ڕاستییەکی مێژوویی هەیە ئەویش ئەوەیە: سەرکردەکانی تورک و عارەب و فارس نایانەوێت بەر نەفرەتی مێژوو و میللەتی خۆیان بکەون، پەیوەست بە جێبەجێکردنی داوا و مافە نەتەوەییەکانی کورد. بەڵام سەرکردە کوردییەکان نەفرەتی گەلی کوردیان لا سروشتییە، بۆ ڕازی بوونی دوژمن و مانەوەی دەسەڵاتە بنەماڵەی و حیزبییە گرێدراوییەکەیان، خیانەت و هەڵەی گەورەی مێژووییان ئەنجامداوە، کە بۆتە هۆ درێژەدان بە پڕۆسەی داگیرکاری و کۆیلایەتی و ژێردەستەیی و بچوکردنەوەی کورد.

هیچ سەرکردەیەکی تورک و عارەب و فارس ئامادەنین بەر نەفرەتی نەتەوەکەی خۆیان بکەون. بۆ نموونە لە ناو تورک دا لە مستەفا کەمال ئەتاتورک و عیسمەت ئینینۆە تا عەدنا مەندەریس و بڵند ئەجەوید و تورکت ئۆزال و عەبدوڵڵا گویلەوە تا دواینیان کە ئەردۆغانە.

لە عێراق دا لە پاشاکانی سەردەمی پاشایەتی (مەلیل فەیسەڵی یەکەم، مەلیک غازی، مەلیک فەیسەڵی دووەم) تا سەرۆک کۆمارەکانی سەردەمی کۆماری (عبدولکەریم قاسم، ئەحمەد حەسەن بەکر . عبدول ڕەحمان عارف، عبدول سەلام عارف، سەدام حسێن) تا سەرکۆکەکانی دوای پڕۆسەی داگیرکاری ئەمریکا، لە غازی عەجل یاوەر وجەعفەر و مالیکی تا دواینیان کە عاد عبدولمەهدی)یە.

لە ئێران دا لە لەسەردەمی ڕژێمی پاشایەتی پەهلەوی(ڕەزا شاه، محمد ڕەزا شاه) تا سەردەمی کۆماری ئیسلامی ئێران(خومەینی .......... ، غامەنایی و ئەحمەدی نەژاد، و دوینیان کە حەسەن ڕوحانی)یە.

هەموو ئەم سەرکردە و سەرۆکانەی ئەم چوار ووڵات و سێ نەتەوەیە بەهیچ جۆرێ ئامادە نین بەر نەفرەتی نەتەوەی خۆیان بکەون پەیوەست بە پێدانی مافی کورد بە خیانەتکار و ناپاک ناوببرێن. چونکە هەر کاتێک هەریەک لەم سەرۆکانەی ئەم ووڵات و نەتەوانە نزیکایەتیان ئەنجامدا بێت پەیوەست بە جێبەجێکردنی خواست و مافەڕەواکانی کورد لە سەر خاکی داگیرکراوی خۆی، ئەوە ئەو سەرۆک و سەرکردەیە کەوتۆتە بەر ڕەخنە و لۆمەی ڕۆشنبیر و مێژونوس و جوگرافیاناس و پیاوانی ئاینی و بیرمەند و ئەدیب و ڕاگەیاندی گەلەکەیانەوە، بەوەی چۆن ڕێگە بە هاوبەشی کورد و دابەشکاری ووڵات دەدەیت؟ لەکاتێکدا فڵان سەرکردەمان چەند دیکتاتۆر و نادادپەروەریش بووبێت، بەڵام ئامادە نەبووە و ڕێگەی بە هاوبەشی و دابەشکاری ووڵات نەداوە، هەموو سەرهەڵدان و ڕاپەڕینەکانیشیانی لەناو بردووە و دامرکاندۆتەوە، ئیدی ئێستا تۆ چۆن بەو هاوبەشی و دابەشکارییە ڕازی دەبیت؟ سەرکردە و سەرۆکی ئەو نەتەوانە دەزانن میللەتەکەیان نزیکایەتی ئەوان لە کورد بە ئاڕاستەی هاوبەشی و دابەشکاری قبوڵ ناکەن،  لەبەرئەوە سەرۆک و سەکردەیەی ئەو نەتەوانە بۆ ئەوەی بەر ئەو ڕەخنە و نەفرەتەی مێژوو و گەلەکەیان نەکەون، ئەو سەرکردەیە خاوەن هەر ئایدۆلۆژیایەک بووبێت هەموو ڕێگەیەکی ئاسن و ئاگری بەکارهێناوە بۆ جینۆساید و کۆکوژی و لە ناوبردنی سەرهەڵدانەکانی کورد، ئامادەی چەندین مل کەچی و تەنازولات بووە بۆ نەتەوەی بەرامبەر، ئەوروپا و ئەمریکا و ڕووسیا، پارە و وزەیەکی گەورەی مرۆیشی بەکارهێناوە دژی کورد ئەگەرچی بۆتەوە هۆی خراپی باری ئابوری ووڵاتەی خۆیش، بەڵام بەلایەوە گرنگ نەبووە، ئەوە گرنگ بووە کورد لەسەر خاکی خۆی دەستی بە مافە ڕەواکانی نەگات.

لە تورکیا، ئەوەی کەمال ئەتاتورک کردی لە نکۆڵیکردن لە بوونی کورد و پاکتاوی ڕەگەز و جینۆساید و ئیتنۆساید، قڕکردن و کۆکوژی، هەر لە دامرکاندنەوەی جوڵانەوەکەی شێخ سەعید و ئارارات و جوڵانەوەکەی سەید ڕەزای دەرسیم تا تەنازولکردن بۆ بەریتانیا و ڕووسیا و فەڕەنسا دژی کورد، ئێستاش ئەردۆغان هەمان کاردەکات، هەر لە هەڵوەشاندنەوەی پڕۆسەی ئاشتی و زیندانیکردنی سیاسەتمەدار و پەڕلەمانتارەکانی کورد و پەلاماردانی جزیرە و سلۆپی  لە باکوری کوردستان تا دژایەتیکردنی خۆرئاوای کوردستان و پەلاماردانی عەفرین و ئامادەکاری بۆ پەلاماردانی تەواوی خۆرئاوا و تەنازولکردن بۆ ئەمریکا و ڕووسیا و ئێران و ڕژێمی سوریا دژی کورد، ئەمانە هەمان کاری پێشینەکانیەتی.

لە سوریا، ئەوەی حافز ئەسەد کردی لە لێسەندنەوەی ناسنامە و بەعارەبکردن و ڕاگواستن و پاکتاوی ڕەگەزی دژی کورد، بەشار ئەسەدیش هەمان جینۆساید و ئیتنۆسایدی دژی کوردی خۆرئاوای کوردستان ئەنجامیداوە.

لە ئێران، ئەوەی ڕەزا شای پەهلەوی کردی لە پەلاماردانی خۆرهەڵاتی کورد و لە ناوبردنی کۆماری کوردستان لە مهاباد و تەنازولکردن بۆ ڕووسیا و بەریتانیا، خومەینیش کە هاتە سەر حوکم فەتوای جیهادی دا دژی کورد و پەلاماری تەواوی خۆرهەڵاتی کوردستانی دا و دەستی کرد بە ڕاگواستن و بە شیعەکردن و بە فارسکردن.

لە عێراق، ئەوەی ئەوەی عبدولکەریم قاسم تا سەدام حسێن لە باشوری کوردستان ئەنجامیاندا هەر لە نکۆڵیکردن لە کورد و پاکتاوی ڕەگەز و بەعارەبکردن و ئەنفال و کیمیاباران، حەیدەر عەبادیش کە کورد شەریکێکی ڕاستەقینە بوو لە حکومەتی بەغداد، لە 16 ئۆکتۆبەری 2017 لە کەرکوک و دوزخورماتو تەواوی ناوچە کوردستانییەکانی ماددەی 140 ئەنجامیدا هەر لە بەعارەبکردن و ڕاگواستن و بەشیعەکردن تا داخستنی دەروازە سنورییەکان و هێڵی ئاسمانی باشوری کوردستان.

لەبەرئەوە ئەمە ڕاستییەکی مێژووییە کە سەرکردە و سەرۆکەکانی تورک و عارەب و فارس نایانەوێت بەر نەفرەتی مێژوو و میللەتی خۆیان بکەون، پەیوەست بە جێبەجێکردنی داوا و مافە نەتەوەییەکانی کورد.

بەڵام سەرکردە کوردییەکان هەڵگری هەر ئایدیا و ئایدۆلۆژیایەک بن نەک هەر نەفرەتی گەلی کوردیان لا سروشتییە، و بۆ ڕازی بوونی دوژمن و مانەوەی دەسەڵاتە بنەماڵەی و حیزبییە گرێدراوییەکەیان، خیانەت و هەڵەی گەورەی مێژووییان ئەنجامداوە، کە بۆتە هۆی درێژەدان بە پڕۆسەی داگیرکاری و کۆیلایەتی و ژێردەستەیی و بچوکردنەوەی کورد. بەڵکو سەرۆک و سەرکردەکانی ئێمە کۆمەڵێک ڕاوێژکار و دەرباریان هەیە هەمیشە وەسفیان کردوون و پیانداهەڵیان داوە، ئەوانیش پیاهەڵدانیان وویستووە نەک ڕەخنەکردن، هەرلەبەرئەمە زۆرجار ئەم دەربارانە هەڵەی گەورەی مێژووییان بە سەرکردەکان کردووە، ئەگەرچی سەرکردەکان خۆیان لێهاتوو و واقعی و کاریزما نەبوون.

دەربار و ڕاوێژکارەکان دەڵێن: سکرتێر و سەرۆک و ڕابەر و ڕێکخەر و ئەمیر و ئەمیندارەکانمان ڕۆشنبیر و ڕووناکبیر و خوێنەوار و دووربین و فەیلەسوف و موفەکیر و حەکیم و دانا و زانا، و کارساز و کاربەجێ  و کاریزما و ئازا و دلێر و سوارچاک و دەست ڕەنگین و داهێنەر و خولقێنەر و بەئەزموون و ژیر و خاوەن عەقڵی کراوە و گەورە و خاوەن پلان و پڕۆژەی ستراتیجی نەتەوەین، دەزانن چۆن کات لەبەرژەوەندی میللەت دا بەکاربهێنن.

سەرکرە کوردەکان لەپاڵ ئەو هەموو وەسف وپیاهەڵدانەی دەربارەکانیاندا توانیان کورد بگەیەننە کوێ؟

ئایا توانیان نەک کوردستانی گەورە، بەڵکو باشوری کوردستانیش لەم پارچە پارچەیی و ناوچەگەرێتیە یەکبخەن و دەرباز بکەن؟ لەڕاستیدا هیچ کام لەم کارانەیان نەکرد ئەی ئەم هەموو وەسف و پیاهەڵدانە لە پای چی؟ لەبەرچی؟ بۆچی؟

ئایا توانیان کوردستان بکەنە خاوەن سەربەخۆی سیاسی و ئابوری، ئاواکردنی دەسەڵاتێکی دیموکراتی، بەدیهێنانی دادپەروەری کۆمەڵایەتی، سەروەری یاسا، کە هەموو هاوڵاتییەک بێ جیاوازی نەژاد و ئاین و ڕەنگ و ڕەگەز لەسایەیدا هەست بە هاوڵاتیبوون و کەرامەتی بکات؟

باشە گەر سەرکردە کوردەکان ئەوەندە حەکیم و بلیمەت و عەبقەرین، بەتوانا و لێهاتوون، بارودۆخی کورد بۆ بەم ڕۆژگارە گەیشت؟

لە خۆرهەڵاتی کوردستان لە هەشتاکانی سەدەی ڕابردوو  حیزبی دیموکرات گرێدراوی حکومەتی بەعسی عێراق بوو هەموو هاوکارییەکی ماددی و سەرباری لە حکومەتی بەعسی عێراق وەردەگرت، لەگەڵ کۆمەڵەدا شەڕی ناوخۆییان کرد، نەفرەتی میللەتیان لا ئاسایی و سروشتی بوو.

پەکەکە و یەکێتی و پارتی شەڕی ناوخۆییان لە باکور و باشوری کوردستان هەڵگیرساند و کوشتار و کاولکارییەکی گەورەیان ئەنجامدا، بەڵام نەفرەتی میللەتیان لا سروشتی و ئاسایی بوو.

یەکێتی و بزووتنەوە و پارتی شەڕی ناوخۆ ۆ 31 ئاب و ڕاکێشانی دەستی تورکیا و ئێران و بەعس بۆ باشور و دوو ئیدارەیی و دابەشکاری باشور و بە هەدەردانی سامانی ووڵات و کاولکردنی سەرخان و ژێرخانی کوردستانیان ئەنجامدا، نەفرەتی میللەتیان لا سروشتی بوو، دواتر ئەم ڤایرۆش و قەزەم و گرگنانە وەکو پاڵەوانی نەتەوەیی خۆیان نمایش دەکرد، لە 16 ئۆکتۆبەری 2017 یەکێتی و پارتی خیانەتێکی گەورەی نەتەوەییان ئەنجامدایەوە، نەفرەتی نەتەوەییان لا سروشتی بوو! 

ئێستاش لە خۆرئاوای کوردستان ئەنەکەسە و جاشمەرگەی ڕۆژی پارتی گرێدراوی تورکیان و دەیانەوێت بە خیانەتێکی نیشتیمانی دەستی تورکیا ڕاکێشنە خۆرئاوا، داگیرکاری و کۆکوژی عەفرینیان لا سروشتییە، نەفرەتی نەتەوەکەشیان لا سروشتی و ئاساییە.

لە مێژوو دا ئەوە ڕوونبۆتەوە کە سەرکردە دەتوانێت گۆڕانکاری گەورە ئەنجامبدات و داینەمۆی پێشکەوتن و بەرەو پێشچوونی ووڵات بێت. سەرکردە کەسێکە سوود لە هەڵە مێژووییەکانی ڕابردووی پێشینەکانی خۆی وەربگرێت، لە ئێستاشدا بە توانای ئەقڵی و فکری و پلانی کۆنکرێتی و ستراتیجی ووڵات بەرەو سەربەخۆی سیاسی و ئابوری پێشکەوتن ببات، بۆ داهاتوویش دوور دەڕوانێت و لە خەمی نەوەکانی داهاتوودایە، سەرکردەکانی دواتریش ژیری و ئەفکارەکانی ئەو دەکانە بنەمای کاریان.

سەرکردە کەسێکه کە میللەت لەم چەقبەستویی و ژێردەستەی گرێدراویی دەربازکات، لە قەیران و نەهامەتی و تەنگ و چەڵەمەکاندا خاوەن پڕۆژەی ڕزگاری نەتەوەیی بێت، و بەلێهاتووی سیاسەت بکات، و کاتی گونجا و بۆ ئەنجامدانی پڕۆژەکانی هەڵبژێرێت لە جوگرافیایەکی زۆر ستراتیجی کوردستاندا، تا کورد بگەیەنێتە ئاسۆیەکی ڕوون. یانی ئەمە بە شۆڕشێکی گشتگیری زهنی و فکری و سیاسی و فەرهەنگی و کۆمەڵایەتی.

بەڵام هیچ لە سەرکردە کوردەکان ئەم پێناسەیە ناینگرێتەوە، ناتوانرێت ئەم جۆرە هەڵسەنگاندنەیان بۆ بکرێت بەڵکو زۆرینەیان دەستێکی باڵایان لە خیانەتکاریدا هەیە. یانی دەبێت لە جیاتی ئەو پیاهەڵدانە نادروستە، ناقابیلە، ناپەسەندە، ئیدی بە سەکردەکان بگوترێت ناپاکیت کرد، بنەماڵەچی بووی، گرێدراوی دەرەکی بووی، تا ئەوەی دواجار میللەت بیانختە بەر نەفرەتی شۆڕش و مێژوو.