تۆ، کە بە کوردی گریای کێ بە تورکی شیری پێدای؟!

تۆ، کە بە کوردی خوێندت، بۆ بە تورکی بیرت کردەوە؟!

تۆ، ئەو ڕۆژەی کە خۆت فریودا و بە بەرگی کوردییەوە نوێژت کرد، چی ڕوویدا کە وەڵامی نزاکانت بە تورکی ببیستەوە؟!

لە سنە پیاوێک هەبوو*، قۆڵی هەڵماڵی و گوتی: هەتا ئیستا هەر چیان پێ وتوون سەبارەت بە خوا و پەیامەکانی، سەرەوبن پییان گوتوون.

لێیان پرسی: تۆ پێمان بڵێ، ئایا ئێمە سەرەتا کوردین یا موسڵمانین؟!.

گووتی: گیانەکانم، ئێمە بەر لەوەی موسڵمان بین، کوردین.

گووتیان: چۆن؟!.

گووتی: کوردبوون، بوونی ئینسانی ئێمەیە، موسڵمان بوون، باوەڕە.

ئەم قسەیە بۆ هەمووان نوێ بوو، هیچ ڕێبەرێکی ئاینیی بەر لەو: یا بوێری وتنی نەبووە و نەی گوتووە، یا نەی زانیووە و نەی گوتووە، یا دەسبڕ و بازرگان بووە و نانەکەی لە چەواشەکردنی خەڵکدا بووە و نەی گوتووە.

ئێستا تۆ پێمان بڵێ: 

ناوێری بۆیە نایڵێت؟!.

یا ئازایی گوتنی ( حەق ) ت نییە؟!

یا بازرگانێکی دەستبڕی و نانەکەت لە چەواشەکردنی خەڵکدایە؟!

ئەگەر:

 - بوێر نیت، لە مەرگ دەترسی.

- ئەگەر ئازایی گووتنی (حەق)ت نییە، مانای وایە پەیڕەوی لە ناخوا دەکەیت.

- ئەگەر بازرگانێکی دەستبڕی، ئەوە لە خوای خەڵکەوە دووریت و یاوەری ستەمکاران و سەر بە تاقمەکانی ئەهریمەنی.

سەرکەووتنی (ئۆردوگان) ت لێ پیرۆز بێت. جلخواریی پیشەیەکی کۆن و ڕەگی ڕزیووی درەختێکی زڕە لە مێژووی هەندێ کەس و بنەماڵەی بەڕواڵەت کورددا، کورد دەیانناسێتەوە. 

 ئیمپراتۆرییەتی خەلیفە و پاشا و والییەکانی، تورک و عەجەم و تازی، یەک لە دوای یەک، نەمان و کورد هەر ما، چوونکە ئەم نەتەوەیە، حەقیقەتێکی زیندووی ئاهۆراییە و خۆشەویستییەکی خودایی.

پیرەمێردی دانای مە، ڕۆژێک نامەیەکی کەسێکی نزیک لە خۆی بە دەست دەگات، بە زمانێکی بێگانە بۆی نووسی بوو. بۆ بەیانی لە ڕۆژنامەی ( ژین) دا وەڵامی دەداتەوە، ئەو وەڵامەی پیری مە، پێشکەش بە تۆ و هەموو ئەو کەسانەی دەوری ( قۆری و کتری) یەکەی چایخانەکەتان، کە لە ڕۆژی سەرکەووتنی خەلیفەکەتاندا، بۆ موبارەک بایی، دەستی تۆیان گووشی!!.

پیرەمێردی ئێمە دەڵێت:

مستۆ! وادیارە تۆش جل خوارئەکەی 

داوێنت دەخورێ و مەیلی بار ئەکەی.  

سەرنج/ 

*ئەو پیاوە ڕاستگۆ و بوێر و ئازاد و حەق وێژە سنەییە، کاک ئەحمەدی موفتی زادەیە، سڵاوی خوای لێ بێت