رۆژی 2ی حوزەیران (سایە فاتیح) بە ئۆتۆمۆبێلەكەی خۆی لەسلێمانیەوە، بەرەو بازیان كەوتە رێ و لەماڵی مامی بەگوللەیەك كۆتایی بەژیانی خۆی هێنا و بەو مەرگەی بەدەیان پرسیاری وەڵام نەدراوەی بەجێهێشت، بەو بەڵگەنامانەی كە لەدوای خۆی بەجێی هێشتووە، دەریدەخات، كە جیابوونەوە لەهاوسەرەكەی (توانا عوسمان) هۆكاری سەرەكی بووە لەتووشبوونی بەبێئومێدی لەژیان و پێشوەختە بڕیاردان لەخۆكوشتن و بەجێهێشتنی كۆرپەیەكی تەمەن 3ساڵ و حەوت مانگ، كە دوای مانگێك تێپەڕ بوون بەسەر رووداوەكەدا، رۆژانە چەند جارێك سۆراخی دایكی دەكات.

سایە و هاوسەری پێشووی لەرێی هاوڕێیەتی و خۆشەویستیەوە لەساڵی 2003 دا، هاوسەرگیرییان كردووە، بەوتەی توانا و هاوڕێكانیشیان لەچوار ساڵی یەكەمدا گرفتی ئەوتۆیان نەبووە و گرفتەكانیان زیاتر لەدوو ساڵی دواییدا سەریهەڵداوە، دوای ئەم روداوە بەهۆی نزیكیان لەناوەندی رۆژنامەوانی و رۆشنبیرییەوە، زیاتر رووداوەكە هەستەوەرە، چونكە هاوڕێیەتی نێو ناوەندەكە لێنەگەڕاوە، وەك پێویست تیشكی بخرێتە سەر و لەئەنجامدا، ئەگەر ئەو ژنە زوڵمی لێكرابێ، باشتر بخرێتە بەردەم رای گشتی.

بەوتەی بەڕێوەبەری گشتی بەدواداچوونی توندوتیژی دژ بەژنان لەسلێمانی “لەم وڵاتەدا بەهەزاران سایە و توانا هەن، هەمان كێشە و هەمان گرفتی ژیان ئازاریان دەدات و كێشەكانیان بەچارەسەر ناگات، بەڵام لەبەر ئەوەی ناناسرێن، نابنە باس”.

باس لەوە دەكرێ كە سایە لەرووی دەروونیەوە ئازاری چێشتبێ، تا كار بگاتە ئەوەی خۆی بكوژێ، ئەوەش لەچوارچێوەی ئەو داوایەدا باس كراوە كە بنەماڵەكەی لەرێی دایكیەوە تۆماریان كردووە، بەڵام براكەی سایە رازی نەبوو لێدوان بدات، تا لێكۆڵینەوە تەواو دەبێ، سەرلەبەری روداوەكەش بەهۆی خۆكوشتنەكەیەوە ئاڵۆز بووە، ئەگەرنا جیابوونەوەیەكی ئاسایی هەر ژن و مێردێك بووە، كە بەدەیان حاڵەتی وا رۆژانە روودەدات.

دوای رووداوەكە 2 كەس دەستگیر كران

دوای رووداوەكە بنكەی پۆلیسی بازیان كە شوێنی رووداوەكە بووە، دەستیكرد بەلێكۆڵینەوە و پاشان فایلی لێكۆڵینەوە كەوتە دادگای سلێمانی.

دایكی سایە بەناوی (ئ) لەدادگای لێكۆڵینەوەی سلێمانی داوای یاسایی لەسەر هەریەكە لە (توانا عوسمان) و (ژ) كچە مامی سایە تۆماركردووە، بەتۆمەتی خیانەتی هاوسەریی و هاندان بۆ خۆكوشتنی سایە، بەپێی مادەی 408 بەبڕیاری دادوەر بۆ ماوەی چەند رۆژێك دەستگیركران و پاشان بەكەفالەت ئازادكران، ئەمە جگە لەوەی (ژ) لەسەرەتای رووداوەكەدا بۆ ماوەی چەند رۆژیك لەشێڵتەرێكی ژنان بۆ پارێزگاریكردن لەژیانی لەسەر داوای كەسوكاری خۆی، داڵدەدرا، بەوتەی كەسێكی نزیكی خۆی “بردنی (ژ) بۆ ئەو شەڵتەرە بۆ ئەوە بووە، نەوەك لەگەرمەی رووداوەكەدا زیانی پێبكەوێ، بەپێی ئەو كێشانەی كە پێشوتر هەبوون”. وتیشی “چونكە ئێمە بڕوامان بەپاكی ئەو كچە هەیە و مێردەكەی خۆی (ع) هیچ گومانێكی لێی نیە و تەنانەت پارێزەری بۆ گرتووە، هیچ جۆرە كێشەیەكیش لەنێوان ئەو و مێردەكەیدا رووینەداوە، ئەگەر یەك تۆز گومانمان بكردایە ئەو ژنە بەو شێوەیە، لەماڵی خۆیدا بەرگری لێنەدەكرا”.

هەوڵدان بۆ گۆڕینی ئیفادە و بە لاڕێدا بردنی كەیسەكە

بەپێی باسەكان لەبنكەی پۆلس و دادگاشدا، ئەگەرچی دادوەر تائێستا هیچ لێدوانێك نادا، هەوڵ هەبووە بۆ بەلاڕێدا بردنی كەیسەكە، بەڵام لایەنەكانی كە ئیفادەیان هەبووە لەو كەیسەدا ئامادە نەبوون هیچ لەمبارەیەوە بڵێن.

لەكەیسی (خۆ كوشتنی) سایەدا، كە تارۆژانی دوایش گومان هەبوو (خۆكوشتن) بێ یان (كوشتن) بەڵام وردە وردە بەپێی ئەو زانیاریانەی لەدەزگا پەیوەندیدارەكانەوە دەستدەكەون، بەلای (خۆكوشتن) خەریكە یەكلایی دەبێتەوە، عەمید (سەركەوت) بەڕێوەبەری بەدواداچوونی توندوتیژی دژ بەژنان لەسلێمانی، دەڵێت “ئەو پەنجەی سایە كە دەمانچەكەی پێ تەقاندووە، بەپێی بەدواداچوونمان بۆ راپۆرتی پزیشكی داد، شین هەڵگەڕاوە و سوتاوە، ئەمەش نیشانەیەكە لەنیشانەكانی خۆكوشتنی، چونكە ئەوەی دەمانچە بەخۆیدا دەتەقێنێ، تووشی ئەو حاڵەتە دەبێ”.

نهێنی لەو دەمانچەیە دایە، كە سایە لەناو جانتاكەیدا دەریهێناوە، كاتێك لەدوای نیوەڕۆی رۆژی رووداوەكەدا گەیشتۆتە ماڵی مامی، نازانرێ سەرچاوەی ئەو دەمانچەیە كێیە و لەكوێوە بەدەستی هێناوە، بەوتەی هاوسەری پێشووی سایە، دەمانچەكە لەجۆری بیكارۆف بووە، حەوت گوللە دەخوا، كەسی شارەزا دەتوانێ، گوللەیەكیش لەدەمەكەیدا دابنێ و لەكاتی تەقاندنیدا، ئەو گوللەیە بتەقێتەوە، بەوتەی ئەو، سایە بەو تاكە گوللەیە مردووە، كە دەشێ كەسێكی شارەزا بۆی ئامادە كردبێ، هەر حەوت گوللەكەی تێدا ماوەتەوە، ئەویش دەپرسێ كێ ئەو دەمانچەی داوەتێ و پێیوایە، لەرێی گفتوگۆ تەلەفۆنیەكانەوە، بتوانرێ ئەمە بزانرێ، بەوتەی پۆلیس داوای گفتوگۆی تەلەفۆنی شەش مانگی دوایی سایە، لەئاسیاسێڵ كراوە.

چوونی سایە بۆ ماڵی مامی، ئەویش نهێنیەكی زۆریی تێدایە، مام هادی، مامی سایە دەڵێت “لێم روون نییە سایە بۆ هات”. هەرچەندە زۆر لەوتەكان دەڵێن “سایە چووە (ژ)ی كچە مامی بكوژێ و ئینجا خۆشی بكوژێ، بەڵام ئەوەی نەكردووە و تەنیا خۆی كوشتووە”، بەپێی ئەو داوایەی كە دایكی سایە لەدادگای سلێمانی تۆماری كردووە دژ بەهاوسەری پێشووی سایە و كچە مامی (ژ) گوایە ئەوان تاوانبارن بەخیانەتی هاوسەریی، كە هاندەر بووە بۆ خۆكوشتنی سایە. بەڵام ماڵی (مام هادی) ئەمە رەتدەكەنەوە و دەڵێن “سایە بەهیچ جۆرێك نەهاتبوو كەسێك لێرە بكوژێ، چونكە ئەگەر ئەوەی بویستایە دەیتوانی هەر هەموومان بكوژێ”.

سەبارەت بەو تۆمەتەش كە دەخرێتە پاڵی، (ژ) رەتی دەكاتەوە كە هیچ جۆرە شتێكی لەو شێوەیە روویدابێ و دەڵێت “ئێمە ئامۆزا بووین و هاوڕێی منداڵین، دواتر هەندێك كێشە كەوتە نێوان خۆی و مێردەكەی، من هەموو هەوڵێكم دا كە بۆی چارەسەر بكەم، رەخنەم لەهەردووكیشیان هەبوو، بەڵام لەهەندێك شتدا كە وتم هەق بەمێردەكەتە، كەوتە تاوانباركردنی من و بەر لەسێ مانگ پێش رووداوەكە، ئێمە پەیوەندیمان پچڕا، چونكە باوكم زانی و گوێی لێبوو، كە سایە دەیوت، تەلەفۆنت بۆ مێردەكەم كردووە، باوكم گوتی، با ئاسیاسێڵ ئەو پەیوەندییانە بگرێ، ئەگەر وابوو من سزای كچەكەم دەدەم، ئیتر سایە وس بوو، چونكە هیچی وای نەبوو، تەنیا خەیاڵی خۆی بوو، لەو كاتەوە پەیوەندیمان پچڕا”.

ئەو كچە مامەی سایە، دەڵێت “لەرۆژی رووداوەكەدا كە هات بۆ ماڵمان، هەندێك گلەیی كرد لەژیانی خۆیی و وتی لەگەڵ هاوسەرەكەم جیابوومەوە، خشە خشێكی لێوە هات، كە هاتە پێشەوە بینیم دەمانچەیەكی پێیە، لەسەر سەری خۆی رایگرت و گوتی خۆم دەكوژم، منیش هاواری باوكمم كرد، چونكە هێزم نەشكایە سەری و باوكم هات دەمانچەكەی لەدەستی وەرگرت و لەناو كتێبخانەكەی دانا. سایەی لەتەنیشت خۆیەوە دانا و زۆر ئامۆژگاری كرد”. مام هادی دەڵێت “پێموت لاپەڕەیەكی نوێ لەژیانی بكاتەوە و دەوامی خۆی بكات و خەریكی ژیانی خۆی بێ و تەڵاق شتێكی وا گەورە نییە، لەوانەیە ژیانی داهاتووی خۆشتربێ و زۆر قەناعەتی هات”.

بەڵام وەكو دەڵێت “لەچاو تروكانێكدا هەستایەوە سەرپێ، تەنیا ئەو دەستەیم لەبەرچاوە كە بردی بۆ دەمانچەكە و چووە دەرەوە، تا گەیشتمە سەری، كەوتبوو”. دەشڵێت “من یەكسەر دەمانچەكەم هەڵگرت و گوللەكانیم لێ بەتاڵكرد، وتم نەوەك لەخۆی بداتەوە، حەوت گوللەی تێدابوو، بەڵام كە تەماشام كرد، زانیم كە كۆتایی ژیانیەتی، ئەوەبوو دواتر بەرەو سلێمانیان برد و لەرێگادا تووشی رووداوی ئۆتۆمۆبێلیش بوو، گیانی سپارد”.

بەوتەی بەڕێوەبەری بەدواداچوونی توندوتیژی دژ بەژنانی سلێمانی، گرفتی سەرەكی لیكۆڵینەوەكان لەكوردستان، تێستكردنی جێ پەنجەیە لەكاتی رووداوەكاندا، بەوتەی ئەو، جاری وا هەیە، ئەو تێستە دەنێردرێتە ئێران یان وڵاتانی دیكە و دوای چەند مانگێك دەگەڕێتەوە، یاخود خەڵكەكە كە رووداوێك دەبێ، هوشیاری نییە و پاش تاوانەكە چەندان كەس دەست لەكەلوپەلەكان دەدەن، چەند دەستی لێدرابێ لێكۆڵینەوە و ئەنجامەكانی ئاڵۆزتر دەبن، بۆیە وتی “ئەگەر مامی سایە دەستی لەدەمانچەكە دابێ، ئەمەش بۆ لێكۆڵینەوە ئاڵۆزی دەهێنێتە پێشەوە”. ئەوەبوو مامی سایە تەئكیدی كردەوە كە دەستی لەدەمانچەكە داوە و گوللەكانی بەتاڵكردووە.

دوای ئەوەی سایە و هاوسەرەكەی دەست بەمامەڵەی جیابوونەوە دەكەن، كە بەوتەی هاوسەرەكەی، جیابوونەوەكەیان زۆر مەدەنیانە و ئارەزوومەندانە بووە، دەڵێت “جیابوونەوەیەكی خولعی ئارەزوومەندانە بوو، ئەوەی كە من پێمبەخشی بەوتەی هەموو ئەوانەی ئامادەبوون، كەس نەبووە بیبەخشێ، سێ دەفتەر دۆلار و ئۆتۆمۆبێل، ڤیزای ئەوروپاشم بۆ دابینكرد، تا لەوێ لەگەڵ منداڵەكەیدا پشوو بدات، یان ئەگەر بیەوێ بشمێنێتەوە، ماوەیەك ماڵەكەشم بۆ چۆڵكرد”.

هاوسەری سایە، دەشڵێت “لەكاتی جیابوونەوەمان حەوت كەس ئامادەبوون، برای من و برای ئەویش ئامادەبوون، هەتا گوتی من دەمەوێ شەرەفی ئەوەم هەبێ خۆم یەكەمجار ئیمزای كەم و خۆی ئیمزای كرد، بەر لەمن”. ئەو گوتیشی “وا بزانم تەڵاقیش تاوان نییە، ئەگەرنا كورتەنامەكانیشم ئێستا لەدادگان، كە ئامادەبووم هەموو هاوكاریەكی بكەم، بۆ ئەو تاوانەی كە دراویشتە پاڵم، ئەوا لەدوا نامەیدا باسی من دەكات”.

لەو ماوەیەدا كە سایە لەماڵەكەدا بەتەنیا ماوەتەوە، بەوتەی هاوسەرەكەیی و كەسانی دیكەش، خەمۆكی پێوە دیاربووە، هەر وەك لەدوانامەكەشدا، لەبارودۆخی دژواری خۆی دەدوێ، ئاماژە بەپێشوازیكردن لەمەرگ و خۆكوشتنی خۆی دەكات. هاوسەرەكەی دەڵێت “زیاد لەسێجار برای سایەم لەو بارودۆخەی ئاگادار كردۆتەوە، كە ئاگایان لێی بێت و گرنگی پێ بدەن، تا وتومە “با نەبێ بەمەلەوانە درۆزنەكە، هەر ئاماژە بەخۆكوشتنی خۆی بكات و كەس بڕوای پێنەكات”.

ماڵی مامی سایە كە شانۆی خۆكوشتنەكەی بووە، لەو بڕوایەدا بوون، ئەگەر سایە لەو ماوەیەدا، كە بەتەنیا ماوەتەوە، دڵنەوایی زۆریی بكرایە لەوانەیە بارودۆخەكە بەشێوەیەكی دیكە بووایە.

بەپێی دوانامەی بەر لەمەرگی سایە، كە وێنەیەكی لای (كوردستان ئۆنلاین)ە، تێیدا ئاماژە دەدات بەوەی كە هاوسەرەكەی، هاوسەرێكی باش بووە بۆی، ئەو خۆی كەسێكی مونفەعیل بووە (بەنووسینی خۆی) و نەیتوانیوە زاڵبێت بەسەر خۆیدا و كێشەی بۆ هاوسەرەكەی دروستكردووە.

دوای ئەوەی هاوسەری پێشووی لەسەفەرێكی كورت دەگەڕێتەوە، سایە نامەیەكی دەگەیەنێتێ، هاوسەری پێشووی و زۆرێك لەوانەی لەلێكۆڵینەوە و رووداوەكەوە نزیكن، پێشبینی دەكەن، كە ئەم نامەیە سەرلەبەری پێشبینیەكانی پێشوو بگۆڕێ، كە زیاتر مەزەندە دەكرا، هاوسەرەكەی بەشێو‌ەیەك لەشێوەكان تاوانبار بكرێ بەهاندان بەو كوشتنە، جگە لەوەی لەلایەن بنەماڵەی سایەوە، هەندێك نووسین و تۆمار بۆ بەهێزكردنی داواكەیان دراوەتە دادگا، بەڵام بەپێی وتەی هاسەرەكەی “ئەم نامەیە ئەو بەڵگانە هەمووی هەڵدەوەشێنێتەوە”، هەروەها دەڵێت “لەم نامەیەدا دان بەوەدا دەنێ، كە من نەك هەر هاوسەرێكی چاك بووم، بەڵكو هەموو ئەركەكانم وەك مێرد و برا و باوك بەرامبەر ئەو جێبەجێ كردووە”. هاوسەری سایە، نكوڵی لەوەش ناكات، كە لەدوو ساڵی دواییدا كێشەی زۆریان هەبووە، تا لەدواییدا ئەو ئامادە بووە، هەموو هاوكاریەكی بكات، بەڵام ئامادەنەبووە وەك هاوسەر لەگەڵیدا بمینێتەوە، هەندێك لەهۆكارەكانیشی باسكرد، بەڵام ئێمە نامانەوێ لێرەدا ئاماژەیان پێبدەین، بۆ رێزگرتن لەگیانی و لەكاتێكدا خۆی ئامادە نییە تابەرگریی لەخۆی بكات.

لەبڕگەكانی ئەو نامەیەدا سایە زۆر بەروونی ئاماژە بۆ مەرگ و خۆكوشتنی دەكات، بەڵام خۆی لەزۆر لەكێشەكان بەرپرس دەكات و داوای لێبوردن لەهاوسەرەكەی دەكات.

هێشتاش هەر پرسیارە، كە ئاخۆ لیكۆڵینەوە بەكوێ دەگات و ئەو نامەیە چی دەگۆڕێ؟ یان بەڵگەكانی دیكە كە لەلایەن كەسوكارییەوە دراونەتە دادگا، هێزیان لەبەرامبەر هێزی ئەو نامەیەدا چەندە؟ بەڵگە و ئاسەوارەكانی دیكەی رووداوەكە چی دەڵێن؟.