ویستم ..

هۆنراوەیەکت، بۆ بنووسم

پیتم لکاند بە پیتەوە

وشەم، لە وشە گرێدا

هۆنراوەکە

بە رستەیەکی پرسیاریی 

کۆتایی هات

هەیە وەك تۆ، شەکرەژن بێ ؟

وشە بە وشەی هۆنراوەکەم

کوژاندەوە ..

تەنها، دوا رستە مایەوە.

بەبیرت دێت.. بۆ دیدارت

چەند کۆڵانم، دەگرتە بەر؟؟

بڕوات هەبێت

هەر لەڕێگا، دەم بە دۆعا

دەم بەنزا کە نەتبینم

وامدەزانی زۆر بتبینم

کانی ئیشقمان وشک دەکا.

میلەکانی کاتژمێری

مەچەکی دەستی چەپم

لە راستەوە، بەشێوەیەکی بازنەیی

زەمەن دەبڕن.

هیچیان، پێش ئەوی دیکەیان ناکەون.

هەروەکو چۆن، ترپەی دڵم

پێش ترپەی دڵت ناکەوێ.

کە، دان دەدەم بە نەورەس

حەزدەکەم

نەورەسە تەنهاکان بیچنن

تا هەست بە تەنیایی نەکەن.

وا هەست دەکەم

تەنیایی .. کوشندەتربێت لە جەنگ .

 

ساڵانێکە لێناگەڕێی

شارای شادی کۆمەك بکەم

خەرمانی خەم بەبا بکەم.

شارای خەمم، پێشەن دەکەی!

خەرمانی شادیم، زەوت دەکەی.

دەلێمگەڕێ ..

پشوویەك بەم.

کە تینوو بم  

( ئاوە خوێڕی* ) دەربەندیخان

هەرگیز، بە سیروان ..

 ناگۆڕمەوە.

ئاوەخوێڕی دەربەندیخان ، لەبەر ئەوەی کەس ئیستفادەی لێناکات بۆ کشتوکاڵ یەکسەر تێکەڵ بە سیروان دەبێت بۆیە خەڵكی ناوچەکە  لەرقا ناویان لێناوە ئاوەخوێڕی،ئەو ئاوە هەرچەندە سەر بە       ( باوەنور ) بەڵام وەك هەڵەی باو ناودەبرێت بە ئاوەخوێڕی دەربەندیخان .