کوردستانیانی شاری کەرکوك ئەمساڵ نەیانتوانی یادی نەورۆز بکەنەوە لەبەرئەوەی ڕێگەیان پێ نەدان. دەسەڵاتی ئەو شارە نەك هەر ڕێگری کرد لەم بۆنە کوردیە ،بەڵکە ڕۆژ دوای ڕۆژ تەعریب و تەتریك شوێنی کورد لەسەر حسابی کورد و مێژووەکەی لەم شارەدا ، بەرەو ئاوابوون هەنگاوی ناوە. دیارە لەمێژ بوو دڵسۆزانی کورد و خەمخۆرانی ئەم گەلە ئەم ڕۆژەی چاوەڕان ئەکرد لەسایەی دەسەڵاتی کلك گرێدراوی ئێران وتورکیای داگیرکەران. لەهەمان کاتدا ، نووسەرانی کوردستانپۆستی بوێر بۆ ماوەی زیاتر لە دوو دەیەیە داوا لەخەڵکی کوردستان بەگشتی و کەرکوك بەتایبەتی کردوە کە چارەنووسی خۆیان بەم بەناو حزبانەی باشوورەوە نەبەستن و لێیان ڕاپەڕن و دەریان بکەن لەشارەکە. بە هەزارەها بەڵگە و ئاگاداری ونووسین بەرچاو ڕوونیان پێشکەش بەو خەڵکە کرد و لەمەترسی ئەم بەناو سەرکردە و پارتە کوردیانە هۆشداریان دا و ئەم ڕۆژەیان پێشبینی کرد و هیچ نەما هانای بۆ نەبەن  تا بتوانین ڕێگری لەم ڕۆژە بکەین و نەیەڵین کەرکوك بەدەردی موسڵ و گوڵاڵە ئەو شارانەی تری لێ بێت کە ئەم سەرکردانە لە مامەڵەیەکی بازرگانی لەسەر مێزی قومار، دۆڕاندیان.

جەژنی نەورۆز ئەگەر چی بۆتە جەژنێکی جیهانی و زیاتر لە 300 ملێۆن خەڵك لە جیهاندا یادی ئەکەنەوە، لێ تەنها بە هی فارس ناوئەبرێ و پیرۆزبایش لە ئێران ئەکرێ. کاتێ گوێبیستی پیرۆزبایی هەندێ لەسەرۆکەکانی جیهان ئەبێ بۆ نەورۆز وەکو سەرۆك بایدن و سەرۆك وەزیرانی کەنەدا، وا هەست ئەکەی نەورۆز تەنها هی فارسەکانە، ئەمە لەکاتێکدا نەورۆز هی کوردە و کورد تیادا سەرکەوتنی بەسەر دوژمندا ، هێناوە. داگیرکەران بەمەشەوە نەوەستاون وهاتوون جگە لە جەژن و بۆنەکانی کورد، فەرهەنگ و هونەری کوردیان دزیوە و ئەوەی بۆیان نەدزرابێ، هەوڵیان داوە بیسڕنەوە وەیان  سەقەتیان کردوە. چەندین گۆرانی کوردی و ئاوازە شیرینەکانیان هایجاك کردوە و بەناوی خۆیان ئەیچڕن و خۆیانی پێوە با ئەدەن.

کەرکوك و گەرمیانیەکان ساڵانە چەندین مزگەوت دروست ئەکەن و گەر بەهۆی بڵاوبوونەوەی ڤایرۆسی کرۆناوە دەرگای مزگەوتەکان کڵۆم بدرێ ، هەوڵی گەورە ئەدەن بۆ کردنەوەیی و گلەیی ئەکەن لەوەی مزگەوتەکان نابێ دابخرێن.. کەرکوکیەکان و کوردە نا ووشیارەکان ئەو مێژووە نزیکەیان لەیاد چوە کە سەدام لەڕێگای ئایینی ئیسلام و ئایەتەکانی قورئانەوە دایك و خوشك و برا و باوکیان ئەنفال کردن و زۆربەیان تا ئێستاش ئێسك و پرووسکیان ، نەگەڕێندراوەتەوە، زۆربەیان نایانەوێ بزانن کە ئایین بۆ ئەمان تەنها مانای نەمانیان بوە و لەڕێگای ئایینەوە ناسنامە و بوونیان بەرەو تاریکی و وونبوون ، هەنگاوی ناوە، ئێدی بۆ ناپرسن بەرەو کوێ نزا ئەکەن و دەنگتان تا دوورایی کوێ ، بڕ ئەکات.