەی فیدراڵی یان کۆنفیدراڵی!

+ دوورکەوتنەوە لە ململانێ ناوخۆییەکان : لە ڕووی مێژووییەوە ململانێ ناوخۆییەکانی نێوان لایەنە کوردییەکان ، هەرێمەکەی زۆر لاواز کردووە ! کارکردن بۆ یەکڕیزی حیزبەکان ، دەتوانێت سەقامگیری سیاسی بەرەوپێش ببات، کە ئەمەش بۆ کارکردنی هەرێمێکی فیدراڵ زۆر پێویستە!

+ سیاسەتی ئابووری هاوبەش : پلانێکی سیاسی یەکگرتوو ، دەتوانێت یارمەتیدەر بێت لە دامەزراندنی سیاسەتی ئابووری سەقامگیر و کاریگەر ! لەگەڵ گرنگیدان بە پێشخستنی وەبەرهێنان و هاندانی گەشەی کەرتی تایبەت و باشترکردنی ژێرخانی ئابوری! چونکە باری سیاسی سەقامگیر ، ھانی سەرمایەدارانی ناوخۆ و نێودەوڵەتی دەدات و ڕایاندەکێشێت بۆ ناو ھەرێم! ئەمەش گەشەسەندنی ئابوری و هەرێمیش خێراتر دەکات.!

+ بەکارهێنانی زیرەکانەی سامانە سروشتیەکان : کوردستان خاوەنی سامانی سروشتی بەرچاوە، وەکو نەوت و غاز ! ئەگەر حیزبە کوردییەکان پێکەوە کار بکەن، دەتوانن سیاسەتێکی ڕوون و دادپەروەرانە دابڕێژن ،لەسەر دابەشکردنی داهاتی ئەو سەرچاوە سروشتیانە! ئەوەش زیاتر سەقامگیری ئابووری بەرەوپێش دەبات! 

+ گەشەپێدانی ژێرخانی هاوبەش : لە ڕێگەی پلانێکی ھاوبەشەوە، دەتوانرێت پڕۆژە ژێرخانییە گەورەکانی وەک ڕێگاوبان و قوتابخانە (پەروەردە) و نەخۆشخانە و دابینکردنی ووزەش،  بە شێوەیەکی باشترو کاراتر بەدیبهێنرێت! ئەمەش نەک هەر کوالیتی ژیانی خەڵکی کوردستان، باشتر دەکات ! بەڵکو گەشەی ئابووریش خێراتر دەکات!

    + یەکگرتوویی کۆمەڵایەتی و ئاشتی :  پێکەوەکارکردنی لایەنە کوردییەکان ، دەتوانێت بەشداربێت لە کەمکردنەوەی گرژی و جەمسەرگیری لەناو کۆمەڵگادا ! ئەویش بە جەختکردنەوە لەسەر ئامانجە هاوبەشەکان ! نەک بەرژەوەندی حزبی یان تاکە کەسی یان بنەماڵەیی ! ئەو پێکەوەکاردنەش دەتوانێت سەقامگیری کۆمەڵایەتی و دادپەروەری بەدەست بهێنرێت!  ئەمەش دەبێتە ھۆی ئاسودەیی و ھێمنی و خۆشگوزەرانی هاوڵاتیان !.

+ باشترکردنی خزمەتگوزارییە گشتیەکان :  بە پەرەپێدانی سیاسەتی هاوبەش، دەتوانرێت خزمەتگوزارییە گشتییە سەرەکییەکانی وەک پەروەردە و تەندروستی و ئاسایشی کۆمەڵایەتی پەرەپێبدرێت و بە شێوەیەکی یەکگرتووتر پێشکەش بکرێت!.  ئەمەش ڕاستەوخۆ سوودی بۆ ئاستی ژیانی ھاووڵاتیان دەبێت!؛

+ بوژاندنەوەی و ئاوەدانکردنەوە دوای ململانێ  : زۆرێک لە ناوچە کوردستانییەکان بەدەست ساڵانێک لە ململانێکانەوە دەناڵێنن ! ئەمەش پێویستی بە ئاوەدانکردنەوە و دروستکردووەیە !  کاتێک لایەنەکان دەیانەوێت پێکەوەکاربکەن ! دەتوانن سەرنجیان لەسەر چاککردنەوەی زیانەکان زیاتر بکەن و دابینکردنی فریاگوزاری بۆ خەڵکی ھەژار و بنیاتنانی داهاتوویەکی ڕوون و سەقامگیر بەپلاتێکی تۆکمەی گشتگر و یەکگرتوو ، بۆ ئێستا و بۆ نەوەکانی داهاتووش !

    + دیپلۆماسی نێودەوڵەتی و دانپێدانان : ئەگەر لایەنەکان پێکەوەکار بکەن،  ئەوابەرەیەکی یەکگرتوو لە نێوان لایەنە کوردییەکاندا دروست دەبێت کە پێگەی کوردستان لەسەر شانۆی نێودەوڵەتی بەهێزتر دەکات !.  ئەمەش دەتوانێت یارمەتیدەر بێت بۆ بەدەستهێنان و دانپێدانان و پشتیوانییەکی فراوانتر بۆ دۆزی کورد، جا فیدراڵی یان کۆنفیدراڵی یان تەنانەت سەربەخۆیییش بێت.

    + پێشکەوتنی زانستی و تەکنەلۆجی : ئەگەر لایەنەکان پێکەوەکاربکەن ! ئەوا پلانێکی ھاوبەشیان دەبێت ! چونکە پێکەوەکاردن و سەقامگیری سیاسی دەبێتە ھۆی وەبەرهێنان لە بواری پەروەردە و تەکنەلۆجیادا ، وە بەرەوپێشی دەبات ! کە ئەم پێشکەوتنەش بۆ بنیاتنانەوە و بیرفراوانی و بەزانستکردنی کۆمەڵگە و پێشکەوتنی کوردستان زۆر پێویستە! وە ئەم پێشکەوتنەش بەشدارە لە پەرەپێدانی ئابوورییەکی زانستی کە بتوانێت لەگەڵ خێرایی تەکنۆلۆجیای ئەمڕۆی جیھاندا بگونجێت و لەھەمان کاتیشدا درێژخایەن (واتە کاتی نەبێت) و بەردەوام بێت ھەتا ھەرێم بەهێز تر بکات !

+ بەڵام ئاخ و ھەزار ئاخ ،  کە عەقڵی سیاسی بۆ پێکەوەکارکردن نەبوو !، ئەوا پلانی ھاوبەشیش نییە ، کە پلانیش نەبوو !، ئەوا پەروەردە  تێک دەچێت ، کەپەروەردەش تێک چوو ! ئەوا کۆمەڵگە وێران دەبێت ! چونکە سەقامگیری سیاسی و گەشەی ئابووری و خۆشگوزەرانی و ئازادی تاکەکان و بەھای کۆمەڵایەتی و کەلتوری جوانی کوردی و ھەستی نیشتمانی و نەتەوایەتیش، تێک دەچێن ! ئەو کاتە ، ھەر کەس بۆخۆی و بەئارەزووی خۆی شتەکان دەشێوێنێت و بەپێی بەرژەوەندی تەسکی خۆیان شی دەکاتەوە و تەنھا ئاگایان لە گیرفانیان دەبێت !

+  ئەگەر ھەر کەسیش بۆخۆی کاری کرد ، ئەوا  سیاسەتمەند ، دەبێتە (سیاسەتباز) ، وە مەلای بەناو  نیشتمانپەروەریش ، دەبێتە (دینباز) ! وە ھەریەکەشیان تەنھا لەیەک کونی بچوکی بەرژەوەندیەکانی خۆیانەوە،  دنیا و ژینگە وکۆمەڵگە دەبینن !

+ ئەوکاتەش پەیوەندیە دبلۆماسیەکانیش بەھۆی ئەو بێ عەقڵی سیاسیەوە ، ژەنگ دەکات و لەناو دەچێت ! وە سەرکردەکانی جیھانش قێزیان لە بێ عەقڵی سیاسی دەستەڵاتداران دەبێتەوە  ! ئەنجامەکەشی ئەوەیە، ھەم کۆمەڵانی خەڵکی کوردوستان و ھەم سۆزی جیھانیش لە دەست دەدەن و کوردستانیش دەبێتە ووێرانە !