به‌رله‌وه‌ی بكوژرێم یان بگیرێم یان هه‌رشتێكی تر...

ده‌مباش مه‌سرۆر بارزانی..

ئه‌ز ژ دل هیڤیدارم تو باش نه‌بی و ژ هه‌ر ده‌مه‌كێ زێده‌تر وێران و هلوه‌ریای بی خرابتر ژ مه‌ هه‌موو گه‌لێ هه‌رێمێ

جه‌نابت ده‌ڵێت تاوانبار و دز و ته‌قینه‌ر و سیخور و بكوژی به‌رپرسان

و جه‌نابی بابت ژی ده‌ڵێت نابێت كه‌س سه‌ره‌وه‌ی یاسا بێت

و جه‌نابی یاساکەی تۆش به‌ چه‌كۆچی ئێوه‌ و كه‌له‌مچه‌ی توركی زیندان و ڕه‌شچاله‌كانی ئێوه‌ی پڕ كردووه‌ له‌ كه‌سانی هه‌ره‌ به‌شه‌ره‌ف و به‌ویژدانی ئه‌م مله‌ته‌ مه‌زلوم و برسیه‌

دزانی ده‌مێ تو و بابێ ته‌ دبێژن یاسا چی دهێته‌ هزرا گه‌لێ مه‌زڵوم؟! 

عه‌بدلخالق مه‌عروف دێته‌ بیری مرۆڤ، كه‌ له‌سه‌ر نویسینی كتێبێك له‌ژێر یاسای تو و باوكت تیرۆر كرا

منێك دێته‌ بیرم كه‌له‌سه‌ر كتێب خوێندنێك له‌ رۆژی جیهانی مافی مرۆڤ دا ده‌ستگیركرام و 25 رۆژ له‌ ژورێكی تاكه‌كه‌سیدا زیندانی كرام.. له‌ ناوه‌ندی بازار ڕفێنرام و ئه‌شكه‌نجه‌ درام و دادگا هیچی پێ نه‌كرا

زه‌كی ئامێدی دێته‌ بیری مرۆڤ كه‌ له‌سه‌ر بیركردن و ڕای جیاواز تیرۆر كرا و لاشه‌ی له‌تكراوی ڕاده‌ستی تورك كرا

سادق عومه‌رسندی دێته‌ بیری مرۆڤ كه‌ له‌به‌ر كۆیله‌نه‌بونی بۆ تۆ و ده‌وله‌تی ترك تیرۆر كرا له‌ژێر یاسای جه‌نابت

تیرۆرا عه‌لی شه‌عبان ئامێدی و زارۆكێن وی دهێته‌ بیرا مرۆڤی.. كۆ هه‌تا نوكه‌ ژی یاسایا ته‌ شه‌رمه‌زارێ وێ تاوانا نه‌مرۆڤانه‌یه‌

یا ئازاد سه‌رۆكانی و یا ژ 92ێ تا 2000ێ كو ڕۆژانه‌ جه‌نازێن كه‌سێن هزر و بیر جودا ل كوچه‌كۆلانێن ده‌ڤه‌رێن به‌هدینان دهاتنه‌ دیتن، ب هزاران وه‌ڵاتپارێزێن سه‌ر ب حه‌ره‌كه‌تا نه‌ته‌وه‌ییا پارتا ئازادا كوردستانێ و ب سه‌دان گه‌ریلایێن ئه‌سیر كو هه‌می ژێر ئه‌شكه‌نجێ هاتین كوشتن د ڕه‌شچاڵێن ته‌ و بنه‌ماڵا ته‌ ل زیندانا ئاكرێ و مه‌سیفی و ڕه‌شچاڵێن یاسایا ته‌ و بنه‌ماڵا ته‌دا... یاسا..؟ 

یاسایا بنه‌ماڵا ته‌ ئه‌وه‌ یا ته‌ دگه‌ل ڕێناسێ زه‌حمه‌تكێشان كری، یا ته‌ دگه‌ل ڕه‌ئوف ئاكره‌یی كری، یاسا ئه‌وه‌ یا وه‌ دگه‌ل نه‌زیری كری ل سێمێلێ ب ئه‌شكه‌نجه‌ك وه‌حشیانه‌ كو پاشی ژی جه‌نازێ وی وه‌ سۆتی...

تو نوكه‌ هاتی بۆ كیش مرۆڤێ بێ مێشك و ئه‌بله‌ه به‌حسا یاساێ دكه‌ی... یێ كۆكا وه‌ ناس نه‌كه‌ت كۆ ماڵباتا من هه‌موو ته‌مه‌نێ خۆ لسه‌ر ڕێبازا دیكتاتۆریا وه‌ ده‌رباس كری، جا ئه‌وێ دگه‌ل وه‌ دژ نه‌بیت ئه‌وی قه‌ت هایا وی ژ خیره‌ت و شه‌رافه‌تێ نینه‌.. جا یێ دگه‌ل وه‌ كۆك بیت ئه‌و یه‌كجار د بازنا بێ كرامه‌تیێ دا نقۆ بۆیه‌...

تو بۆ مه‌ ژ یاساێ دبێژی و دادوه‌ریێ و سه‌روه‌ریا وێ ؟؟؟

دیمه‌نێ فیشه‌كا دناڤ ده‌ڤێ سه‌رده‌شت عوسماندا حوكمێ یاسایا وه‌یه‌

دیمه‌نێ كوشتنا هزرڤان و شاعر و رۆژنامه‌ڤانێ تا سه‌ر هێسكان وه‌ڵاتپارێزێ وه‌ك سۆرانێ مامه‌ حه‌مه‌ یاسایا وه‌یه‌.، دیمه‌نێ ئه‌شكه‌نجا لسه‌ر لاشێ وه‌داتێ بیست و چه‌نده‌ك سالیێ دهۆكێ ،.

دیمه‌نێ چاڤێن وی كو ئینابۆن ده‌رێ، دیمه‌نێ سه‌رێ وی یێ ب شفشا كون كری، دیمه‌نێ لاشێ وی یێ نه‌حیف و نازك كو ب ئامیرێن تایبه‌ت ب ئه‌شكه‌نجێت قرون وستایی ره‌ش و شین كربۆ، خوینا هشكا كو ژ كوژیێ لێڤێن ویدا ژ كێشانا ددانێت وی شۆر بۆیی،

تپڵێت وی یێت بڕی دهێنه‌ بیرا مرۆڤی... یاسا ؟؟ 

ئه‌و گه‌نجێ كو ل نیڤا رۆژێ ل ل به‌ر چاڤێ جه‌ماوره‌ك زۆڕ هاتی ڕه‌ڤاندن به‌رچاڤێ سه‌دان كامیرا كو یاسایا ته‌ یێك كامیره‌ ل كۆلانان نه‌هێلا و هه‌می نخافتن... 

ئه‌و یاسا باش دهێته‌ ناسین یا كو هه‌تا رۆژا ئیرۆ ژی ئه‌و دادگه‌ها ته‌ یا زه‌ر نه‌ك تنێ یێك مسقال كه‌یس بۆ پێشڤه‌ نه‌بریه‌ ، به‌لكۆ هه‌رچی ئاسه‌وار و ته‌له‌فۆنا وی و لابتۆپا وی و نیشانێن ژێ هه‌یی هه‌موو و هه‌موو نخافتن وبێ سه‌رۆشوین كرن... 

ئه‌ڤه‌ یاسایا ته‌ به‌ر چاڤی رایا گشتی یه‌، هه‌ركه‌سه‌ك دزانیت... كیژ بێشه‌ره‌ف هه‌یه‌ ڤان راستیا بزانیت و پشتگیریێ ل چه‌كۆچێ بێدادگه‌ریا ته‌ و كه‌له‌مچێن توركی یێت بنه‌ماڵا ته‌ بكه‌ت ل ده‌ستێ زاڕۆك و كه‌سێن فه‌هیم و ب وژدان و كه‌سایه‌تێن ره‌وشه‌نیبیر و وه‌لاتپارێز و ب شه‌ره‌فێت وه‌ڵاتی...

یاسا؟؟؟ دادوه‌ری... عه‌داله‌ت... ؟ كوردایه‌تی..؟ یاسایا ته‌ و كۆردایه‌تیا وه‌ ئه‌ڤه‌ بسالانه‌ به‌ر چاڤی رایا گشتیه‌... وه‌ كه‌سێت خودان هزر ل وه‌لاتی نه‌هشتن.، هه‌موو وه‌دان كۆچاندن. ، وه‌ به‌رێ زهنیه‌تێ دا لایه‌كێ كو ده‌رڤایی بێ كه‌سایه‌تێن دز و حیز و ته‌شك حه‌رام و تالانچی و بێ شعور وه‌ د ده‌ستهلاتێ دا نه‌هێلانه‌...

وه‌ زاڕۆكێن قوتابخانا ل سه‌ر ته‌رغیبا توركاتیێ و بێ كه‌سایه‌تیێ و بێ به‌رپرسیاریێ و كێم ئاستیێ په‌روه‌رده‌ كرن.. كو د رۆژا مه‌ یا ئیرۆ دا د ڤان هه‌می فه‌لاكه‌تێن ب سه‌رێ وان دهێن و پێشه‌رۆژا وان به‌رچاڤێ وان دهێته‌ فرۆتن و ڕه‌ش و قرێژكرن و ئه‌و بێ هه‌لویست ماینه‌ و كۆره‌ كۆره‌ چه‌پڵا بۆ خوه‌لیسه‌ری و به‌ختره‌شیا خوه‌ لێ بده‌ن..

فه‌لاكه‌ت ژ ڤێ مه‌زنتر هه‌یه‌ یا یاسا ته‌ بسه‌رێ خه‌لكی ئینای...

یاسایا ته‌ ئه‌وه‌ یا ب سه‌رێ عه‌باس بریفكی یێ گه‌نجێ خوینگه‌رم و ب شۆڕ ئینای سه‌را ڕحا وی یا به‌رپرسیاریێ لاشێ وی وه‌ك وه‌داتی هنجناندی و هێشتا ب بكه‌رنه‌دیاری مایه‌، داویێ وه‌دای ڕه‌ڤاندن ژ وه‌ڵاتی چۆی كه‌تیه‌ كۆڵانێت ئه‌ورۆپا ب بێخودانی.. هزاران یێت وه‌ك وی..

و سه‌رحاڵارا ژی وه‌ دچاڤێ كۆره‌فامیا جڤاكا به‌رهه‌مێ نه‌زانپه‌روه‌ریێ وه‌ هه‌وڵا ڕه‌شكرنا وان دا.. 

یاسا ته‌ ئه‌وه‌ یا بسه‌رێ ئه‌یهان سه‌عید ئینای و بن ئه‌شكه‌نجێ له‌ت له‌تاندی، و شاربه‌ده‌ركری تانۆكه‌... 

یاسا ته‌ ئه‌شكه‌نجا لسه‌ر جه‌سته‌ێ نه‌حیف و نازكێ مامۆستا مێهڤانێ شاعر و ب شۆڕ ئینای ئه‌و ژی تنێ سه‌را هه‌ست و هه‌لبه‌ستا هه‌لبه‌ست..، كو هێشتا ب بكه‌ر نه‌دیاری وه‌ هێلای

ئه‌ڤه‌ د ڕه‌وشه‌كێ دایه‌ كو هه‌می به‌لگه‌ و شه‌واهد ب ئه‌شكه‌ره‌ دسه‌لمینن كو لژێر بڕیار و چاڤدێری و پالپشتیا ڕاسته‌وخۆ یا ده‌ستهه‌لاتداریا ته و بنه‌ماڵاته‌ بڕێڤه‌ چۆینه‌..

یان ئه‌وا بسه‌رێ من ئیناین و ئاسایشێ ل جادێ ئه‌ز ڕه‌ڤاندیم و ئه‌شكه‌نجه‌ كریم.، یێك ساڵێ ب به‌لگه‌ و شه‌واهد یاساێ خۆ نه‌شیا وان ئه‌ندامێن ئاسایشێ گازی بكه‌ته‌ دادگه‌هێ ژی.. یاسایا ته‌ .. و دادگه‌ها ته‌...

ته هژمارتینه‌ چه‌ند هه‌لبه‌ستڤان ب بكه‌رنه‌دیاری لژێر یاسایا بنه‌ماڵا ته بێ ناڤ و نیشان و بكه‌رنه‌دیار ژێرئاخ بۆینه‌... ؟ 

یاسا ته‌ هه‌تا رۆژا ئیرۆ ژی به‌رده‌وامیا وان یاسایێت به‌رێ یه‌، به‌س ئێدی ژ ته‌ ناهێت تو جورعه‌تا ده‌ست درێژیا خوینی بكه‌یه‌ سه‌ر كه‌سێ نه‌چار سه‌یێت خوه‌ یێت پاشدڕ دهنێری دربێت ده‌خه‌س دانن و بڕه‌ڤن

وه‌ك چه‌وا ل پشتڤه‌ كه‌سایه‌تێن وه‌ك ڕه‌ئوف ئاكره‌یی گوله‌ ره‌شین دكرن، ئیرۆ ژی هاوڕێ كوردی ل هه‌لێرێ دده‌نه‌ به‌ر چه‌قۆیا و یاسایا ته‌ یێك هنگاڤ بۆ ناهاڤێژیت، دكتۆر غالبه‌كێ دلسۆزێ ڤی گه‌لی كو تنێ هه‌كه‌ دیف یاسایا ته‌ كه‌تبا نوكه‌ ب به‌ژنا وی وه‌ دۆلار و پۆست و پله‌ دابۆنێ...

لێ ژبۆ كو خۆ به‌رامبه‌ر بێدادیێ نه‌چه‌ماند وه‌ك سه‌یێت پاشدڕ و ترسۆنه‌ك وه‌ك دیرۆكا هه‌وه‌ یا كه‌ڤنار ب نه‌مه‌ردانه‌ ب كه‌مینا لپشتڤه‌ دده‌نه‌ به‌ر چه‌قۆ و بۆكسا .. . به‌لێ ئه‌ڤه‌یه‌ یاسا ته‌... 

مه‌سرۆر بارزانی تو ئیدعایا هه‌ر تشته‌كێ بكه‌ی، بكه‌... تنێ ته‌ ماف نینه‌ ئیدعاێ د دوو تشتا بكه‌ی

ئه‌و دوو تشت چنه‌: یێك یاسا، دوو كورداتی... 

ئه‌ڤ 2 تشته‌ هوین ژ كۆك و ڕیشال ژێ به‌رینه...‌

وی ده‌می یێك ڕه‌خنه‌ ناكه‌ڤیته‌ سه‌ر ته‌ و هه‌ر كه‌سه‌ك دێ مافێ ڕه‌واێ ته‌ زانیت تو بدزی، بفرۆشی تركا، بكوژی، تالان بكه‌ی. هه‌ر كه‌سه‌ك دێ بێژیت ئه‌ڤه‌ هێزه‌كن و دشێن بكه‌ن و ل وان عافیه‌ت بیت.، وی ده‌می دكارن ب بێ غیره‌تی تنێ ل وه‌ ته‌ماشه‌ بكه‌ن یان ژی غیره‌تا وان بكه‌ڤیته‌ لڤینێ.