پایەکانی نیشتمانیبوونیان گۆج کردووە، واتای وشە بەنرخەکان بێ نرخکراون، دڵسۆزیان خستۆتە خانەی ناپاکی و ناپاکیش پلەی شانازیبوونی پێ بەخشراوە.

ئەمانەی باسمانکرد مشتێکیش نییە لە خەرواری قەباحەتەکانی پارتی نادیموکراتی کوردستان.

ئاخر دەبابەی کام وڵاتی داگیرکەر ماوە سەرانی پارتی بە ئاڵای زەرد و ڕەشی خومەینییەوە، بە ئاڵای زەردی خۆیان و سووری ئەتاتورکەوە و بە ئاڵا زەردەکەیان و ئاڵای سەردەمی ڕژێمی سەدامەوە، بە هاوبەشی کوردیان نەکوشتبێت!

میکرۆبی ئەو پەتایەی بارزانی باوک بڵاویکردەوە، نەک هەر تەنیا پارتی، تەنانەت ئەو حزبانەشی ڤایرۆساوی کرد کە لە نێو هەناوی پارتیدا ئیجادبوون و جیابوونەوە.

لە ۳۳ ساڵی دەسەڵاتە کەڵەگاییەکەیاندا، کار لەسەر داپلۆسین و پەرچقاندنی خەڵک دەکەن، هەوڵدەدەن کوردایەتی و ئازادی و وڵاتپارێزی بخەسێنن، بوون بە تەواوکەر و چاوساغی سیاسەتی لەناوبردنی بەها ئەخلاقی و نەتەوەییەکان کە داگیرکەرانی کوردستان بە وردی بەرنامەیان بۆ داڕشتووە.

وڵاتیان تاڵانکرد و خاکی کوردستان دەفرۆشن، کەچی هێشتا وەک منەتی کوردایەتی بە خەڵکی دەناسێنن.

ئەو هەویرە ئاوی زۆر کێشا، دڵنیابن ئیدی ئەو ڕۆژە نزیک بۆتەوە بکەونە بەر پەلاماری تووڕەی خۆڕسکانەی خەڵک.

هەموو دیکتاتۆر و زالمەکان وایان دەزانی تا سەر دەمێننەوە، بەڵام دەیان نموونەی لەو دیکتاتۆرانەمان بینی کە چۆن تەخت و تاراجیان کەوتە ژێر پێی خەڵک و خرانە زبڵدانی مێژووەوە.

وا دیسان پرۆسەی هەڵبژاردن نزیک دەبێتەوە، پارتی و یەکێتی لەڕاگەیاندن و لێدوانی سەرانیان یەکتر تاوانبار دەکەن، لە ڕاستیدا هەردوو بنەماڵە و حزب تەنیا لەوەیاندا ڕاستگۆن کە پاشەڵی تاوانەکانی یەکتر هەڵدەدەنەوە، لە خیانەت، دزی، گەندەڵی و خۆفرۆشیدا، دەبێ دانبەوەشدا بنێین کە ئەوان هەردوو لایان لەم بابەتەدا تۆمەت بۆ یەکتر هەڵنابەستن، بەڵکو ڕاستیەکانی یەکتر ئاشکرا دەکەن کە شاراوەش نینە.