شا (ساوک)ی بوو

مەلاکانیش (ئیتلاعات)

لە نێوان ساواک و ئیتلاعاتدا

ڕیشێک و

تەزبیحێک و 

جبەیەک، جیایان دەکاتەوە

ساواکییەکان

کتێبی (بەرەو شارستانییەتی گەورە)* ی ئاریامیهریان

دەخوێندەوە و

کوردیان دەکوشت

ئیتلاعچییەکانیش

قورئانێک

لاپەڕەیەک (خوب)

لاپەڕەیەک(بد)

دەخوێننەوە و

خەڵک دەکوژن

کورد لەدار دەدەن

باوە، کراوە و دەڵێن:

قازییەکانی سەددام

بەرەبەیان

کاتێ دەهاتنە هۆڵی بڕیاردان

کوردەکانیان ڕیزدەکرد، جا دەیانخوڕی:

لەو پشتێن گوڵ گوڵییەوە، بۆ ئەو پشتێن ڕەشە

ئیعدام

لەو پشتێن قاوەییەوە بۆ ئەو چۆغەلەبەرە

دەساڵ زیندان

قازی مەلاکانیش

قورئانە خوب و بەدەکە**

دەکەنەوە

(زەینەب جەلالیان)

زیندانی هەتاهەتایی

(شیرین عەلەم کوهی)

جوخە اعدام***

پار لە تاران

کچەکوردێکیان گرت

ئەوەڵ ناوەکەیان گۆڕی و بوو بە مەهسا

هەر ئەو کاتە لە سنە

زارا وانەی کوردیی دەگوتەوە

بۆ نموونەی پیتی (ژ)ێ

منداڵەکانی فێرکرد

لە دەفتەری نووسینەوەی وانەکاندا

سەدجار بنووسن (ژینا)

ئەوسا مەهسا بووە هێمای داگیرکردن و

ژیناش بوویە سیبۆلی ژیان

هەمووش پێکەوە

وتیان

داگیرکەری ئێرانی

بکوژی (ژینا)مانی

بکوژی (ژیان)مانی

----------------

سەرنجەکان: ئەو وشانەی بە زاراوەی فارسی نووسراون: 

*بسوی تمدن بزرگ، کتێبێکی خەیاڵ پڵاویی شای ئێران بوو، بەناوی وییەوە بۆی نوسرابوو لەلایەن چەند نووسەری دەربارەوە لە ناویاندا داریوش هومایۆن، وەزیری ڕۆشنبیریی و سکرتێری حیزبەکەی شا بە ناوی رستاخیز، دووساڵ بەر لەوەی شاهنشا، قەلفڕی پێ بکەن، چاپ و بڵاوکرایەوە، بەڵام ئێران نەک بەرەو شارستانەت نەچوو، بەڵکو بەرەو تاریکستانی مەلاکان چوو.

**مەلاکان لە ئێران، قورئانێکیان چاپکردووە کە ئیستخارە(بەختگرتنەوە)ی پێ دەکەن، لاپەڕەیەک لە سووچی سەرەوەی نووسراوە خوب/ باش، لە سووچی لاپەڕەکەی بەرامبەردا نووسراوە بد/ خراپ

*** جوخە إعدام/ دەستەی سێدارە، یا گولە باران