له‌سه‌ر کورسییەکانی به‌غدا سلێمانی كاول مه‌كه‌ن
Thursday, 17/05/2018, 22:51
ئەمە جاری یه‌كه‌م نییه، کە ئەو هەڵبژاردنەی ناویان ناوە دەنگدانی دیموکراتی بۆ هەڵبژاردنی نوێنەر و کاندیدە دڵخوازەکانی خەڵکی کوردستان، بە بێ ساختەکاری ئەو دەنگدانە هەڵبژێرێت، کە پارتەکانی باشوور بەو دەنگانە رابەرایەتیمان بکەن.
هەڵبەت دەنگدان سیمای کۆمەڵگایەکی وشیار و سیسەمێکی دیموکراتیی دەردەخات، ئەمەش بوونی نییە، کە خەڵکی پێی وابێت ساخته‌كاری تێدا ناکرێت، بەڵکو ئەوەی راستە ئەوەیە، کە هەمیشە ساخته‌كاری ده‌كرێت و لە سەرەنجامی ئەو هەموو دەنگدانەکاندا هەر پارتیی و یەکێتی براوەی یەکەم و دووەم بوون، ئەمیش هۆکاری خۆی هەبووە، لەوانە خواستی ئەو دەوڵەتانە بووە، کە ئەم پارتانە گرێدراوی کلکیان بووە، بە داگیرکەرانەوە، ئەوەی خۆی بە سیاسیی و بیرمەند و زیرەک بزانێت، نابێت پێچەوانەکەی بیربکاتەوە، ئەوەی کە پێچەوانەکەی کرد، ئەوە یان درۆزن و فێڵبازە، یان پرۆپاگەندە بۆ بەرژەوەندی خۆی و حیزبەکەی دەکات، لە باشترین حالەتدا بە کوردییەکەی کەسێکی ساویلکە و نەزانە و دڵخوازی پارتەکەی خۆیەتی و بە سۆزەوە وەکو دڵدارێک لە سەرسامی خۆی بە رەنگ و پەڕۆ و لۆگۆی پارتەکەی، یان لەبەر خاتری گۆڕ و روخساری سەرکردە و بەرپرسەکانیی دەنگیان پێدەدات، بە بێ ئەوەی لەو ساتەدا عەقڵ بکات بە میوانی خۆی و بڕیاری راست و دروست بدات!.
هه‌ر له‌سه‌ره‌تای ده‌ست پێكردنی هه‌ڵبژاردن و بانگه‌شه‌ی ئه‌مجاره به ڕاشكاوی ئێمە وەکو بەرەی بەرەی بایکۆت ڕامان گه‌یاند، كه ئه‌م گاڵته‌جاڕی هه‌ڵبژاردنە ڕه‌ت ده‌كه‌ینه‌وه و دڵنیاش بووین كه ساخته‌كاری ده‌كرێت، كه‌چی ئەو خەڵکە سه‌رەڕای جنێودان و تۆمه‌ت هه‌ڵبه‌ستن هیچی دیکەیان پێ نەبوو تا وەڵام بدەنەوە و بەرگری لە راو بۆچوونی خۆیان بکەن، بەڵکو تەنیا ئەوەنەبێت دەیان گوت، ئێوە خەڵکی له ده‌نگدان سارد ده‌كه‌نه‌وه و ده‌نگه‌كانی ئێمه ده‌سه‌ڵات بۆ خۆی دەبات، كه‌چی رێك بپێچه‌وانه‌کەی دەرچوو، ئەوەتا زیاتر له سیانزه ملێۆن هاوڵاتی له‌سه‌رتاسه‌ری عێراق ده‌نگیان نه‌دا، ته‌نانه‌ت له‌به‌غدادی پایته‌خت ڕێژەی به‌شدرای كردن له سه‌دا سی و پێنج بوو. بۆ پینەکردنی سەرەنجامی ئەو دەنگدانە ساختەیە، بەردەوام ئیستاش درۆ دەکەن و بیانوی نابەجێ دەهێننەوە.
لە پراکتیکدا ده‌سه‌ڵات ده‌نگه‌كانی ئێمەی نەبرد، بەڵکو دەنگی ئەوانەی برد، کە بڕوایان بە دەنگدان و راستگۆیی پارتەکان و پرۆپاگندەکانیان بوو، دەنگی ئەو خەڵکانەیان برد، کە لە بەردەم سندوقی دەنگداندا هیوایەکیان بەو پارتانە، یان بە سەرەنجامی بێ غەلوغەشی دەنگەکان هەبوو. ئێمه ویژدان و مۆڕاڵی مرۆڤبوونی خۆمان پاراست و به‌شداریمان نه‌كرد، به‌ڵام ده‌نگه‌كانی ئەو خەڵکە وەکو هەموو جارەکانی پێشوو برا، کە بۆ داهاتووش هه‌ر وا ده‌بێت.
بۆیە باشترە ئەو خەڵکەبه بە ئاگا بێنه‌وه، بە قسەی ئەو سیاسیی و کاندید و بازرگان و نووسەر و فەیلەسوف و رۆژنامەنووسانە نەکەن، کە هانتان دەدەن، بچن دەنگ بدەن. ئەو نووسەر و روناکبیرانە، کە تاریکبینن، لە سیاسیی و پەرلەمەنتارەکان تاوانبارترن، چونکە بە قەڵەمەکانیان فریوی ئێوەیان دا، ئەوانە ویژدانیان نییە، بۆیە بە وتار و نووسینەکانیان فریای دەسەڵات و پارتەکان دەکەون، لەو کاتانەدا بە هانایانەوە دەچن، ئەمانەی کە وتاریان نووسی، دەیانفەلسەفان، وەکو هەموو جارێکی دیکە، دیسان بە درۆ کەوتنەوە، بەڵام دەڵێیت چی، نووسەر کە بێشەرم بوو، بەتەنگ شەرەفەوە نایەت، چونکە نییەتی، بۆیە کاتێک وتارێکی ئاوا بۆ بەرژەوەندی دەسەڵات دەنووسێت، هیچ نادۆڕێنێت، چاوەڕوان بن، کە چۆن هەر ئەم نووسەر و رۆژنامەنووسانە بۆ چوار مانگی دیکە (مانگی 9) بۆ هەڵبژاردنی پەرلەمانی کوردستان، بە هەمان بەیت و بالورەوە هانی خەڵک دەدەن تا بچن دەنگ بدەنەوە. من هەمیشە ئاواتەخوازی ئەوە بووم و وتوومە بریا لە بری ئەو هەموو بەندە یاساییانە ، یاسایەک دەنووسرایەوە کە لێپێچینەوەی لەگەڵ نووسەر و رۆژنامەنووسە ساختەچیی و خۆفرۆشانمەدا دەکرد، بە قەد ژمارە و باڵای قسە و وشەکانیان لە زیندانیان توند دەکردن، تا ئەوانەی کە ئەوانەی لە دوایەنانەوە دێن نرخی وشە و پایەی پیرۆزی قەڵەمیان دەزانی و توخنی کاری خۆفرۆشی و ریاکاریی و درۆکردنیان دەبڕی. ئەمانەیان دەکردە وانە بۆ رەوشت و موراڵ.
با بگەڕێینەوە بۆ سەرەنجامی دەنگە ساختەکان
سەرەنجامی ئەو دەنگانە هه‌ر ته‌نیا ساخته‌كاریی هۆكار نه‌بوو بۆ كه‌مكردنه‌وه‌ی كورسییه‌كانی کورد له به‌غدا، بە تایبەتی بۆ لیستی گۆڕان و پارتەکانی دیکە، به‌ڵكوو ڕێژه‌یه‌كی به‌رچاو لە ده‌نگدارانی پێشوو چونه پاڵ لیسته‌كه‌ی (نه‌وه‌ی نوێ)، جگه له‌وه‌ی هه‌زاران هه‌زار ده‌نگده‌ری ئەو خەڵکە ده‌نگییان بە هیچ لایەک نەدا، متمانه‌یان پێ نه‌كردن، ئەمیش هۆکاری خۆی هەبوو! لەوانە چه‌ندین رووداو و نه‌هامه‌تی ڕووی له‌م هه‌رێم و خه‌ڵكە كرد، خەڵکەکە هه‌ندێك جار وەک ته‌ماشه‌كه‌ر هه‌ندێك جاریش به‌شدار بوون، ئەم پارتانە بۆ کارەساتی ژینۆسایدی شەنگال و كۆمه‌ڵكوژیەکە قسه‌یان نه‌كرد. كه‌ركوك داگیر كرا هیچیان نه‌كرد. بە تایبەتی گۆڕان بووه به‌شێك له گاڵته‌جاری ڕیفراندۆم، فەرمانبەران مووچه‌یان نه‌ما ، له كاتێكدا گۆڕان و کۆمەڵ و یەکگرتوو له‌و حكومه‌تە شكست خواردووه‌دا بەشدار بوون و نه‌كشانه‌وه.
ئیتر خه‌ڵكی بڕیاری دا سزای ئەمانیش بدات. بۆیە تەنیا ئەو ساختەکارییانە هۆکاری دۆڕاندنی ئەمانە نەبوو، هەروەها نابێت ئەوەمان لە بیر بچێتەوە و به به‌هانه‌ی ساخته‌كاریی بڕوا بە خۆتان و ئەندامەکانتان بهێنن، گوایە ئەگەر ساختەکاری نەکرایە، ئەمانی دیکە زۆرترین دەنگیان دەهێنا!.
گه‌ر لە بزووتنەوەی گۆڕان بپرسین كه ئێستا پێنج كورسیتان هه‌یه، کە پێشتر نۆ كورسیتان هەبوو، ئایا ئەگەر پانزه کورسیشتان بهێنایە لە رابردوودا چیتان كرده، تا لە داهاتوودا بەو کورسیانەوە زیاتر له به‌غداد بکەن؟ هه‌ڵبژاردن له وڵاتێكی دیموكراتدا نرخ و سه‌نگی خۆی هه‌یه و گۆڕانكاری دروست دەكات. ده‌نگی ده‌نگده‌ران دەبێته بڕیاردەر، ئێوە ته‌نیا كۆمه‌ڵێك ده‌م و چاوی كۆن و تازه به‌ڕێ دەكه‌ن بۆ به‌غدا یان هه‌ولێر، ئەمە جگه له خۆده‌وڵه‌مه‌دكردنیان بچوكتریان سودیان بۆ نیشتیمان و بۆ خەڵکەکەی نه‌بووه و نابێت.
بۆ گۆڕانخوازەکان و بزووتنەوەکەیان
په‌رله‌مانتارەکانی به‌غدا سه‌ر به هه‌رچی حیزبێک بێت، لای هەموومان دەرکەوتووە کە هه‌ریه‌ك شته، ڕه‌نگه یه‌كێكیان چه‌ند جارێك زیاتر هۆڵی په‌رله‌مانی جێهێشتبێت، یاخود عه‌ره‌بیه‌كه‌ی باشتر بووبێت، یاخود له‌و (٣٠) پاسه‌وانه‌ی كه بۆی داده‌نێن هه‌ندێكیان وه‌ك خزم و ناسیاو برا و خوشك ده‌وام بكه‌ن و مووچه‌كانیان نه‌خۆن. ده‌نا سەرەنجام هه‌ر هه‌مان یەک مەعدەن دەرچوون.
لەماوەی ئەم چاڵەی کە گۆڕانی تێدا دروستبووە، گۆڕان نەیتوانیوە ببێتە فێرگەیەک، لایەنی کەم ئەوانەی کە بڕوایان بە گٶڕان و گۆڕانکاری هەیە لەدەرەوەی پارتی و یەکێتی، فێری زمانپاراویییان بکەن و لە جنێودان دووربکەونەوە، ئەمڕۆ گۆڕان وه‌ك هێزێكی سه‌ر لێشاو جنێو فرۆشی باشیان بەرهەم هێناوە، کە لە كاتی بانگه‌شه‌دا بە سەڵییە جنێو دەدەن، ئێستاش دوای ئه‌م دۆڕانه چاوه‌ڕوانكراوه، كه‌وتوونه‌ته بۆڵه‌بۆڵه‌كردن و هه‌ڵخەڵەتاندنی هه‌ست و نەستی ئه‌ندامان و ده‌نگده‌رانیان، تاکە سامانێکی فیکری کە یەنابێت لێدوانه كۆنه‌كانی كاك نه‌وشیروان مستەفایە، كه هیچ ناخاتە سەر خەرمانەی بیری نوێ بۆ رووداوەکانی ئەمڕۆ، ناونوسین و چه‌كداركردنی خه‌ڵك جگه له ماڵوێرانی هیچ تری لێ شین نابێت، چونکە فیکر و بیروباوەڕێکی لە پشتەوە نییە، تەنیا توڕەبوونە لەوەی کە دەستکەوتی بۆ بزووتنەوەکە تێدا نییە، دەستکەوت دەبێت بۆ خەڵک بێت، نەک بۆ بەرپرس و پارتێکی دیاریکراو.
لێدوانی فڵانه سه‌ركرده‌ی سه‌ربازیی و هه‌ڕه‌شه‌و جوێنتان ناتانگه‌یه‌نێته تاسلوجه‌ش، نه‌ك به‌غدا.
رابەرایەتی بزوتنەوە، یان پارت و رێکخراوێک کەسی ئازا و بە غیرەتی دەوێت، ته‌نانه‌ت کەناڵی (KNN) نەیتوانی ئه‌و ڕاپۆرته‌ی كه له‌سه‌ر شێخ جه‌عفه‌ر ئاماده‌ی كرابوو په‌خش بكرێت، له‌به‌ر ئه‌وه‌ی به فلته‌ری كاك عومه‌ری سەید عەلییدا تێنەپەڕی، وتی: زۆر توندە، گوایە توندترە لەو فیشه‌كانەی کە شێخ جەعفەر بە مێز و کورسییەکەی نەوشیروان و گردەکەی زەرگەتەیەوە نا.
له كۆتاییدا وه‌ك رۆژی رووناك دیاره، کە گۆڕان ئه‌نجامی ئەم دەنگدانە قبوڵ ده‌كه‌ن ئه‌ندام په‌رله‌مانكانیشیان به‌هه‌مان فرۆكه ده‌چنه به‌غداد.
هیوادارم ئه‌م شكسته له‌خه‌وی غه‌فڵه‌ت و غرور گۆڕان بە ئاگا بهێنێته‌وه.
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
