مەلا عەبدولی سەلەفی ئەڵێ؛ گەر مزگەوتەکان ناکەنەوە ئەوە با بازاڕ و مۆڵەکانیش نەکرێنەوە و دابخرێن. چونکە ناکرێ تەنها مزگەوتەکان دەرگاکانیان کڵۆم بدرێن، بەڵام مۆڵەکان و بازارەکان بکرێنەوە.

سەد لە سەد لەگەڵ ئەم مەلا خوێندەوارەم کاتێ پێی وایە مۆڵ و بازاڕ نرخ و بایەخ و گرنگیان یەکسانە بە مزگەوتەکان.

دیارە خۆ ئەم مەلا لەخۆیەوە نایەت ئەو فتوایە دەربکات، هەڵبەت لێکدانەوەی تەواو و گونجاوی بۆ کردوە و گەیشتۆتە ئەو باوەڕەی، مزگەوت و ماڵی خوا کە دیارە تەنها لای باوەڕداران وایە ، ئەگینا هەر یەکەیان ناو و نیشانێکی خۆی هەیە. نابێ دابخرێن، گەر نا ئەچێتە موحەرەماتەوە.

با مزگەوتەکان بکرێنەوە چونکە ئەگەر دابخرێن ئەی کێ نزا و پاڕانەوە بۆ سوپای ئەردۆگانی ئیسلام بکات و بەسەر هێزەکانی پەیەدە و یەپەگەی کافر و دۆستی ئەمریکادا سەریان بخات. ئەی کێ ئایەتی فەتحیان بۆ بخوێنێتەوە. 

با مزگەوتەکان بکرێنەوە بۆ ئەوەی موسڵمانانی کورد بێ بەش نەبن لە بەشداری کردن و لە فتوای دژ بە وڵاتی چین کە ئیسلامەکانی خۆی ئەچەوسێنێتەوە و ناهێڵێت هۆرینگاکان ئایینی خۆیان پەیڕەو بکەن

با مزگەوتەکان بکرێنەوە بۆ ئەوەی مەلا عەلی قەرەداغی و چنگیانی و مەزهەر و ئەوانی تر ڕێنیشاندەری موسڵمانی کوردبن بۆ ئەوەی سەرمایە و پارەکانیان لە دەوڵەتی تورکیای ئیسلامیدا، سەرف بکەن.

با مزگەوتەکان بکرێنەوە بۆ ئەوەی موسڵمانانی کورد بتوانن لە کاتێکی ناخۆشی وەك ئەوەی بەسەر برا ئیخوانیەکانمان هات لە میسر، دکتۆر موسەناکان بتوانن داکۆکیان لێبکەن و دوعای سەرکەوتنیان لە ڕابعە عەدوی بۆ بکەن.

با مزگەوتەکان بکرێنەوە تا ووتار بێژ وجومعەبێژ هانی موسڵمانی لاو و گەنجی کوردستان بدەن، نەبن بە پەکەکە و لە جیاتی ئەوان سیرات لسموستەقیم هەڵبژێرن ببن بە داعش و ئیخوان و ئەنسار و بەشداری جیهاد بکەن.

با مزگەوتەکان بکرێنەوە تا مەلا دڵسۆزەکانمان فێرمان بکەون، کە چۆن زەردەشتیی ئایین نییە و هی ئاگرپەرستان و فارسە کۆنەکانە، با فێرمان بکەن سەلاحەدین سەرکردەیەکی مەزنی کورد بووە و شانازی بە ئیسلامبوونی خۆیەوە کردووە.

با مزگەوتەکان بکرێنەوە تا مەلا و ڕەوانبێژەکانمان فێرمان بکەن شەرەفی پیاو لای ئافرەت و ژنەکانیانە، خاك و نیشتمان هیچ نییە هەمووی هی ڕەبولعالەمینە هی ئەو موسڵمانانیە کە یەکێکی وەکو ئەردوغان رابەرایەتی دەکات، هەروەها هەر کاتێ خوشك و دایکمان گومانیان لەسەر بوو، بیانکوژین.

با مزگەوتەکان بکرێنەوە وهاوڵاتی کورد فێری ئەوە بکەین، کەچۆن دەست نوێژ بگرن و چۆن کاتی خۆی ئەسحابەکان بە قاچی ڕاست هەنگاویان ناوە و دەستی چەپیان بەکارهێناوە بۆ پاکژکردنەوەی دواوەی خۆیان لەکاتی تارات، ئەوەی دەست و قاچی چەپی بەکارهێنابێ، قبوڵ نییە و ئایینەکەی خێری نییە.

با مزگەوتەکان بکرێنەوە بۆ ئەوەی شاری ڕۆشنبیری حوسەینیەی لێ ئاوەدان بێ و دڵی ئێرانمان لێ نەیەشێت. با هەوڵ بدەین شێخ نەهرۆی کەسنەزانی لەڕێگای ئەم تەریقەتەوە موچەی فەرمانبەرەکانمان بۆ دایبین بکات.