لە پاش هاتنی تورکە مەنگۆلە دڕەندەکان بۆ ئەم ناوچەیە  تاکو ئیمڕۆ  درێغییان نەکردوە لە کوشتن و جینۆساید و تاڵانی ناوچەکە ، بە تایبەتی ئەرمەن و کوردەکان  ، لە پاش دابەشکردن و داگیرکردنی خاکی كوردستان لە لایەن چوار وولات  بە هاوکاری زلهێزە خوێنمژەکانی جیهان ، کە تەنها بیریان لە بەرژەوەندی خۆیان کردۆتەوە  ، بەردەوام هاوکاری  ڕژێمە دیکتاتۆر و مرۆڤ کوژەکانیان کردوە و دەستیان واڵاکردون بۆ قرکردنی نەتەوە ژێردەستەکان. 

تورکیای ئیمڕۆ لەژێر فەرمانڕەوایی دیکتاتۆرێکی ئیسلامی ئیخوانی سەلەفی مرۆڤ کوژ  کەوتۆتە گیانی گەلی کورد لە هەرچوار پارچەی کوردستان ، بە هاوکاری و پشتگیری زلهێزەکانی جیهانی ڕوسیا و ئەمەریکا و ئەوروپا و لە بەر چاوی ڕێکخراوێکی کارتۆنی نەتەوە یەکگرتوەکان  بە بێ سڵیمینەوە لە هیچ  کارێکی قێزەوەن و تاوانی جەنگ ، لە بەر ئەوەی لەم کاتەدا لەگەڵ کوردا هیچ بەورژەوەندییەکیان نیە و تەنها کورد  بەکار ئەهێنرێت وەك ئامڕازێك بۆ گەیشتن بە بەرژەوەندییەکانی خۆیان ،  دەسەڵاتی خێڵەکی و بنەماڵەی کوردیش زۆر دڵسۆزانە و ساویلکانە کارەکانیان بۆ جێ بە جێ ئەکەن زۆر بەبێباکانە ، تا بتوانن دەست بەسەر سامان و دەسەڵاتەکەیان بگرن و لە دوای خۆشیان نەوەکانیان جێیان بگرنەوە و بە پشتاو پشت ، کۆمەڵێك  مشەخۆر و مەسسینەهەڵگریان لە خۆیان کۆکردۆتەوە بۆ پارێزگاری لە سامان و دەسەڵاتەکانیان . 

لە مێژوی مرۆڤایەتیدا و لە هیچ سوچێکی ئەم زەوییە ڕووی نەداوە ، کە دەسەڵاتدارانی ووڵاتێك یا هەرێمێك ئەوەندە بێباکانە و بێشەرمانە شان بە شانی دوژمن دژی میللەتەکەی خۆیان هەڵسوکەوت بکەن و بەرامبەر بە هاوخوێن و هاونیشتیمانی خۆیان بچنە بەرەی دوژمن و خزمەت بە دوژمن بکەن.

دەسەڵاتدارانی دیکتاتۆری ئیسلامی توندڕەوی تورك بە هەموو هێزی خۆیانەوە لەعەفرین کەوتونەتە کوشتنی مناڵ ،ژن  ، پیر ، گەنج  ، کوروکچی تاکی کورد ، تاڵان کردن و وێران کردنی شارەکە  ، کەچی دەسەڵاتی خێڵەکی و بنەماڵەی هەرێمی گەندەڵستان زۆر بێشەرم و بێباکانە هەڵسوکەوت ئەکەن ودژی ڕاگەیاندنی ماتەمەنین بۆ عەفرین ، خۆشیان تەنها بۆ جارێکیش نەهاتنە سەر شاشەی تەلەفیزیۆن و ئیدانەیەکی ئەو کوشتارەی کورد بکەن و هەوڵی بدەن کاریگەرییەك دروست بکەن و بڕیاری ڕاگرتنی بازرگانی کردن و بایکۆتکردنی بەروبومی وڵاتێکی داگیرکار و خوێن مژ و کورد کوژی وەك تورکیا و ئێرا ن بکەن و چیتر هاوردەی بەروبومەکانیان نەکەن و درامای ڕەگەزپەرستانی تورك و ئێرانی ڕابگرن و هەوڵ بدەن ناچاریان بکەن دەست لە کوشتاری تاکی کورد هەڵگرن،  لەهەمووی سەیرتر و ساویلکانەتر ئەوەیە ، کە یەك وورتەیان لێ نایەت بە بونی دەیان بنکەی سیخوری و سەربازگا و جەندرمە و پاسداران و میت و ئیتڵاعات لە کوردستاندا  ڕێکەوتنیان لەگەڵدا ئەکەن بۆ هێرش کردنە سەر هەرێمی گەندەڵستان بۆ لە ناوبردنی کوردانی باکور ،شان بە شانی ئەوەش هاواریان لێ هەڵ ئەستێت  و دوا لە پ ک ک  و ڕێکخراوەکانی سەر بەم پارتە ئەکەن بچنە دەرێ لە کوردستان ، داواش لە پارتەکانی ڕۆهەڵات ئەکەن  نابێت هیچ چالاکییەکی چەکداری دژ بە ڕژێمی داگیرکاری ئێران  هەبێت ، کە ئەوان میوانن و پێویستە هەرێمی دزوگەندەڵستان بە جێ بهێڵن و بگەڕێنەوە بۆ ووڵاتی خۆیان ، سەیر لەوەدایە و مایەی شەرمەزاری  و سەرشۆڕییە کە سنوری بە سەر ڕۆژئاوای کوردستان  دائەخەن و بە ملیاردیش بازرگانی لەگەڵ داگیراکارانی تورك و فارس ئەکەن ، ڕۆژانەش هەریمی سەر بە بنەماڵە و خێلەکی تۆپباران ئەکەن و کۆڵبەر و خەڵکی دێهاتەکان ئەکوژن ، بۆ تەنها جارێکیش وورتەیان لە دەم نایەتەدەرێ ، شانبەشانی ئەمانەش کۆمەڵێك کویلە و مشەخۆر بە ناوی نوسەر و ڕۆشنبیر باس لە سیاسەتی حەکیمانەی ئەم خۆفڕۆش و خاك فڕۆشانە ئەکەن .  

ژیانی سیاسی ئەم نەگبەتانەی کورد ، کە خۆیان بە سیاسی لە قەڵەم ئەدەن هەر باس باسی بودجە یە ، یەك ورتەیان لێ نایەت لە بارەی مادەی ۱٤٠ و گەڕانەوەی بۆ سەر هەرێمی گەندەڵستان ،باس لە هێرشی داگیرکاران ناکەن کە هاتونەتە خاکەکەمان و داگیریان کردووە ،    ئەوەی کە زۆر جێگای سەر سوڕمانە بەردەوام هەوڵی پەرەپێدانی پەیوەندییەکانیانن لەگەڵ داگیرکارانی کوردستان و بەردەوام بونی بازرگانی نەوتی دزراو  و هێنانی بەروبومی بەسەرچوی ئەم ووڵاتانەن .

پێویستە لەسەر میللەت و خەمخۆرانی کوردستانە دزراو و فڕۆشراوەکەمان  ئەم دەسەڵاتە خۆفڕۆش و خاك فڕۆشانە ناچار بکەن بە کۆتایی هێنانی بازرگانی و هێنانی بەروبومی تورکی و ڕاگرتنی دراما سەرلێشێواوەکانی تورك ، گەر  هەر بەردەوام  بێباك بون لە داواکارییەکانی میللەت ، پێویستە سزابدرێن لەکاتی هەڵبژاردندا  بە شێوەیەك کە نەشتوانن تەزویر و فڕوفێڵەکانیان فریایان بکەوێت تا نەتوانن جارێکیتر خزمەتکاری دوژمن ببن و میللەت و خاك و ووڵات بفڕۆشن و لە هەموو کون و قوژبنێکی ئەم ووڵاتە خۆیان و کۆیلە و مشەخۆرەکانیان ڕیسوا بکرێن ، هەوڵ بدرێت ڕێگا بە کۆمپانیاکانی تورك نەدرێت کار بکەن لە کوردستاندا. 

لە کاتێکدا تورکە ڕەگەزپەرست و مرۆڤکوژەکان کەوتونەتە گیانی بەشێکی کوردستان لە عەفرین ، هیچ بەرپەچدانەوەیەك لەلایەن  دەسەڵاتی خێڵەکی  نابینرێت و تەنها وەك بینەرێك سەیر ئەکەن و ئەو ئازایەتیان تێدا نیە ، بۆ چرکەیەك دەنگ بەرز بکەنەوە ، ئەبوایە ئەو دەیان هەزار چەکدارەی  لە چواردەوری خۆیان دایان ناون بۆ پارێزگاری لە خۆیان و خێزان و سامانەکەیان ، بییان ناردنایە بۆ پارێزگاری لە شەرەفی کورد لە  عەفرین. 

نازانم چۆن تاکی کورد دەنگ بەمانە ئەدەن و پشتگیریان ئەکەن ، گەر خۆشیان مشەخۆر و خۆپەرست و کۆیلە نەبن و هاوبەشی دزو گەندەڵییەکانیان نەبن :  

   نازانم چۆن دەنگ بە کەسێك ئەدرێت

      + گەر ۲۷ ساڵ بیری لە بەرژوەندی تاکی کورد نەکردبێتەوە جگە لە  خۆیان و بنەماڵە و کۆیلەکانیان .

 +گەر ٢٧  ساڵە پارێزگاری لەخۆیان بکەن بە ڕشتنی خوێنی کوڕی هەژار  بە هۆی شەڕی  براکوژی و پێشکەوتن و ڕێ نیشاندەری سوپای دوژمن دژ بە کوردی هاونیشتیمانی خۆیان .

+گەر ٢٧  ساڵ ئەرکیان  ڕێسواکردن و برسی کردن و بەکۆیلەکردنی تاکی کورد بێت  و بەرهەمەکەیان تەنها دروستکردنی سنوری زۆنی زەرد و سەوز و داخستنی پەرلەمان بێت  .

+گەر ٢٧ ساڵ ئەرکیان تەنها دەمکوتکردنی میللەت و کوشتنی ڕەخنەگر و ڕۆژنامەنوس و ژنانی کورد بێت

+گەر کاری پێشینەییان  جێ بە جێ کردنی پیلانەکانی میتی تورکی  بێت بۆ نمونە  ئەنجامدانی ڕیفراندۆمێکی گاڵتەجاری بۆ داگیرکردنی نیوەی خاکی کوردستان.

گەر دەسەڵاتی خێڵەکی  باکی نەبێت  بە دڕندەیی دوژمن و هاوکارییان دژ بە میللەتی خۆیان  .بۆیە ئەبێت  ئەرکی سەر شانی هەموو تاکێکی کوردی دڵسۆز و خەمخۆری خاك و نیشتیمان بێت کە ئەم دەسەڵاتدارە گەندەڵ و دزو مافیا و خۆفڕۆش و میللەت فڕۆشانە ڕیسوا بکەن  و هەوڵ بدەن بۆ ڕێگری لە مانەوەیان لە سەرتەختی زۆرداری  و کۆتایی هێنان بە دەسەڵاتی خۆیان و نەوەکەیان و دەستاودەست کردنی دەسەڵات بۆ بەرژەوەندی میللەت و ڕزگار بونیان لە دەست ئەم خۆفڕۆشانە و نەهێشتنی نۆکەر و کویلە و مەسینە هەڵگرەکانیان . بە هەموو تواناییەکمانەوە دژی هاتنی کۆمپانیا و دەزگاو ڕێکخراوی سیخوڕی تورك و ئێرانی بین و بەتایبەتی بایکۆتی بەروبومی تورکی و هەوڵدان بۆ دەرکردنیان لە کوردستاندا و ناچارکردنی کەناڵە کوردییەکان بۆ ڕاگرتنی دراما تورکییەکان  ڕیسواکردنیان .

با نەکەوینە داوی پیلانەکانی میتی تورکی ، کە میللەت بە وەرگرتنی موچەوە خەریك بکەن تا نەتانپرژێتە سەر کێشە سەرەکییەکانی ووڵاتەکەمان و بیرنەکەینەوە  لە دزینی نەوت و ڕادەستکردنی بە تورکیا و کردنی کوردستان بە بازارێکی گەورەی تورك ، گۆڕینی کەلتوری کوردی بە کەلتوری دزراوی تورکی و تەنینەوەی کوردستان بە سیخوڕی تورکی و بڵاوکردنەوەی نەخۆشی لە کوردستاندا، کردنەوەی خوێندگا و زانکۆی تورکی  ،بە هێواشی داگیرکردنی خاکی کوردستان ، بون بە کویلەی تورك لەژێر سایەی ئەم دەسەڵاتە بێباکەدا .