چۆن بتوانین بەسەر شەڕی تایبەتی داگیرکەراندا سەرکەوین!؟

Monday, 13/04/2020, 20:49

١- لە ئەگەری رووداوی هەر ڕووداو و ناکۆکیەک، لە نێوان "دوو تاکی کورد، کۆمەڵی کورد، لایەنی کورد، هەرێمی کورد و بەشی کوردستان"دا، پێویستە لەگەڵ ئەوەی کە ڕاشکاوانە، توند و تۆڵانە و راست وێژانە مامەڵەی لەگەڵ بکەین، وشیاریشبین بە زیادەڕەوی و لە ڕێگەی شرۆڤەی بێ بەرپرسیارانەوە ئاو نەکەینە ئاشی داگیرکەران.
کوردستان یەک وڵاتە و کورد نەتەوەیەکە، ئەمە تەنیا رستەیەک نییە، ئەمە چەکی رزگاری کوردستانە، داگیرکەر زۆر هەوڵدەدات ئەم چەکەمان بشکێنێ و بێ کاریگەری بکات. بۆ ئەوەش لە پارچەگرایی و هەرێمگەرایی کوردستان لە ناو تاک و کۆمەڵگای کوردستاندا، دەتوانێت راستەوخۆ و ناراستەوخۆ گەورەترین کەڵک وەربگرێت. بۆ ئەو مەبەستە لەناوماندا دەست و پەیوەندی خۆی دروست کردووە و دروست دەکات.
٢- بە قسەی زۆرکەس کاتێک کاک موستەفا سەلیمی دێتە گوندێکی باشووری کوردستان، لەو دۆخەیشدا مێوانداری دەکەن و تەنانەت سێ رۆژ لای خۆیان رای دەگرن. ئەوەیە باشووری کوردستان.
شۆڕشگەری رۆژهەڵاتی کوردستان نییە، هاتبێتە باشووری کوردستان و رووبەڕووی وەڵاتپارێزی و مێوان نەوازی باشوور نەبووبێتەوە، ئەوە باشووری کوردستانە. زەکی شەنگالی، ڤیان سۆران، دیار غەریب، مامە ریشە، کاک ئارام، لەیلا قاسم و.... باشووری کوردستانن.
٣- ئەوەی هاوکاری داگیرکەر دەکات نە کوردە، نە باشووری کوردستانە، ئەوە کوردی سپییە. کوردی سپی چییە؟ کوردی سپی کوردێکە کە بە شکڵ و شەما کوردە، بەڵام داماڵڕاوە لە ئەخلاق و بەزەیی کورد. کوردی ساختە و دروستکراوە. راستەوخۆ و ناراستەوخۆ دەست سازی دەستی داگیرکەرانە. کرمی دارە دەتوانێت لە ناو هەر کۆمەڵ، گوند، هەرێم، شار و بەشی کوردستاندا هەبێت. دەتوانێ جار جاریش بێ زانابوون دزە بکاتە ناو کەسایەتی ئێمە و کاریگەری لە سەر کاردانەوەمان دانێت، لەبەروەی جارناجار راستەوخۆ لە پاڵ داگیرکەر دێتە مەیدان کە دیتنی لەو حاڵەتەدا ئاسانە، جارناجاریش بە ناوی کوردایەتی، خەباتکار و خەمخواری کوردستان دێتە پێش چاوی ئێمە، ناو شاشەی تەلەوزیۆن، کامپیۆتر، موبایلەکانمان و....، دەیەوێت بمانخاتە خزمەتی خۆی. کەواتە دەبێ کوردی سپی رسوا بکەین نە شتێکیتر.
پێویستە شەڕی تایبەتی دوژمن باش بناسین، وشیار، زانا، سیاسی و.... بین، دونیای داگیرکەر وەک بەرێ سادە نییە، ڕێباز، تاکتیک، کەرەسەی نەرم و.... جۆراوجۆر بۆ ئامانجەکانی بەکار دەبات. دۆستەکانی شۆڕش پێویستە وشیار بن، بەشێک لە باری شۆڕش هەڵبگرن نە بۆخۆیان ببن بە بار. شۆڕش ئەگەر کاری ببێتە سەرقاڵی بە دۆستەکانییەوە دەرفەت و هێزی تێکۆشانی لەگەڵ دوژمن کەم دەبێتەوە.
لە راستیدا شۆڕش دەسگای خەیرخوازی نییە، دەسگای رزگاری نەتەوەیی و کۆمەڵایەتییە، کە ئەو پرسە گەورەیە بە شێوەیەکی راست و دروست چارەسەر کرا، زۆر کێشەی وردیش چارەسەر دەبێت. بێ گومان ئەوە بەواتای بێ بەرپرسیاری ڕەهای شۆڕش لە بەرانبەر دۆستەکانی و ئەندامانی و هەمووی گەل و کۆمەڵگا نییە، شۆڕشێک لە بەرابەر دەوروبەری خۆی بێ بەرپرسیار بێت، ناتوانێت باسی شۆڕشگێڕی بکات. بێ گومان پێویستە کەرەسە و سازی چارەسەرکردنی کێشەی وردیش هاوتەریب لەگەڵ بە جێهێنانی ئەرکە بنەمایەکی ئاوا بکات. مەبەست چاوەڕوانی نابەجێ و خەیاڵییە لە شۆڕش.
٤- خۆمان لە مەنتێقی رەش و سپی بپارێزین، هاوکات بزانین کە چۆن راستگۆترین کەس ئیمکانی ئەوەی هەیە جارناجار هەڵە بکات. درۆزنترین کەسیش مومکێنە جارناجارێک بۆ مەبەستێک، شتێکی راستیش بڵێت.
ئەوەش بزانین کە میدیای چەواشەکار، جارناجار خۆی رووداو دروست دەکات بۆ خۆراکی چەواشەکاری، جارناجاریش لە راستی ڕووداوێک کەڵک وەردەگرێت بۆ چەواشەکاری.
٥- کاتێک ڕووداوێک روودەدات یان دەنگۆیەک دەبێت، ئێمە پێویستە ووشیار بین، کێ دەیەوێت لەم روداو و دەنگۆیە بە ئارمانجی دژە گەل و کۆمەڵگا کەڵک وەربگرێت، بناسین و نەکەوینە داویەوە و بەپێ هێڵ و شرۆڤەی ئەو نەچینە پێش و ئاو نەکەینە ئاشی ئەودا.
هاوکات پێویستە ئەوەش وشیار بین لەبەر ئەوەی هەندێ کەس دەیانەوێت بەلاڕێیدا ببەن، نەکەوینە ئینکاری راستی و بێ مەنتێق رووبەڕووی بینەوە. ئێمە پێویستە لایەنی راست و دروستی رووداوەکە یا دەنگۆوەکە بین. ئەویش پێویستی بە سەبر، قاڵبوونەوە، شێوازی راست و... هەیە.
تەنیا نیەتی باش بەس نییە. وەک لنین گوتویەتی – رێگای دۆزەخ لە رێگە رازاوەکانی نیەتی پاکدا تێپەڕ دەبێت – (راە جهنم از سنگ فرشهای نیت پاک عبور خواهد کرد )