جارێک، لە منداڵیدا، چۆلەکەیەکم بە بەچکەیی گرت. گۆتم، خۆم بەخێوی دەکەم. چۆلەکەش هێدی هێدی لە نێوماندا ڕاهات. دەمخستە سەر سەرم، سەر شانم، نێو باخەڵم، بەسەر سنگمدا هەڵدەزنا و لە کراسەکەمەوە بە جریوە جریو سەری دەردەهێنا. هەندێک جار دەهاتە سەر سفرەی نانخواردن، لە تەنیشتمەوە کەمێک برنج یان ساوەرم بۆ ڕۆ دەکرد و دەستی دەکرد بە خواردنی.

بە خۆمم گۆت، ئێمە جەلالین، منیش چۆلەکەکەمم زۆر خۆش دەوێت، کەواتە ناوی دەنێم "مام جەلال".

 ڕۆژێک، نیوەڕۆ، دایکم خواردنی هێنایە سەر سفرە و منیش پێش دانیشتن بانگی چۆلەکەکەمم کرد: مام جەلال! مام جەلال! وەرە کاتی خواردنە!

باوکم یەکسەر بۆم هەستا. خێرا ڕۆیشت بۆ لای دەرگەکە، تاکێک لە پێڵاوەکەی هەڵگرت، منیش بەحەپەساوی بەرانبەری وەستابووم، تێی گرتم و بەر ڕوخسارم کەوت. لووتم پڕ بوو لە خوێن. ئەوجا بۆم هات تا سزام بدات، وەلێ من بە فێڵبازیی منداڵانە کە لە فیلمی کاوبۆیەکانەوە فیری بووبووم، بەژێر دەستیدا خۆم خزاند و بۆی دەرچووم. ئەو تا سەری کۆڵان ڕای کرد بەدوامدا و بە دەنگی بڵند سوێندی خوارد: "وەڵڵا ملت هەڵدەکێشم".

بە پێی پەتی ڕامکرد بۆ ماڵی نەنکم لە گەڕەکی شێخان.

باوکم ملی چۆلەکەکەی هەڵنەکێشابوو. بردبووی لە باخی مزگەوت بەرەڵای کردبوو.

منیش بە لووتی پژاو و سێ ڕۆژ پەنابەری لە ماڵی نەنکم هەقی خۆشەویستییەکەمم بۆ "مام جەلال" دا.