هه‌ستی خۆ به‌كه‌مزانی لای سه‌ركرده‌كانی كورد
Friday, 23/09/2022, 16:48
كه ره‌فتاری سه‌ركرده‌ی هه‌ڵتۆقیوی كورد ده‌بینیت، یه‌كاوكه ده‌زانیت كه هه‌ستی خۆ به‌كه‌مزانی له ناخیدا چه‌كه‌ره‌ی كردووه، گه‌ر ئه‌و كه‌سه‌ش به خۆی بزانێت یان نا. ئه‌وه‌ی له پرٍێكدا ده‌بێته سه‌ركرده و له ناكاودا به قودره‌تی قادر هه‌ڵده‌تۆقێ و ده‌بێته ده‌مرٍاستی كورد، هۆكاری زۆره و هه‌ر له ده‌رئه‌نجامی ره‌فتار و هه‌ڵویست و بیركردنه‌وه‌ی زۆرێك له ڤیگه‌ره‌كانی كورده له دیاریكردن و هه‌ڵبژاردن و پشتگیری كردنی سه‌ركرده‌ی نوێ به پێی به‌رژه‌وه‌ندی ته‌سكی شه‌خسی و حزبیدا خۆی ده‌بینێته‌وه ، بۆ نمونه ئه‌وه‌ی ده‌ركه‌وتووه ته‌نها بۆ زیاتر ده‌نگهێنانی حزبی بووه نه‌ك زانایی و توانا و لێهاتوویی و لێوه‌شاوه‌یی و زانیاریی هه‌مه‌جۆری هه‌بێت، وه‌كو به‌رزكردنه‌وه‌ی خه‌ڵكانیك به‌دوور له كه‌مترین زانیاری سیاسی و مێژویی و یاسایی بووه، بۆ نمونه بێژه‌ری ئاسایی و به‌ندبێژ و خه‌ڵكی ساده‌ی بێ سواد و كه‌سانی گاڵته‌جار ، ته‌نها بۆ زه‌وتكردنی ده‌نگی خه‌ڵكی بێئاگا له ره‌وتی سیاسی و به‌رژه‌وه‌ندیه‌كانی كورد و له دژایه‌تی ئه‌ویتری ركابه‌ر، بێ ئه‌زمون و بێ زانیاری له مێژووه‌كه‌مان ده‌رده‌خه‌ن، كه ئاگای له بچكوترین كاری سه‌ركرده‌بوون له مامه‌ڵه‌كردن له‌گه‌ڵ پێشهاته‌كان نه‌بێت، به پێی ئه‌و هه‌ڵوێسته مێژوییانه‌ی لایه‌نی به‌رامبه‌ر له مێژوی دوور و نزیكمان هه‌یبووه. ئه‌مه‌ش وه‌نه‌بێت كه ته‌نها له بۆچون و ره‌فتاری فه‌ریكه سه‌ركرده‌كان له به‌رامبه‌ر نه‌ته‌وه‌ی سه‌رده‌ستدا ببینرێت، به‌ڵكو ئه‌مه ره‌فتار و سیاسه‌تی خه‌ڵكه باڵاكه‌شه له‌گه‌ل َهه‌ر لایه‌ن و كه‌سێكی جیهانیشدا ده‌بینرێت، هه‌رچۆنێك بوبێت له مێژوودا به‌رامبه‌ر نه‌ته‌وه‌كه‌مان، ئه‌گه‌ر هه‌ڵوێستی دوژمنكارانه‌یشی نواندبێت و ئاینده‌ی كوردیشی له قورٍٍ گلاندبێت.
ئه‌وا با قسه له‌سه‌ر ئه‌م بابه‌ته وه‌ك ره‌فتار و كرده‌وه و سیاسه‌تی ئه‌و هه‌ڵتۆقیوانه له به‌غدا نه‌كه‌ین كه زۆرێك له بێ ئاگایانه له مێژووی نزیك و دووری كورد ده‌یكه‌ن و هه‌ندێكیان بیروباوه‌ری رێگه‌ی پێ ده‌دات هه‌رچیه‌ك بكات و كوردستان به موڵكی خۆی نازانێت و ئه‌ویتر له دژی لایه‌نی ركابه‌ر خۆی ده‌خاته خانه‌ی نۆكه‌رایه‌تی یار و نه‌یاره‌وه و به زه‌ره بۆ گه‌سه‌كه‌مان ده‌كه‌وێته‌وه ، ئه‌ویتریش بۆ خۆ ده‌رخستن و وه‌كو كه‌سێكی به هه‌ڵكه‌وت هه‌ڵكه‌وتووی ده‌ستی قه‌ده‌ر بوبێته ده‌مراستی كورد له‌م كاته‌دا، بۆیه وا ده‌جوڵێته‌وه.
با له به‌غدا دوور بكه‌وینه‌وه و ته‌ماشای چۆنێتی ره‌فتاری سه‌رانی هه‌رێم له‌گه‌ڵ ناشتنی ته‌رمی شاژنه ئه‌لیزابیسی به‌ریتانی بكه‌ین كه له ئاستی باڵا به‌شداریان كرد و ئه‌وه‌نده توشی زهایمه‌ر بوون و ته‌نانه‌ت یادگه‌یان به‌تاڵه له ره‌فتاری چه‌ند ساڵێكی كه‌می پێش، نه‌ك بیر له‌و كاره‌ساته بكه‌نه‌وه كه ئه‌م به‌ریتانیا به‌سه‌ر كوردی هێنابێت، به‌ڵكو بیر له جه‌وهه‌ری سیاسیه‌تی ئاشكرا و نهێنیی ئه‌مرۆی بكه‌ن كه چۆن مامه‌ڵه له‌گه‌لأ به‌رژه‌وه‌ندیه‌كانی كورد ده‌كات، هه‌ڵوێستی به‌ریتانیا له 16ی ئۆكتۆبه‌ر گه‌واهی سیاسه‌ته‌كانیه‌تی له‌مه‌رٍ كورد دا.
ئه‌مه ته‌نها هه‌ست به خۆكه‌مزانیه و بۆ ده‌رخستنی كه‌سیه به‌دوور له پێویستی سیاسه‌تی گشتی نه‌ك ئه‌ته‌كێتی په‌یوه‌ندیه دیبلۆماسیه‌كان بێت, ئه‌مه له‌ژێرپێ خستنی به‌رژه‌وه‌ندیه‌كان و ئامانجه‌كانی گه‌لی كوردستانه، تۆ بینیوته ئه‌وه‌نده خۆت به كه‌مبزانیت به‌م شێوه‌یه به‌رامبه‌ر وڵاتێك و سه‌ركردایه‌تیه‌كه‌ی ره‌فتار بكه‌یت كه خه‌ونی تۆی له‌گۆرنابێت و، تا ئه‌مرۆش له سه‌ر ئه‌وهه‌ڵویَِسته به‌رده‌وام بێت و ره‌فتاری به‌ریتانیای پاش 16 ی ئۆكتۆبه‌ر له‌مه‌رٍ كورد و بیره‌نه‌وته‌كانی كه‌ركوك و زیانگه‌یاندنیان به كورد و پشتتێكردنی و گرنگیدان به عیراق و یه‌كگرتوویی خاكه‌كه‌ی له‌پێناو به‌رژه‌وه‌ندیه ته‌سكه كۆن و نوێكه‌ی خۆیان ئه‌وه سیاسه‌تیان بێت. ئای كورد كه هه‌میشه یادگه‌ت به‌تاڵه له روداوه‌كانی مێژووی كۆن و نوێ، یان چانسی كورده تووشی سه‌ركرده‌یه‌ك ده‌بێت كه ئاگای له مه‌حموی بێزه‌وانی مێژوه‌كه‌ت نیه. با باش بزانن كه ئه‌م ره‌فتارانه وا ناكات كه ئه‌و وڵات و كه‌سانه رێزت زیاتر لێبگرن و سیاسه‌تیان بگۆرٍن به‌ڵكو ئه‌وان زیاتر له‌وه یه‌كلایی ده‌بنه‌وه كه ئه‌مانه له‌و ئاسته‌دان كه گوێ به‌هیچ ناده‌ن و ئه‌وان هه‌رچیه‌كیان بوێت جێبه‌جێی ده‌كه‌ن، ئه‌گه‌ر له‌سه‌ر حسابی پرسه نه‌ته‌وه‌یی و نیشتمانیه‌كشه‌مان بێت.
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
