ماندێلا پیاوە ناشرینەکەی ئەفەریقا
Saturday, 20/07/2024, 20:25
3025 بینراوە
ساڵی 1992 تورکیای ڕەگەزپەرست بە ئاشکرا نیلسۆن ماندێلای بە "ئەفریقییەکی ناشرین" ناوبرد، ئەویش بەهۆی ئەوەی کە ماندێلا "مەدالیا و خەڵاتی ئەتاتورک"ی ڕەتکردەوە، لەو بارەیەوە ئەو لێدوانەشی دا، کە ئەو خەڵاتە بۆیە رەت دەکاتەوە، بەهۆی زوڵم و ستەمەکانی تورکیا بۆ سەر کورد. لە لێدوانەکەیدا وتی “ئەگەر دەتەوێت زانیاری لەسەر حکومەتی تورکیا بزانیت بۆ ماوەی یەک کاتژمێر ببە بەکورد”.
لەبەرامبەر ئەو لێدوانە، تورکیا هێرشی کردە سەر ماندێلا و بە زمانێکی بازاڕیانە لە رۆژنامەی (حوریەت)ی تورکیا ماندێلای کرد بە پیاوێکی چڵکنی ئەفەریقی ناشرین، وەک بەڵگە لە خوارەوە رۆژنامەکە بخوێنەرەوە.
دوای ئەوە چەند نووسەر و رۆژنامەنووسی ئەفەریقای باشوور لەسەر ئەمە هاتنە دەنگ و کوردیان وەک نەتەوە بە خەڵکی وڵاتەکەی خۆیان ناساند، یەکێک لەوانە باسی کورد دەکات و دەڵێت:
(نزیکەی ١٠٠ ساڵە کورد بووەتە قوربانی تیرۆری دەوڵەتی تورکیا و سیاسەتی جینۆساید و ڕەگەزپەرستانەی زۆرەملێ! . تورکیای رەگەزپەرست سیاسەتی ئاسمیلەکردن پیادە دەکات، (Assimilationist Policies)، واتا ئەو سیاسەتە لەسەر بیرۆکەی ئەوە دامەزراوە، کە هەرچی نەتەوەی ئەو وڵاتە هەیە دەبێ واز لە زمان و داب و نەریت و بەهاکانی خۆیان بهێنن، میراتی کەلتووری خۆیان بەجێبهێڵن، هەموو ببن بە تورک ... هتد.).
ئەمەی سەرەوە بە کورتی پێناسەی دەوڵەتی رەگەزپەرست و سیاسەتی تورکیا و دەزگای میتە بەرامبەر بە کورد، کە زیاتر لە 100 ساڵە بەڕیوە دەبرێت.
پارتیی و بنەماڵەی بارزانی وەکو دۆستی تورک و دوژمنی کورد.
لە سەرئەم باسە زۆر نووسراوە، کە لێرەدا من زۆر لەسەری ناڕۆم، چونکە لای هەمووان ئاشکرایە، کە بنەماڵەی بارزانی خائین و دەزگای پاراستن و پارتیی دیموکراتی کوردستان، بە هەموو شێوەیەک هاریکاری داگیرکاری تورکیا دەکەن، رێگایان بە سوپای تورک داوە، بێتە ناو باشوورەوە، بۆ ئەمەش هەموو دەزگا راگەیاندنەکانی خۆیان، وەک (رووداو)، (کوردستان 24)، (باسنیوز) ... ئەوانی دیکە بێشەرمانە، چالاکیی و هەواڵ و نووسینەکانیان لە خزمەت سیاسەتی تورکیایە. ئەوەتا لە تازەترین نووسیندا (باس نیوز)دەیەوێت ئەوەمان پێ بڵێت، کە ماندێلا کەسایەتییەکی وا نییە کەوا گەورە کراوە، خەبات و هەموو تێکۆشانەکانی دەسڕێتەوە و بێنرخی دەکات. بە وردی نووسینەکە بخوێنەرەوە کە بۆچی لەم کاتەدا باسنیوز ئەم باسە دەوروژێنێت و لەو بارەیەوە دەنووسێت:
(سەیری كتێبەكەی ماندێلا بكەن و بیخوێننەوە، زیاتر لە ٦٠٠ لاپەڕەیە، لە یەك شوێن باسی نەتەوەی كورد ناكات، لە یەك شوێن ناڵێت كورد بە دەستی ئەتاتورك، یان حكوومەتی توركیا زوڵمی لێ كراوە و باس لە هیچ پارچەیەكی كوردستان ناكات، كە عێڕاق و ئێران و توركیا و سووریا، دەیان زوڵم و كۆمەڵكوژییان بەرامبەر بە كورد كردووە.)
لە شوێنێکی دیکەدا دەڵێت بۆ ئەوە خەڵاتەکەی رەتکردۆتەوە: (بۆیە ماندێلا، كاتێك بینیویەتی ئێڤرەن بووەتە خاوەنی ئەو خەڵاتە، كە دكتاتۆرە و توركیاش بێ هەڵوێست بووە بەرامبەر ئەو زوڵمەی لە ماندێلا و خەڵكە رەسەنەكەی باشووری ئەفریقیا كراوە، خەڵاتەكەی رەت كردووەتەوە..... ). لە شوێنێکی دیکەدا دەنووسێت:
باشە رێی تێدەچێت، ماندێلا خەڵاتی ئەتاتورك بەهۆی ئەوەی زوڵمیان لە كورد كردووە، رەت بكاتەوە؟.) واتا ئەمە درۆیە و هەڵویستی لەسەر کورد نەبووە.
ئەوەی نووسینەکە بخوێنێتەوە دەزانێت، کە تەواوی نووسین و داڕشتنەکە لە کوێوە سەرچاوەیان گرتووە، چ عەقڵێکی تورک نووسیوێتی و فەرماندراوە لە باسنیوزدا بەو شێوەیە بڵاوبکرێتەوە، واتە رۆحی نووسینەکە تورکییە و لە رێگای ئەم قەڵمەفرۆش و خائینانەی کوردەوە، هەوڵ دەدرێت، بێچەوانەکەی بڵێت بە درۆش درۆیەک بکاتە راستیی و لە هزری کورددا بچێنرێ، تا لەبەهاکانی مرۆڤبوون دوور بکەوێتەوە و کورد ببێتە کۆیلەیەکی گوێڕایەڵی داگیرکەر.
باسنیوز، سەر بە دەزگای پاراستنە، کە لە نمونەی جەمال عەبدوڵڵا و کۆمەڵێک خۆفرۆش و قەلەمفرۆش تێیدا دەنووسن. هەر ئەمەشە من بڕوام وایە، دەستوپەنجەی قەڵەمی نووسەرێک وەکو پەردەی خاوێنی کیژێک وایە، هەر دێڕێکی چووە باوەشی دەسەڵاتی خائینەکانی کوردەوە، خاوێنی و پاکژیی نامێنێت. ئیتر خوای دەکرد، ئەو نووسەرە لە لوتکەدا دەبوو، یان دەربڕینەکانی لە تۆپکدا دەدرەوشایەوە.
سەرچاوە ئینگلیزییەکە:
باسنیوزی دەزگای پاراستن:
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست