ڕوو
Saturday, 21/04/2018, 1:05
مرۆڤ کە ڕووی خۆی نەما
ڕووی نابێ لەناو ڕووان
یاساغ ئەبێ لە کۆمەڵ
ئەستەمە بێتە دووان
خۆی وون ئەکا لەبەر چاو
دەم بەست ئەبێ لە زمان
ناچار بارگەی ئەپێچێ
ئەیدا بە دەشت و کێوان
بەڵام بەرپرسانی کورد
ڕوو قایمن وەکو سندان
سەد ڕوویان هەیە بەڕوو
کە بنی نایە بە ڕووشان
نازانم لە کوێ ی دێنن
ئەو هەموو ڕووانەیان
هەر ڕۆژەو بە ڕووێکەوە
ڕوویان ئەکەنە مەیدان
سوێند بە شەڕەفیان ئەخۆن
کە نیانە ، بە ووتەی جوان
داکۆکی بکەن لە ماف و
هەژارو بەش خوراوان
لە درۆ کردن زۆرزانن
هەروەکو پیشەی جاران
بەڕوو قەیمی و بێ شەرمی
ئەچنە بەر قاپیەی ماڵان
ڕووی ڕەشیان وەلا ئەنێن
ڕووێکی تر ئەدەن نیشان
تاکو دەنگیان پێ بدەن
بۆ بژاردەی پەرلەمان
وا خۆیان نیشان ئەدەن
کە داخوازن لە گۆڕان
خەباتی کوردایەتیش
ئەفرۆشن بە دوو گیرفان
دیارە هێشتا تێر نەبوون
لە ڕاوە ڕووت و دۆڕان
دەگ خەجالەت بن ڕۆلە
لەبەردەم قاپیەی یەزدان
ئەوەی دەنگتان پێ بدا
نەفرەت لە خۆی و باوکیان
بەڵێن ڕواندزی
2018-4-19
سندان
ئەو ئامێرەیە کە ئاسنگەرەکان
ئاسنی گەرمی لە سەر ئەکوتن
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
