2019-11-01 سێرگی لاڤرۆڤ، وەزیری دەرەوەی روسیا، لە دیدارێکیدا لەگەڵ کەناڵی ڕوسیا 24 ڕایگەیاند، نابێت قەیرانی کوردەکانی سوریا ناوچەکە بەرەو وێرانکاریی و ناجێگیریی ببات، هیچ کەسێکیش نایەوێت ناوچەکە بتەقێنێتەوە.

لە باسی کوردیشدا وتی: "کورد جگە لە سوریا، لە ئێران، عێراق و بەشێکی زۆریشیان لە تورکیا دەژین، هیچ کەسێک نایەوێت ئەم چوار هەرێمە بتەقێنێتەوە، هیچ کەسێکیش نایەوێت وا بیر لە کوردەکان بکاتەوە کە مرۆڤی پلە دووی وڵاتەکانیان بن. ناکرێت کێشەی کوردەکان پشتگوێ بخرێت، دۆزی کوردەکان لەسەرو بابەتی سوریاشەوەیە".

1/11/2019 بەشار ئەسەد، سەرۆکی رژێمی سوریا لە نوێترین چاوپێکەوتن تەلەفیزیۆنیدا هێرشی زۆر توندی کردە سەر حکومەتی تورکیا و رەجەب تەیب ئەردۆگانی سەرۆکی تورکیا و بە "دز و تاڵانچی" ناویبردن.

ئەسەد لەو دەرکەوتنە نوێیە رۆژنامەوانیەیدا کە  بۆ یەکەمجار دوای حەوت ساڵ لە جەنگی ناوخۆی ئەو وڵاتە، بۆ یەکەمجارە لەسەرجەم تەلەفیزیۆنە ناوخۆییەکانی ئەو وڵاتە چاوپێکەوتنێکی پەخش بکرێت، لە بەشێکی دیکەی وتەکانیدا تورکیای وەکو “بەکرێگیراوی و وەکیلی ئەمریکا ناساند و وتی"ئەمریکا تورکیا هەڵدەسوڕێنێت".

لە وتەکانیدا ئاماژەی هەڕەشە ئامیزی ئاراستەی سەرکردایەتی و حکومەتی تورکیا کرد و وتی" حکومەتی داگیرکاری تورکیا بۆ خۆسەپێنی هاتوەتە ناوخاکی سوریا، کاتێک هیچ چارەسەرێکی دیبلۆماسی قەبوڵناکات بۆ پاشەکەشە، ئەوا هیچ بژاردەیەکمان نییە جگە لەجەنگ لە دژی".

سەرۆکى سوریا ئاماژەى بۆ ئەوەشکرد، پەشیمان نییە لە دژی ئەردۆغان قسەى کردووە چونکە هێزەکانى سوپاى تورکیا بۆ دزی لە سوریان.

بەشار ئەسەد  لە وتەکانیشیدا  کوژرانی  بەغدادی بەدرۆخستەوە و وتی "ئەگەر راستباوەیە دەبو تەرمەکەی پیشان بدرایە".

بەشار ئەسەد سەرۆکى سوریا ڕایگەیاند، کێشەى ئەوان لەگەڵ کوردەکان ئەوەیە ئەوان داواى کوردستانى سوریا دەکەن، بەڵام حکومەتى سوریا دەیەوێت یەکپارچەیی خاکى سوریا بپارێزێت.

بەشار ئەسەد لە چاوپێکەوتنێکدا لەگەڵ میدیاى سوریا ڕایگەیاند، پێش هاتنى سوپاى تورکیا بۆ باکورى سوریا، ڕێککەوتنیان هەبوو لەگەڵ هێزە کوردییەکان و ئەوان دەتوانن لەگەڵ کوردەکاندا لە ناو خاکى سوریادا بژین.

ڕاشیگەیاند، هێزەکانى ئەمریکا لە هەر شوێنێکى خاکى سوریادا بن داگیرکەرن و ئەو وڵاتە بۆ نەوت لە سوریایە، لە وەسفى ترەمپیشدا ڕایگەیاند، ترەمپ باشترین سەرۆکە بەراورد بە سەرۆکەکانى دیکەى ئەمریکا. چونکە تەنیا تڕەمپ ڕاستگۆیە و بە ڕاشکاوانە دەڵێت ئێمە نەوتمان دەوێت.

لەلایەکی دیکەوە ئه‌نجومه‌نی سوریای دیموكرات وه‌ڵامی وته‌كانی سه‌رۆكی سوریای دایه‌وه‌، كه‌ له‌ دواین چاوپێكه‌وتنی ته‌له‌فیزیۆنیدا ڕایگه‌یاند، " لە گەڕانەوەی دەوڵەت دەبێت پێکهاتەی کورد لەبەرچاوبگیرێت".

ئه‌نجومه‌نی سوریای دیموكرات له‌ڕاگه‌یه‌ندراوێكدا ئاشكرایكرد، "ئاماده‌ن بەبێ هیچ مەرجێکی پێشوەخت، دانووستاندن لەگەڵ حکومەتی سووریادا بکەن، ئه‌ویش لەسەر بنەمای نیشتمانی و سەروەری یەکێتیی خاکی سووریا".

ئه‌نجومه‌نی سوریای دیموكرات به‌گرنگییه‌وه‌ باس له‌دواین لێكتێگه‌یشتنی نێوان هێزه‌كانی سوریای دیموكرات و حكومه‌تی سوریا ده‌كات به‌ سه‌رپه‌رشتی ڕوسیا، كه‌ بە گوێره‌ی ئه‌نجومه‌نی سوریای دیموكرات، ئه‌وه‌ سه‌ره‌تای دروستكردنی متمانه‌یه‌ له‌نێوان هه‌ردوولا، له‌پێناو ڕزگاركردنه‌وه‌ی ناوچه‌ داگیركراوه‌كانی سوریا له‌لایه‌ن توركیاوه‌.

2/11/2019 پزیشکێکی سویدی کە لە نزیکەوە پشکنینی بۆ بریندارانی خۆرئاوا کردووە ڕایگەیاند، نیشانەکان دەری دەخەن کە سوپای تورک جگە لە فۆسفۆری سپی، چەکی کیمیاییشی بەکارهێناوە، هاوکات باس لە حاڵەتە مەترسیدارەکانی بریندارەکانیش دەکات.

دکتۆر (عەباس مانسووران) کە لە سەرداوای خۆی لە وڵاتی سویدەوە بۆ خزمەتی بواری تەندروستی چووەتە خۆرئاوای کوردستان، ئەنجامی لێکۆڵینەوە و پشکنینە پزیشکیەکانی لەسەر بریندارانی 13ی تشرینی یەکەم لە خۆرئاوای کوردستان کە لە ئەنجامی هێرشەکانی سوپای تورک بریندار بوون، ئاشکرا کرد.

پزیشکە سویدیەکە ڕایدەگەیێنێت کاتی خۆی هەلی بۆ ڕەخسابوو لە جەنگی نێوان ئێران و عێراقدا لە ساڵی 1988 لێکۆڵینەوە لە برینداران و کوژراوانی ئەو شەڕە بکات و وتی: "نیشانەی چەکی کیمیایی لەسەر لەشی نەخۆشەکانی 13ی تشرینی یەکەم دەردەکەوێت. نیشانەکانی چەکی فۆسفۆری سپی بە ئاشکرا دیارە و جەختیشی کردەوە جگە لە فۆسفۆری سپی نیشانەکانی ماددەی (Dense Inert Metal Explosive) و چەند جۆری تری ماددەی کیمیایی دەرکەوتوون. نیشانەکان لە برینی چەکی ئاسایی ناچن"

دکتور مانسووران هەروەها ڕایگەیاند لە گرێ سپی و سەرێکانی و ناوچەکانی دەوروبەری بە سەدان کەس براون بۆ نەخۆشخانەکان کە چەندین کەسیان منداڵن و جەختیشی کردەوە کە زیاتر لە 30 کەسی بەرکەوتووی چەکی کیمیایی ڕەوانەی نەخۆشخانەی ناوەندی شاری حەسەکە کراون و وتیشی: "برینەکانیان زۆر قورس بوون، نیشانەکانیان لە چەکی ئاسایی نەدەچوون.

پزیشکی ناوبراو جەختیشی کردەوە کە فۆسفۆری سپی لەگەڵ ئەوەی ئیسقانەکان دەسووتێنێت، لە هەمانکاتدا زیانێکی زۆر بە دڵ و جگەر و گورچیلەش دەگەیێنێت.

دکتۆری عەباس مانسووران لە بارەی بارودۆخی بریندارەکانیش وتی: "زۆربەی بریندارەکان کەسانی مەدەنین، زۆربەیان وتوویانە لە ئەنجامی بەکارهێنانی چەک لە لایەن فڕۆکەی بێفڕۆکەوانەوە برینداربوون، برینێکی ڕەش و قووڵ لە لەشیاندا بەجێماوە، تا ئێستاش بریندارەکان بە ئاسانی ناتوانن هەناسە وەرگرن، هەناسەیان توند دەبێت، نەخۆشەکان باس لەوە دەکەن کە تا ئێستاش چاویان دەسووتێتەوە، ئەمانە هەمووی نیشانەی چەکی کیمیایین.

ئەو پزیشکە سویدیە دەشڵێت: "زۆر حاڵەتی مەترسیدار لە نەخۆشەکاندا بەدی دەکرێت کە بەکتریای وەکو (Pseudonmonas ssp E.coli) و (MRSA) دەبنە هۆی ئەو حاڵەتانە، چەندین حاڵەت هەن کە ناتوانن ببیستن، زۆر حاڵەت هەن وەک ئەوەیە کە مین تەقیبێتەوە، بەڵام هیچ پارچەیەک بە لەشیانەوە بەدی ناکرێت".

دکتۆر عەباس مەنسووران جەختی کردەوە کە سوپای تورک چەند جۆر بۆمبی کیمیایی بەکارهێناوە کە یەکێک لە نیشانەکان دەری دەخات بۆمبی کیمیایی لە جۆری (Dense inert metal explosive - DIME) بەکارهاتبێت.

2/11/2019، هەزاران کەس لە شاری سلێمانیش بۆ پشتیوانیی بەرخۆدانی ڕۆژئاوای کوردستان ڕژانە سەر شەقام، خۆپیشاندەران بەیەک دەنگ هاواریان دەکرد یەکێتی کورد ئاوایە، باشوریش ڕۆژئاوایە.

دواینیوەڕۆی ئەمڕۆ لە شاری سلێمانی، لە چوارچێوەی چالاکییەکان بۆ ڕۆژی جیهانی پشتیوانی لە ڕۆژئاوای کوردستان، دەستەی هەماهەنگی پشتیوانی ڕۆژئاوای کوردستان، ڕێپێوانێکی جەماوەرییان لە شاڕێی سالم "سەهۆڵەکە"ەوە بۆ بەردەم باخی گشتیی ئەنجامدا.

هەزاران کەس لە هونەرمەند، گۆرانیبێژ، ڕۆشنبیر، نووسەر، ڕۆژنامەنووس، چالاکوان، پەرلەمانتار، کەسایەتی سیاسی و کۆمەڵایەتی، نوێنەری حزب و لایەنە سیاسییەکان، ژن و منداڵ بەشدارییان لە ڕێپێوانەکەدا کرد.

خۆپێشاندەران لەگەڵ بەرزکردنەوەی ئاڵای یەپەگە، یەپەژە، هەرێمی کوردستان، وێنەی شەهیدان و قوربانییەکانی هێرشە داگیرکارییەکانی سوپای تورک، دروشمەکانی"بژی بەرخۆدانی ڕۆژئاوا، کوردم ئازادیم دەوێت، ڕۆژئاوا سەردەکەوێ، نا بۆ بەرهەمی تورکی ئەگەر جاش نیت و مەردی، یەکێتی کورد ئاوایە باشوریش خۆرئاوایە، تیرۆریست ئەردۆغان"یان  وتەوە.

دوای گەیشتنی خۆپیشاندانەکە بە بەردەم باخی گشتی، کنێرعەبدوڵا، ئەندامی دەستەی هەماهەنگی پشتیوانی ڕۆژئاوای کوردستان، بەیاننامەی ڕێپێوانەکەی خوێندەوە و تێیدا بایکۆتکردنی کاڵا و دراماو کلتوری تورکیی وەک هەڵوێستێکی بەرز نرخێندرا.

هەر لە بەیاننامەکەدا، دەستەی هەماهەنگی پشتیوانیی لە ڕۆژئاوای کوردستان، ڕەخنەی لە هەڵوێستی حکومەت و پەرلەمانی هەرێمی کوردستان و حزبە سیاسییەکان گرت بەرامبەر خۆرئاوای کوردستان و بە "شەرمەزارانە" ناوزەندیان کرد.

2019-11-02 مەزڵوم كۆبانی فەرماندەی گشتیی هەسەدە لە چاوپێكەوتنێكدا، لەگەڵ ڕۆژنامەی ''لاریبوبلیكا''ی ئیتاڵی ڕایگەیاند، "هیچ متمانەیەكمان بە حكومەتی سوریا نییە، بەڵام جگە لە ڕێككەوتن هیچ چارەسەرێكی دیكە نییە بۆ كێشەكانی سوریا، لەبەرئەوە بە ناچاری ڕێككەوتنمان كردووە."

پێویستە وڵاتانی ئەوروپا گەرەنتیی جێبەجێكردنی ئەو ڕێككەوتنە بدەن. دانوستانەكانمان لەگەڵ حكومەتی سوریا بە شێوەی ناڕاستەوخۆ و لە ڕێگەی ڕوسیاوەیە، كە هاوپەیمانی دیمەشقە و هەموو ڕێككەوتنەكانیشمان لە چوارچێوەی بەرگریكردنە لە گەل و ئازادیی سیاسەت و كلتورى کوردى.

گفتوگۆمان لەگەڵ ئەمریكییەكان كردووە و گرەنتیی پاراستنی كوردیان بە هەسەدە داوە، بەڵام ئەمریكا لە جێبەجێكردنی بەڵێنەكانیدا سستە.

مەزڵوم كۆبانی لە چاوپێكەوتنەكەیدا ڕەخنەی لە بڕیاری كشانەوەی ئەمریكا لە سوریا گرتو وتی "ئەو بڕیارە هەڵكردنی گڵۆپی سەوز بوو بۆ هێرشەكانی توركیا و بۆردومانكردنی ناوچە كوردییەكان."

كۆبانی لە وەڵامی پرسیاری دەستگیركردنی لەلایەن توركیاوە وتی، ''جگە لەوە چاوەڕوانی هیچی دیكە لە كەسێك ناكەین كە پرۆژەی كوشتوبڕی گەلەكەمانی بە ئاشكرا ڕاگەیاندووە".

3/11/2019 ته‌قینه‌وه‌یەک له‌ رێگه‌ی ئۆتۆمبێلێکی بۆمبڕێژكراوەوە لە بازاڕێکی شارۆچکەکەی گرێ سپی ڕوویدا، 13 كه‌س شەهید بوون و ژمارەیەک هاوڵاتی دیکەش برینداربوون.

هەروەها تەقینەوەکە جگە لە زیانی گیانی، زیانێكی زۆری مادیشی بە شوێنی ڕووداوەکە گەیاند و بەهۆیەوە زیانێكی زۆری مادی به‌ دوكان و شوێنه‌ بازرگانییەکان کەوت.

شارۆچکەی گرێ سپی ڕۆژئاوای کوردستان ده‌كه‌وێته‌ سه‌رسنوری نێوان توركیا و سوریا، لە سەرەتای هێرشەکانی تورکیا بۆ سەر ڕۆژئاوای کوردستانەوە کەوتووەتە ژێر دەستی میلیشیا چه‌كدارییه‌كانی سه‌ر به‌ توركیا.

کینۆ گابرێل، وتەبێژی ناوه‌ندنی ڕاگه‌یاندنی هێزه‌كانی سوریای دیموكرات (هه‌سه‌ده‌) لە راگه‌یه‌ندراوێكدا رایگه‌یاند، "تورکیا دەیەوێت خەڵکی ناوچەکانی خۆیان جێبهێڵێن، خەڵکی دیکە لە شوێنەکانیان نیشتەجێبکات و گۆڕانکاری دیمۆگرافی لە ناوچەکە بکات". 

 ئاماژه‌ی به‌وه‌شكردووه‌، "ناوچەکانی گرێ سپی و سەرێ کانی کەوتوونوونەتە بەر هێرشی ئۆتۆمبێلی بۆمبڕێژکراو و ئەوان سەرکۆنەی ئەو هێرشانە دەکەن بەتایبەتی ئەوانەی کەسانی مەدەنی دەکەنە ئامانج". 

هەر هەمان ڕۆژی 3/11/2019  شەڕڤانانی سەر بەهێزەکانی سوریای دیموکرات(هەسەدە) توانیویانە لەماوەی 24 کاتژمێردا، لەشەڕ و پێکدادانێکی قوڕس لەگەڵ گروپەچەکدارەکانی سەر بەتورکیا (13) گوندی سەر بە شارۆچکەی سەرێکانی ئازاد بکەنەوە، گوندەکانیش بریتین لە(داودیە، سەعید، رێحانە، سویدیە، کنبەهر، عەبوش، ئوم شەفیعە، فەیسەڵییە، عەزیزە، قاسمییە، جەمیلە، ئوم عەشبە، عەریشە). ئەو گوندانە پێشتر کەوتبوونەدەست گروپەچەکدارەکانی سەر بەتورکیا.

قەتەر یەکێک بوو لەو ووڵاتە عەرەبیانەی کە هەر لە سەرەتای داگیرکاری تورکیا بۆ سەر خۆرئاوای کوردستان هاوکاری گەورەی مادی و ئیعلامی تورکیایی کردووە، کەناڵی ئەلجەزیرەی قەتەری هەموو هەوڵێکی خۆی خستبووە کار بۆ چەواشەکردنی ڕا گشتی عارەبی و جیهانی سەبارەت بە داگیرکارییەکەی تورکیا، بە درێژەیی شەڕەکە وەکو زمانحاڵی تورکیا و چەتەکانی هاوپەیمانی تورکیا مامەڵەی دەکرد. ڕۆژی 2019-11-03  مەولود چاوشئۆغڵو، وەزیری دەرەوەی تورکیا سەردانی قەتەری کرد و لەگەڵ وەزیری دەرەوەی قەتەر کۆبوویەوە و دواتر لە تویتێکدا نوسیوی، "لە کۆبوونەوەماندا لە دەوحە، سوپاس و پێزانینی رەجەب تەییب ئەردۆغان، سەرۆکی تورکیامان گەیاندە ئەمیری قەتەر".

یەکشەممە، 3ی تشرینی دووەمی 2019، لە سێیەمین کۆنفرانسی گشتی پارتی دیموکراتی گەلان (هەدەپە) لە ئیستەنبوڵ بەسترا، سەزای تەمەلی ڕوو بە ئەردۆغان و پارتەکەی وتی، "ئەوانەی پێیانخۆشبوو کۆبانی بکەوێت، ئێستا بوونەتە دراوسێ لەگەڵ داعش. دیموکراتیخوازەکان دەردەکەیت لە سنوور و داعش کە لە ئیستەنبوڵ کۆمەڵکوژیی کرد دەخەیتە شوێنیان".

پەروین بوڵدان، هاوسەرۆکی هەدەپە لە وتارەکەیدا ئاماژەی بەوەکرد، هیچ کەسێک بۆی نییە دیموگرافیای باکوری سوریا بگۆڕێت و وتیشى،"هەدەپە ناکەوێت، چونکە خەڵکمان هەیە و هەدەپە بە گڕوتینەوە لە مەیدانەکەدا دەمێنێتەوە".

ڕۆژی 5/11/2019 هاوڵاتیانی گوندە سنورییەکان لە خۆرهەڵاتی شاری کۆبانێ، بە میوەی خراپبوو، هێلکەو بەرد، ڕووبەڕووی دەورییەی هاوبەشی پۆلیسی ڕووسیا و دەوڵەتی داگیرکەری تورک بوونەوەکرد لە کاتی تێپەڕبوونیان بەناوچەکە.

یەکەم دەورییەی هاوبەشی پۆلیسی ڕووسیا و سوپای داگیرکەری تورک بەپێی ڕێککەوتننامەی سوچی کە لە ڕێککەوتی 22/10/2019 مۆرکرا، لە ناوچە سنورییەکانی کۆبانێ گەڕانێکیان ئەنجامدا.

لەکاتی گەیشتنی ئەو دەورییە هاوبەشە بۆ گوندی قەرەمۆخ لە ڕۆژهەڵاتی شاری کۆبانێ، هاوڵاتیانی ئەو گوندە،  پێڵاو، بەرد، هێلکە، میوەی خراپبوو-یان ئاراستەی ئەو کاروانە کرد و هەندێک لەو هاوڵاتیانە بە بەرد لەبەردەم ئەو کاروانە وەستان ئەمەش وەکو ناڕەزایەتییەک و ڕەتکردنەوەی هێزی داگیرکەری لەسەر خاکەکەیان.

هەروەها هاوڵاتیان لەکاتی تێپەڕبوونی ئەو کاروانە، هەڵوێستی خۆیان جگە لەبەردبارانکردن، بە نوسینی"ئەردۆغان تاوانبارە" وتنەی درووشمی جیاجیا لە دژی هێزی داگیرکەری تورک دەربڕی.

ڕۆژی 5/11/2019، (200) زانا و ئاکادمیستی ناوداری جیهان، کە لەناویاندا (نوام چۆمسکی) و چەند ناودارێکی دیکەی جیهانی تێدا بوو، لەدژی داگیرکارییەکانی دەوڵەتی تورک بۆسەر خۆرئاوای کوردستان بەشداری کەمپەینێک بوون و بۆ شەرمەزارکردنی ئەو هێرشانە داوای پشتیوانیان لە جیهان کرد و ڕایدەگەیەنن کە: خۆرئاوای دیموکراتی سەردەکەوێت.

دوای هێرشەکانی دەوڵەتی داگیرکەری تورک بۆسەر ڕۆژئاوای کوردستان، 200 نووسەر، زانا، ڕۆشنبیر، گروپ و ڕێکخراوە هەرەوەزییەکان، لە 21 وڵاتی جیهان، دژی ئەو هێرشانە کەمپەینێکیان بۆ بایکۆتی تورکیا دەستپێکرد، نوام چۆمسکی، میچل لۆیی و جانت بێل کە بەشدارن لەو کەمپەینەدا، لەسەر هێرشەکانی دەوڵەتی تورک و گرنگی پاراستنی نمونەی ڕۆژئاوای کوردستان بۆ ڕۆژنامەی "یەنی یاشام" دووان.

(جانت بێل) ناڕەزایەتی خۆی لەسەر کشانەوەی هێزەکانی ئەمریکا لە باکوری سوریا دەربڕی و وەک خیانەتکردن لە کوردی نیشاندا و وتی: "ئەمە بە تەواوەتی نامەنتقی، نا ئەخلاقی و نامرۆڤانەیە، ترامپ دەیەوێت ببێتە دیکتاتۆرێک، لەبەرئەو ڕێگەی بە داگیرکاری ئەردۆغان لەدژی سیستمی ئاشتیخواز و دیموکراتی باکور و خۆرهەڵاتی سوریا داوە، ئەو ناوچەیە تێکدرا، کورد و کرستیان کوژران و ڕووبەڕووی کۆمەڵکوژی کرانەوە.

هەروەها جانت بێل، دواتر لەسەر باسی سیستمی یەکسانی خۆرئاوا، وتی: "شەرم دەکەم و زۆر غەمگینم کە وڵاتەکەم خیانەتی لەو مرۆڤانە کرد، هەروەها بانگی لە هەموو مرۆڤە ئازادیخوازەکانی جیهان کرد کە پشتیوانی لە قەسەدە بکەن و وتی: بۆ دروستکردنی ناوچەی دژە فڕین لە خۆرئاوا گەل دەتوانن فشار بخەنە سەر دەوڵەتەکانیان، دەتوانن داوا لە دەوڵەتەکان بکەن کە لە ڕووی سەربازییەوە پشتیوانی هەسەدە بکەن لەدژی تورکیا، دەتوانن هاوکارییەکانیان بگەیننە مانگی سوری کوردستان، دەتوانن فشار بخەنە سەر وڵاتەکەیان تا پشتیوانی بزوتنەوەی ئازادیخوازی بکەن، پێویستە بزانرێت پێگەی کورد، بەڕێوەبەری و ڕاستی خۆبەڕێوەبەری، بەناچاری ڕۆژێک قبوڵ دەکرێت.

لای خۆیەوە (نوام چۆمسکی)، هێرشەکانی دەوڵەتی تورک بە تاوانی شەڕ ناو دەبات و وتی: "لە قۆناغەکانی پێشوودا دڕندەیی و پاکتاوی نەژادی هەبوو، ئێستاش ترامپ بە خیانەتی خۆی، خیانەتێکی دیکەی بۆ لیستەکەی زیادکرد، ئەو سەرکەوتنەی خۆرئاوا لەژێر هەڕەشەی جددی دایە، تاوانەکانی تورکیا پێویستی بە شەرمەزارکردنی بەهێزی نێونەتەوەیی هەیە".

(میچل لۆیی)، نمونەی خۆرئاوای کوردستان بە نمونەیەکی دیموکراتی و ئاشتیخواز دەزانێت و وتی: "پێچەوانەی هێزە سیاسی-دینییە ستەمکارەکان، خۆرئاوا نمونەیەکی تەواوی مرۆڤایەتی و یەکگرتووییە، بە فەرمانی ترامپ و هاوکاری ئەردۆغان، چەتە توندڕەوەکان هەوڵدەدەن خۆرئاوا لەناو بەرن، ئەو تاوانە تەنیا دژی کورد نییە، دژی دیموکراسی و مافەکانی مرۆڤیشە، ئێمە ناچارین لە ئەوروپا، ئەمریکا، ئەمریکای لاتین، ئاسیا، ئەفریقا و هەموو شوێنێک، لەدژی داگیرکاری تورک پشتیوانی خۆرئاوا بکەین، خۆرئاوای دیموکراتی سەردەکەوێت.

ڕۆژی سێ شەممە 5/11/2019 نێچیرڤان بارزانى سەرۆکى هەرێمى کوردستان لەمیانى پانێڵێکدا لە دیدارى (میر)ى لە هەولێر لەبارەى دۆخى خۆرئاواى کوردستان و هێرشەکانى تورکیا وتی: "ئەمڕۆ هەر کوردێک پێی ناخۆشە ئەوەى بەسەر خوشک و براکانمان لە سوریا بەسەریان هاتووە و حەز دەکات بە جۆریکى تر بێت، کورد لە سوریا بەرخۆدانێکى گەورەیان  کرد لە دژى داعش و شەهیدێکى زۆریاندا نەک بۆ پاراستنى کورد، بەڵکو بۆ پاراستنى پێکهاتەکانی تریش".

هەروەها وتی: " تورکیا لە سوریا کورد نەبووە، بەڵکو مەسەلەکە پەکەکە بووە کە تورکیا ڕایگەیاندوە ئەوان ناتوانن ئاڵاى پەکەکە لەسەر سنورەکەیان قبوڵ بکەن. ئێمە هەوڵمانداوە برایانى کورد لە سوریا تێبگەیەنن ئەوە خەتەریکى گەورەیە". "نیگەرانى ئێمە لە هاتوونى تورکیا ئەوەیە ئەو هێزەیە کە لەگەڵ تورکیان، چونکە لە عەفرین شتى خراپ روویدا ئێمە بەجدی لەوە نیگەرانین هەمان شت دووبارە دەکەنەوە، هەروەها نیگەرانین لە هاتنى ئەو هەموو ئاوارەیە کە تەکلیفیکى لەسەر هەرێم زیادکردوە بە بەهاى ملیارو نیوێک دۆلار زیادى کردوە، نیگەرانییەکى تر کە هەمانە داعش پێمانوانییە داعش تەواو نە بووەو داعش خەتەرە لەسەر هەرێم و عێراق بە گشتى".

سەرۆکى هەرێم وتیشى" تورکیا داوایان لێکردین  کوردانى سوریا خۆیان جیلا بکەینەوە لە پەکەکە، بەڵام بەداخەوە پەکەکە شەرعیەتى خۆى لەرێگەى کوردەکانى سوریاوە بسەلمێنێت، کە دواتر ئەمەى بەسەر هات".

نێچیرڤان بارزانى رونیکردەوە، داواى لەوەزیرى دەرەوەى روسیا کردوە هەوڵى چارەسەری کێشەکانى کورد لەگەڵ حکومەتى سوریا بدات، جەختیشکردەوە، دەبێت کێشەکە لەگەڵ سوریا بە ئاشتیانە چارەسەر ببێت.

باسى ئەوەشی کرد لەگەڵ مەزڵوم کۆبانى قسەى کردوەو هەموو شتێکى پێ وتووە، ئەوەى لەگەڵ مەزڵوم کردومان پێیان وتووەو هەموو شتێک دەزانێت، جەختیشیکردەوە، تائێستا هاوکاریان بوون ئەوەى پێیان کرا بێت کردویانەو بەردەوامیش دەبن.

لەبارەى سیاسەتى ئەمریکا لەناوچەکە سەرۆکى هەرێم رونیکردەوە، کێشەى ترەمپ ئەوەیە نازانێت هێزەکانى بۆ لەسوریاو هیچ سیاسەتێکى روونى نەبووە لە سوریا.

نیچیرڤان بارزانى نیگەرانى خۆى لە لەشکرکێشى تورکیا بۆ سەر رۆژئاواى کوردستان دەربڕی و راگەیاند

هەروەها سەرۆکى هەرێم ئەوەشى خستەڕوو، کە هەوڵى بەردەوامیان دەبێت لەگەڵ ئێران و تورکیا، ئەوەى پێیان بکرێت بۆ یارمەتیدانى کوردانى سوریا لەم دۆخە تێپەڕێنن، بەڵام دەستوەردان ناکەن تەنیا عامیلى خێر دەبن.

لەبارەى کێشەى کوردیش لە تورکیا نێچیرڤان بارزانى وتیشى"کێشەى کورد لە تورکیا کێشەیەکى جدییەو ئێمەش دەورمان هەبووە لە پرۆسەى ئاشتى، لە هەموو دیدارەکانمان لەگەڵ تورکیا ئەو پرسەمان فەرامۆش نەکردوە، پێمان وتوون دەبێت کیشەى کورد لەتورکیا بە شێوەیەکى ئاشتیانە چارەسەر بکرێت و بەشێوەیەکى سەربازى چارەسەر ناکرێت".

قسەکانی نێچیرڤان بارزانی لە قسەکانی ئەردۆغان دەچوو، لە قسەی تورکێکی ڕەگەز پەرست دەچوو نەک لە سەرۆکی هەرێمی باشوری کوردستان، پاساوی بۆ داگیرکاری تورکیا دەهێنایەوە، بەرژەوەندییە ئابوری و سیاسییەکانی پارتەکەی لەگەڵ تورکیا ببووە هۆی پاراستنی بنەماڵە و دەسەڵاتەکەیان، نێچیرڤان بارزانی نەک نەیتوانی بە شێوازێکی دبلۆماسی قسە بکات بەڵکو ڕاستییەکانیشی شێوان، باشە خۆ پەکەکە کێشە بۆ بە فەرمیکردنی زمانی کوردی لە تورکیا ناکات بەڵکو کار بۆ ئەوە دەکات، ئەی تورکیا بۆ ئەو کارە ناکات و زمانی کوردی ببێ بە زمانی فەرمی و لە دەستوور دا دانی پێدابنرێ؟

ئەی باشە ئەوە پەکەکەیە کە سەرۆک شارەوانییەکانی ناوچە کوردییەکان، کە بە شێوەیەکی دیموکراسی هەڵبژێدران، بەزەبری هێز لادەبات و بە قەیومەکان جێگایان پڕ دەکاتەوە؟

خۆ رێفێراندۆمەکەی باشور هیچ پەیوەندیەکی بە پەکەکە نەبوو، رەجەب ئەردۆگان دژایەتی باشوری کرد و سنوری داخست.

ئەی ئەوە پەکەکەیە کە ناوی کوردستانی قەدەغە کردووە و نابێت بوترێت کوردستان بەڵکو دەبێت بگوترێت باکور و خۆرهەڵاتی سوریا و باکوری عێراق؟

خۆ تورکیە دەتوانێت ناوچە کوردییەکانی باکوری کوردستان ئاوەدان بکاتەوە لە کاتێکدا لە چاو ناوچە تورکییەکان بە دوو وڵاتی جیاواز دەچن، خۆ پەکەکە کێشە بۆ ئاوەدانی دروست ناکات. ئەوە جۆرە گوتارانە یەکێکن لە هۆکارەکانی درێژەدان بە داگیرکاری و کاولکاری تەواوی کوردستان. كاتێك نێچیرڤان بارزانی ده‌ڵێت: "توركیا كێشه‌ی له‌گه‌ڵ كوردی سوریا نییه‌ به‌ڵكو كێشه‌ی  په‌كه‌كه‌ی هه‌یه‌". هه‌مان ئه‌و قسه‌یه‌ ئه‌كات كه‌ ئه‌ردۆغان ئه‌یكات، هه‌مان قسه‌ی سیاسه‌تی ره‌سمی ده‌وڵه‌تی توركیایه‌ كه‌ بانگه‌شه‌ی بۆ ئه‌كات، له‌ پشت ئه‌م قسه‌یه‌ی ده‌وڵه‌تی توركیاوه‌ گه‌وره‌ترین پرۆژه‌ی  پاكتاوكردنی ره‌گه‌زیی و گۆرینی دیمۆگرافی له‌سه‌ده‌ی بیست و یه‌كدا دژ به‌ كورد به‌رێوه‌ ئه‌چێت، ئه‌و قسه‌یه‌ی سه‌رۆكی هه‌رێمی كوردستان گه‌وره‌ترین پشتیوانییه‌ بۆ ئه‌و  په‌لاماره‌ی توركیا دژ به‌ كورد خۆرئاوای کوردستان ده‌ستیپێكردوه‌،  پشتیوانییه‌ بۆ ئه‌و هه‌ڵمه‌ته‌ گه‌وره‌یه‌ی له‌ناوبردنی بوونی كورد له‌ سوریا، ئه‌م قسه‌یه‌ی  نێچیرڤان بارزانی هێمایه‌كی روونه‌ بۆ ده‌رخستنی ئه‌و جه‌وهه‌ره‌ ساخته‌یه‌ی گوتاره‌ ناسیۆنالیستیه‌كه‌ی پارتی، گۆتارێكی  نه‌ته‌وه‌یێ کە ناوەڕۆکەکەی جگە لە سەپاندنی هەژموونی خێزانێکی سیاسی و تاڵانکردنی سامانی وڵات هیچ شتێکی تر نییە، گوتارێكە ناتوانێت پشتگیری بزوتنەوە ڕزگاریخوازەکانی کورد لە پارەکانی دیکەی کوردستان بکات، بەڵکو ناتوانێت پشتیوانی دوژمن و داگیرکەران نه‌كات كه‌ له‌ پارچه‌كانی كوردستاندا سه‌رقالی سرینه‌وه‌ی بوونی كوردن.

هەر لێرەدا دەمەوێت بۆ وەڵامدانەوەی قسەکانی سەرۆکی هەرێمی باشوری کوردستان ئاماژە بە نووسینی (ئەحمەد ئالتان) بدەم  کە ڕۆژنامەنوسێکی بەڕەگەز تورکە، ساڵی 1995 نوسینێکی لەسەر کوردی باکوری کوردستان بڵاوکردەوە، کە بەو هۆیەوە دادگای تورکیا بڕیاری زیندانیکردن دا و زیندانیکرا، کە ناونیشانی نووسینەکەی بەمشێوەیەیە کە دەڵێت: "بیهێننە بەرچاوی خۆتان ئێمە لە جێگای کوردەکان بوینایە چیتان دەوت؟ 

ئەمانویست چی بکەین، ئەگەر مستەفا کەمال ئاتاتورک (بنیاتنەری تورکیا) کۆمارێکی دروست بکردایە بەناوی "کوردییەت" هەروەها پەرلەمانەکەش ناوی خۆی نابا " ئەتاکورد".؟

ئەمانویست چی بکەین، ئەگەرهەموو هاوڵاتیانی "کۆماری کوردییەت" وا حسابکرایە  کوردە ؟  لە هەموو شوێنێکیش بنوسرایە

بەختەوەر ئەو کەسەیە، کەخۆی بە کورد بزانێ؟

ئەگەر بمانوتبا، بە هیچ شێوەیەک تورک لە کۆماری کوردییەتدا نییە، هەموو لە ئەسڵدا کوردن؟

ئەگەر ناوی تورکی قەدەغە بوایە، هەموو ناچارکرابان ناوی کوردی  وەربگرن؟

ئەمانویست چیبکەین، ئەگەر خوێندن تەنها بە کوردی بوایە لە قوتابخانەکان، خوێندن بە تورکی قەدەغە بوایە؟

ئەگەر بەبێ دادگا زیندانی بکرێین لەسەر ئەوەی وتومانە" ئێمە تورکین، ئێمە زمان  و میژووی خۆمان هەیە؟

ئەگەر بەردەوام لە ژێر چاودێری پۆلیسا بین و هەمیشە وەک خەتابارێک مامەڵە بکرێین هێرش بکرێتە سەرمان تەنها لەبەر ئەوەی تورکین؟! ئێمەی تورک ئەوشتانەمان قبوڵ دەکرد؟

یاخود حەزمان دەکرد بەیەکسانی قبوڵکراباین وەک هاوڵاتی بە ناسنامەی تورکی وزمان و کلتوری خۆمان؟

دیموکراتی ئەوەیە، کاتێ ئێمە قبوڵدەکەین، کە کوردەکان هەمان مافیان هەیە کە ئێمەی تورکیش داوای دەکەین، ئەگەر لە کۆماری کوردییەتدا بژین.

لە ڕاستیدا ئەمە ئەوە دەهێنێ کە ئەو هەموو خوێنەی لە پێناوا بڕژێ؟ ئەمە ئەو نرخەی هەیە ئەو هەموو خوێنە لە پێناویا بڕێژین، چونکە نامانەوێ مافەکانی کەسێ بدەین، لەکاتێکا خۆمان لەهەمان باردا هەمان داواکاریمان هەبێ؟.

ڕۆژی 2019-11-05  فرۆکەی بێفڕۆکەوانی تورکیا بارەگایەکى یەکینەکانی پاراستنی شەنگال (یەپەژە)یان لە چیاى شنگال بۆردومان کردو بەهۆیەوە چەندین کەسیش برینداربوون. بریندارەکان بۆ نەخۆشخانە کانى خۆرئاواى کوردستان گواسترانەوە. بە بیانووی بوونی بنكە و بارەگاكانی پەكەكە، سوپای توركیا چەند ساڵێكە بە بەردەوامی ناوچە سنوریەكانی هەرێم بۆردومان دەكات و لە رابردووشدا بە قوڵایی چەندین كیلۆمەتر هێزەكانی لە سەر خاكی هەرێم جێگیر كردووە.

ڕۆژی 6/11/2019 (نۆم چۆمسکی) میوانی بەرنامەیەکی تایبەتی کەناڵی ئەلجەزیرەی قەتەری بوو سەبارەت بە داگیرکاری تورکیا بۆ سەر خۆرئاوای کوردستان، کاتێک مەهدی حەسەن راگەیاندکار لێی دەپرسی بۆچی پشتگیری لەمانەوەی هێزەکانی ئەمریکا دەکەیت لە باکوری سوریا؟ مەگەر تۆ بەدرێژایی ژیانت دژی  دەستێوەردانی سەربازیی ئەمریکا نیت لە وڵاتان!  بۆچی ئەمجارە پشتگیری لەم دەستتێوەردانە دەکەیت کە خەڵک سەرسام بوە تۆ  ئەو داوایە دەکەیت؟

چۆمسکی وتی: "ئەو کەسانەی داوای کشانەوەی هێزە ئەمریکیەکان دەکەن لەوێ، لەسۆنگەیەکی دژەئیمپریالیزم ئەو کارە دەکەن، بەڵام پرەنسیپەکان دەقی پیرۆز نین و پێویستە لەگەڵ واقیع و بارودۆخی مرۆڤەکان بخوێندرێتەوە، هێشتنەوەی یەکەیەکی بچوکی سەربازیی ئەمریکی بۆ بەرپەرچدانەوەی داگیرکاری پلان بۆدانراوی تورکیا، ئیمپریالیزم نیە. 

بەڵکو پاراستنی کوردەکانە لە رەشەکوژی و کارە دڕندانەکانی ئەردۆغان کە ئێستا بەشێکی لەو خاکە داگیرکردوە".

6/11/2019 (موراد قەرەیلان) ئەندامی کۆمیتەی بەرێوەبەری پەکەکە بەشداری بەرنامەیەکی تایبەتی (ستێرک تی ڤی) زمانحاڵی پەکەکە کرد، قەرەیلان ئاماژەی بەوەدا کە یەکێک لە کێشە هەرە گرنگەکانی گەلی کورد کێشەی یەکێتی نەتەوەییە و، وتی: "ئێمەی کورد هەموو لە یەک کەشتیداین، ئەگەر لایەکی ژێرئاو بکەوێت ئەو کات هەموو ژێر ئاو دەکەون، سەرەڕای ئەمەش پێکهێنانی یەکێتی نەتەوەیی ناخرێتە ڕوو باسی لەسەر ناکرێت، بە تایبەت لەم کاتە دەرفەتێکی گرنگ هەیە، لە کەسایەتی ڕۆژئاوای کوردستان و لە سایەی بەرخۆدانی شکۆمەند دەنگی کورد ئەمڕۆ گەیشتووەتە هەموو جیهان، سیستمی جیهان هەموو ڕاوەستەی لەسەر دەکەن، ئەمە دەرفەتێکی گرنگە، ئەگەر ئێمەی کورد ستراتیژی و سیاسەتێکی هاوبەش بخولقێنین، ئەگەر ئەو شەپولە نوێیەی داگیرکاری دەوڵەتی تورک تێکبشکێنین، دەستکەوتەکانی کورد بۆ هەمیشەیی دەمیننەوە و کێشەی کورد چارەسەر دەبن.

دەمەوێت بانگ لە ڕێبەرانی پارتە کوردەکان و کەسانێک کە خۆیان بە بەرپرس دەزانن بکەم؛ پێویستە چیتر مەترسییەکان ببینین، چەقۆ گەیشتووەتە سەر ئێسک، ئەگەر ئەم قۆناغە لەدەست بچێت، کورد ئیدی ناتوانێت وەک ئێستا دەنگی خۆی بگەینێتە هەموو شوێنێک، ئێستا دەرفەتێکی گەورە لەدەستی کورد دایە، دۆزی ڕەوای گەلی کورد ئێستا لە ڕۆژەڤی جیهان دایە، ئەگەر سیاسەتێکی ڕاست و هاوبەشمان هەبێت، دەتوانرێت لێشاوی هێرشە فاشیستی، مشەخوری و قڕکەرانەکان تێکبشکێندرێت و دەستکەوتەکانی گەلەکەمان هەمیشەیی بکرێنەوە، ئەگەر نەتوانین ئەمە پێکبێنین هەموو شتێک لە دەستمان دەچێت، پێویستە لەسەر ئەم بابەتە بە جددی ڕاوەستین و بیری لێبکەینەوە.

ئەمانە هەمووی لەسەر بنەمای یەکێتی نەتەوییە و پێویستە هەنگاوی گرنگی بۆ بنرێت و پێشنیارێکی بەو شێوەیەی کرد: ئێستا کەنەکە هەیە، لە ڕێگای کەنەکەوە ڕۆشنبیر، هونەرمەند، نووسەر و بێلایەنەکان لە کوردستان دەتوانن کۆمسیۆنێک دابمەزرێنن، با ئەو کۆمیسیۆنە لەگەڵ هەموو پارتە کوردییەکان کۆببێتەوە و داوایان لێبکات لەسەر هێڵی یەکێتی نەتەوەیی یەکبگرنەوە، ئەوەی لەو هێڵە لایدا، پێویستە بکەوێتە بەر ڕەخنە و هەڵویستی لەبەرامبەر نیشانبدرێت، پێشنیاری دیکەشم ئەوەیە: بەرنامەی یەکێتی نەتەوەیی ئامادەیە، ئەو بەرنامەیەی کە ساڵی 2013 ئامادەکرابوو لە قۆناغی کۆتایی ڕاگیرا، ئەگەر هەموو لایەنەکان ئەم بەرنامەیە قبوڵ بکەن، پێویستە ناکات سەرلەنوێ لە سفرەوە دەست بەو هەوڵدانە بکرێت، چونکە بنەمایەک هەیە و بە کۆبوونەوە لەسەر ئەم بنەمایە، دەتوانێت قۆناغەکە پێکبێت، ڕاستیش ئەوەیە بنەمایەک بۆ یەکێتی نەتەوەیی هەیە".

6/11/2019 (تسیبی هۆتوفیلی) جێگری وەزیری دەرەوەی ئیسرائیل رایگەیاند، ئیسرائیل پشتیووانی ھێزەکانی سوریای دیموکرات (ھەسەدە) دەکات و لە دانووستانەکانی لەگەڵ ئەمریکا پشتیووانیان دەکات.

تسیبی ھۆتوفیلی ئاماژەی بەوشداوە، وڵاتەکەی لە بڕیاری کشانەوەی ھێزەکانی ئەمریکا لە سوریا ناڕازییە و لە ڕۆژی 10ی تشرینی یەکەمی ئەمساڵ بنیامین ناتانیاھۆ سەرۆک وەزیرانی ئیسرائیل ھاوکاری مرۆیی پێشکەش بە کورد کردووە و ڕایگەیاندووە، کورد لەسەر دەستی تورکیا و گروپە پرۆکسیەکان لەناوچەکانیان توشی راگوێزان دەبنەوە و ئەمە قبوڵ ناکرێت.

ھەروەھا ئاماژەی بەوەشکردووە، داواکاری زۆر ھەیە لە ناوخۆی ئیسرائیل تا لە ڕووی سیاسی و مرۆیی ھاوکاری کوردەکان بکرێت، ئەوان لە چەند کەناڵێکەوە ئەو ھاوکاریانە پێشکەش بە کورد دەکەن.

تسیبی ھۆتوفیلی باسی لەوەشکردووە، پارێزگاریکردن لە کوردەکان و ھێشتنەوەی کەمایەتییە نەتەوەییەکان لەناوچەکە لە بەرژەوەندی ئیسرائیل دایە، بەو پێیەی لە ڕووی سیاسی و فکریەوە زیاتر لە وڵاتانی ڕۆژئاواوە نزیکن و کۆتایی ھاتنی دەسەڵاتی کوردی لە باکوری سوریا ھەڕەشەیە بۆ سەر ئیسرائیل، کە دواجار ئەو ناوچانە دەکەونە ژێر کۆنتڕۆڵی ئێران.

ڕۆژی 7/11/2019 لە کۆنگرەیەکى رۆژنامەنوسیدا وتەبێژانى وەزارەتى بەرگرى ئەمریکا-پنتاگۆن، ڕایگەیاند، ئامانجى سەرەکى هێزەکانى ئەمریکا تێکشکاندنى داعشە لە سوریا و نەگەڕانەوەیەتى بۆ ناوچەکە، چونکە هێشتا داعش بەتەواوەتى لەناو نەچووە.

هەروەها ئاماژەى بەوەشکرد، هێزەکانییان  بەردەوامن لە هاوکارکردنى هەسەدە لە تێکشکاندنى تەواوەتى داعش، چونکە بەوتەى خۆیان هەسەدە هاوپەیمانى سەرەکى ئەمریکایە.

لەبارەى کێڵگە نەوتییەکانى سوریا، وتەبێژی پنتاگۆن رونیکردەوە ساڵى 2014 داعش نابێت داهاتێکى زۆری لەنەوت دەستکەوت، ئێستا ئەمریکا نایەوێت کێڵگە نەوتییەکان بگەرێنەوە دەست داعش.

سەبارەت بە کشانەوەى هێزەکانیشیان لە سوریا، وتەبیژى پنتاگۆن ئەوەى خستەڕوو، بارودۆخەکەو فەرماندەکانیان بریار دەدەن تا کەى هێزەکانییان لە سوریا دەمێننەوە.

ڕۆژی 7/11/2019  ئه‌مانوێل ماكرۆن، سه‌رۆكی فه‌ره‌نسا له‌میانی چاوپێكه‌وتنێكدا له‌گه‌ڵ گۆڤاری "ئیكۆنۆمسیت" ڕایگه‌یاند، "ئه‌وه‌ی ئێستا ده‌یبینین مردنی په‌یمانی باكوری ئه‌تڵه‌سی (ناتۆ)یه‌".

سه‌رۆكی فه‌ره‌نسا هۆكاره‌كه‌ی گه‌ڕانده‌وه‌ بۆ نه‌بوونی هیچ هه‌ماهه‌نگییه‌كی ئه‌مریكا له‌گه‌ڵ ئه‌ندامانی ناتۆ له‌ بڕیاره‌ ستراتیژییه‌كاندا، هه‌روه‌ها وتیشی: "ئێمه‌ كاره‌ دوژمنكارانه‌كانی هاوپه‌یمانێكی ناتۆ ده‌بینین كه‌ توركیایه‌، ئه‌و كارانه‌ به‌رژه‌وه‌ندییه‌كانی ئێمه‌ی خستوه‌ته‌ مه‌ترسییه‌وه‌. به‌هۆی هه‌ڵسوكه‌وته‌كانی توركیاوه‌ ڕێكخراوی په‌یمانی باكوری ئه‌تڵه‌سی (ناتۆ) له‌ لێواری مه‌رگدایه‌. بریاری ئەمریکا بۆ ئۆپەراسیۆنی تورکەکان، دەمانگەیەنێتە ئەو ئەنجامەی قەسەدە کە هاوکارمانە و پێکەوە لەدژی داعش شەڕ دەکەین، دەبێتە قوربانی".

7/11/2019 هەسەدە ڕایگەیاند، کە یەکینەکانیان لە 6ی ئەم مانگە توانیویانە لە ئۆپەراسیۆنێکی تایبەتدا، سەرچەتەی جەیش الاسلام بەناوی (ئیسماعیل زاییم) دەستگیربکەن.

ڕاگەیەندراوەکەی قەسەدە بەمشێوەیە هاتووە:

"سوپای داگیرکەری تورک و گروپە هاوپەیمانەکانی، هاوکاتی هێرشی داگیرکەری بۆسەر باکورو ڕۆژهەڵاتی سوریا و ڕۆژئاوای کوردستان، بەئامانجی دروستکردنی ئاڵۆزی لەناو خەڵک شانەیەکی نهێنی ئەرکدار دەکات و پلانسازی هێرش دەکەن، یەکینەکانی ئاسایشی ئێمە، کاتێکی درێژە ئەو کەسانە چاودێری دەکات کە خەریکی پلانسازی هێرشن دژی خەڵک و هێزەکانی ئێمە، دوای چاودێریکردنی بۆ ماوەیەکی زۆر، لە ئۆپەراسیۆنێکی تایبەتدا، دوێنێ سەرچەتە ئیسماعیل زایم دەستگیرکرا.

چەتەی دەستگیرکراو، برای سەرچەتە محەمەد زاییم-ە کەلەناو هێرشی داگیرکەریدا بەشدارە، محەمەد زایم یەکێکە لەو چەتانەی کە هێرشی سەر تەرمی شەڕڤانی شەهیدی یەپەژە، شەهید ئامارا ڕێناس-یان دەکرد، ئەوەش ڕوون بووەتەوە کە ئەو چەتەیە لەناو ڕیزەکانی جەیش الاسلام دایە، لەگەڵ برایەکەی لە پەیوەندی بەردەوام دابوون بۆ ئەوەی پیلانی هێرش بۆسەر فەرماندەکانی قەسەدە دابنێن".

ڕۆژ 7/11/2019 (دۆناڵد ترەمپ) سەرۆکی ویلایەتە یەکگرتووەکانی ئەمریکا لەگەڵ (رەجەب تەیب ئەردوگان) سەرۆک کۆماری تورکیا پەیوەندییەکی تەلەفونیان ئەنجامداوە، دۆناڵد ترەمپ لەتویتێکیدا لەتۆڕی کۆمەڵایەتی تویتەر رایگەیاند: "لەگەڵ ئەردوگان پەیوەندییەکی تەلەفۆنییم ئەنجامداوە و باسی ڕاگرتنی شەڕ و هێرشی سەرکوردەکانیشمان لەسوریاکردووە، لەتویتەکەیدا ترەمپ ئاماژەی بەوەداوە کەوا ئەردوگان هەواڵی دەستگیرکردنی چەند چەکدارێکی داعشی پێ ڕاگەیاندووە کەلەناویاندا هاوسەر و خوشکێکی ابوبکر بەغدادی یان تێدابووە".

ڕۆژی 8/11/2019  جوناتن هوفمان وتەبێژی وەزارەتی بەرگری ئەمریكا- پێنتاگۆن لە کۆنگرەیەکی ڕۆژنامەنووسیدا رایگەیاند، داهاتی كێڵگەكانی نەوتی سوریا بۆ هێزەكانی سوریای دیموكرات دەبێت نەك بۆ ئەمریکا، ئەمریكا داهاتی نەوتی سوریا  نابات. وتیشی، ئەركی ئەمریكا دابینكردنی سەقامگیرییە بۆ ئەو ناوچانەی دەوڵمەندن بە نەوت و روبەڕوبوونەوەی رێكخراوی تیرۆرستی  داعش، وتەبێژی پێنتاگۆن ئاماژەی بەوەش كرد، كاركردنی هاوبەشی هێزەكانی هاوپەیمانان و هەسەدە بەردەوام دەبێت بۆ پرچەككردنیان و رووبەرووبوونەوەی تیرۆریستانی داعش.

08/11/2019 بەگوێرەی رۆژنامەی "نیویۆرك تایمز"ی ئەمریكا، بەرپرسێكی گەورەی ئەمەریكی (ویلیام ڕۆبۆک) ڕەخنەی ئەوەی لەئیدارەی دۆناڵد ترامپ گرتووە، كە هەموو هەوڵی خۆی نەداوە بۆ ئەوەی ڕێگری بكات لەهێرشی توركیا بۆسەر خۆرئاوای كوردستان، كە هێرشەكەی بە "تاوانی جەنگ " و "پاكتاوی رەگەزی " وەسف كردووە. 

رەخنەی ئەوەی لەئیدارەی دۆناڵد ترامپ گرتووە، كە هەموو هەوڵی خۆی نەداوە بۆ ئەوەی ڕێگری بكات لەهێرشی توركیا بۆسەر رۆژئاوای كوردستان، كە هێرشەكەی بە "تاوانی جەنگ " و "پاكتاوی رەگەزی " وەسف كردووە. 

بەپێی ئەو یاداشتنامەیەی رۆژنامەكە دەستیكەوتووە، ویلیام رۆبۆك ئاماژە بۆ ئەوە كراوە، كە ئەمەریكا هەوڵی نەداوە ڕیوشوێنی توند بگرێتەبەر بۆ ئەوەی جڵەوی رەجەب تەیب ئەردۆغانی سەرۆكی توركیا بكات.

هەر بەگوێرەی نیویۆرك تایمز، لە یاداشتنامەكەدا رۆبۆك ڕەخنەی لەهەوڵە چرەكانی توركیا و میلیشیا هاوپەیمانەكانی توركیا گرتووە بۆ پاكتاوی رەگەزی لەدژی كوردی سوریا، كە ئاماژەی بۆ ئەوەش كردووە ناكرێت جگە لە تاوانی جەنگ و پاكتاوی نەژادی هیچ ناوێكی تری لێبنرێت.

ڕۆژی 08/11/2019‌ ئیدارەی خۆسەر لەبەیاننامەیەكدا بۆ رایگشتی ڕایگەیاند، زیادەڕەوییەكانی توركیا دەرحەق بە پێكهاتەكانی باكووری خۆرهەڵاتی سوریا و ئەو پێشێلكارییانەی گروپە تیرۆریستی و چەتەكان لەبەرچاوان ئەنجامی دەدەن، پێشێلكارییەكی ڕوون و ئاشكرای یاسا و رێكەوتننامە و پەیماننامە نێودەوڵەتییەكانە و لەڕووی یاساییەوە پێویستی دادگایی گەیاندنیان هەیە.

لەبەشێكی تری بەیاننامەكەدا ئەوەش راگەیەنراوە، كە لە 9ی ئۆكتۆبەرەوە تا ئێستا لەناوچەكانی سەرێكانی، توركیا و چەتەكانی سەر بە توركیا بەهەمان ئەندازە بەردەوامن لەلێدان لە پێوەرە یاسایی و ئەخلاقییەكان، بەشێوەیەك تاوانەكانی توركیا لە دوای بەكارهێنانی چەكی قەدەغەكراوی نێودەوڵەتی دەرحەق بە گەلی كورد لە خۆرئاوای كوردستان گەیشتە لوتكە. لەهێرشێكدا 30 كەسی مەدەنی و لاشەڕ لەناویاندا منداڵ بەو چەكانە گیانیان لەدەستدا.

لەبەیاننامەكەدا ئیدارەی خۆسەر داوا لە هەموو دامەزراوە و رێكخراوە تایبەتمەندەكان دەكات لەپێش هەموویانەوە ڕێكخراوی قەدەغەكردنی چەكی كیمیایی و بایۆلۆجی بەوەی بەكردەوە هەڵوێستی خۆیان دەرببڕن.

هەروەك ئیدارەی خۆسەر ئامادەیی خۆی دەربڕیوە بۆ ئەوەی پێشوازی لە لیژنەكان تایبەتمەندەكان بكەن و هاوكاریان پێشكەش بكەن، بۆ ئەوەش  بەڵگەی پێویستیان لەبەردەستە، كە دەیسەلمێنێت توركیا چەكی قەدەغەكراوی بەكارهێناوە.

08/11/2019‌ (ماریا زاخارۆڤا) وته‌بێژی وه‌زاره‌تی ده‌ره‌وه‌ی رووسیا رایگه‌یاند: "ڕوسیا ئامادەیە كار بكات بۆ ده‌ستبه‌ركردنی دانووستان و رێككه‌وتنی نێوان كورد و حكومه‌تی دیمه‌شقدا.ئێمە ئه‌ركمانە كارئاسانی بۆ ئه‌و دانووستانه‌ بكه‌ین، ڕه‌نگه‌ زامنیشی بكه‌ین، له‌ كۆتاییشدا كار بۆ جێبه‌جێكردنی رێككه‌وتننامه‌كان دەکەین. هه‌ر رێككه‌وتنێك بێته‌ ئاراوه‌ له‌ رووی شێوه‌ و ناوه‌ڕۆكه‌وه‌ بڕیاری كورد و دیمه‌شق ده‌بێت، پێویسته‌ ئه‌وان قسه‌ی له‌ باره‌وه‌ بكه‌ن و بڕیاری لێ بده‌ن". 

08/11/2019‌ مسته‌فا بالی، به‌رپرسی ناوه‌ندی راگه‌یاندنی هێزه‌كانی سووریای دیموكرات(هه‌سه‌ده‌) رایگه‌یاند، له‌ ئاكامی به‌كارهێنانی گازی فرمێسكڕێژ له‌ لایه‌ن سوپای توركیاوه‌، له‌ دێریك - مالكییه‌ی باكووری خۆرهه‌ڵاتی وڵات گه‌نجێك گیانی له‌ده‌ستدا و 10 خۆپیشانده‌ری كورد بریندار بوون. سوپای توركیا ئه‌و هاووڵاتییه‌ مه‌ده‌نیانه‌ی كردووه‌ته‌ ئامانج، كه‌ دژی كاروانێكی سوپای توركیا خۆپیشاندانیان كردبوو. زرێپۆشێكی سوپای توركیا، یه‌كێك له‌ هاووڵاتییه‌ خۆپیشانده‌ره‌كانی كردووه‌ به‌ ژێره‌وه‌ و به‌و هۆیه‌وه‌ گیانی له‌ده‌ستداوە.

2019-11-09 مەزڵوم کۆبانی فەرماندەی هێزەکانی سوریای دیموکرات (هەسەدە) لە تویتێکدا ڕایگەیاندووە، "تورک و جیهادییەکانی بەردەوامن لە هێرشکردنە سەر باکوری خۆرهەڵاتی سوریا و هەموو کاتژمێرێک خاکی زیاتر داگیردەکەن. دوای ڕێککەوتن لەسەر ئاگربەست لەگەڵ بەرپرسانی ئەمریکا و بە سەرپەرشتی سەرۆکی ئەمریکا، 182 شەڕڤان و هاووڵاتیی مەدەنی شەهیدبوون و 30 هەزار کەس ئاوارەبوون و هەزار و 100 کیلۆمەتر دووجایان داگیرکردووە. ئێم پابەندی هەموو ڕێککەوتنەکانی ئاگربەست بووین بۆ پاراستنی خەڵک لە کوشتن و ئاوارەبوون. پرۆگرام و ئۆپراسیۆنە هاوبەشە سەرکەوتووەکانمان دژی تیرۆر بۆ دڵنیابوون لە تێکشکانی داعش دەستیپێکردووەتەوە و ئێمە ئێستا لەگەڵ هێزەکانی ئەمریکا کێڵگە نەوتییەکان دەپارێزین."

2019-11-09 ڕۆژنامەی دەیلی سەباحی تورکی بڵاویکردووەتەوە، ئەردۆغان وتویەتی: "سووریا جێناهێڵن هەتا وڵاتانی تر جێینەهێڵن و بەردەوام دەبین لە ئۆپراسیۆنەکەمان دژی هێزە کوردییەکان هەتا دوایین چەکداریان ناوچەکە جێدەهێڵن. ئۆپراسیۆنی کانیی ئاشتی بەردەوامیی دەبێت و تا کۆتا تیرۆریست لە ناوچەکەدا مابێت کۆتایی نایەت.

بە ترەمپم وتووە کە مامەڵە لەگەڵ مەزڵوم کۆبانیی تیرۆریست ناکەم. ئەو پێشنیاری کردبوو کە دەبێت قسە لەگەڵ کۆبانی بکەم. قسەی هیچ کەسێک لە حکومەتی ئەمریکا بە جددی وەرناگرێت جگە لە ترەمپ.

2019-11-09 ئاژانسی ڕۆیتەرز بڵاویکردووەتەوە، ئیلهام ئەحمەد سەرۆکی دەستەی جێبەجێکاری ئەنجوومەنی سووریای دیموکرات ڕایگەیاندووە، یەکێتیی ئەوروپا ڕووبەڕووی شەپۆلێک لە چەکدارانی داعش دەبێتەوە ئەگەر بە شێوەیەکی توندتر مامەڵە لەگەڵ تورکیادا نەکات. هەڕەشەکە زۆر گەورەیە بەهۆی ئەو شێوازە لە کشانەوەی ئەمریکا لە سووریا، چونکە بووە هۆی ئەوەی زۆر لە چەکدارانی داعش هەڵبێن و بەرەو وڵاتەکانیان بگەڕێنەوە بەمەبەستی بەردەوامیدان بە چالاکییە تیرۆریستییەکانیان.

ئیلهام ئەحمەد داوای لە ئەوروپاش کردووە کە دوو هەزار سەرباز بۆ پاراستنی سنووری تورکیا و سووریا بنێرن و ڕێگری لە پەڕینەوەی چەکدارانی داعش بکەن و فرۆشتنی چەک بە تورکیاش ڕابگرن چونکە گەلەکەمان بە چەکی ئەوروپا دەکوژرێت. یەکێتیی ئەوروپا دەبێت یان توند بێت لەگەڵ تورکیا یانیش بەمزووانە ڕووبەڕووی گەیشتنی شەپۆلێک لە چەکدارانی داعش دەبنەوە. ڕۆژئاوا دەبێت لێکۆڵینەوە لە تورکیا بکات لەسەر دەنگۆی بەکارهێنانی چەکی کیمیایی لە دژی کورد.

تورکیای کاندید بۆ یەکێتیی ئەوروپا هەمان ئەو تورکیایە نییە کە ئێوە پێتانوایە دەیناسن، ئێستا تورکیا تورکیایەکی ئیسلامیی ڕادیکاڵ و ئێوەش، ئەوروپا، پێویستە گفتوگۆی بەئەندامبوون و ڕێککەوتنی بازرگانی لەگەڵ تورکیا بپچڕن. تورکیا دەبێت بترسێت، باسی لەوەش کردووە، چەکدارانی باڵای داعش لە ناوچەکانی ژێر دەستی تورکیا لە باکوری سوریا پەنادراون.

لەبارەی ئەوەی کە ترەمپ وتوویەتی کورد لە جەنگی نۆرماندی لە ساڵی 1944دا دژی نازییەکان لەگەڵیان نەبوون، ئیلهام ئەحمەد وتوویەتی، تورکیاش لە بەرەی ئەمریکییەکان نەبوو لە جەنگی جیهانیی دووەمدا و وتووشیەتی، "کورد لەکاتی نۆرماندیدا دەوڵەت یان کیانێکی نەبووە و کورد لەو جەنگەدا قوربانی بووە و تورکیش لەگەڵ ئەمریکییەکان نەبووە لەوکاتەدا، لەبەرئەوە نازانم ترەمپ بۆچی ئەوەی وتووە."

 09/11/2019‌ عەلی قەرەداغی ئەمینداری گشتی یەكێتی زانایانی ئیخوانی ئیسلامی جیهانی پێشنیازی كرد شاری ئەستەنبوڵی توركیا بكرێتە پایتەختی ئابووری ئیسلامی، ئەویش بەهۆی ئەو "تایبەتمەندییە مێژوویی و جوگرافییەی" هەیەتی. لە کاتێکدا بەهۆی داگیرکاری خۆرئاوای کوردستانەوە هەڵمەتێکی گەورەی بایکۆتی کاڵای تورکی لەلایەن خەڵکەوە دەستی پێکردووە، عەلی قەرەداغیش کار بۆ ئەوە دەکات ئەستەنبوڵ بکرێتە پایتەختی ئابوری ئیسلامی. لەم کاتی داگیرکارییەی تورکیا بۆ سەر خۆرئاوای کوردستان، عەلی قەرەداغی نمایندەی هێڵی خیانەتکاری ناو کورد دەکات، لە کاتێکدا بە هەزاران خەڵکی مەدەنی شەهید بوون و چەندین شار و گوند و شارۆچکە کاول بوون و سەدان شەڕڤان شەهید بوون و بە هەزاران خەڵکی سڤیل بریندار بوو و تورکیا چەکی فسفۆڕی بەکارهێناو و ناوچەیەکی زۆر داگیردووە، لەبەرامبەردا عەلی قەرەداغی کار بۆ بەهێزبوونی ئابوری تورکیا دەکات تا لە داگیرکارییەکەیدا زیاتر پاکتاوی ڕەگەزی میللەتەکەی عەلی قەرەداغی بکات هێڵی خیانەتیش هێڵی نەتەوایەتی و بەرخۆدان تێکبشکێنێت.

عەلی قەرەداغی لەكاتی پێشكەشكردنی وتارێك لەدووەم كۆنگرەی نێودەوڵەتی ئەكادیمیای كۆمەڵەی "مۆسیاد" لەشاری ئەستەنبوڵ، كە لەژێر ناوی "بازاڕە داراییە ئیسلامییەكان لەنێوان راستی و ئەركدا" ئەو پێشنیازەی كرد.

عەلی قەرەداغی لە كۆنگرەكەدا داوای كردووە بانكێكی نەختینەیی ئیسلامی هاوشێوەی سندووقی نەختی نێودەوڵەتی دروست بكرێت و بانكی ئیسلامی هاوشێوەی بانكە سەرمایەدارییەكان بكرێنەوە و دواتر لیژنەیەك لەكەسانی یاسایی و ئابووریناسان پێكبهێنرێن بۆگەیشتن بەجێگرەوەیەك بۆ ئابووری كۆن و سوودەوەرگرتن لەزیانمەندبوونی خەڵك لە دۆلار و سیاسەتی ئەمەریكی.

10/11/2019 سه‌رۆك كۆماری توركیا ڕه‌جه‌ب ته‌یب ئەردۆگان  بڕیاریدا، نزیكه‌ی 365 هه‌زار ئاواره‌ی سوریی كه‌ له‌توركیان، بۆ ئه‌و ناوچانه‌ بگوازرێنه‌وه‌ كه‌ سوپای توركیا داگیریكردوون. ئه‌ردۆغان وتیشی، ئه‌و هه‌وڵانه‌ی بۆ شكستهێنان به‌ ئابووری توركیا دران سه‌رجه‌میان شكگستیهێنا.

کاردانەوەکانی دژی داگیرکاری تورکیا بەردەوامە و لە تەواوی دنیاوە پاڵپشتی کورد و شەرڤانانی هەسەدە دەکرێت، ڕۆژی 10/11/2019 لەئەفریقای باشور خۆپیشاندان لە بەردەم باڵوێزخانەی تورکیا، بەمەبەستی پشگیری کردن لەکوردی خۆرئاوا بەڕێوەچووە، لەنامەیەکدا کەئاڕاستەی باڵوێزخانەی تورکیایان کردووە، خۆپیشاندەران داوا دەکەن سوپای تورکیا سوریا بەجێبهێڵێت و بگڕێتەوە بۆ وڵاتەکەیان، جگە لەوە خۆپیشاندەرانی ئەفریقای باشور چەندین دروشمیان بەرزکردبوویەوە وەک " رۆژئاڤا تەنیا نیە، نەخێر بۆجینۆساید".

ڕۆژی دوو شەممە 11/11/2019 گەڕانێکی دیکەی هاوبەشی نێوان سوپای ڕوسیا و دەوڵەتی داگیرکەری تورک لە خۆرئاوای شاری درباسییە ئەنجامدرا، لەکاتی تێپەڕبوونیان، دانیشتوانی ئەو ناوچانە هاوشێوەی ناوچەکانی دیکەی خۆرائاوا، باکور و خۆرهەڵاتی سوریا، بەردبارانی ئەو کاروانەیان کرد.

هەر لە هەمان ڕۆژدا ڕۆژی سێ تەقینەوە لەنێو قامیشلۆ دا روویاندا، دووان له‌ ته‌قیینه‌وه‌كان له‌ رێگه‌ی ئۆتۆمبێلی بۆمبڕێژكراوه‌وه‌ روویداوه‌ و ئه‌وه‌ی دیكه‌شیان بۆمبێك بووه‌ له‌ناو بازاڕی میوه‌فرۆشان ته‌قییه‌وه‌ته‌وه‌.

هێزەکانی ئاسایشی قامیشلۆ و ڕێکخراوی مانگی سوری کورد ئاماره‌كانی كوژراو و برینداره‌كانی ته‌قیینه‌وه‌كه‌یان رایانگه‌یاند، (6) هاوڵاتی مەدەنی شەهیدبوونه‌ و (21) کەسی دیکەش برینداربوون.

لە هەمان کاتیشدا بەشار ئەسەد، سەرۆکی سوریا لە چاوپێکەوتنێکدا لەگەڵ کەناڵی (RT) رووسی ڕایگەیاندوە،  رێککەوتن لەگەڵ هەسەدە لەسەر بنەماى گەڕانەوەى سەروەرى تەواوى خاکى سوریا دەبێت بە ناوچە کوردیەکانیشەوە کە پێویستە بگەرێنەوە ژێر دەسەڵاتى حکومەت، ئیستاش کورد لە سنورەکان دوورخراونەتەوە تا رێگە لە سوپاى تورکیا بگیرێت.

ئاماژەی بەوەشکردوە، ئەو داواى لە کوردەکان کردووە ببنە بەشێک لە سوپاى سوریا، بەڵام بەشێکیان رەازى بوون و بەشەکەى تریشیان کە سەر بە پەیەدەن رەتیانکردوەتەوە، جەختیش دەکاتەووە کێشەی سەرەکی ئەوان لەگەڵ پەیەدە یە کە یەکەیەکی سەربازیی بە ناوی یەپەگە دروست کردووە.

سەرۆکی سووریا باسى لەوەشکردوە، پەیەدە لە لایەن ئەمەریکییەکانەوە پشتگیرییان لێ دەکرا، لەگەڵ ئەمەریکا پێکەوە نەوت دەدزن و باقاچاغی دەبەن.

لەبەرامبەردا (ئیلهام ئەحمەد) بەرپرسى پەیوەندییە دیبلۆماسییەکانى ئیدارەى خۆسەر لە ئەوروپاوە بە (NRT) رایگەیاند، لەناوخۆى ئەمریکا نیگەرانى توند هەیە لەسەر هێرشى تورکیاو کشانەوەى هێزەکانى ئەمریکا لە سوریا،بەڵام تائێستا سیاسەتى ئەمریکا ناڕوونە کە چى دەکەن و چی ناکەن.

ئاماژەى بەوەشکردوە ئەوان داوایان لە ئەمریکاو ئەوروپا کردوە کە هێزێکى هاوبەشى نێودەوڵەتى لە سەر سنور جێگیر بکرێت تا ئەو هەرێمە بپارێزرێت و رێگە لە هێرشەکانى تورکیا بگیرێت.

لەرێگەى نەتەوەیەکگرتووەکانەوە ئەو پرسە چارەسەر بکەن و گفتوگۆشیان لەو بارەیەوە بەردەوامە، وەک خۆشى دەیڵێت، ئەگەر پێداگیرى بکەن ئەنجامی خۆی دەبێت، بەڵام کاتى دەوێت.

لە درێژەی کاردانەوەکانی ئەمریکا بەرامبەر بە سیاسەتەکانی تورکیا (ڕابەرت ئۆبراین)راوێژکاری ئاسایشی ئەمریکا نیگەرانی وڵاتەکەی لەبارەی بەکارهێنانی سیستەمی ئیس 400ی روسی لەلایەن تورکیاوە دەربڕی و ڕایگەیاند: "ئەگەر بێت و تورکیا بەردەوام بێت لەسەر هەڵسوکەوتەکانی و دەستبەرداری بەکارهێنانی سیستەمی ئیس 400ی روسی نەبێت ئەوا ئەنقەرە ڕوبەڕوی سزای قوڕسی واشنتۆن دەبێتەوە، سزاکانی ئەمریکا بەشێوەک دەبێت کاریگەری راستەوخۆ و بەهێزی لەسەر تورکیا هەبێت".

لەلایەکی دیکەوە ڕۆژی 11/11/2019 مەزڵوم كۆبانێ، فەرماندەی گشتی هێزەکانی سووریای دیموکرات و شاندێکی ئەنەکەسە كۆبوونه‌ته‌وه‌ و لەبارەی بارودۆخی خۆرئاوای کوردستان گفتوگۆیانكردووه‌ و باسین له‌ یەکڕیزی نێوان لایەنە سیاسییەکان کرد.

له‌ دیداره‌كه‌دا گفتوگۆ له‌باره‌ی میكانیزم و چۆنیه‌تی لێكنزیكبوونه‌وه‌ی نێوان پارت و لایه‌نه‌ كوردستانییه‌كان و چۆنیه‌تی به‌هێزكردنی یه‌كڕیزی كورد له‌ رۆژئاوای كوردستان كرا.

هاوكات مه‌زڵوم كۆبانێ وتی: "كاردانه‌وه‌كانی ناو كۆبوونه‌وه‌كه‌ ئه‌رێنی بوون، ئێستا كاتی ئه‌وه‌یه‌ دووه‌م هه‌نگاو بۆ یه‌كڕیزی كورد بنرێت، ئه‌ویش به‌ستنی كۆنگره‌یه‌كه‌، كه‌ ته‌واوی هێزه‌ سیاسییه‌كانی سووریا له‌خۆ بگرێت".

هاوسەرۆکى پارتى دیموکراتى و ئاشتى گەلان (هەدەپە)ش وتی: "ئەمرۆ جیهان پشتیوانى گەلى کورد دەکات و تورکیاش بەوە تەنگاوتاو بووە. تورکیا دەیەوێت دیمۆگرافیای ناوچەکە بگۆڕێت و جیهانێکی بێ کورد دروست بکات، لەکوێ کوردێک هەبێت دەیانەوێ هەناسەی ببڕن، لەناوخۆ و دەرەوە هەمان کار دەکەن. تورکیا کە چونە باکوری سوریا پێیان وابوو جیهان نەگۆراوە، بەڵام ئەمجارە جیھان كوردی بەجێ نەھێشت و توركیاش بە تەنیا مایەوە و نازانێت خۆى چۆن دەرباز بکات. ئەردۆغان شکستى خۆى لە ناوخۆ دەباتە دەرەوە و دژ بەکورد بەکارى دەهێنێت، ئەردۆغان ناگات بەو خەونەى هەیەتى کە لەناوبردنى دەستەکەوتەکانى کوردە، رۆژێک دێت هەموو کارەساتەکان بەسەر خۆیدا دەشکێتەوە".

ڕۆژی دوو شەممە 11/11/2019 ناوەندی ڕاگەیاندنی هێزەکانی سوریای دیموکرات لە ڕاگەیەندراوێکدا ئاماری پێشلکارییەکانی سوپای داگیرکەری تورک و چەتەکانی دوای ئاگربەست ئاشکراکرد و ڕایگه‌یاند، دوای ڕۆژی (17)ی مانگی ڕابردوو، گروپە چەتەکان و سوپای داگیرکەری تورک، (190) جار بە هێرشی زەمینی و (82)جاریش بە هێرشی ئاسمانی لە ڕێگەی فڕۆکەی جەنگی و فڕۆکەی بێفڕۆکەوانەوە، ئاگربەستیان پێشلکردووە.

ئاماژەی بەوەشداوە، دوای ئاگربەستەکە و لە ئەنجامی ئەو هێرشانەدا، (182)شەڕڤانیان شەهیدبوون و (243) شەڕڤانیشیان برینداربوون.