زەنگاینەی ئاویی (رستی دوەم)

Friday, 22/01/2021, 15:26

( تۆ پەرستی )
لە فەرهەنگی زۆر زماندا
بەدوای وشەیەکدا گەڕام.
مەزنتر بێت
لەو ( وشە ) یەی لە کوردیدا
پێیدەوترێت خۆشەویستی
لە ئاکامدا
لە میحرابی دینی یەکتاپەرستیدا
دۆزیمەوە ..
پێیدەوترێت تۆ پەرستی.

( جۆگەلە )
تۆ جۆگەلەی
پڕی لە ئیشقی خودایی.
من جۆگەلەم
تەژی لە ئیشقی جودایی
کە تۆ جۆگە و من جۆگە بم
دە پێمبڵێ..
ئەدی ئیتر بۆ یەکتری نەخۆینەوە؟!
سەرمەست نەبین،
بە ئیشقی هەتا هەتایی.

( سوێند )
لە سێبەری پەپولەدا
هێدی .. هێدی
گۆرانی ئیشقت بۆ دەڵێم.
سۆزم لەگەڵ قاسپەی کەوا
سیمفۆنیایەو
ئاوێزانی رۆحتی دەکەم.
سوێندت دەدەم
تو پەپوولە.. تو رەوتی کەو
ئەی ئاسکەکەی کانیئاسکان
تاکەی سرکی و کەوی نابی؟!

( سۆما )
ئاسکەکێویی
ئاشقی، کێوی بەرز و سەختە
زۆر پێی شەرمە لە دامێنا
شاخەکانی لە بەرد بسوێ.
من پەپولەم زۆر خۆشدەوێ
چون پەپولە ..
ئیشقی بێناڵەی فێرکردوم.
ئاسکەکێوی .. پەپوولە.. ئیشق
سۆمای چاومن.

( پەری دەریا )
لە کۆبنهاگن
لەبەر پەیکەری ( پەری دەریا ) دا
کیژۆڵەیەك، دۆش دامابو
نەیدەزانی!
ببێت بەماسی،
یا
پەری..!

( با )
کە هەواری خاڵیم جێهێشت
بۆ ماوەیەك – با – م کرد، بەتۆ
با..
بەیادی ژوانی پێشو
گوێڕادێرم،
بۆ جیکەجیکی نەورەسه کانی کەنار دەریا
پەنجەکانم بگێڕم بەشەپۆلی ئەگریجەتا.
با..
سەرت بخەمە نێو هەردوو لەپی دەستم
چاوببڕمە نێو چاوانت
چیمە لە تەنکایی دەریا!