پاشمەرگەى نەوشیروان مستەفا

Sunday, 24/05/2020, 18:39

پاشمەرگە..کە نەوشیروان مستەفا بە باوکى هەژاران ئەناسێنن منیش شاعیرى هەژاران قانع ى بیرکەوتەوە ، بەیادى ئەویشەوە ووشەى پاشمەرگە بەکار ئەهێنم ، پاشمەرگەى قانع..کتێبێکە زۆربەى شیعرە بڵاونەکراوەکانى قانعى تێدایە و ساڵى ١٩٧٠ چاپکراوە و هەتا ئێستا بۆنى هەژارى و کۆڵنەدان و ورەى بەرز و ڕوەو و ئاسۆیەکى ڕونى لێدێت ، پیاوێک وەک شیعرەکانى ژیا و وەک شیعرەکانى سەرى نایەوە..گۆڕەکەشى مڵکى میللەتێکە وەک شیعرەکانى.
نەوشیروان مستەفا بەهەژارى نەژیاوە و لەژیانیدا وەکو زۆر سیاسیتر هیچ پیشەیەکى نەبووە و لەخوانى سیاسەتدا ژیاوە ، ئەو نازناوەش تەنها پرۆپاگەندەیەکى پۆپۆلیستى زیاتر و بۆ کۆکردنەوەى خەڵک و لەدواجاردا بۆ گەوجاندن زیاتر هیچیتر نەبووە.نەوشیروان مستەفا بەپێى ڕاسپاردە و ئەوەى کەخۆى ئەیویست نەک خۆى بەڵکو گۆڕەکەشى بەگوێرەى قەواڵەى فەرمى بووە بە مڵکى کوڕەکانى و لە سێبەرى ئەوانیشدا کۆمەڵێک گەجەرو گوجەر لە ژێر قۆنەرەکانى مەسعود بەرزانیەوە زیقە زیقى چاکسازیانە.
لە یادى سێ ساڵەى کۆچى نەوشیروان مستەفادا خۆم لەقەرەى سەردەمى شاخ و پێشمەرگایەتى نادەم و باسى کوشتن و ژن کوشتن و دیل کوشتن ناکەم ، باسى تێرۆرى شار و هەڕەشە ناکەم ، ناچمە ناو هەڵەى ستراتیژى هێنانى پاسدار و پاساو بە بەعس بدەم بۆ ئەنفال کردن ، زۆر کەسیتر لەمن لە پێشترە هەتا باسى ئەو مەرگەسات و بەکوشتدانى خەڵکى گەرمیانە بکات کە نەیانهێشت خۆیان لە ئابلوقەى ئەنفالى بەعس ڕزگار بکەن ، بەرکەوتەیەکى کیمیایی لەمن باشتر مەرگەساتى کیمیاباران و ئابلوقەى هەڵەبجە ئەزانێت کەڕێگربون خەڵک لە هێرشى کیمیایی خۆى دەرباز بکات..تفەنگچەیک شارەزاترە کەفیشەکێکێک چەند کەس ئەسمێت , بەهیچ کلۆجێک کۆمێنتم لەسەر ( ڕێباز )ى نەوشیروان نیە چونکە پێموایە هیچ مەسائیلێکى فکرى نیە بەڵکو بزوتنەوەکەشى لە فکر خاڵیە ، بەڵکو ئەوەى وجودى هەیە ( ڕێباز)ەکەى حەملانە.
لەم یادەدا وردە ئاماژەیەک بۆ هەندێک پرس ئەکەم ، هەگبەکەم بۆ کۆکردنەوەى جنێو ئامادەکردووە و ئەزانم سەرتاپای میراتگر و لایەنگیرانى میراتگر جورئەتى وەڵامدانەوەیان نیە و مایەپوچن.
ئەوە مایەیى تێرامانە کەسێک سەرۆک و لێپرسراوى سیاسی و سەربازى ڕێکخراوێکى مارکسى بێت ( کۆمەڵەى ڕەنجدەران )و سەدەها گەنج لە پێناوى ئامانجەکانیدا بکوژرێت و ئیعدام و زیندانى بکرێت یان کەسوکاریان ئاوارە و دەربەدەر و ماڵوێران ببن ، خۆت باوەڕت بەئایدۆلۆژیاکەى نەبێت.ئاخر چ ویژدانێکى زیندوو ئەمە قبوڵئەکات ، ئینجا وەرە ئەو دوو دێڕە بۆ زمانە زیندووەکانى جیهان وەربگێرە بخوێنرێتەوە.
بۆ خەڵکانى ساویلکەو بەبێ تەجروبە کەرەسەیەکى باشە : باس لە پاکێتى نەوشیروانى کۆچکردوو ئەکەن ، گەندەڵى وەکو سەرکردەکانی ترى یەکێتى پێوە نەلکاوە ، ئایا چ سەرکردەیەک لەوانە شەریک بوە لە سەروەت و سامانى یەکێتى ، ئەوانە موچەخۆرێکى قەبەى یەکێتیبون لەژێر سایەیدا کەوتونەتە ڕاوڕوت و داگیرکردنى سامانى گشتى و دروستکردنى بەنزینخانەو خەستەخانە..هەتا ئەگاتە قەحبەخانە ، بەڵام خودى نەوشیروان ئەڵێت من شەریکى سەروەت و سامانى یەکێتیم ، کەواتە چ پێویستیەکى بەوەهەیە وەکو فەریدون عەبدولقادر هەڵسوکەت بکات ، فەرەیدونێک بەملیۆنان دۆلار لەجەلال تاڵەبانى وەربگرێت ، کوڕێکى بامۆکى ملیۆنان وەرگرێت ، شێخێکى پەرپوت کەبەشەقامەکاندا تێئەپەڕێت بەخۆى خەنجەر و تەزبیحە تەرسەقولیەکەى زەوقى گشتى بەناخى زەویدا ئەبات و دیمەنى شوستە و جادەکان ئەشێوێنێ ملیۆنان دؤڵار وەربگرێت..ئەندامێکى دەستلەکارکێشاوە چەکى ملێۆن دۆلارى وەربگرێت ، ئەبێت کاکە نەوە چى وەربگرێت کە قەت تاڵەبانى دەستى بەڕویەوە نەناوە ، نەوشیروانى کۆچکردو یەکێک بووە لیژنەى نوسینەوەى دەستورى عێراق لەو سەردەمەدا جارێک ٧ و دواتر ٨ ملیۆن دوڵارى لە مامى گەورەى وەرگرتووە.ئەوە خەڵاتى ١٠ ملیۆن دۆلار و گردێک لاى هەموان ئاشکرایە ، لیستەکە درێژە دیارە ڕەنگە یەکێتى ئاشکراکردنى هەڵگرتبێت بۆ گەمەیەکى سیاسی.
لەدواى ڕاپەڕینەوە نەوشیروان مستەفا کەسى نیمچە یەکەمى یەکێتى بووە ، هەموو پۆستێک بە فلتەرى ئەودا تێپەڕیوە ، قەت نەمانبینیوە ئەم پیاوە لێپێچینەوەیە لەیەک کەس بکات چ لەئاستى حکومەتى و حیزبی کەخاوەنى بڕیار و ووشەى یەکلاکەرەوە بووە ، بێجگە لە قسە و گلەیی ئەملاو ئەولا هەندێک بۆڵە بۆڵى سیاسى زیاتر هیچیترى نەبووە بە پێچەوانەوە هەرکاتێک دەستى خستبیتە هەر فەرمانگەیەکەوە (قەڵەمڕەوى یەکێتى) وێرانەیەکى بەدواى خۆیدا جێهێشتوە ، زانکۆى سلێمانى ، شارەوانى ، قومارچیەکى پێشتر خانەنشینکراو لەبەر پەککەوتەیی ئەکات بەسەرۆکى دادگاى سلێمانى ، لەفرسەتدا کۆبونەوەى بەئەنجومەنى وەزیران ئەکرد لەکاتێکدا بانگەشەى جیاکردنەوەى حکومەت و حیزبى ئەکرد و ئەیوت ئەبێت ڕێز لەدامودەزگاى حکومەتى بگیرێت و خۆى یەکەمین کەس بوو بۆ بێرێزى و هێنانە پێشەوەى خەڵکانى ناکارامە و نەشیاو کەئەم نەهجە لەلاى شۆربوەوە بۆ بزوتنەوەى گۆڕان و کەسانى وەکو حەملان و هاوشێوەکانى هێنایە پێشەوە.
نەوشیروانى کۆچکردوو..کەسى نیمچە یەکەمى یەکێتى بوو..قەت بینیوتانە خەمى لەکردنەوەى قوتابخانەیەک ، نەخۆشخانەیەک ، شەقامێک ، یان کتێبخانەیەک بوبێت ، قەت بینراوە خەمێک لەشارى سلێمانى بخوات ، گاڵتەى بەو کەسانە ئەهات کەچوبونە لاى وتبویان بابنارى گۆیژە وێران نەبێت و بکرێت بەسەوزایی و بەپێچەوانەوە دەستى لە هەلاهەلاکردنى بنارى گۆیژەدا هەبوو.
بەداخەوە خەریکە بتێکی ترمان بۆدروست ئەکەن و زۆر بێڕەحمانە بۆ هەڵخەڵەتاندنى خەڵکى هەژار و گیرفان خاڵى ئەم میللەتە کڵۆڵە و لەئیفلاسبونى فکریدا ئەڵێن چەند ساڵە قەمسەڵەیەکى هەبووە و نەیگۆڕێوە و خواردنى ئاسایى ئەخوارد..ئەنجیلا مێرکل ١٨ ساڵە جلێکى هەیە هەتا ئێستاش لەبەرى ئەکات ، بەمە بووە بەنەنکى هەژاران ؟ با کاک نەوشیروان حەزى لەخەیار و تەماتە بوبێت ئەوە کوڕەکانى هەموو شەوێک قەل و ویسکیان لێببڕێت ڕەنگە ناڵەیان گردى زەرگەتە بهێنێتە لەرزە ، تەمەن باقى بێت لەم ڕیتمە بڕۆن یەکێکیان شێوەى خرتەقەل و ئەویشیان وێنەى بتڵە ویسکى ئەگرێت.
کەسێک بەتەنگ سامانى گشتیەوە بێت ئایا چ ڕەوایەتیەکى تێدایە گردێکى ١٢٢ دۆنمى وەربگریت کەمڵکى گشتیە و بەشێکە لە هەناسەى پاکى سلێمانى و چەندەها پشت و نەوەى بەڕێکردووە ، چ جیاوازیەک هەیە لەنێوان داگیرکردنى سەرى ڕەش و گردى زەرگەتە ، هیچ یاسایەکى ڕێپێدراو نیە ئەم کارە بکات ، جەلال تاڵەبانیەک هەتا زمانى لەجوڵە نەکەوتبوو بەڕاست و چەپدا مڵک و ماڵى تەخشان و پەخشان ئەکرد ، ئەگەر تاڵەبانى گەندەڵە ماڵئاوایت لە حیزبەکەى کردووە چ ڕەوایە مامەڵە لەگەڵ گەندەڵدا بکەیت و کەلەبنەڕەتدا هیچ پێگە و دەسەڵاتێکى یاساییى نیە بۆ بەخشینى گردى زەرگەتە.هەر لەگردى زەرگەتەوە کە بەشێکە لەسامانى گشتى سلێمانیە نەوشیروانى کۆچکردوو بانگەوازى گێڕانەوەى سامان و مڵکى گشتى ئەکرد.
لە گەرمەى هەڵبژاردندا پاش ئەو خرۆشانە جەماوەرییەى کەلە گردى زەرگەتە خڕببوبونەوەە بەئاواتى ڕزگارى و گۆڕینى سیستەم ، هەندێک لەدەوڵەمەندان ئارەزومەندانە و هەندێک لەترسى دروشمە قەبەکانى گۆڕان وایانئەزانى دنیا ژێرەو ژور ئەبێت پارەیەکى بێشوماریان بۆگردى زەرگەتە هەڵڕشت و خودى کاک نەوشیروان نزیکەى (5) ملیۆن دوڵارى بۆ ڕاگەیاندن لەڕێگەى قادرى حاجى عەلیەوە خەرجکرد ، هیوادارم ئەو ڤیلا دەیەها ملیۆن جونەیهیە کەلەلەندەن بۆ چراى نەوشیروان مستەفا کڕدراوە لە پاشماوەى ئەو پارەیە نەبێت.
یەکێک لەو دروشمانەى کەخودى کاک نەوشیروان بەرزیکردبۆوە و ئەیوت ئەبێت سیاسەت لەژورە تاریکەکانەوە بێتە دەرەوە و شەفاف بێت ، بەڵام یەکەم کەس خۆى ئەم پرنسیپەى خستە ژێر پێلاوەکانیەوە ، بەسەردانیکردنى یەک لەدوایەکى بۆ سەرى ڕەش بۆلاى مەسعود بەرزانى کەهەتا ئێستاش بوە بەمەتەڵێک هەڵهێنانى سەختە ، بەڵام زۆر ئاشکرایە لەدواى ئەو سەردانە یەک بەدواى یەکانەدا جەنابى کاک نەوشیروان لەو هەموو پرسە گرنگانەى ئەوکاتەدا بێدەنگیەکى کوشندەى هەڵبژارد ، هیوادارم لەبارمتەى ئەو ئۆتۆمبیلەدا نەبێت کەلەسەرى ڕەشەوە بۆ سلێمانى هات شۆفێرەکەى تامەزرۆ بوو گردى زەرگەتە ببێنێت بەڵام پێیان ووت بارگە لە شوێنێکیتردا هەڵبدە.
کاک نەوشیروان زۆر دروشم و پرەنسیپی ترى لەژێر پێدا فلیقانەوە لەوانە تەوریسى سیاسى و بەبنەماڵەکردنى گۆڕان ، دەستەیەک پرۆژەیەکى ئامادەئەکەن بۆ ئەوەى مڵکى و سامان و گردەکە ببێت مڵکى بزوتنەوەى گۆڕان ، بەڵام بەڕێزیان توڕە ئەبن و یەکێک لەوانە هاوڕێیەکى دێرینیەتى کە بۆماوەى شەش مانگ قسەى لەگەڵدا نەکرد ، هیوادارم ئەو پیاوە بە ویقارە ئەو تەمەنەى کەماویەتى بۆ وتنى ئەو ڕاستیانە تەرخان بکات و هاوڕێیەتى نەکات بەقوربانى وتنى ڕاستیەکان و نەوەکانى ئێستاو داهاتوو قەرزاربار نەکات.
نەوشیروان مستەفا سەرکردەیکى مەیدانى نەبووە کەپێشڕەوایەتى ناڕەزایەتى خەڵک بکات ، بەڵکو لە سەرکردەیەکى میلیشیاییەوە جەماوەرى خۆیهەبووە و لەناو بزوتنەوەکەشیدا هەر ئەوانەى لەخۆی خڕکردبووە و کەزۆریان هەتا ئێستا نازانن تاریفى گۆڕان بکەن لەناو یەکێتیەوە دوایکەوتبون ، ئاخر بەو کەرەسە ڕزیوو کەللە پوتانە ئەبێت چى بگۆڕدرێت , بەوەش سوارى شەپۆلى ناڕەزایەتى خەڵک بوون و کەوتنە وەرگرتنى پلەو پۆست و شەرعیەتدان بەدزینى نەوت بەناوى پشتگیرى ئابورى سەربەخۆ و چاو داخستن و سەر شۆڕکردن بەرامبەر بەو هەمو تاڵانى و چەتەییە و پێشێلکردنى ئازادى مافى هاوڵاتیان.ئەو نەهجە هەتا ئێستا بەردەوامە و زۆر گەشەیکردوە و ئێستا بزوتنەوەکە بووە بە جوتێک پێڵاو پارتى کەی ویستى لەپێی ئەکات و شەقى چاکسازى ئەوەشێنێت.
کاک عەبدولڕەزاق شەریف ئەڵێت (پێش مردنیەوە ، نەوشیروان مستەفا کاک عەبدولاى کوێخا موبارەک بانگ ئەکات و پێی ئەڵێت چیتر کێشە بۆماڵى مام جەلال دروست نەکەیت..! چونکە وەعدیان پێداوم چاویان لە چیا و نماى کوڕم ببێ..! ).
پێشتر لەنوسینێکدا ئاماژەم بۆ ئەوەکردبوو کاتێک کە کاک نەوشیروان لە قاسمەڕەش بوو : کۆمەڵێک (پێشمەرگە )ى پارتى بۆ سۆراغى عەبدولا ئاغا لەو دەڤەرەوە تێئەپەڕن لەلاى ئەو لائەدەن هەموو چەکى تازەیان پێیە دەربارەى ئەو چەکانە پرسیاریان لێئەکات و ئەونیش ئەڵێن ئیدریس بەرزانى پێیداون و ئەڵێت من دوژمنى چەکم و بەڵایە سبەینێ کوردستان ڕزگار بوو ئەبێت مناڵاتى ئێمە ببنە فەڕاشى ئەوانەى لە شارن..لە مێژە جەنابیان لە خەمى نەوەکانیدایە ، ئێستا گردێک بەگۆچاندار وبێگۆچان بون بە فەڕاشى چیا و نما و ئەو پلە و پۆستانەش کەلە حکومەتە نابوتەکەى مەسروردا بە ملشۆڕى پێیانردراوە دەڵاڵى بزنسى جوت کوڕن..پرسیارەکە لەجێی خۆیدایە : ئەبێت ماڵى مەسعود بەرزانیش وەعدیان نەدابێت چاویان لەو دوو کوڕە نازدارە بێت ؟
لە پاشمەرگەى باوکى هەژاراندا : دوو کوڕى هەژار کوژى بۆ بەجێهێشتین ، لەگەڵ کۆمەڵێک قرخن و لات و لەوێر کەلەگردى زەرگەتە خەریکى خۆ لێسانەوە و مەسرور لێسانەوەن.
یادت بمێنێ..باساڵانە یادت بکەین..ئەندازیارى لە گۆڕنانى ئۆپۆزیسیۆن و هیواو ئیرادەى خەڵک بۆ گۆڕانکارى ، ئەندازیارى پارێزەرى درێژەدان بەدەسەڵاتى چەتەیی جوتبنەماڵەیی , شەرعیەتدان بە پەرلەمانى کارتۆنى لەژێر ناوى خەباتى پەڕلەمانى ، پشتگیرى چەتەکانى نەوت لەژێر دروشمى ئابورى سەربەخۆ و سوکایەتى بەژنانى بێئیش و کردنیان بەکابانى ماڵ ، یادت بمێنێ..پاڵەوانى دروشمى قەبە و بریقەدار و پاشاى پۆپۆلیزم و کپکردنى دەنگى ناڕازى ، یادت بمێنێ..سەرکردەى (خاکى) خاکت بەسەر خەڵکدا کردو سوپایەک لە پێلاولێس و جانەوەرى ستایشکار و ئابڕوتکاو و کادرى ناخ زەرد و ڕیسوات بەجێهێشت.
لە کۆتایدا :
کاک نەوشیروان لەکتێبى بەدەم ڕێگاوە گوڵچنین لە باسى مەولانا خالیدى نەقشەبەندیدا ئاماژە بەوە ئەکات کە مەولانا ئەمرێت ئینجا مڵک و ماڵى دەر ئەکەوێت کە چەند دەوڵەمەندە ، ئێمەش پاش مەرگى بەڕێزیان ئینجا بۆمان دەرکەوت چى بۆ جوتکوڕى بەجێهێشتووە.