لیستێک بە مێژووی جاش و باشی حزبە کوردییەکانی باشوری کوردستان:-

١/ ساڵی(١٩٦٣)مەلا مستەفا بە هێزێکەوە و بە ناو شاری سلێمانی، ژێر دەستی حکومەتی عێراقدا، ئەچێتە سەر باڵی مەکتەبی سیاسی پارتی لە ماوەت، تا قەتڵ و عامیان بکات، بە هۆی ناکۆکی حزبییەوە. بەلای مەکتەبی سیاسییەوە، مەلا مستەفا خائین و باڵی م.سیاسیش خیایەنەت لێکراوبوون.

٢/ ساڵی (١٩٦٦) باڵی جەلالی و باڵی مەلایی، بە جیا لە مفاوەزات ئەبن لە گەڵ ڕژێمدا، باڵی جەلالی ئەگەنە لێکتێگەیشتن و لە شارەکاندا ئەمێننەوە و باڵی مەلایی ڕێکناکەون و ئەچنەوە شاخەکان. لێرەدا باڵی مەلایی، جەلالییەکان بە خائین ئەبینن و خۆشیان بە ستەم لێکراو.

٣/ ساڵی (١٩٧٨)، قیادەی موەقەتەی پارتی، پەلاماریی هێزەکانی یەکێتی، لە هەکاری دەدن و بە کوشتنی سەددان کەسیان، کۆتایی دێت، بەلای یەکێتییەوە، ئەمە خیانەتێکی گەورەی قیادە موەقەتە و هەڵگیرسانی شەڕی براکان بوو بۆ جاری دووەم.

٤/ساڵی (١٩٧٩) لە سەرووبەندی شۆڕشی گەلانی ئێران، قیادە موەقەتە هاوشانی ئێران، لە هێزە کوردییەکانی ڕۆژهەڵاتی کوردستان دەدەن و شارەکانیان پێ چۆڵ دەکەن، لەم کاتەدا یەکێتی لە بەرەی ئەو حزبانە دژی ئێران شەڕ دەکات، بەلای حزبەکانی ڕۆژهەڵات و یەکێتییەوە ئەمەی قیادە خیانەت بوو.

٥/ لە ساڵی (١٩٩٢) تا (ئەمڕۆ) تیرۆر کردن و هێزی ئێران و تورک هێنانە سەر و ڕاوەدوونانی کادر و پێشمەرگەی حزبەکانی ڕۆژهەڵات و گەرێلای پەکەکە و حزبەکانی ڕۆژئاوا و لێدانی پەنابەری سڤیلی ناو کەمپەکانیان بەردەوامە. هەموو ئەم کردانە لە لایەنی ئێران و تورکیاوە، لە سنوری یەکێتی و پارتی ئەنجام دراون و دەدرێن. به هاوکاری و بێ هاوکاری یەکێتی و پارتی. هەمووان بە خیانەتی یەکێتی و پارتی پێکەوە یان بە جودای ئەبینن. 

٦/ بە درێژایی (١٩٧٦-١٩٩١) و (١٩٩١ - ٢٠٠٣)، چەندین شەڕی خوێناوی و ناکۆکی قووڵ و دەست بادانی نامرۆڤانە و بۆسەی نامەردانەی نێوان حزبەکانی کوردستان، بەهاوکاری و بێ هاوکاری عێراق و ئێران و تورکیا، بە ورد و درشتی شەڕەکانیانەوە، لە نێوان هەر یەک لە (پارتی، یەکێتی، شیوعی، سۆسیالیست، ئاڵای شۆڕش، پاسۆک، بزوتنەوەی  ئیسلامی، پەکەکە، ئەنسار، کۆمەڵ، حزب اللە، …)، لە چەندین فۆرم و شێوەدا و بە جەولەی شەڕی براکوژی نەوەدەکانیشەوە. لە هەموو ئەمانەدا، هەمووان یەکتریان دابەشکرد لە نێوان شەیتان و ڕەحماندا یاخود جاش و باشدا.

٨// لە (٣١ی ئابی ١٩٩٦)ەوە تا (١٦ی ئۆکتۆبەری ٢٠١٧)، بە بەردەوامی خیانەت و براکوژی و دەست تێکەڵکردن و هاریکاری دوژمن و ناحەز و تێکەڵ کردنی کارتەکان و قڵپ کردنەەی مێزی یارییە سیاسی وسەربازییەکان بە سەری یەکتریدا، کراوە. کاراکتەری سەرەکی نێوان جاش و باشی ئەم ساڵانە یەکێتی و پارتی بوون. پارتی لە جەولەی شەڕی ناوخۆی براکان بە بیانووی هاتنی ئیران بۆ یارمەتی یەکێتی، دەبابەکانی بەعسی بانگێهشتی هەولێر کرد. یەکێتی بە خیانەتی مەزن و پەڵەی ڕەش ئەمەی ناوبرد. بەڵام پارتی، ئەمەی بە بەرگری پیرۆز، لە قەڵەم دا و لە کاتی نووسینی ئەم وتارەدا پارتی دوای چەندین ساڵ بێ دەنگی لە یادکردنەوەی ئەمساڵ بە ئاهەنگ و سەرچۆپی ئەو یادەی پیرۆز کرد. ڕیفراندۆمەکەی پارتیش بە هاوکاری بەشێک لە یەکێتی لە لایەن زۆرێک و بەشەکەی دیکەی یەکێتی بە پیلان و دەسیسە و موغامەرەی سیاسی دانرا، بەڵام  لای پارتی، کۆتاییەکەی، کە بە لە دەست دانی زۆرترین خاکی کوردستان بوو، بە خیانەتی ئەو بەشەی یەکێتی لە قەڵەم دا.

٨/لە (١٩٨٨)دا، هەڵەبجەییەکان بەر کیمیاوی دەدرێن و لە (٢٠١٤)شدا، ئێزیدییەکان بۆ داعش جێدەهێڵدرێن. جارێک تۆمەت یەخەی یەکێتی و جارکیش یەخەی پارتی دەگرێت. لە نێوان بەرگری و ڕێگەگرتن لە هەڵەبەجەییەکان لە هەڵاتن لە کیمیاوی و جێهێشتنی ئیزیدیان بۆ داعشی دڕندە، یەکێتی و پارتی لە نێوان تۆمەتبارکردن و بێ تاوانی ناڕێک  و ناکۆکن. 

٩/ لە پاش کارەساتی بەجێهێشتنی ئیزیدیان و جینۆسایدکردنیان لە لایەن داعشەو و لە ١٦ی ئۆکتۆبەردا لە ئەنجامی یارییەکی باش بۆ ڕانەهێنراو، یاری بە چارەنووسی کەرکوک و ناوچە دابڕێنراوەکان دەکرێ و شاری کەرکووک ڕادەستی حەشدی شەعبی و سوپای عێراق ئەکرێت. لەم نێوەندەدا پەنجەی تۆمەت بۆ یەکێتی درێژ ئەکرێ. هەر لەم مێژووەدا باسی مامەڵەی بازرگانی نەوت و ئاڵوگۆڕی ئابوری سەرانی سەر بە پارتی و یەکێتیش دەکرێ لە گەڵ داعشدا. 

 ١٠/ ئێستاش لە هاوکاری و هاریکارییەکی کەم وێنەدا دەستی جەندرمەی تورک گیراوە و بە قوڵایی دەیان کیلۆمەتر سەنگەر لە نێو خاکی هەرێم دادەکووتن بۆ لێدانی پەکەکە. پارتی لەم مەسەلەیەدا تاوانباری سەرەکییە.

١١/ لە دوا ململانێی هەڵبژاردندا لە کەرکوک و موسڵ و ناوچە دابڕێنراوەکاندا پارتی و یەکێتی نەک وەکو دوو لایەنی هاوچارەنووس و هاوزمان و هاوخەبات دەرنەکەوتن، بەڵکو وەکو دوو لایەنی ناکۆک و دژمن بە یەکتری و زیاتر لە ڕکابەری عەرەب و تورکمان بۆ کورد، وەکو رکابەری یەکتری دەرکەوتن.

١٢/ ئەمڕۆ لە هەرێم بە ئاگاهیی و بە بێ ئاگاهیی، هێزو کەسایەتی و ڕەوتە ئیسلامی و ئیخوانی و وەهابییەکان، لە هەوڵێکی چڕ و پڕی کاڵکردنەوەی هەستی کوردبوون و کوردستانی بووندان. لە هەوڵی پانکردنەوە و کوژاندنەوەی هەموو سیمایەکی کولتوری و مێژوویی و فەرەهەنگی کوردی دان لە کوردستان. ئەم هەوڵانە بۆن و تامی خیانەتێکی کولتوری و هزری گەورە دەدەن. خیانەتی لەم جۆرە ئەتوانن ئەرکی دوژمنان بۆ لەناوبردنی کورد بە دەیان ساڵ نزیک بخەنەوە. 

لە دوای ئەم سەردە مێژووییە خێرایەوە، ئەتوانین بگەینە چەند سەرنجێک:-

-ئەمانەی لای سەرەوە، هەموو ڕووداوەکانی جاشی و باشی ئەم هێزانە نین لە ساڵانی خەباتیاندا. چونکە ڕووداوگەلی گەلێ زیاتریش هەن، کە یان بە نهێنی ماونەتەوە، یاخود باسیان لێوە نەکراوە بە وردی.

-دەرخەر و نووسەری، ئەم پەڕانەی مێژوو، خودی کتێبەکانی بیرەوەری و گێڕانەوەکانی سەرکردە و پێشمەرگە و کاراکتەرەکانی ناو ڕووداوەکانن، بۆیە لە زۆربەی حاڵەتەکاندا، نووسەر بەرگری لە خۆی کردووەو بیانووی هێناوەتەوە و لایەندار بووە.

- ئەگەرچی کەسی بێلایەن زۆربەی ئەم ڕووداوانەی نەنووسیوە، بەڵام بە مەبەست و بێ مەبەست، کەرەستەیەکی خاویان، خستووینەتە بەردەست، تا لە مێژووی خیانەت لەم دەڤەرە بکۆڵینەوە.

-بە ئەندازەی ئەو فیشەکانەی، بە دوژمنەوە نراون و ئەو خوێنەی لە ڕێگەی بەرگری و کوردایەتی ڕژاون، ئەم حزبانە فیشەکی جاشێتییان ناوە بە یەکەوە و خوێنی ڕۆڵەکانی کوردیان ڕشتووە، بە قازانجی دوژمن. ئێستاش بەردەوامن.

-تاوانبار تا سزا نەدرێ، تاوانی زیاتر ئەکات، هیچ حزبێک و هیچ سەرکردەیەک لە سەر خیانەت و جاشێتی سزا نەدراوە، چ سزای میللی لە بەجێ هێشتن و دەنگ نەدان پێی یاخود سزای یاسایی لە ڕێگەی دادگاوە. بگرە لە هەر جاشێتی کردن و خیانەتێک حزب، بە پاداشت و شاباش کردنی جەماوەر و دوژمن لێی دەرچوون. هەر بۆیە میللەتی وا، ئەبێت هەمیشە چاوەڕوانی خیانەت و جاشێتی بێت بە تامی کوردایەتی.

-زۆربەی هەرە زۆری جاشێتی و خیانەتەکان، ئەگەر لە ساڵانی یەکەمی دوای ڕوودانیان بە شاراوەیی هێڵدرابنەوە و ژێر لێوخرا بن، ئەوا دوای چەند ساڵێک لە ڕوودانی بەرگی شانازیان لە بەر کردووە و کردوویانە بە ڕۆژی مەزن و پیرۆزی حزب، لە ڕۆژمێری یادەکاندا، ٣١ ئاب بە نموونە.

ئەم حاڵەتەش ئەگەڕێتەوە هەم بۆ کاڵفامی گەڵ و لاوازی زاکیرە و بە دوکومێنت نەکردنی ڕووداوەکان وەکو خۆیان بۆ نەوەی دوای خۆیان.

ماوەتەوە بڵێم گەلی کورد هێندەی سەربەخۆیی کوردستان پێویستی بە دەزگایەکە، تا پێناسەی خیانەت و خائینی بۆ بکاتەوە و ڕووداوەانی مێژووی بۆ ساغ بکاتەوە و جاشی لە باشی جیابکاتەوە، چونکە ناکرێ ڕەوڕەوەی مێژوو، حزب و سەرکردەیەک هەڵیسووڕێنێ، ئەوانە پاشەڵی خەباتیان بوو بێت.