دەقی بڕیارەکانی جڤاتی نیشتیمانی بزوتنه‌وه‌ی گۆڕان

تشرینی یه‌كه‌م 22, 2017

ئەمڕۆ یەکشەممە (22/10/2017)، جڤاتی نیشتیمانی بزوتنەوەی گۆڕان کۆبونەوەی خۆی ئەنجامدا و گەیشتە ئەم بڕیارانە:

سه‌رۆكی هه‌رێمی كوردستان و جێگره‌كه‌ی هیچ شه‌رعییه‌تێكیان نییه‌ و پێویسته‌ ده‌ستبه‌رداری پۆسته‌كانیان بن.

یاسای سه‌رۆكایه‌تی هه‌رێم هه‌ڵبوه‌شێته‌وه‌ و دامه‌زراوه‌ی سه‌رۆكایه‌تی هه‌رێم نه‌مێنێ و سیستمی په‌رله‌مانی بچه‌سپێت.

كابینه‌ی هه‌شتی حكومه‌تی هه‌رێمی کوردستان ده‌ستله‌كاربكێشێته‌وه‌ و له‌ جێگه‌یدا حكومه‌تێكی رزگاریی نیشتمانی ده‌ستبكات به‌ گفتوگۆ له‌گه‌ڵ حكومه‌تی فیدراڵ، له‌سه‌ر بنه‌مای ده‌ستور و ده‌سته‌به‌ركردنی مافه‌ نه‌ته‌وه‌ییه‌كانی خه‌ڵكی كورستان.

سه‌رۆكی په‌رله‌مانی كوردستان له‌گه‌ڵ فراكسیۆنه‌كان له‌ هه‌وڵدایه‌ بۆ دانیشتنی په‌رله‌مان، بەمەبەستی ده‌ربازكردنی گه‌له‌كه‌مان له‌و دۆخه‌ مه‌ترسیداره.‌

ئه‌نجومه‌نی باڵای سیاسی كوردستان هیچ شه‌رعییه‌تێكیان نییه‌ و ده‌یانه‌وێ خۆیان بكه‌ن به‌ جێگره‌وه‌ی دامه‌زراوه‌ شه‌رعییه‌كانی هه‌رێم.

داوا له‌ حكومه‌تی فیدراڵ ده‌كه‌ین په‌لاماره‌كانی بۆ سه‌ر شار و شارۆچكه‌كانی كوردستان رابگرێ و لیژنه‌یه‌كی لێكۆڵینه‌وه‌ دروستبكات بۆ قه‌ره‌بوی زیانلێكه‌وتوانی ناوچه‌كانی دوز و كه‌ركوك و خانه‌قین و جه‌له‌ولا و شه‌نگال و شێخان و زوممار و مه‌خمور ناوچه‌كانی تر

ئیدانه‌ی هه‌ر ده‌ستدرێژییه‌ك ده‌كه‌ین بۆ سه‌ر موڵك و ماڵ و ژیانی هاوڵاتیان و پێویسته‌ ده‌ستدرێژیكاران راده‌ستی دادگا بكرێن

پێویستە گفتوگۆی نێوان حکومەتی هەرێم و لەسە بنەمای دەستوری عێراقی و پاراستنی کیانی هەرێمی کوردستان بێت

بزوتنەوەی گۆڕان لەگەڵ کۆمەڵی ئیسلامی لەهەوڵدایە بۆ کۆکردنەوەی هێزو گروپی تر بەئامانجی جێبەجێکردنی ئەرکەکانی ئەم قۆناغەو لەسەروی هەمویانەوە کابینەی هەشت و پێکهێنانی کابینەیەکی رزگاریی نیشتمانی.

لەکۆتایدا داواکارین دەسەڵاتدارانی هەرێمی کوردستان ئەم داواکاریانە بەهەند وەرگرن و جێبەجێی بکەن، چونکە لە ئەگەری گوێنەگرتن لەم داواکاریانە، بژاردەی تر لەبەردەم کۆمەڵانی خەڵکی کودستاندایە.