دوواندی شەرافەتمەندانی نەتەوەکەم، بۆ گەشەپێدانی وشیاریی نەتەوەیی لە کاتی تێپەڕین / پاش تێپەڕین لە سەرکردەیەتی حیزبەکان. 

ئاسایشی میللی چییە و بەچی دەڵێن ئاسایشی میللی؟!

ئاسایشی میللی نەتەوەیەك، هیچ پەیوەندی بە هەبوون یا نەبوونی پۆست و مەقام و دەسەڵاتێكی تایبەتی بۆ كەسێك یا دەزگایەكەوە یا حیزبێکەوە نییە لە وڵاتدا، تێگەیشتن لەمە خاڵێکی کرۆکی، بنەرەتی و زۆر گرنگە.

ئێمە وەك نەتەوەیەكی دابەشكراو/ نیشتمان کۆڵۆنی کراو، لە زۆر ڕوەوە جیاوازیمان هەیە لەو گەلانەی كە دەوڵەتی خۆیان هەیە، واتە زەویەكی دیاریكراویان لەسەر نەخشە هەیە و دەسەڵاتێكی خۆشیان بەڕێوەیان دەبات. بۆیە لە زۆر پێناسناسەكانەدا ناتوانین وەك گەلێكی خاوەن دەوڵەت ببزوێین، كەواتە لە هەندێ لایەنەوە دەچینە ناو چوارچێوەی پێناسە جیهانییەكانەوە(وەک ئەوەی کە ئازادیی نەتەوەییمان زەوتکراوە)، بەڵام لە زۆر لایەنی بنەڕەتییەوە، دەبێ لەدەرەوەی چوارچێوەكان هۆشمەندانە كار بكەین.

بۆیە دەڵێم: ئاسایشی ئێمە ئاسایشێكی كوردستانییە، واتە ڕەهەندی كوردستانی هەیە، كە ئەنجامەكەی، ئەگەر چاك ووەك پێویست كارمان بۆ كرد، دەبێتە زەمینە بۆ ئاسایشی نیشتمانەكەمان، ئەوەی لە دەڤەری باشوور پێی دەڵێن: ڕەهەندی نیشتمانی، دەبێت ڕەهەندی كوردستانیی بێت، كە لە قۆناغەكانی دوای ڕزگاریی لە کلتووری سەرکردەیەتی حیزبەکان، زەمینەیەكی تۆكمەی ڕەهەندە نیشتمانییەكەی ساز دەكات. 

ئەم دوو بابەتە لە بنەڕەتدا یەكن، واتە ئاسایشی میللیمان، بەرانبەرە بە ئاسایشی نیشتمانەكەمان لە داهاتوودا، كە بۆ ئێمە ئەمەی دواییان وەك خاك هەمانە، هەستی پێدەكەین، جوگرافیاكەی دیارە، هەزاران ساڵە تێیدا دەژین، بەڵام ڕەسمییەتی پێنەدراوە، كە ئەگەر ئەو بابەتانەی ڕەهەندی كوردستانیان هەیە، بەو جۆرە كوردستانییە هەنگاومان بۆ نا، بۆ داهاتووی نیشتمانەكەمان زەمینەیەكی ئامادە و پشتیوانییەكی مەزن دروست دەكات و بناغەكەمان پتەو دەبێت بۆ گەشەپێدان و كارەكانمان لە داهاتوودا ئاسان دەكات.

ئاماژەیە بۆ ئاسایشی دەوڵەتی نەتەوە كە بریتییە لە ئاسایشی: هاوڵاتییەكانی، ئابوورییەكەی و ئاسایشی دامودەزگاكانی، ئەمەش بە ئەركی حوكوومەت دادەنرێت. 

لەسەرەتاوە پێناسەكەی بریتی بوو لە: بەرەنگاربوونەوەی هێرشی سەربازی وڵاتانی تر، بەڵام ئەمڕۆ پێناسەكەی فراوانتر بووە كە جگە لە بەرپەرچدانەوەی لەشكریی، بابەتی ناسەربازیش دەگرێتەوە وەك: تیرۆریزم، جۆرەكانی تاوان، ئاسایشی ئابووری، وزە، خۆراك، ژینگە و ئاسایشی سایبەریی و...هتد.

هەروەها جگە لە هێرشی دەوڵەتانی تر، بەرەنگار بوونەوەی باندە گەورە و ڕێكخراوەكانی ماددە هۆشبەرەكان، كارتێلە گەورەكانی كۆمپانیا چەند میللییەكان و هەروەها كارەساتە سروشتییەكانیش دەگرێتەوە.

دەوڵەتان بۆ پاراستنی ئاسایشی میللییان، پشت دەبەستن بەهێزی سیاسی، ئابووری، سەربازی و دیبلۆماسی،

هەرەها بۆ پاراستنی ئاسایشی  ناوچەیی وجیهانیش، سازكردنی: مەرجەكانی كەمكردنەوەی نابەرانبەریی ئابووری، گۆڕانكارییە ژینگەییەكان، چارەسەری  سیاسی  بۆ گرفتەكان و سنوورداركردنی چەكە ئەتۆمییەكان.

بۆ ئێمەی كورد بابەتەكە ڕەهەندی كوردستانی هەیە، واتە لە ئێستادا پەیوەندی بە پاراستنی گیانی تاكی كوردەوەیە، كە ئەمانە دەگرێتەوە:

كەستان لەوە گومانتان هەیە، كە ئێمەی كورد ئەگەر كۆنترین نەبین، لە نێوان ئەو میللەتە كۆنانەداین كە شارستانەتی مرۆڤایەتیان ئاوەدان كردەوە؟! ئەمە من نایڵێم سەرچاوەكانی شوێنەوارناسان و مێژوونووسان سەلماندویانە.

ئێمە لە كۆتاییەكانی هەشتاكاندا و سەرەتای نەوەدەكاندا، كە سەرەتای خوێندنی زمانی سویدیمان بوو، لەو كتێبانەی پێیان دەخوێندین، ئاوا نووسرابوو و مامۆستاكەمان بۆی شیكردەكردینەوە:" ئەو خەڵكانەی كە ئێستا ئێمە بە چادر نشین و بێ وڵات ناویان دەبەین، نیشتمانەكەیان لانكەی شارستانەتی مرۆڤایەتی و خۆیان بەرهەمهێنەری سەرەتاكانی ئەم شارستانەتەی ئێمەن".

جا باسی باكوری نیشتمان و ئەشكەوتەكانی هەزارمێرد و گوندی چەرمۆی بۆ دەكردین وەك یەكەمین شوێنی نیشتەجێبوونی مرۆڤ و ئاوادانکردنەوە و کشتوکاڵی. 

ئەو باپیرەگەورانەی ئێمە، كە سویدییەكان ئاوا باسی ڕابووردویان دەكەن، ئێستا لە سەرەتاكانی سەدەی بیستویەكەمدا منداڵ و نەوەکانیان، ناتوانن ئارد بۆ نانی خۆیان بەرهەم بێنن، زۆر ئاسان ئاردی ژاراویکراوی كۆنەی وڵاتانی هاوسێ هاوردە دەكەن!!.

ئەگەر ئێمە دڵسۆز باینایە و لە ڕەهەندی كوردستانیی ئاسایشی خۆراك تێ گەیشتباین، ئێستا گەنمی سەقز و تەماتەی ئامەد و ماستی كرماشان و زەیتونی عەفرینمان بە منداڵەكانی خۆمان دەدا، بازرگانەكانمان لە هەر پارچەیەكی كوردستاندا نووسینگەی كڕینی بەرهەمی جوتیاری كوردستانیان دانا بوو، هەم نەتەوەكەیان لەیەكتر نزیك دەكردەوە، هەم تۆڕێكی بازرگانی كوردستانییان بنیات دەنا بۆ ئایندەی پاراستنی ئاسایشی خۆراكی نیشتمانمان و سەرمایەكەمان لە ناو نەتەوەكەی خۆماندا دەمایەوە و نەدەدرا بە چەك و تەقەمەنی تا خوشك و براكانمانی پێ لە ناو بەرن!.

گەلان ئاوا نیشتمانی خۆیان بەدەستخست و بنیات نا، چەند سەرمایەی بچووك پڕۆژەی گەورەی پێ ئەنجام دەدرێت، بە مەرجی هەبوونی پلان و دڵسۆزیی بۆ نەتەوە. 

سەبارەت بە ئابووری كوردستان، بیرمەندی گەورەمان مامۆستا مەسعود محەمەد دەڵێت: " ئابووری كوردستان وەك كانییەكە كە سێ جۆگەی لەبەر بڕوات."  ئاشكرایە كە كانییەكی ئاوا هەرگیز پڕ نابێت.

هەروەها بیرمەندی كورد كاك ئەحمەدی موفتی زادە، پاش ئازادكردنی لە زیندانی فاشییە ئیسلامییەکانی ئێران، لە كاتێكدا دەبیستێت خەڵكێكی فرە دەیانەوێ بچنە سەردانی لە تاران زوو ئاگاداریان دەكاتەوە، كە ڕازی نییە كەس بێتە سەردانی و دەڵێت:" خۆم سەرەڕای قەدەغەكان لەسەرم كە نابێت بێمەوە كوردستان، ئەگەر بۆ هەفتەیەكیش بووە دێمەوە بۆلاتان، ئێوە ئەگەر هەزار كەسیش بێن بۆ سەردانم و هەر یەكەتان هەزار تمەن خەرج بكەن لەم سەفەرەتاندا، ئەوا ملیۆنێك تمەن، لە كوردستان دەچێتە دەرەوە، با ئەو سەرمایەیە لە گیرفانی كوردا هاتو چۆ بكات و لە وڵاتی خۆمان بمێنیتەوە". ئەمە تێگەیشتن و خەمخۆریی دووبیرمەندی كوردی دڵسۆزی نەتەوەوەکەیە، بۆ ئاسایشی خۆراك و ئابووری كوردستانیی، ئێمە دەبێت، ئەم بیرانە سەرمەشقی كاری بازرگانی و سەرمایەگووزاریمان بێت لە نیشتمانی خۆماندا.

ئێمە و سەروەت و بوون و نەبوونمان دەڕۆین و بەجێی دێڵین، با ڕوومان بێت گۆڕێكمان هەبێت لە خاكی نیشتماندا!!.

ڕەهەندی كوردستایی ئەم ئاسایشە ئەوەیە كە گرنگترین سەرمایە گیانی تاكی كورد بێت لامان و بەئەركی خۆمانی بزانین وەك چاومان پارێزگاری لێ بكەین و زەمینەی وەفاداریی بۆ نەتەوە و كوردستانی بۆ بسازێنین، بەوەی ڕێزی لێ بگرین، تا لە بێ پەنایی و نەبوونی پشتیواندا، ژیان ناچاری نەكات سەر بە ماڵی دوژمنیدا بكات. 

ئەمڕۆ کوردەکان خەمیان گەورە و سكیان برسی و چەوساندنەوەی نەتەوەیی و كوردبوونیان، زۆر جار ناچاریان دەكات، بۆ نانی شەوی منداڵەكانیان، تەن بە زۆر زەبوونی بدەن، دەبێت لێژنەكانی پشتیوانی كوردستانیی،  ئاوەدان بكەینەوە و سەرەتای دروستكردنی تۆڕی بەتەنگەوەهاتنی نەتەوەكەمان دەست پێبكەین.

ڕەهەندی كوردستانی: بۆئەوەی پەناگایەكی هەبێت بۆ پشوودان تا بتوانێ بە ئاسوودەیی لە پەروەردەكردنی كوردستانیی منداڵەكانیدا تێ بكۆشێ و چالاك  بێت،  بە پێدانی ئەو دەرسانەی كە پێویستن بۆ داهاتوویەكی ئاوەدانیی هۆش و ڕەوان. منداڵەكان هەست بەوە بكەن كە شوێنێك هەیە دەتوانن لە وێدا بە ئازادیی باوانیان ببین و سفرەیەك كۆیان بكاتەوە و مێژوویەك كە بەشێكە لە مێژووی نەتەوەیەك لەوێوە دروست بكەن. 

من بۆ بەرگرتن لە خراپ سوود وەرگرتن و چاوچنۆكی سەرمایەداران بۆزیادكردنی بەپەلەی سەرمایەكەیان، وەك پلانێكی كورت خایەنی چەند ساڵە، پێشنیاز دەكەم: هەر خێزانێك تەنها بە ئەندازەی ژمارەی ئەندامانی  خێزانەكەی بتوانێت موڵكی هەبێت، ئەمە خاوەندارێتی شوێنی نیشتەجێ بوون، زیاد دەكات و كرێگرتەیی كەم دەكاتەوە و ئارامی لەناو كۆمەڵگادا دروست دەكات.

بۆئەوەی نەتەوەكە بتوانێ داهاتووی مسۆگەر بكات، پێویستی بە تاكی بەهێز و ساغە. دەروون و تەن لە بەتاڵی و بێكاریدا، دەشێوێ و نەخۆش دەكەوێت، یا هەوڵ دەدات خۆی و ئازاری نەتەوەكەی لەبیربەرێتەوە  بە هانا بردن بۆ بێهۆش بوون و دەست بردن بۆ تاوان، لێرەدایە منداڵەكانمان دەبن بە داوی بازرگانی چاوچنۆك و بێ ویژدانەوە كە وەك نێچیرێكی لاواز ملكەچی فرمان دەبن و چەوت ڕەفتاركردن و شكاندنی عیزەتی نەفسیان لێ دەبێت بە خوو، نەتەوە و نیشتمانیان لا سووك دەبێت و خۆیان سەر بەهیچ گروپێكی ئینسانی نازانن، چونكە لەم قۆناغەدا، زۆر لە خسڵەتە ئینسانییەكانیان گوم كردووە و دەربەستی دۆزینەوەشی نایەن.

بۆ ئەوەی تاكێكی وشیار و ئاگادار بین، كە لە كۆتایدا، بەهەموومان نەتەوەیەكی وشیار دروست بكەین، دەبێت سەرچاوەی زانین و زانیاریمان لەبەردەستدا بێت و حوكوومەت زانیاری پێویست بۆ كاتی جەنگ و ئاشتی، بدات بە تاكەكانی كۆمەڵ، تا شێوازی خۆپاراستن لە جەنگدا و تەنانەت بەشدار بوون لە جەنگی نیشتماندا و ڕێگای گەشەكردنی هۆش و تواناكانمان فیر ببین بۆ كاتی ئاشتی و سەردەمی بنیاتنان و ئاوادانكردنەوەی نیشتمان. نەبوونی زانیاری چەواشەبوون دروست دەكات و هەڵەكردن لە كاتی جەنگ و ئارامیدا.

بۆ ئەوەی تاك دڵنیا بێت، لە چوونە دەرەوەی، درەنگ هاتنەوەی، دڵنییایی كەل وپەل و پێویستییەكانی، هەروەها گیان و جەستەی كاتێ لەدەرەوەی ماڵە و كاتێ لە ماڵی خۆیدایە، دەبێ دڵنیایی ئەوەی هەبێت، كە یاسا لەهەموو بوارەكاندا سەروەری یەكەمە و بچووكترین تاوان و سەرپێچی لێپرسینەوەی لێدەكرێت بەپێی یاسای خۆی. هەروەها بوونی ئەو دڵنیاییە كە دادوەران لە دادگاكاندا بۆ سەلماندنی حەق و چەسپاندنی دادپەروەری كاردەكەن، بێ هیچ كاریگەرییەكی دەروونی، دەرەكی، حیزبی، ناوچەیی و خێڵیی.

تاك مافی خۆیەتی لە ژینگەیەكی ساغدا بژی، دەبێت ئەو ژینگەیەی تێیدا ژیان بەسەر دەبەن، نەكرێتە مەترسی بۆ سەر ژیانی دەروونی و جەستەیان. نەوەكان دێن و دەڕۆن، بۆیە دەبێت ئەم نەوەیە ژینگەیەكی پاك بۆ نەوەكەی دوای خۆی جێ بهێڵێت، ئەمەش پەیوەندی بە سیاسەتی ژینگەیی حوكوومەتەوە هەیە، كە مافی ئەوەی نییە، بە سیاسەتی وێرانكردن، لەناوبردنی دارستانەكان و پیسكردنی ئاوەكان، بواری هەناسەدانێكی تەندروست بۆ تاكی كۆمەڵ ئاستەنگ بكات، لەبەر سوودی خێرای كۆمپانیاكانی سەرکردەیەتی حیزبەکان بە چاوپۆشی و ڕەخساندنی زەمینەی گەندەڵی سیاسییەكان.

ئەمە ڕەنگە لە ئاسایشی پاراستنی میللی نەتەوەكاندا گرنگترین بابەت بێت، كە بۆ كورد لەم حاڵەتەدا كە هەیەتی نەك هەر گرنگە بەڵكو پێویستییەكی هەرە لە پێشەوەی بابەتەكانی بوون/ هەن، كە دەبوایە لە دەیان ساڵ لەمەو بەرەوە( سپای ڕزگاری كوردستان)، بۆ پاراستنی نەتەوەكە دروست بكرابایە، بەڵام لەبەر نەبوونی ڕەهەندێكی كوردایەتی/ کوردستانی دڵسۆز بۆ نەتەوەكە، ئەم ئەركە، بەهەند وەرنەگیراوە و ڕۆڵەكانی ئەو سپا یەكگرتووە، دابەشكراون بەسەر كەسایەتی و حیزب و دەستە و تاقمەكاندا، كە بە دەیان هەزار گەنجی كوردیان بێبەش كردووە لە خزمەت کردن بە نەتەوەكەیان. چونكە ئەو لەشكرە دەیتوانی بازوویەكی بەهێزی ئاوادانكردنەوە بن، كاریان هەبایە، بەرهەمهێنەر و چالاك بانایە لە ژیانی كۆمەڵایەتی و بنیاتناندا. کرۆکی ئەم سپایە دروستبووە لە دووبەشی نێستمانی ئێمەدا، لە باکوور و ڕۆژئاوا.

بەم لێكدانەوانە بۆمان ڕووندەبێتەوە، كە ئێمەی كورد جیاواز لە گەلانی خاوەن دەوڵەت، ئاسایشی میللیمان زۆر لاواز و هیچ كاتێك و لەهیچ قۆناغێكدا نەتوانرا و نەویسترا ئەم بابەتە گرنگە، پێش داخوازی كەسایەتی و سەرکردەیەتی حیزبەكان بخرێت لە باشوور و ڕۆأهەلات. هەروەها لە تایبەتمەندییەكانی تێ بگەن، ئەم ئەركە پیرۆز و كوردستانییە كرایە قوربانی سوودی مادی و پلە و پایە، بۆیە ئێستا ڕۆژانە خاكی نیشتمان بە سووتماك دەكرێت و دوژمنانی نەتەوەكەمان سڵ لە هیچ بەربەستێك ناكەنەوە، كەی ویستبێتیان لە دوور و لە نزیكەوە، ڕاستەوخۆ و نا ڕاستەوخۆ، ئەوەی دڵیان و بەرژەوەندی و میزاجیان ویستبێتی لە تۆپباران و سووتان و تیرۆری تاكێك یا بەشێك لە نەتەوەكە ئەنجامیان داوە.

ئەو هۆ بنەڕەتییانەی کە ئاسایشی نەتەوەیمان دەخەنە مەترسییەوە.

1. هەبوونی حیزبی چەکدار، کە سەرکردەیەتییەکانیان ڕابووردوویەکی درێژیان لە کلکایەتیدا هەیە و زیاتر وەک حیزبی دوژمنانی نەتەوەکە ناسراون تا حیزبی نەتەوەیەکی دابەش و نیشتمانێکی بە کۆڵۆنی کراو، چوونکە چەندین جار بوونەتە کەواسووری بەر لەشکری دوژمنانی کورد بۆ سەر کورد، لە نموونەیان مەلایی و جەلالییە لە باشوور، کۆمەڵە و دیمۆکرات لە ڕۆژهەڵات، هەڵبەتە ئەوانەی ڕۆژهەڵات، لە هەندێ خاڵی بنەڕەتیدا لە سەرکردەیەتی مەلایی و جەلالی دەچن، وەک ئەوەی کە کوردیان بەدەستی کورد داوە بە کوشت، سەرکردەیەتی جەلالی و مەلایی خوێنی هەزاران کوردیان وا لە گەردندا و سەرکردەیەتی کۆمەڵە و دیمۆکرات خوێنی سەدان کورد.

2. چاوپۆشی و بێدەنگی نەتەوەکە بەرانبەر بە تاوانە نەتەوەییەکانی سەرکردەیەتی حیزبەکان...

3. دروستکردنی تاقم و دەستەی بچووک کە لە سەرووی یاساوەن....

4. سازکردی پشێویی و نائارامی بۆ ترساندنی خەڵک و لاوازکردنی ئیرادەی بەرهەڵستی تیاندا.

5. ڕەواجدان بە کلتووری ماڵبات، تیرە، هۆز، خێڵ و ناووچە کە ڕیگر بووە لەوەی تاک هەستی سەر بەنەتەوەیەکی دیاریکراوی تێدا بەهێز بێت و بەهۆی ڕەفتاری سەرکردەیەتی حیزبەکانەوە، ئەم هەستەی تێدا قێزەوون بووە و لە خۆیدا کوشتوویەتی، یا لە ڕووی دەروونییەوە تێکشکاوە و بۆ قەرەبووی ئەو هەستی خۆ بەکەم زانین و تێکشکاندنەش، خۆی بە داوێنی کەسێکی دیاریی ناو حیزبێکدا هەڵواسییوە و ئازادی خۆی لە قارەمانێکی خەیاڵیدا بەرجەستەکردووە و خۆی بەو سپاردووە.

6. سەرکردەیەتی حیزبەکان هەمیشە بۆ شکاندنی خەڵکی تر و کوشتنی گیانی یاخیبوونێکی وشیار تێیاندا، بایەخیان بە گەجەر و گوجەری ناو کۆمەڵگا داوە و وەک کەسایەتی نموونە پیشانیان داوون، کە ئەمەش ڕێگایەکە بۆ بچووککردنەوە و پووچکردنەوەی خەڵکی سەرکەش و خاوەن عیزەتی نەفسی بەرز، یەکێک لەو نەخۆشییە دەروونیانەی تووشی فەرمانڕانانی ملهوڕ، کە ژمارەیەکی زۆریان لە ڕۆژهەڵاتی ناوەڕاستدا بە سەرکردەیەتی تاقمە کوردییەکانیشەوە لەناویاندا، بەهۆی کودەتا، یا هەڵبژاردنی ساختە و پلەی حیزبییەوە دەبنە فەرمانڕان، نەخۆشی دەروونی سادیزمە، کە دەسەڵات لەپڕێک دەیانکاتە، جانەورێک هەموو بەهاو نرخێکی مرۆیی دەخەنە ژێر پێیانەوە و سڵ لە کوشتنی نزیکترین کەسایەتی لە خۆشیان ناکەنەوە، چ کوشتنی فیزیکی بێت بەپلان و بۆسەدانان، چ کوشتنی دەروونی بێت بە دروستکردنی تۆمەت گەلێک کە کەرامەتی ئینسانییان ورد دەکات، کە دوو حاڵەتی دەبێت، یا بێدەنگی دەکەن و پاشەکشە دەکات، یا دەستدەبات بۆ کارگەلێک کە دەچێتە قاڵبی خۆکووشتنەوە بۆ سەلماندنی بوونی خۆی، ئەم چیرۆکانە لەناو تاقم و دەستەگەلە سیاسەتبازەکاندا هێندە ڕەواجی هەیە بە سەدان کتێب و فیلم و داستان تەواو نابن.

سەرەتا دەبێت، وشیار بین بەو ژینگەسیاسییەی کە تێیدا خەبات و چالاکی دەکەین و ڕەش و سپیمان ناسیبێ، تا نەکەوینە ناو بازەی خۆڵەمێشییەوە، لەگەڵ خۆمان و بڕوا و توانا و داخوازییە ڕەواکانی خۆمان بە کۆتایی هاتبین، واتە وەک مرۆیەکی زاخاودراو لەسەر بەستێنی بڕوابوونمان بە ئازادی ئەوی تر کە دەشێ لەسەر حەق و داخوازییەکانی ڕەوا بێت، وەستابین تا نەکەوینە ناو زەلکاوی پاساوهێنانەوە بۆ کردارە ناڕەواکانی خۆمان بەرانبەر بەوی تر، هێڵە گشتی و پێوانەکانمان عەیارکردبێ لەسەر بنەمای ئازادی بۆ مرۆڤ، هەوڵ وتێکۆشان بۆ بەرهەمهێنانی ئازادی مرۆڤ و تێگەیشتن لە کەرامەتی مرۆڤ بوون.

خەبات بکەین کە زۆرترین کەس لەوانەی بەهەرهۆیەکەوە گیرۆدەی داوی سەرکردەیەتی تاقمەکان بوون و دەستیان بە تاوانی کوشتنی تاکی کورد سوور نەبووە، لەو تاقمانە جودا بکەینەوە و مرۆڤبوون و مانای ئازادی لە دەروونیاندا بگەشێنینەوە، ئەوەیان بۆ ڕوون بکەینەوە کە تاکی کورد لە ناو نەتەوەکەدا گەورە و بایەخدار و کاریگەرە، نەک لە ناو تاقمێکدا کە کەمینەیەکی ستەمکار و ملهوڕە و تا ئەو کاتە پشتیوانی ئەو تاکە دەکەن کە گوێڕایەڵ و جێبەجێکاری فەرمانی ئەوانە، بەڵام نەتەوەکە لەگەورەیی خۆیدا، هەمیشە پشتیوان و خەمخۆریەتی و بۆ پاراستنی ژیانی هەوڵ و تێکۆشان دەکات. ژیانی ناخاتە مەترسییەوە و داو و پلانی شاراوەی بۆی نییە، بەڵکو دەرفەتی پێدەدات کە تاکێکی وشیار و خزمەتگوزار و خاوەن کەرامەتی مرۆڤبوون بێت، گاریگەر بێت لەسەر بڕیارەکانی سەر بە چارەنووسی خۆیی و ئەوی تریش، فێری ڕێبەریکردنی دەکات و دەیکاتە مرۆڤێک کە شایان بەوە بێت ببێتە تاکێکی کاریگەر.

دەبێت خەباتی ئێمە، پانوپۆڕ بێت، هەموو بەستێنەکانی ژیانی کۆمەڵگا بگرێتەوە و کاری تێدا بکات، واتە هەمیشە لە هەموو پەیوەندییە کۆمەڵایەتی و ژیارییەکانمادا، ڕۆژانە خەریکی بەرپاکردنی شۆڕش و گۆرانکاری بەرەو باشتر بوون بین، چ سەبارەت بە خۆمان و چ سەبارەت بەوانی تریش. دەبێت هەوڵ بدەین، تۆڵە ناشرین و قیزەوون بکەین، ڕسوای بکەین، چوونکە تۆڵەکردنەوە هەم ژیانی تۆڵەسێن ناجێگیر و دروونی دەشیوێنی، هەم درێژە بە پشێووی ناو کۆمەڵگا دەدات واتە سەروەریی یاسا دەشکێنێت و بێبەند و باریی ڕەواج پێدەدات، کارێک کە دەستە و تاقمەکان تاکەکانی خۆیانی لەسەر ڕادەهێنن، ئێمە دەبێت بەدوای ڕێرەوی گاندیادا بڕۆین و ئەم وانە بەنرخە فێری تاکی کورد بکەین کە دەڵیت: " ڕقم لە تۆڵەیە، من ناتوانم هەموو ژیانم دوای ئەو سەگە بکەم کە ڕۆژێک گازی لێ گرتووم، تا منیش گازێکی لێ بگرمەوە".

تۆڵەی ئێمە تۆڵەی نەتەوەیەکی دابەشکراو و نیشتمانێکی بە کۆڵۆنیکراوە، کە مەبەست لێی گێڕانەوەی مافە بۆ مرۆڤگەلێکی ماف لێ زەوتکراو و بەرهەڵستی ستەم و ستەمکارییە، سەبارەت بە نەتەوەیەک کە بەر ستەمێکی درێژخایەنی کۆن و نوێ کەوتووە، لەم پێناوەشدا بە ئەندازەی بڕوابوونمان بە ئازادی مرۆڤ، ڕێگای سەربەخۆیمان کورتر و بۆسەکانی سەرڕێگای تێکۆشانمان پوچتر و ئیرادەی ئازادبوونمان جێگیرتر دەبێت، تاکی نەتەوەکەی ئێمەش شایان بەو خەسڵەتە ئینسانییە بەرزانەیە، کە هەم بەربەستە ناوخۆییەکان ناهێڵیت و هەم ستەمکارییە دەرەکییەکان کۆتای پێدێنێت، نیشانەگەلی ڕوون و ئاشکرا لە بزووتنەوەی ئازادیخوازیی کورددا بەدی دەکەم، کە وتار و هزری، ژن ژیان ئازادی، ببێتە قوتابخانەی ئایندەی مرۆڤایەتی.