میدیای دنیا و ناوچیەکان، خەریکی ڕووماڵە کردنی ڕووداوە خوێناویەکانی غەزەن، بەشێک لایەنگری ئیسرائیل دەکەن، بەشەکەی دی لایەنگری حەماس دەکەن. واتە میدیای دنیا و ناوچەکەش هەریەکەیان خۆیان لەبەرەی یەکێک لە زلهێزەکان و هاوپەیمان و هاورێکانیان لە ناوچەکدا ساغ کردۆتەوە و تورەگەیان گرتۆتەوە بۆ پارە. 

لە کاتێکدا دنیا سەرقاڵی سەروبەندی ئەو ڕووداوە خویناویانەی غەزە و ئیسرائیلە، هەموو دنیای عەرەبی سەرەڕای بوونی بەرژەوەندیی ئابووریی لەگەڵ ئەمریکا و ئیسرائیل، ئەوجا پشتیوانی لە حەماس دەکەن، بە پێچەوانەی سەرانی باشوور کاتێک کە تورکیا و ئیران و کوردستان بۆردوومان دەکەن، ئەوان دەبن بەچاوساغیان، پەکەکە بە تیرۆریست لە قەڵەم دەدەن، هێزی ئۆپۆزسیۆنی کوردی ڕۆژهەڵات لە باشووری کوردستاندا شاربەدەر دەکەن!

 تورکیا بەبێ ئەوەی عەرەب بێت، بەناوی موسڵمان بوونەوە،  دژی ئیسرائیل لێداوان دەدات، ئەو دەیەوێت بڵێت، کە ئەو ناکۆکییانە لەنێوان موسڵمان و جوە، بۆ دنیا و شەقامی عەرەبی خۆی کردوە بە موسڵمانێکی عەیار ٢٤، لە کاتێکدا هەر لەو مانگەدا بە درۆن کەمپی مەخموری کردۆتە ئامانج، هیچ یەک لە وڵاتانی ئیسلامیی و عەرەبی نەهاتۆتە دەنگ. ئاشکرایە کە کەمپی مەخمور، تەنیا خەڵکی سیڤلی ڕاکردووی ژێر دەسەڵاتی ئەسەد و ئەردوغانی تێیدا گوزەر دەکەن، هەموو دنیا دەزانێت، کە زۆربەیان ژن، منداڵ، پیر، پیاو و گەنجی ناچەکدارن، هەروها دانیشتوانی کەمپی مەخمور هەڵگری ناسنامەی ئاینی ئیسلامن، نەک هەڵگری ناسنامەی ئاینی جو، یان هەر ئاینێکی دی بن. تورکیا موسڵمانی ئەو کەمپەی کردۆتە ئامانج، کە بەهەزاران کیلومیتر لە سنووری تورکیا و میلیشیاکانی دوورن. لەوەتەی دنیا سەرقاڵی ڕووداوەکانی غەزەیە، ئەو سەدان جار کوردانی ڕۆژئاوای کردۆتە ئامانج، هەر لەو مانگەدا ٣جار کەمپی مەخموری کردۆتە مەئاوای دڕۆنەکانی. 

ئەگەر دنیا بێ ئاگا بێت لە هێڕشەکانی تورکیا، لەبەرئەوەی میدیای ناوچەکە زۆربەی عەرەبن و سەر بەتورکیان، خۆیان دەدزنەوە لە ڕووماڵەکردنی، بەڵام جاشمەلاکانی باشووری کوردستان پێویستیان بەوە نییە، ئەو هەواڵانە لە ڕێگەی میدیاکانەوە ببیستن، چونکە ئەوەی ڕوودەدا لەبن پاڵی خۆیانە، تەنیا چەند کیلۆمەترێک لەوان دوورە، بەڵام نوتقیان لە خۆیان بڕیوە، کەچی  لە میدیاکاندا غافڵ نین، سەرقاڵی ساغ کردنەوەی جاشایەتی خۆیانن بۆ  عەرەب و تورک و فارس،  بەناوی موسڵمانیەتی دژی ئاینی جو، خۆیان کردوە بە لایەنێکی سەرسەختی حەماس. ئەوان دەیانەوێت بڵێن ئەو جەنگە، جەنگی موسڵمانانە دژ بە جو، نەک جەنگی دەسەڵات، بەرژەوەندیی، سەپاندنی هەژموون، نەک ململانێ و زۆرانبازی زلهێزەکانی دنیا و ناوچەکە وەک تورکیا و ئیران، سوتەمەنیەکەشی خەڵکی هەژار و نەداری زۆرینەی سادەی نێو فەلەستینە، بە جو و  فەڵە و موسڵمانیەوە. 

 جاشمەلاکان لەیاد خۆیان دەبەنەوە کە لە قورئاندا، پێخەمبەری موسڵمانان، ددانی بەو ئاینە ناوە و پێان دەڵێت (ئەهلی کیتاب)، واتە بڕوای بەوەیە کە هەر دوو کتێب، ئینجیل و تەورات، لە ئاسمانەوە نێردراون، (موسا و عیسا) ش پێغەمبەرن، تەنیا ژنێکیش لە قورئاندا ناوی هاتبێت (مریەم)ە و (موسا) لە قورئاندا لە هەموو پێخەمبەرەکان زێتر ناوی هاتوەو پیرۆز کراوە. ئەم خۆگێل کردنەش بەلایەک، پرسیاری گرنگ لێرەدا ئەوەیە، کە بۆ ئەوان خۆیان کەڕ و لاڵ کردوە،  لەبن پاڵیانەوە تورکیا هێرش دەکاتە سەر کەمپی مەخمور کە ناسنامەی نەتەوەییان کوردە، بەڵام ناسنامەی ئاینی دانیشتوانی ئەو کەمپە بمانەوێت یان نا (ئیسلامە).

 جاشمەلاکان، قەیناکە ئەوا با کوردایەتیەکە بخەینە لاوە و بۆمان گرنگ نەبێت، ئەی بۆ ئێوە ناوێرن دەنگ هەڵببڕن و بڵێن، ئەرێ ئەردوغان، تۆ بۆ موسڵمانانی کەمپی مەخمورت کە خەڵکی لێقەوماو، دەربەدەر، سیڤلن بێ چەکن، کردۆتە ئامانج؟ ئەی سوڵتانە موسڵمانەکە، ئاخۆ کوشتنی موسڵمان بەدەستی موسڵمان حەرامە یان نا؟