زۆرینەی ئەو بە ناو ڕوناکبیرانەی (عەرەب) کە باسی ئەو کوشتارانەی سەرکردەیەتییەکانی دەستە و تاقمە عەرەبییەکان دەکەن، دەڵێن  نەتەنیاهۆ(لە ئیسرائیل بە بیبی ناوزەدی دەکەن) بۆیە بەردەوامە لە درێژەدان بەکوشتنی سەرکردەی تاقم و دەستەکاندا، چوونکە دەیەوێ لە پلەکەیدا وەک سەرۆک وەزیران بمێنێتەوە و دەزانێ ئەگەر شەڕ بوەستێنێ، دادگایی دەکرێت!!!.

ـ سەرەک وەزیرانێک، بەگفتی ئەوان، لە دادگایی کردن دەترسێ، ئەم قسەیە چ مانایەک دەدات؟!.

• ئیسرائیل وڵاتێکی دیمۆکراتیی خاوەن دامەزراوەکانە، کە لەوێ هیچ کەس لە بان "یاسا"وە نییە، هەموو کەس بەپێی هەڵەکانی دادگایی دەکرێت.

١-  بەرپرسی ئیسرائیلی، بەرانبەر بەپاراستنی خەڵکەکەی خۆی لێپرسراوە و خیانەتیان پێ ناکات و لە پێناوی مانەوە و 

     گەشەکردنیاندا، تێدەکۆشێ و هەوڵ دەدات.

٢-  پارە و خەزنەی نیشتمانەکەی لەم لاولای دنیا قایم ناکات و خەڵکەکەی خۆی برسی ناکات.

٣-  دەستی دوژمنانی میللەتەکەی ناگرێت بۆ سەر دڵی نەتەوەکەی، بەڵکو لە دوورترین خاڵی جیهانیشدا بێت، دەستیان دەبڕێ و

     تۆڵەیان لێ دەکاتەوە.

٤-  دوای دەیان و سەدان ساڵ خەباتی خوێناوی، بە نەتەوەکەی ناڵێت، بڕۆنەوە بۆ ماڵی خۆتان و ئیتر ئاش بەتاڵ، بەڵکو دانە دانە،

    هەر کەسێک خیانەتی لە میللەتی جوو کردبێ، لێپرسینەوەی توندی لێ دەکات. هتد…و…….هتد…و……..هتد.  

باشە ئێوە و خوداتان، کامەیان شەریفتر، نیشتمانپەروەرانەترە، دڵسۆزتر و شارستانەتیترن؟!.

حافز ئەسەد ٤٠ ساڵ سووریا و سوورییەکانی لێخوڕی، دوای مردنی کەسیان دەست نەکەوت بەشاری کوڕی نەبێ: 

ئەویش ئەوە بیست ساڵە، سووریا و سوورییەکان لێ ئەخوڕێ!!.

بورقێبە پەنجا ساڵ سەرۆک بوو، موبارەک سی ساڵ و مرخیشی لێ خۆشکردبوو کە جەمالی کوڕی بکات بە سەرۆک!!.

کاک عەلی عەبدوڵا ساڵح: چل ساڵ لە یەمەن لێخووڕینی بوو، ئۆردوگان ئەوە بیست ساڵە تورکیا و توورکەکان لێ ئەخوڕێ!!…

ئاخووندەکانی لە مرۆڤ نەچوو، ئەوە چل و دووساڵە، ئێرانی کۆرشی کەبیر و داستانە خەیاڵییەکانی( کە لێیان بۆتە ڕاستی) ڕۆستەم و زۆراب و پێرژییەن...پێرژییەن لێدەخووڕن!!.

پاشا و ئەمیر و گزیر و وەزیر و …لیستەکە بە کەس پڕ نابێتەوە... 

کابرای لەمەڕ خۆمان، سی و چوارساڵە کورد و کوردستان لێدەخوڕێ……

کەس لە مانەی پرسییەوە: 

بۆ وا ئەکەن؟ 

بۆ ئەدزن؟ 

ئەبڕن؟ 

ئەکوژن و 

ئەفرۆشن و 

وێران ئەکەن؟!!!.

حاشا !

دەی ئێوە و خواکەتان، ئەم پیاوە ( ئەم بیبی) یە جوامێرتر و شەریفتر و وڵاتپارێزی خەڵکی خۆیەتی، یا ئەو سپڵی لاورگانەی، کە بە خۆیان و ژن و منداڵەکانیانەوە( بەوەی لەمەڕ خۆشمانەوە)، بەر بوونەتە گیانی خەڵکەکەی خۆیان؟!!.

گیانەکانم: 

خەڵک وڵاتپارێزیی و گەلویستی و نیشتمانپەروەریی و خەمخۆریی دەکات، خۆ بە هەوانتە سوێند بۆ گەلی خۆی ناخوات، کە لە پێناویاندا سەری خۆی پێشکەش دەکات…. ئاوایە ڕێگای ڕزگاریی و بنیاتنانی نیشتمانێک...

ئێمەی کورد، بە هەڵکەوت و بەڕێکەوت، جوامێرێکی گەوهەرینمان تێدا هەڵکەوت 

وتی: ئەگەر من دڵسۆزیی بۆ خۆم بکەم و بۆ گەلەکەمی نەکەم، 

نامەردییە و  

سپڵەیی و 

خیانەتە 

بۆیە ئەوە بیست و حەوت ساڵە، لەپشت هەزار دەرگای قوفڵ کراوەوە، لە چاوی ئێمەیان شاردۆتەوە، 

کەچی هەموو بەیانییەک لە خەو ڕادەبین، 

" بێریتان"ێکی پەروەردەی هزری ئەم "جوامێر"ەمان، 

داستانێکی نوێ 

دەخوڵقێنێ….

ئەگەر بە خوێنی خوێشی بێ..

چکێ "ئازادیی" بەرهەمدێنێ...