تیرۆرکردنی ئەم لاوە کەرکوکییە وەرچەرخانی ڕەوڕەوەی فکرو ئایدۆڵۆژیاو ئازادبوونی کۆیلەکان بوو !!، 

 بە تیرۆرکردنی سۆران مامە حەمە هەستانەوەو بەخەبەرهێنانەوەی گەنج وخەڵکی بەش مەینتەتخواردووی ئەم نیشتیمانە ستەم دیدەیەبوو ، بە تیرۆرکردنی گەنجە نەترسەکەی قەڵای کەرکوک بۆ ڕای گشتی وخەڵکی هەڕێم و گشت وڵاتانی دنیای سەلماند کە ئازادی و ڕای ئازاد و ڕۆژنامەنووسی سەربەخۆ و میدیای سەربەخۆ لە ژێر مەترسیدایەو هەڕەشەی گەورەی لەسەرە لە لایەن هەردوو حزبی پارتی ویەکێتیە وە ،کە بەناو دیموکراسن ..بەڵام تەواو ئەو پاشگرەیان بۆ مەرامی سیاسی و حزبی خۆیان قۆستۆتەوە ..پێچەوانەی دیموکراسی و ئازادین .

سۆران دەنگێک بوو بۆهەموو سەردەمەکان، ڕەنگێک بوو بەبێ جیاوازی ،

بەگژاچوونەوە بوو بە ڕووی بەرپرسە گەندەڵ و فەسادەکانی ناوچەکەیدا..دەنگێک بۆ ئازادی بوو .

هاوارێک بوو لەبری هەموو هاوارە کپکراوەکان ..!

سۆرانەکەمان: ڕێچکەیەک بوو بۆ گرتنە دەستی هەزاران قەڵەمی تیژکراواوی تر ... 

سۆرانەکەمان : خوێنێکە بەردەوام لێی دەچۆڕێت تائەو کاتەی دەسڵاتی کوردی و حکومڕانانی هەرێمی کوردستان ڕەوڕەوەی حکومداریان دەگۆرن و ئازادیان پێ قبوڵ دەبێت .

خامەیەکی تیرۆرکراو لە بری من ئێوەو هەمووان .

سۆرانەکەمان : ناو و یادت کوێرنابێتەوەو خامۆش نابێت.

سۆرانەکەمان: نەیویست قەڵەمەکەی و ویژدانی بفرۆشێت و خۆی پێ رزگار بکات .

شه هیدی قەڵەم سڵی نەدەکردەوە ،سەرە ڕای ئەوەی هەڕەشەی تیرۆری لەسەربوو ، بەردەوامی بە ڕەخنەو کاری ڕۆژنامەنوسیەکەی دابوو ، سۆران قوربانیەکی تری دەستی دەسڵات وحزبی کوردیە !؟

بەڵام سۆران نەیدەزانی لە دوای تیرۆرکردنی کۆمەڵێک بەناو نوسەرو ڕۆژنامەنوس یاری بەخوێنەکەیەوە دەکەن و کەیسی تیرۆرکردنەکەی بۆ لەبەرژەوەندی خۆیان و قەڵەمەکانیان بەکار دەهێنن وگۆقارو ڕۆژنامەکانیان پێ پڕ فرۆش دەکەن ...!، دەبنە کۆیلەی حزب و قەڵەمەکانیان بۆ پاڵپشتی خوێنڕێژەکان بەکاردهێنن ..،

 سۆرانەکەمان : لە سایەی دەسەڵاتی کوردیدا شەهیدکرا و کەیسەکەیشی هەر لە سایەی دەسڵاتی حزبی کوردیدا غەلق کراوە ..!، 

کاتێک (سۆران) خوێنی ڕژاو تیرۆرکرا زۆرمان وت ئەمە زەنگێکی مەترسیدارە بۆ پانتای ئازادی وڕۆژنامەگەری وکاری ڕۆژنامەنوسی .

ئەوەتا ئێستا مەترسیەگەورەکە دەرکەوتووە ، کە زیندانەکانیان پڕ کردوە لە ڕۆژنامەنوس وچالاکوان و ئازادیخوزان ، تۆمەتی گەورە گەورەیان دەدەنە پاڵیان و جارێ بەسیخورو جارێک بە تێکدەر حکومیان دەدەن..

دادگاو یاسایان کردۆتە شوێنی حزبی و لەژێر چەپۆکی ئەواندا کاری پێدەکرێت ..! 

روون و ئاشکرایە بۆ هەموو لایەک هیچ دەسڵاتێکی حکومڕانی ستەمکارو زاڵم و خوێن ڕێژ تا سەر لە دەسڵات و پلەو حکومکردندا نەماوەتەوەو بەر چەپۆکی گەل کەوتووە ، داتەپیوبوون و بۆیە ئەم حزب و دەسڵادارانە هەرێمی کوردستانیش بۆیان ناچێتە سەرو مێژووی پیسیان و شۆرشی درۆزنانەیان هەر لەناو دەچێت و دەسڕێنەوە لە مێژووی گەلدا .

چونکە ئەمانە بونەتە کەڵەگاو تێکدەری ڕەوشی ئابوری وئازادی و دەرونی خەڵکەی کوردستان .

تاوەکو ئەم زۆردارانەو نادادانە لەسەر حکوم بن ، لەهەر شوێنک دەنگێکی بوێر و نارازی هەبێت ..ئەوە دەسڵات هەوڵی داوە برینێک لە جەستەی دروست بکات وسەر ئەنجام دیکوژێت و کپی دەکات ..و بکوژیش لە کۆمەڵگای کوردیدا جێگای کراوەتەوەو پاڵپشتی لێ دەکرت ..

سۆرانەکامان: نە وون دەبیت نە لەیاد دەچتەوە ،ئەوەتا سەدان قەڵەم چرای ئەو ڕێگەیەتن ، کە خوێنی خۆت کردە قوربانی..، وەخاوەن قەڵەمە ڕاستەکان قەڵەمەکەیان فڕێ نادەن و خامەیان پڕ ئازادی دەبێت .