ده‌وڵه‌تداریه‌كه ڕه‌نگدانه‌وه‌ی شۆڕشه‌كانن.
Saturday, 03/10/2020, 16:34
ئه‌گه‌ر هه‌رسێ حیزبی فه‌رمانڕه‌وا و پێكهێنه‌ری حكومه‌تی هه‌رێمی كوردستان ده‌تانزانی به‌و جۆره له كار و به‌ڕێوه‌به‌ریتان به‌ناوی ده‌وڵه‌تداریه‌وه چه‌ند خۆتان و خاك و ئاو و خه‌بات و شۆڕش و ئاڵا و پێشمه‌رگایه‌تیتان له‌به‌رچاوی میلله‌ت ناشیرینكردووه، ئه‌وه هه‌رئه‌مڕۆ پێش سبه‌ینێ ده‌ستتان له‌كارده‌كێشایه‌وه بۆ ئه‌وه‌ی له‌وه ناشیرینترنه‌بن، به‌ڵام به‌داخه‌وه ئێوه دزینی ملیاره‌ها دۆلار چاوی كوێركردون و له‌پێناو ده‌وڵه‌مه‌ندیی و خۆشگوزه‌رانی خۆتاندا ئاگاتان له هیچ نه‌ماوه، ئاماده‌ن له پێناو كورسی و دۆلاره‌كانتان ده‌ست له شكۆ و شه‌هامه‌تی خۆتان هه‌ڵبگرن.
به‌ڵام ئێوه بێئاگان له‌وه‌ی ئه‌وجۆره له به‌رپرسیاریه‌تی و ئیداره‌ی خۆبه‌ڕێوه‌بردن له‌ژێر ناوی ده‌وڵه‌تداریدا ته‌نیا سه‌لمێنه‌ری ئه‌وڕاستیه‌یه كه هه‌رخۆتان له یاداشته‌كانتاندا بۆمان ده‌گێڕنه‌وه كه له په‌نای شۆڕشدا چی مابو به میلله‌ت و خاك و ئاو و كورد و كوردستانی و یه‌كتری نه‌كه‌ن؟! كام دوژمن مابو كه ئێوه بۆ سڕینه‌وه‌ی یه‌كتر په‌نای بۆنه‌به‌ن؟ كام دوژمن مابو كه ئێوه هاوكاری لێوه‌رنه‌گرن و په‌لكێشی ناو نیشتمانی نه‌كه‌ن؟ كام جۆر له‌شه‌ڕی یه‌كتر و فێڵ و سه‌رانه‌سه‌ندن و دیلكوژی و تیرۆری جه‌سته‌یی و ده‌رونی مابو ئێوه له‌گه‌ڵ یه‌كتر و له‌گه‌ڵ میلله‌ت په‌نای بۆ نه‌به‌ن؟ ئه‌مانه نه قسه‌ی من و نه‌هیچ كه‌سێكیترنین، ئه‌مانه ئه‌و ڕاستیانه‌ن كه زمان خۆتانه‌وه ده‌یبیستین و له بیره‌وه‌ری و یه‌ده‌وه‌ری و مێژو و ژیاننامه‌كانتادا تۆمارتانكردووه و خوێندومانه‌ته‌وه!
ده‌ی من ده‌ڵێم له‌كاتێكدا ئه‌وه‌حاڵی سه‌رده‌می شۆڕش و شاخ بوبێت! ئیتر حه‌ق نیه به‌هیچ جۆرێك گله‌یی له جۆری به‌ناو ده‌وڵه‌تداریه‌كه‌تانه‌وه بكه‌ین، ئه‌گه‌ر له‌وه‌ی ئێسته خراپتریش بێت! چونكه مێژوی شۆڕشه‌كانتان له‌وه خراپترمان بۆ ده‌گێڕنه‌وه!
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
