بارزانی پانتایەکی گەورەی لە مێژووی کوردستان، لە سەدەی بیستەم، داگیر کردووە، بۆ ماوی نیو سەدە وەک سومبلی خەباتی کوردایەتی – رزگاریخوازی کوردستان خۆی نواندووەو کۆمەلانی خەلکیش بە چاوی رزگارکەر تاماشایانکردووە.

ئەم بابەتە پێویستی بە توێژینەوەو بەدواداچوونێکی دوور و درێژی مێژوویی و ئەکادیمی هەیە، من تەنها بە کورتی لە یادی لە دایکبوونی ئەم کەسایەتیە چەند سەرنجەکی کورت دەخەمە بەر باس. 

مەلا مستەفا لە گوندێکی دورەدەسەت و پەڕاویزکراوی کوردستانی باشور لە دایکبووە،  تا دوای شەڕی جیهانی دووەم قوتابخانە بەس لە شارە گەورەکان هەبووە. ئەگەر لاپەڕەی مێژووی سەدەکانی پێشوو هەلدەینەوە هیچ دەنگ و باس و شتێکمان سەبارەت بە دەڤەری بارزان ناکەوێتە بەرچاو. لەم ناوچەیە نە شاعیرێکی کلاسیکی، نە زانایەکی ئایینی، نە میرێک، تەنانەت "عەشیرەتێک بە ناوی بارزانی" وجودی نەبووە.

ئەم قسەیەمان بۆ سوکایەتیکردن، بە دەڤەر و دانیشتوانەکەی، نیە. کەچی لە شارەکانی وەکو ئامێدی، هەولێر، سلێمانی، کەرکوک، کفری، هەلەبجە، کۆیە، رەواندوز و... هتد لە سەدەکان رابردوو، دەیان شاعیری کلاسیک و زانایی ئاینی مەزن و پڕ لە هەستی نەتەوەیی و  و نیشتمانی لە دایکبوون و زۆر شار و ولاتان گەڕاون و گەشەیان بە بیری "کوردایەتی"داوە یان دەوڵەمەندیان کردووە.

مرۆڤ لە رێگەی خوێندەواری، نووسین و خویندنەوە، گەشت و گەڕان وشیار و بە ئاگا دێتەوە، لە رێگەی تێکەلاوبوون دەگەل نەتەوەو ئایین و رێکخراوی سیاسی و ئایینی جیاواز هەست بە بوونی خۆی و ئەوانیتر دەکات، خۆی دەناسێت و بە ماف و ئەرکەکانی خۆی ئاشنا دەبێت. 

مەلا مستەفا لەم گوندە دورە ، تا تەمەنی ٣٠ سالی ژیاوە، بێچگە لە گوند و دەڤەرەکەی خۆیان ئاگای لە هیچ نەبووە. کەچی ئێستا بارزانیان لێمان کردووە بە  شۆڕشگێر، ئازادیخواز، قارەمان، دانەر، فەیلەسوفێکی خاوەن دەیان رێباز و دونیا بینی، سیاسەت و دەولەتمەدار، کەسایەتیەکی سوپەر – مرۆڤ و بێ وێنە لە مێژوو. 

ئەم داهێنانە، لە راستی، لە سەرەتاوە "ئەفەندیەکانی کوردایەتی" سەر بە حیزبی "هیوا" تۆیەکەیان بلاوکردەوەو و پاشان لەگەل جولانەوە – شۆڕشی ئەیلول شاعیر و سیاسیە رۆشنبیرەکان پەرەیان پێدا. ئەگەر چاوێک بە شیعری شآعیرانی سالانی ١٩٥٠ – ١٩٨٠بگێرین، بە تایبەتی ئاورەحمان بەگی بابان، قەدری جان، هەژار موکریان، شیرکۆ بێکەس، عەبدوللا پەشێو، مەدحەت بێخەو، جەمشید حەیدەری، کەریم شارەزا و.... هتد دەبینین هەریکە بارزانی بە رزگارکەر، شۆڕەسوار، سەرکردەی قارەمان، رابەر، کاوەی سەدەی بیستەم، سپارتاکۆس، کێوی هیمەلایە، هۆشی منە، گیڤارا، سەربازی وون، زەردەشتی رزگارکەری مرۆڤایەتی، ئاهورە مەزدا، عیسای مەسیح، پێغەمبەری کورد، باوکی روحی نەتەوەیی کورد و .... زۆرتریش ناساندووە. ئەوەندە شیعر و هۆنراوەی "خۆشەویستی بۆ بارزان"یان هۆنیتەوە مەگەر فەرهاد بۆ شیرینی بەیانکردبێ. ئەوە وایکرد لە دەرەوەی کوردستانیش رۆژنامەنوس و نوسەرانی بیانیش ئەو زاراوانە بۆ مەلا مستەفا دووبارە بکەنەوە. لەوانەیە ئەو شاعیرانە، بێجگە لە هەژار موکریانی، هیچیان لەگەل بارزانی نەژیابن و نەیاندیبێت، بەلام لەبەر ئەوەی گەلی کورد لە هەموو پارچەکان لە مافەکانی بێبەشکرابوو ئەوانەش بە نیاز پاکی و دلسۆزیان بۆ دۆزی کورد ئەو شیعرو پیا هەلگوتنەیان  بۆ هۆنیتەوە. لەوانیە کەسایەتی مەلا مستەفا لە پارچەکانیتر رەگ و خۆشەویستی زیاتر داکۆتابێ. بەلام رەفتارەکانی پارتی و بنەمالەی بارزانی لەم ٣٠ سالەی دوایی ئەو هەست و سۆزەیان زۆر لاوازکردووە و خەریکە راستیەکان بۆ هەموو لایەک روون و ئاشکرا دەبن .

مەلا مستافا، وەک تەواوی هاوتەمەەکانی خۆی، کەسێکی نەخوێندەوار بوو،  لە سالی ١٩٣١پەلاماری مەخفرەر – بنکەکانی پۆلیسی مێرگەسۆر دەدات و لە حکومەت یاخی دەبێت، دەبتە ئەشقیا. ئەم هێڕش و پەلامارە ٢ سال دەخایەنی و تەنها لە دەڤەری بارزان دەمێنێتەوە و تەشەنە ناکات. هیچ حیزب و رێخکراوێکی کوردی، ئەو کات لە ئارادا نەبوو پالپشتی لێبکات. ئەو جولانەوەیە بەرنامە و داواکاری نیشتمانی نەبوو.

لە راستی ئەو  شەڕو شۆڕەی ئەوکات پەیوەندی بە دوژمنداری، لە لایەک بارزانی و زێباریەکان، لە لایەکیتریش بارزانی و برادۆستیەکان هەبوو. زێباریەکان و برادۆستیەکان بووبوونە قوربانی پەلاماری مەلا مستەفا و چەوکدارەکانی. سالی ٢٠٢٢ کاک عیسا سێودین Isa Sewdin وتارێکی دورو درێژی بە ١٨ زنجیرە لەسەر پەیجی فەیسبوکەکەی خۆی بلاوکردۆتەوە، بە وردی باسی پەلاماری بارزانیەکان لە سالی ١٩٣٠ تا ١٩٧٥، تا ئاشبەتال، دەکات. ئەو دوو عەشیرەتەی قوربانی دەستی مەلا مستەفا و چەکدارەکانی هانا بۆ حکومەت دەبەن و ئەوەبوو ژمارەیەکی زۆر لە بنەمالەی بارزانی، بە مالی شیخ ئەحمەدی برای بۆ خواروی عێراق، پارێزگای ناسڕیە، دوور دەخرێنەوە. لە دوای کودەتاکەی بەکر سدقی لە سالی ١٩٣٦ بارزانیەکان دەگەڕێنەوە بۆ سلێمانی، هەندێک دەلێن سالی ١٩٣٨ و هەندێکتر دەلێن لە ١٩٤١ گەیشتوونە سلێمانی. بەهەر حال لێرە بۆ یەکەمجار مەلا مستەفا تێکەلاوی لەگەل کوردی دەڤەرێکیتر دەبێ. دانیشتوانی سلێمانی یارمەتیەکی زۆری مالە بارزانیەکانیان داوە، هێشتا روون نیە ئاخۆ لەم ماوەیە بارزانی چ کارێكی کردووە؟ ئا لێرە ئەفەندیەکانی کوردایەتی – حیزبی هیوا پەیوەندیان بە بارزانیکردووەو یارمەتیانداوە و لە کاتی جەنگی جیهانی دووەم، لە هاوینی سالی ١٩٤٣، مەلا مستەفا لەگەل چەند کەسێک، بە نهێنی، دەگەڕێتەوە دەڤەری بارزان و حیزبی هیوا بە پارەو چەک کۆمەکی بارزانی دەکات. 

مالی بارزانی لە رێگەی سولحی عەشایری لەگەل زێباریەکان ئاشت دەبنەوەو مەحمود ئاغای سەرۆکی عەشیرەتی زیباری کچەکی خۆی (عەمایلە خان، دایکی مەسعود بارزانی)، دەداتە مەلا مستەفا بەلام لەگەل برادۆستی و شێخی لۆلان دوژمنداریەکە قوڵتر دەبێ.

ئەوکات زۆربەی ئەفسەرە کوردەکانی سوپای عێراق سەر بە حیزبی هیوا بوون. هیوا، بە پالپشتی لە بارزانی، گەورەترین هەلەی ئەنجامدا، لە کاتێک هیوا لە زۆربەی شارو شارۆچکەکانی کوردستان رێکخستنێکی باشی هەبوو، پێگەیەکی بەهێزی لەناو سوپا هەبوو. دەڤەری بارزان، هیچ کاریگەری لەسەر حکومەتی بەغدا نەدەبوو و نەشیکرد، دەکرا شارێک و دەڤەرێکی گونجاوتر، لە رووی خوێندەواری هەستی نەتەوەیی، هەلبژێرن. لەوانەیە حکومەتی بەغدا بە ئاگاییەوە رێگەی بە حیزبی هیوا دابێت تا کۆمەکی بارزانی بکات بۆ ئەوەی رکابەرێک بۆ هیوا دروست بێت و لاوازی بکات و بەمەش ئامانجەکەی پێکاوە. 

دوو سال ناوە ناوە لە تەقە و تۆقە کردن، لە رێگەی حیزبی هیوا، چەند داواکاریەک پێشکەشی حکومەتی بەغدا کرا ن  بەلام شەڕی دووەمی جیهانی کۆتایی هات و حکومتی عێراق، بە یارمەتی ئینگلیز، بەهێزتر بوو و وەلامی داواکاریەکانی هیوا و بارزانی نەدایەوە، بە پێجەوانەوە داوای خۆ بەدەستەوەدان و چەکدانانی، بێ مەرجی، لێکردن. لەبەر ئەوە بە  نیوە رێنمایی حیزبی هیوا چەکدارە بارزانیەکانی لە هاوینی ١٩٤٥ چوونە رۆژهەلات. 

چەکدارانەکانی بارزانی، لە رۆژهەلات، تا رادەیەک، بوونە بارگرانی بەسەر ئەو کۆمارە ساوایەی تازە دامەزرابوو، ئەو مال و مندالە بارزانیانە پێویستیان بە یارمەتیەکی زۆر بوو، رۆژهەلاتیەکانیش لە یارمەتیدان کەمتەرخەمیان نەکرد بەلام بوونی ماڵ و مندال ئەرکی سەرشانی چەکدارەکانی بارزانیان قوڕستر دەکرد.

بە داخەوە کۆماری کوردستان – مەهاباد تەمەنی کورت بوو، لە بەهاری ١٩٤٧ مەلا مستەفا بارزانی بە خۆی چەکدارەکانی هەولیاندا بگەڕێنەوە باشور، حکومەتی بەغدا داوای تەسلیمبوون و چەکدانانی بێ مەرجیان کرد و ڕێگەیان نەدا، بە چەکەوە، بگەڕێنەوە دەڤەری بارزان. لێرە بارزانی، نازانرێ چۆن و کێ پێشنیاری بۆ کردووە، بە سنوری باشور – باکور – رۆژهەلات بەبێ بەرنامە و ئامانجێکی دیاریکراو  دەسووڕینەوە و ناوە ناوە توشی تەقە و تۆق دەبن لەگەل سوپای تورکیا و ئێران، پاش ماندووبوون و برسیێتی ناچار دەبن پەنا بۆ یەکێتی سۆڤیەت ببەن و، لە ١٨ حوزەیرانی ١٩٤٧ لە روباری ئاراس دەپەڕنەوە.

بارزانی، بە خۆی ٥٠٠ چەکدار ، زۆربەیان سەر بە دەڤەری بارزان بوون، خۆیان رادەستی پۆلیسە ئازەریەکانی سەر سنور دەکەن و  موعامەلەیەکی خراپیان دەگەل دەکرێ. لە راستی مەلا مستەفا و هاوەلەکانی، بە چوونیان بۆ سۆڤیەت، هەلەیەکی گەورەیانکرد، ئەو سۆڤیەتەی پەنجەیەکی نەجولاند بۆ پارێزگاری لە کۆماری مەهاباد و پێشەواکەی، قازی محەمەد، چۆن یارمەتی گروپێکی چەکداری عەشایری دەدات؟ ئەم گروپە ‌هیچیان لە سیاسەت و دونیا بینی نە دەزانی، لە سالانی ١٩٢٠ سۆڤیەت و بۆلشۆڤیەکان کۆمەکێکی زۆری تورکیای کەمالیستیان، لە دژی کورد، کرد. هەر سۆڤیەت بوو یارمەتی تورکیایدا بۆ لەناو بردنی راپەرینەکەی ئاگری داغ بە سەرۆکایەتی ئیحسان نوری پاشا. 

بارزانیەکان دەیانتوانی خۆیان تەسلیمی حکومەتی بەغدا بکەن بە بێ مەرج، بە دڵنیایەوە، زۆربەیان بەر لێبوردن دەکەوتن و دەگەڕانەوە شوێنی خۆیان، لەوانەیە ژمارەیەکی کەم لە بنەمالەی بارزانی وەکو سالانی پێشو نەفی خواروی عێراق بکرانە. دەکرا مەلا مستەفا و چەکدارەکان دابەشی گروپی بچووک بچوک بووبان و خۆیان لە گوندەکانی سەر سنور حەشاردابایە و حکومەتی بەغدا وازی لێدەهێنان.

چوونی مەلا مستەفا بارزانی و چەکدارەکانی بۆ یەکێتی سۆڤیەت یەک سوودی هەبوو، بووە هۆی دروستبوونی وێنەیەکی خەیالی لە دڵ و دەروونی کۆمەلانی خەلکی کوردستان، ئەویش وێنەی قارەمانی نەتەوەیی و نیشتمانی  بوو بەلام بارزانی نەیزانی یان نەیویست سوودی لێوەرگرێ. بە درێژایی ئەو ١٢ سالە هەولی نەدا پەیامێکی دەنگی، نامەیەکی نووسراو، قسەیەک، بە دزی و نهێنی بۆ گەلی کوردستان رەوانە بکات و هانیان بدات بۆ خەبات و یەکگرتن. ئای ئیلاهی ئەوە چ سەرکردەیەک بوو، ئەوە چ فەیلەسوفێک بوو لەم ماوە درێژە خۆی بێدەنگ دەکات.

بۆ زانیاری زۆرتر، لە کاتی مانەوەی مەلا مستەفا لە سۆڤیەت، دەکرێت سوود لەم کتێبە وەربگیرێت.

زرار سلێمان بەگ یەکیک بووە لەو کەسانەی بەشداری لە کۆماری مەهاباد کردووەو  چۆتە سۆڤیەت و تا گەڕانەوەی لە ١٩٥٩ زۆر بە وردی روداوەکانی تۆمار کردووە. ئەم کتێبە زۆر بە ئاسانی بە پی دی ئێف لە گوگل و کتێبخانەی کوردستانپۆست دەست دەکەوێ.
حیزبی هیوا بە دەست تێکەلکردن لەگەل جولانەوەکەی بارزانی گەورەترین زەڕبەی لەخۆی دا و بڕیاری مەرگی خۆیدا، ئەوتە هەموو ئەفسەرەکانی حیزبی هیوا کە لە ناو سوپای عێراق بوون و چوونە پال جولانەوەکەی بارزانی بۆیان دەرکەوت کە هەلەی گەورەیان کردووەو هیچیان باوەڕیان بە مەلا مستەفا نەبوو، لەبەر ئەوە لەگەلی نەچوون بۆ یەکێتی سۆڤیەت و دەگەڕێنەوە باوەشی حکومەتی عێراق. بە داخەوە حکومەتی ئەوکاتی عێراق بڕیاری لە سێدارەی بۆ چوار ئەفسەرە شەهیدەکان (مستەفا خۆشناو، محەمەد قودسی، عیزەت عەبدولعەزیز و خێرۆڵا عەبدولکەریم) دەرکرد کە لە ١٩ حوزەیرانی ١٩٤٧ لە سێدارە دەدرێن. ئەم پۆلە شەهیدە پێش لە سێدارەدان  لە وەسیەتنامەکەیان داوا لە کورد دەکەن "دوژمنی جەهالەت بن و بە هەموو توناتان شەڕی جەهالات بکەن و وە دوای جەهالەت مەکەون". 

دیارە مەبەستی سەرەکی ئەم پۆلە شەهیدە لە جەهالەت "حەرەکەتەکەی مەلا مستەفا بارزانی" بووەو بە ئاشکرا ناویان نەهێناوە. 

پارتی دیموکراتی کوردستانیش بە دەستی خۆی قەبری بۆ خۆی لێدا و سودی لە هەلەکانی حیزبی هیوا وەنەگرت و، ئەو وێنە خەیالی و داستانەی بۆ مەلا مستەفا دروستکرد و لە دوورەوە کردی بە سەرۆکی خۆی. مەلا مستەفا هیچی لە سیاسەت و حیزبایەتی نەدەزانی و تا مردنیش نەیویست فێری هیچ ببێت.

لە دوای کودەتا – شۆڕشێ ١٤ تەموزی ١٩٥٨ کرانەوەیەکی گەورەو فراوان بە رووی کورد هاتە ئاراوە، عێراق بووە ولاتی هاوبەشی کورد و عەرەب، حکومەتی عەبدولکەریم قاسم دانی بە زۆر مافی کوردنا و لێبوردنی بۆ زیندانیان و دورخراوەکان دەرکرد و ئەوەبوو مەلا مستەفا بەرێز و قەدرێکی زۆر لە ٦ ئۆکتۆبەری ١٩٥٨ گەیشتەوە بەغدا و زۆر بە گەرمی لەلایەن کاربەدەستانی حکومی و جەماوەرێکی بێ هەژماری کورد پێشوازی لێکرا. 

بە داخەوە ئەو مەلا مستەفایەی پارتی، لە دوای راپەڕین و بە تایبەتی دوای ٣١ ئاب، ئیدیعای بۆ دەکات کە گوایە لە سۆڤیەت ئابوری، ئیدارەو ئەکادیمیای سەربازی و زمانی روسی خوێندووە کە هیچی راست نیە و هەر زوو بە زوو لە خۆی بایی بوو، یەکەم شت دژی پرنسیپی حیزبی بوو، گەڕایەوە گوندی بارزان و  دالغەی عەشایری کەوتەوە مێشک و شەڕی لەگەل زێباری و برادۆستیەکان هەلگیرساندەوە. لە راستی ئەمجارە بارزانی هەموو عەشیرەتەکانی بادینان و هەولێری لەخۆی و لە کورد کردە دوژمن. 

کورد ئامادە و توانای شەڕێکی سەرتاسەری نەبوو لە گەل بەغدا، لەم دەمە نەدەبوایە کورد، بە تایبەت گوندنشینەکان، راکێشێ دۆزەخی جەنگ بکرێن. ئەوەتە بە درێژایی شۆڕشی ئەیلول نەتوانرا شارێکی بچوکی وەک کۆیە، شەقلاوە، رەواندوز، هەلەبجە، خانەقین، پێنجوین، زاخۆ، ئامێدی و ... تاد رزگار بکرێت. بە دێژایی ئەم سالانە ژمارەی جاشەکان لە پێشمەرگە زیاتر بووە. بەیانی ١١ ئازاریش بەرهەمی بەهێزی شۆڕش و زیرەکی سەرکردایەتیەکەی نەبوو بەلکو بە پێچەوانەوە بەهێزی حکومەت و زیرەکی بەعس، بە تایبەتی سەدام حوسێن بوو. بەیانەکەش، سەرەڕای پۆزەتیڤی، یەک لایەنە بوو، رێکەوتنێکی دوو لایەنە نەبوو، لە کاتی پاشەگەز بوونەوەو کەموکورتی هیچ گەرەنتیەکی نێودەوڵەتی نەبوو.

 وەک دەرکەوت رژێمی بەعس بەم بەیاننامەیە، لە ناوەوەو لە دەرەوە بەهیز بوو، توانی نەوت خۆمالی بکات، وولات ببوژێنتەوەو خۆی پڕ چەک بکات. 

بەدرێژایی جولانەوە – شۆڕشی ئەیلول، لە ١٩٦١ تا ئاش بەتالی لە ١٩٧٥ بارزانی کتێبەکی نەخوێندۆتەوە، وتارێکی رێک و پێک، لە ئاستی سەرکردەیەکی نەتەوەیی و نیشتمانی، بۆ کۆمەلانی خەلک نەداوە، بە تایبەتی لە ١١ ئازاری ١٩٧٠ تا ئاش بەتالی. لەم کاتە پارتی حوکمی دێ فاکتۆی ئیداری و سەربازی کوردستانی دەکرد، بارزانی هەولی نەدا کۆنگرەیەک و دیدارێکی پان کوردستانی ساز بکات، کێ رێگەی لێگرتبوو؟ بە بڕووای من هیچ کەس و لایەنێک بەلکو عەقلیەتی خێلەکی و دواکەوتووی خۆی بوو. ئەوەتە لەم ماوەیە چەندەها سەرکردەو کەسایەتی بەشەکانیتری کوردستانی تیڕۆرکرد یان ناچار کرد باشور بەجێ بهێلن. ئەوەتە ئێستا نەوەکانی مەلا مستەفا لەسەر هەمان رێباز دەڕۆن.

لە سالانی ١٩٧٠ – ١٩٧٤ بارزانی سەردانی هیچ شارێکی وەک دهۆک، هەولێر، کەرکوک، سلێمانی و ... هتد نەکرد، هۆیەکەی چیە؟ 

لە ماوەی شۆڕشی ئەیلول ئافرەتێک، بە عەمەلی، بەشداری شەڕی چەکداری نەکرد و کەچی ئێستا باسی فەلسەفەی بارزانی و ئافرەتمان بۆ دەکەن! تاکو ئێستا بنەمالەی بارزانی حەز ناکەن و رێگە نادەن ژنەکانیان بێنە ناو کۆمەلانی خەلکی کوردستان کەواتە چۆن مەلا مستەفا داکۆکیکاری ئافرەت بووە؟

بارزانی، بەبێ هیچ هۆیەک، ئاش بەتالی بەو شۆڕشەکرد کە ١٤ سال خەباتی بۆ کرابوو، تەنها بۆ بەرژەوەندی شای ئێران بوو، گەلی کوردی لە هەموو کوردستان مەئیوس و بێ هیوا کرد. هەر میللەتێکیتر بووایە دەبوایە دادگایی بارزانی و سەرانی پارتی بکات و ئەم حیزبە بۆ هەتا هەتایە هەلوەشێنێتەوە. 

لە دوای ئاش بەتال بنەمالەی بارزانی ٣٠ تا ٥٠ ملیۆن دیناری عێراق، بوجەی شۆڕشیان، لەگەل خۆیان برد. ئەوکات یەک دینار بە ٣ دۆلار بوو. 

  ئێستا بە هەمان شێوە کەس نازانی داهات و سامانی کوردستان، بە تایبەت نەوت، چەندەو چۆن خەرج دەکرێت، نا خەرج ناکرێت بەلکو دەدزرێت و دەبرێتە دەرەوە و خەلکی برسی دەکرێت.

زۆرجار دەوترێ بنەمالەی بارزانی خێلەکین، ئەوە راستە بەلام تەنها لایەنە نەگەتیڤەکانی عەشایریان وەرگرتووەو پاراستووە، خێل زۆر رەفتار و هەلوێستی پۆزەتیڤی پاک و جوامێرانەیان هەیە، وەک: جوامێری، پەیمان نەشکاندن، دڵسۆزی، پاراستن و خۆ بەکوشتدان لەسەر ئەو کەسەی دەخالەتت پێدەکات. 

زیندانە نهێنی و دڕندەکانی ئیستای پارتی هەر هەمان سجنەکانی رایات و خەلان و گەلالە و حاجی ئۆمەرانمان دێنێتەوە بیر کە بە بڕیاری مەلا مستەفا نەیارە سیاسی و عەشایریەکانی لەناو دەبران.

زۆر هەولمدا یەک شت، یەک رەفتار و کردەوەی پۆزەتیڤی مەلا مستەفا بارزانی بدۆزمەوە بەلام بەدەسەتی بەتاڵ مامەوە.

ئەو ئاوەی مەلا مستەفا رێشتی ئەوە ٣٠ سالە کوڕەکان و بنەمالەکەی پێی ڵیدەخشێنن، لە مێژە کورد دەلێ "گیا لەسەر پنجی خۆی دەڕۆێتەوە".  

ئەوەندەی من ئاگاداربم تاکو ئێستا، وەک پێویستی و بە جدی، هەولی ناساندنی کەسایەتی و رەفتارو بۆچوونەکانی مەلا مستافا نەدراوە. بۆ لاوازکردنی پارتی و بنەمالەی بارزانی پێویستە هەولی پوچەلکردنەوەی داستانی مەلا مستەفا بدرێت.

لە سالانی ١٩٦١ تا ئاش بەتالی پارتی یەکسانە بە مەلا مستەفا، لە دوای مردنی مەلا مستەفا پارتی واتە بنەمالەی بارزانی.

ڵیرە ئەو وتارە بە پێزەی کاک مەحمود رەزا ئەمین "پارتی و کوستحنی سیاسی" دادەنێمەوە کە هی دیسەمبەری ٢٠١٦ یە و دەکرێ لیستی هەلە و تاوانەکانی مەلا مستەفا و بنەمالەی بارزانی درێژتر و ئەبدەیت بکرێتەوە.