لەدایک بوونیان: بوویە لەدایک بوونی ناکۆکی.

گەورە بوونیان: بووە ھۆی تەشەنەکردنی زامەکان.

کە لە شاخ بوون: بوونە بەڵا بۆ گیانی گوندییەکان.

کە دابەزین: بوونە نەفرەتییەکی درێژ خایەن بۆ شارەکان.

دەڵێی پەڵەیەکی ڕەشن بەڕۆحی سپی نەتەوەکەوە، ھەتاکو دێت ئەم پەڵە گەندەڵە، گەورە دەبێت و گەورە دەبێت، خۆیان زەمینەسازیی گەندەڵ بوون و قین و نەفرەتن، چوونکە دوو ئەندامیان نادۆزییەوە، ڕقیان لەیەکتر نەبێت. 

کلتووری ڕق و نەفرەت، ھەر دەتوانێ لە ڕەگەزی خۆی بەرھەم بێنێ، بۆیە تا دێ: 

 • نەفرەتەکە درێژتر و 

 • قینەکە قوڵتر و 

 • زامەکە بەسۆێتر دەکات.

من تێناگەم، بۆ گەلەکەم لە ڕۆژھەڵات  و باشووردا، حەفتاساڵە ئەم مەتەڵەی بۆ ھەڵنایەت کە ناوی (سەرکردەیەتی) حیزبی کوردییە؟!.

من تێناگەم، دایک و خوشک و ھاوژینی کورد، چۆن دەتوانن، کوڕ و برا و مێردەکانیان، قەبوڵ بکەن، بە:

 ⁃ مێشکێکی گەندەڵ و 

 ⁃ گیرفانێکی پڕ پیسایی و

 ⁃ بەرگێکەوە کە بۆنی ڕۆحێکی ڕزاوی لێدێ!!.

لە ئامێزیان بگرن، ماچیان بکەن، پێیان بڵێن:

 ⁃ ماندوو نەبی: کوڕم

 ⁃ بەخێربێیتەوە: کاکە

 ⁃ چاوڕێت بووم: ئازیزەکەم

چۆن دەتوانی، دایەی کوردی؟!

چۆن دەتوانی، خوشکی کوردی؟!

چۆن دەتوانی، براژنی کوردی؟!

گەل، لێ پرسراوە بەرانبەر بە فەرمانڕانیی: سەرکردەیەتی نیشتمان فرۆش، بەرپرسی خیانەتکار و حیزبگەلی گەندەڵ!!.

سەرنج/

لەگەڵ ئەوپەڕی ڕێز و خۆشەویستیمدا، بۆ ژنانی کوردی نیشتمانپەروەر و ھەموو ئەو گیانە کوردستانیانەی لە پێناوی کوردستانێکی ئازاددا ماندووبوون و گیانیان بەخشی و ئەوانەشیان، کە ئێستا لە مەیدانی تێکۆشانێکی کوردستانیدا، لە پێناو بە دەستھێنانی ئازادی بۆ نیشتمان و بەرھەم ھێنانی سیستەمێکی دادپەروەردا، لە ژێر ئەشکەنجەی حیزبی دەسەڵاتدا، وان لە زیندانەکان، یا لە گۆشەیەکی ئەم نیشتمانە زامدارەدا، وەک قەڵەمێکی ئازاد و تفەنگێکی ئامانجدار کە تەنیا و تەنیا ڕووی لە دوژمنانی کوردە، درێژە بە خەباتە کوردستانییەکە دەدەن.