ڕاوەستە، دە ڕاوەستە

با منیش شتێ بڵێم

- تۆ ئەو ژنە نیت

کە لە شیعرەکاندا باسکراوی

زوڵف چین چین

برۆ شمشێر

چاو نێرگزی

غەدار؟!

بە خوا

تۆ ئەویت 

-----

گەوجە

- بەخوا تۆشێتی

- دەی ئەوەی 

  تۆ ببینێ و

  شێت نەبێ

  گەوجە

------

گوڵئەندام

گوڵی هەناری لێوەکانت

قسەی دەکرد

سەعاتەکەی دەستم

زریکاندی

تەماشام کرد، هەموو ترپەکانی دڵم فڕی بوون

کەچی دەڵێن

هەر زەوی و مانگ توانای کێشکردنیان هەیە!!

-----

تۆ

لێی پرسیم

- شیعر چییە؟!

  ڕامابووم

  لە ناو چاویا 

  پیاسەم ئەکرد

- تۆ خۆت شیعری!!.

سپاس

وەختەبوو

بەلادا بێم و

بکەوم

گۆشەی چاوەکانت

گرتمییەوە

سپاس بۆ نێرگزی چاوەکانت.

----

کەی بوو

لێی پرسیم

- کەی بوو هەستت کرد

  خۆشت دەوێم؟!

- کە مەستوورە کۆچی کرد 

  بۆ سلێمانی

  دڵی من لە کۆچدا بوو 

  بەرەو سنە

-----

وشەکانی دڵ

وتی زمان لووس و

زۆرزانی

وتم گێژێکی سەرگەردان بووم

لاڵەپەتە

کە تۆم ناسی

زمانم پژا و

فێری وتنی وشەکانی 

دڵ بووم 

-------

بینین

وتی چیت لە مندا بینیوە

وا شێتم بوویت؟! 

وتم:

تۆ.....

دەنگوباس

وتی: هێندە بەسادەیی باسم دەکەی

       من توانای مەلەم نییە

       لەو زەریا قووڵەدا

- ئەی  ناشرین گیان

       بۆ قەت لە منت نەپرسی

      کەی بوو خنکای؟! 

------------------

سەرنج: 

* بەیادی گوڵەکانی گوڵزاری نالی، مەحوی، وەفای و مەولەوی و.... 

  ئێستا ژنی کورد سەروەری بەرخۆدانێکی کوردستانی وایە کە هەموو پێوانەکانی سەروبنکردن و خوشکەکانمان لە قەندیل و ڕۆژهەڵات و ڕۆژئاڤا بوونەتە هەناسە و ترپەی دڵی نەتەوەکە و مانای بەرزی مرۆڤ بوون. هەموو جوانییەکانی ژنانی کورد لەناو ئەواندا بەرجەستە بوون.