بەداخەوە جارێکی تر گەنجێکی تری شارەکەم سەری ئەبێتە شوێن شەقی کوردێکی نەزانی ملکەچی چەند شەددە دۆلارێك. کاتێ ئەم گەنجە ئەیەوێ داوای مافی خۆی بکا، ئەمان دێن و وەك گەلە گورك تێی ئەووروکێن و گەمارۆی ئەدەن و هەرچی سووکایەتی هەیە دوژمنی کورد پێمان ئەکەن، ئەمان لەسەر ئەم گەنجانە خۆیان تاقی ئەکەنەوە و وەك ئەوەی ئەمان نەوت دز و مافیای تریاك و ماددەی هۆشبەر بن و دەستی دوژمنیان گرتبێ بۆ داگیرکردنی ، کوردستان.

ڕەنگە زۆرتر لەوەش ناخۆشتر کاتێ ڕوودواوێکی وا ڕووئەدا و گەنجێ ئەدرێتە بەر شەق و غەزەبی ئەم دەسەڵاتە بەعس ئاسایەی سلێمانی و هەولێر،، کەچی ئەوەندە ناخایەنێ دەرگای ماڵی واڵا ئەبێ بۆ سەردان کردنی چەندین ئەندام پەرلەمان و ئەوانەی بەو دەردەیان بردوە و شکۆیان تێك و پێك داوە..بەڕاستی زۆر مایەی مەراق و بێزار بوونە کاتێ ئەو گەنجە و خانەوادەکەی هەروا بەسانایی دەرگایان بخەنە سەر پشت بۆ چەند کەسانێك کەوا بەشدارن لەتاوانی دەسەڵات و بەشێکن لەو نەهامەتیەی بەسەر خەڵکیان ، هێناوە.

کاکە ئاکاری گەنج هەلێکی زێڕینی هاتە پێش بۆ ئەوەی پێشەوایەتی ئەو ناڕەزایەتیانەی بگرتایەتە ئەستۆ و بەهیچ شێوەیەك نەیهێشتایە ئەو ووزەیەی سەرفی کرد، بە هەدەر بڕۆیشتایە..چونکێ کاتێ ئەو بریندار ئەبێ و دواتر کەناڵەکانی میدیا سەرقاڵی ئەکەن و لە گەرماو گەرمی خۆپیشاندانەکان دووری ئەخەنەوە و پەیتا پەیتا ئەندام پەرلەمانە خرپنەکانی دەسەڵات هاتوو چۆی ماڵی ئەکەن و هەوڵ ئەدەن خاوی بکەنەوە، ئەبوو بە پێچەوانەوە ؛ئاکار پێچەوانەکەی بکردایە و سەرکردایەتی لەدەست نەدایە.

بەداخەوە ئەم گەنجە لەجیاتی ئەو باسی تەنها ئەو 6 هەزار دینارە بکا کە لە جزدانەکەیدا بوە، بهاتایە و باسی ئەجندای ڕۆژانی دوایی بکردایە و هیچ خۆی لە پاڕانەوە و نەبوونی پارە و دەست کورتی خۆی و هاوڕێکانی، نەکردایە. ئەبوو لەجیاتی ئەو قسانە کە دەسەڵات سبەینێ بەچەند گەڵایەك سەری خۆی لەگەڵیاندا ئەقەبڵێنێ، ڕازی نەبوایە بە هیچ شتێ کەمتر لەوەی ئازادی زیاتر بۆ گەنجان و بەشداری پێکردنیان لە بڕیارەکان لە زانکۆ و پەیمانگەکان کە لە سوود و قازانجی خوێندکاران بوایە.