کۆنگرە ..... مۆتەکەى پارتى کوردى
Thursday, 29/08/2019, 17:55
ئەگەر بە شێوەیەکى زانستى خوێندنەوە بۆ مێژووى دامەزراندنى پارتى سیاسیى بکەین لە رۆژهەلاتى ناوەڕاستدا و بە تایبەتى تر باشورى کوردستان، ئەوا دەگەینە ئەو ڕاستیە حاشاهەڵنەگرەى کە ڕەمزەکانى پارتە سیاسییەکان هەمیشە بۆ ژیانى سیاسیى خۆیان کۆنگرەى پارتەکانیان لە بەروارى خویدا بە مۆتەکە دەزانن. ئەگەر ڕێکەوتنێکى ژێربەژێر نەکات بۆ درێژکردنەوەى تەمەنى سەرکردایەتى خۆیان. هەر بۆیە هێندە فاکتەرە ناوخۆیەکان ڕێگر بووە نیو هێندە فاکتەرە دەرەکیەکان کاریگەریان نەبووە بە سەر دواخستنى کۆنگرەى پارتەکان لە بەروارى خۆیدا چونکە ئەم فاکتەرە ناوخۆیانە بەر ئەنجامى کارو پیلان لە دواى پیلانى سەرکردایەتى پارتەکان خۆیانە لە پێناو نەبەستنى کۆنگرە لە کاتى خۆیدا بە بێگوێدانە خواستەکانى ئەندامان و لایەنگرانى پارتەکەیان کە لە خوارەوەى هەرەمەکەوە هەنگاو دەنێن بەو ئامانجەى ڕۆژێک دابێت ئەمانیش بگەن...... نەک بەلوتکەى هەڕەمەکە بەڵکو بگرە نزیکى لوتکەى هەڕەمەکە چونکە لوتکەى هەڕەمەکە لە نێو پارتى سیاسی کوردیدا تەنها لە ناوەکەیدا روویەکى دیمکراسی بە گوێ ئێمەو ماناندا دەدەن، دەنا لە ناوەڕۆکدا جگە لە پارتێکى پاشایەتى هیچى دیکە لە هەگبەکەیدا نیە! هەروەک ئەوە دەبینین ئێستا نەک سەرۆکى پارتەکان بگرە ئەندامانى مکتب سیاسیى و سەرکردایەتیەکانیش هەمان ڕێچکەى سەرۆکى پارتەکانیان دەگرنەبەر بۆ پلە باڵاکردنى کور و کورەزاکانى خۆیان بە بێ ئەوەی هیچ پلەبەندیەکى پارتایەتى بە شایستە بوونى خۆیان بڕیبێت و وە بگرە بە کونفە یەکونێک دەبن بە ئەندامى سەرکردایەتى و سیاسیى پارتەکانیان بەبێ گەڕانەوە بۆ دەنگى لایەنگرانى خۆیان. هەر بۆیە دەبینین لە ڕۆژگارى ئەمڕۆماندا کۆنگرەى پارتەکان لە باشورى کوردستان نە بۆتە زەروورەتێک بۆ دووبارە بوژانەوەى پارتى کوردى، تا دەلاقایەکیش بێت بۆ پێداچونەوە بەو بڕیارو هەڵوێستانەى کە لە چوار ساڵى ڕابردوودا دەرئەنجامى کارەکانى بووە هەر بۆیە بە ڕوونى دەرئەنجامى نەبەستنى کۆنگرە لە کات و ساتى خۆیدا بە لاشەى شقار شەقارى پارتى کوردیەوە بە ئاشکرا دەبینین، چونکە کۆنگرە بۆ هەر دەستە و دامەزراوەیەک ئەگەر هاتوو بە شێوە ئەکادیمیەکەى ببەسترێت نەک رێکەوتنى ژێر بەژێرو پشک پشکێنەو تەوافقى پێشوەختە بۆ بکرێت کۆنگرە لە مەهامە ڕاستەقینەکەى دابماڵرێت ببێت بە کۆنگرەى چەپڵە ڕێزان.
ئەوا خۆی لە خۆیدا دەبێتە دادگایەک بۆ لێپرسینەوە لە بەرامبەر ئەرک و مافەکانى تاک بە تاکى ئەندامانى پارتەکان لە سایەى شایستە بوونیانەوە دەتوانن هەنگاو بەرەو پێشتر هەڵبهێنن ئەمەش دەبێتە هۆکارێک تا تاکەکانى پارتى کوردى لە لوتکەى تا بنکى هەڕمەکە خۆیان بە بەرپرسیار بزانن بە رامبەر دەرئەنجامى ئەو کارانەى کە لە ماوەى چوار ساڵى کارکردنیان لە هەر پلەیەکى پارتەکەیان ئەنجامى دەدەن، کەواتە ئەگەر ئەمە رووی بدایە لە نێو ژیانى پارتە سیاسیەکانماندا ئەوە هۆکارێک دەبوو بۆ دانانى کەسى شیاو لە شوێنى شیاو.وە پارتى کوردیش دە بووە ئامرازێک بۆ گەیاندنى پەیامى نەتەوەیەک نەک بەچەشنى ئێستا کە پارتى کوردى هۆکارێکە بۆ بارگرانیەکى زیاتر بە سەر دۆسى ڕەواى نەتەوەیەکەوە وە بگرە لە زۆربەى کاتەکاندا بووە بە ئامرازێک بۆ خۆ دەوڵەمەند کردنى ئەندامانى لوتکەى هەڕەمەکە.
شاخەوان سەنگاوى
[email protected]
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
