کاتێ نەخوێندەوارترین کەس ئەچێتە سەمونخانە و بچووکترین زوڵمی لێ ئەکرێ ، کە نۆرە بڕییە ، ئەڵێ : کاکە کاتی ئێمەیش بەنرخە ، ئێمەیش ئیش و کارمان هەیە ، ئێمەیش حەزمان لە چاوەڕوانیی نییە ، چ ڕوو قایمییەکە کاتی ئەوانی تر بۆ خۆت بقۆزیتەوە ..

ئەم ڕستانە ، هەموویان ڕستەی تازەن ، یان ڕاستتر بڵێین ڕستەی شۆڕشگێڕین و ..هەموو شۆڕشەکان لەسەر ئەو پڕنسیپانە ڕۆئەنرێن  ، یەکسانی و پاراستنی سنوورەکانی یەکتری و ..ئەرک و ماف بۆ هەمووان .. کەواتە ئەو زوڵمە ڕۆتینییە کە ڕۆژانە لە بەردەم سەمونخانە و نانەواخانەکان ئەیبینین ، ئەبێتە قوتابخانەیەکی سەفەری و وانەکانی شۆڕش و مرۆڤایەتیی فێری مرۆڤەکان ئەکات .. بە جۆرێکی تر بیریان پێ  ئەکاتەوە و ..ئەیانکاتە خاوەنی گوتاری تازە و زاراوەی تازە بۆ نمونە نوسەرێکی شۆڕشگێڕ و یەکسانخوازی وەک مەکسیم گۆرکی و ..سەرکردەیەکی وەک چێ ڤارا ، خەڵکی کرێکار و سادە بوون و زوڵم پەروەردەی کردن  .. هەر بۆیە ئەو کۆمەڵگایانەی کە لە زوڵم و نادادیدا نوقوم بوون ، پێویستیان بە دەستە و تاقم و ڕێکخراوی پەروەردەیی نییە ، چونکە ئەوان بە زوڵم و زۆر  پەروەردە کراون و  هەموو وانەکانی شۆڕش فێر بوون تەنها پێویستیان بە سەرکردەیەکە ،پێشڕەوییان بکات ..

لەبەر ئەوە  لە کۆمەڵگا ئەشکەنجەدراوە ژێرچەپۆکەکاندا ، ئەو دەستە و تاقمانەی کە لە ژێر پەردەی پەروەردە کردنی کۆمەڵگادا خۆیان ناساندووە ، ئەوانە دوکانداری سیاسین و درێژە بە ئەشکەنجەدان و کۆیلەکردنی کۆمەڵگا ئەدەن بەرامبەر بودجە و پارەیەکی زۆر ، کە لێی ئەخۆن و پێی ڕائەبوێرن .

گەورەترین سوکایەتیکردن بە شاعیرێک ئەوەیە پێی بووترێت : ( شیعرێکی خۆتمان بۆ بخوێنەرەوە)  چونکە ئەرکی شاعیر نووسینی شیعرە و ..ئەرکی کۆمەڵگایش خوێندنەوەیەتی ..ڕاست نییە بە سەرتاشێک بڵێیت ، ئادەی سەری خۆتمان بۆ بتاشە ..

کۆمەڵگایەک خۆی تاقەتی خوێندنەوەی کتێبی نەبێ ، کارەساتێکی گەورەیه بێی کتێبی بۆ بخوێنیتەوە .. لەوەیش کارەساتبارتر ئەوەیە بێیت بە کەمانچە و فلوتەوە بۆی بخوێنیتەوە ، بۆ ئەوەی شیعرەکە ئەگەر بۆنساردێکی هەبێ ، بە حوکمی کەمانچە و فلوتەکە ، کەم بێتەوە و جەنابیان قێزیان نەیەتەوە و بۆیان قوت بدرێ ..

لە بیرمە ئەچووین بۆ کۆڕە شیعرییەکانی مەربەد لەبەر نزار قەبانی کە شیعرەکانی ئەخوێندەوە ، وەک گیانەوەرێکی سێرک ئەهاتە بەرچاوم کە خۆی شین و مۆر کردبۆوە تا خەڵکی گوێی لێبگرن و گرنگی پێبدەن و نەمامەکانی شۆڕشیان تیا بڕوێنێ  ، سەرباری ئەوەیش کاتێ به تەنزەوە ڕەخنەی لە دیکتاتۆر و  کۆمەڵگا ئەگرت ،خەڵکەکە پێی پێئەکەنین ، ئەوە گەورەترین ئازاری منی ئەدا .. کاتێ ئەمبینی کوڕ و کچە عاشقەکان ، بۆ ئەوەی بۆ یەکتری دەربخەن کە ڕۆشنبیرن ، لەو کۆڕانەدا  دانیشتبوون بە بێ گرنگیدان ، سەیری ئەو سێرکە ڕۆشنبیرییەیان ئەکرد ، کە لە ڕاستیدا ئەوان هاتبوون لەگەڵ خۆشەویستەکانیاندا دانیشن و بۆنیان بکەن ، نەک گوێبگرن لە شیعرەکانی نزار ..چونکە ئەگەر ئەوان شیعر دۆست بوونایە ، ئەبوو بیانزانیایە چەندین شەو تا بەیانی نزار نەخەوتووە و خەریکی نوسینی شیعرەکانی بووە ، ئێستا بۆچی ئەرکی خوێندنەوەکەیشی ئەخەنە ئەستۆی خۆیەوە ؟؟

کارەساتەکە لەوەدایە ئێستا شاعیران و تەنانەت چیرۆکنووسانیش دێن بەرهەمەکانی خۆیان بە ئاوازی مۆسیقاوە ئەخوێننەوە و بڵاوی ئەکەنەوە بەڵکو ئەوە خوایە خوێنەرە بێتاقەتەکان گوێی لێبگرن ..

بڕوا ناکەم لە هیچ کومەڵگایەکا ئەوەندەی کومەڵگای ئێمە سوکایەتی بە کتێب و نووسەران کرابێ .. لە بەناوبانگترین پێگە ئەدەبییەکانماندا ، باشترین نوسین و نووسەرەکان ، بێ بەرامبەر خۆیان ماندوو ئەکەن و ئەنووسن ، لە دوای ئەوە فیڵدی باری سەرنجی میللەتێکی 40 ملیۆن کەسی ، سفرە .. واتە سفر باری سەرنج ..واتا هیچ کەسێ نەیخوێندۆتەوە ، خویندبێتیشیەوە هیچ کاردانەوە و باری سەرنجێکی لەلا دروست نەکردووە  .. ئەوە بە ڕای من کارەساتێکی گەورەیە کە ئەمڕۆ یەخەی بە نووسەران و کتێبەکانیان گرتووە ، کار گەیشتۆتە ئەوەی نووسەرەکانمان کاتێ کتێب چاپ ئەکەن ، وەک شەکراو خواردنەوە و پاشتێلانە ، خزم و دۆستەکانیان بانگ ئەکەن و کتێبەکانیان بە خۆڕایی دابەش ئەکەن بەڵکو لەگەڵ بیبسی و پاقلاوەدا ، نەختێ گوێیان لێبگرن کە بزانن چییان نوسیوە..

ولیەم سارۆیان ئەڵێ ، ئەوەی ئەینووسم  ئەگەر تەنها خێزانەکەم بیخوێنێتەوە ، بەسە.. زیاترم ناوێت، ئیتر پێویست ناکا نوسینەکانتان ئارایشت بدەن و شیرینی و هۆڵیان بۆ بگرن، ئەوە هەم خەڵەتاندنی خەڵکە و هەم بێ ڕێزییە بەرامبەر نووسین

بەڵام من لەوە سەیرترم بەسەردا هات ، لەو ماوەیەدا هاوڕێیەکم بینی کە بە هەندێ هۆکاری سیاسیی و نەخۆشییەوە ، خوێندنی زانکۆی کەوتە ساڵانی پیرییەوە ، واتا دوای 40 ساڵیی .. پێی ووتم : ( ئێستا لە بەشی کوردی زانکۆی سلێمانیی ئەخوێنم و حەزم لێیە دەربارەی تۆ بنووسم و توێژینەوەکەم لەسەر تۆ بێت ، چونکە بە ڕاستی تۆ لە نووسەر و شاعیرە پشت گوێخراوەکانیت ) 

نایشارمەوە ، دڵم بەو هەستە جوانەی زۆر خۆش بوو ، جێی شانازییە برادەرێک دوای ئەو هەموو ساڵە ، بیری تۆی کەوتبێتەوە و ..تۆ بکاتە شاعیری هەڵبژاردەی خۆی بۆ توێژینەوەی زانکۆ و لەو کومەڵگا ئەکادیمییەدا بتناسێنێ و باسی ئەوەیان بۆ بکات کە شاعیر هەیە لە بیر کراوە یان پاشەکەوت کراوە ..

زۆر سوپاسم کرد و ..پێم ووت پێویستت بە هەر دەستنوس و بەرهەمێکمە بۆت ئامادە ئەکەم  ، هەتا توێژینەوەکەت تەواو ئەکەیت ..

بەڵام توشی شۆک بووم کە ووتی :  نا .. من ناینووسم ..!!

خۆت بینووسە .. خۆت لە هەموو کەسێ زیاتر لە خۆت و بەرهەمەکانت شارەزاتریت !!!

ووتم : یەعنی چۆن ؟ خۆم وەسفی خۆم بکەم و ..خۆم باسی لە یادکردنی خۆم بکەم و.. بە خۆم بڵێم : شاعیری لەیاد کراوی گەلەکەمان؟!

تومەز ئەم برادەرە خەریکی ئیشی دارتاشییە و تاقەتی نوسینی توێژینەوەی نییە و ..ئەیەوێ بە بەردێک شاعیرێک و دوو چۆلەکە بکوژێت ، هەم دڵی من خۆش بکات ، هەم ئیشی دارتاشییەکەیشی ڕانەوەستێ و .. هەم توێژینەوەیەکی بێ ماندوو بوونیشی دەست بکەوێ .!