هه‌لوێسته‌كان له نێوان ریفراندۆمه‌كه‌ی كوردستان و كه‌ته‌لۆنیادا
Tuesday, 17/10/2017, 16:32
بۆگدانۆڤ سه‌رۆكی هه‌رێمی كه‌ته‌لۆنیا ده‌ڵێت: سه‌رپشككردنم بۆ زه‌روره‌تی سه‌ربه‌خۆبونی كۆماری كه‌ته‌لۆنیا قبوڵ ده‌كه‌م و پێشنیار ده‌كه‌م كه پاشماوه یان رێكاره‌كانی راگه‌یاندنی سه‌ربه‌خۆیی دوابخرێت بۆ ئه‌وه‌ی به وتوێژ له‌گه‌ڵ مه‌درید بكه‌ین و به سازان بگه‌ینه چاره‌سه‌رێك.
ئه‌م وشه هه‌ستیار و عاقڵانه‌ی بۆگدانۆڤ هه‌م ریفراندۆمه‌كه‌ی ره‌تنه‌كردۆته‌وه و هه‌میش رێگای گفتوگۆی كردۆته‌وه و كه‌سیش كاردانه‌وه‌ی قورسی نابێت و پرسی سه‌ربه‌خۆییش قبوڵكراوه و گفتوگۆش به‌رده‌وام ده‌بێت و مه‌دریدیش ناتوانێت هیچ به‌هانه‌یه‌كی هه‌بێت بۆ كاردانه‌وه‌ی قورس و ته‌نها به گفتوگۆ چه‌ند درێژ خایه‌ن بێت یان كورت رێگه‌كه ده‌گرنه‌به‌ر و كه‌ته‌لۆنیاش له پێگه‌یه‌كی باڵاوه مامه‌ڵه له‌گه‌ڵ مه‌درید و ده‌رئه‌ناجمی ریفراندۆمه‌كه‌ش ده‌كات و هه‌ر هه‌ڵوێستێكی گونجاو به قازانج بزانێت ده‌یگرێته‌به‌ر و به سه‌ربه‌خۆیی بێت یان به‌هه‌ر رێگه‌یه‌كی تر، هه‌رێمه‌كه قۆناغێكی گه‌وره ده‌چێته پێشه‌وه، تاوه‌كو له‌كاتی دیاریكراو و هه‌لی له‌باردا دوا ئامانجی خۆی ده‌پێكێت و له كام رێگه‌یه‌وه بیه‌وێت ده‌كه‌وێته سه‌رروبه‌ری دوا قۆناغی سه‌ربه‌خۆیی یان به ده‌زویه‌كی باریك له‌گه‌ڵ مه‌درید دا ده‌مێنێته‌وه، به‌ڵام به هه‌ڵوێست و پێگه‌یه‌كی شه‌ره‌فمه‌ندانه‌وه .
لیره‌شدا له كوردستانه‌كه‌ی خۆمان، سه‌ره‌رای جیاوازی هه‌مه‌لایه‌ن چ له جۆری ناوه‌ندی عیراق و ده‌وروبه‌ری له‌گه‌ڵ ئه‌سپانیا و ده‌وروبه‌ره‌كه‌یدا، یان بارودۆخی نیوخۆی كوردستان و گوشاره‌ی كۆی گشتی بیر و ره‌فتار و عه‌قڵیه‌تی خه‌ڵكه ساده دڵسۆزه‌كه و، نه‌بونی خه‌تی سور له ره‌فتاری نه‌یاران یان ئه‌وه‌ی خۆی به ئۆپۆزسیۆن ده‌زانێت كه به پشتخانێكی ته‌سكی حزبی و كه‌سی مامه‌ڵه له‌گه‌ڵ پرسێكی نه‌ته‌وه‌یی و نیشتمانی وادا ده‌كات، له گه‌ڵ داموده‌زگای راگه‌یاندنی نابه‌رپرس كه زیانی له هه‌وڵه‌كانی دوژمنان زیاتر بوو . پاش بێنه و به‌رده‌یه‌كی زۆر و چاوسوركردنه‌وه‌ی سێ وڵاتی دوژمن و رازینه‌بونی هیچ ولاتێكی خاوه‌ن پایه و كاریگه‌ر له‌سه‌ر ناوچه‌كه، سه‌رئه‌نجام له هه‌نگاوێكی مێژوویی گه‌وره‌ی بێ هاوتا و وه‌رچه‌رخانێكی سیاسی دوور مه‌ودا كه گه‌وره‌یی و گرنگیه‌كه‌ی له دوارۆژێكی نزیك بۆ هه‌موو لایه‌ك ده‌رده‌كه‌وێت؛ ریفرادنۆم ئه‌نجام درا و ده‌رئه‌نجامێكی شانازیبه‌خشی به‌ده‌ستهێنا كه له دوارۆژی نزیك نه‌ك دوور ئامانجه‌كه‌ی خۆی به پله‌یه‌كی دیاریكراو ده‌پێكێت و ئه‌م كاردانه‌وانه‌ی ده‌وروبه‌ریش كه ئێستا له په‌له‌قاژه‌دان وه‌ك بڵقی سه‌رئاو كۆتاییان دێت و هه‌موو هه‌نگاوه گرنگه‌كان رێچكه‌ی تیابه‌تی خۆیان وه‌رده‌گرن و پرسی كورد بۆ چه‌ندین ساڵی تر وه‌ك كیشه‌ی فه‌له‌ستین ده‌مێنێته‌وه و، دانوستان و هاوكێشه‌كان پاڵپشتی یان دژه كوردستان رێكده‌خه‌ن و هه‌موو كرده‌وه و خۆهه‌ڵكێشانێكی به‌مه‌به‌ستی سیاسی و موزایه‌ده‌كانی هه‌موو لایه‌ك كپ ده‌بێته‌وه و شانازیه‌كه بۆ خاوه‌ن ویست و ئیراده ده‌مێنێته‌وه كه له‌دواجاردا به پشت به‌ستن به‌میله‌ته‌كه سه‌رده‌كه‌وێت .
دیاره ریفراندۆمی كوردستان به‌و ده‌رئه‌نجامه مێژوییه‌ی ئامانجه‌كه‌ی پێكا و وا ئێستا له قۆناغی به‌ره‌و ئاساییكردنه‌وه‌ی هه‌لچون و ده‌ردان و كاردانه‌وه‌كان ده‌چین، سه‌ره‌رای ئه‌وه‌ی هه‌رته‌شقه‌ڵه و جموجوڵ و داگیركاریه‌ك لێره‌و له‌وێ رووبدات، ئه‌مه‌ش هه‌ڵچونێكی ئاساییه بۆ ئه‌وه‌ی زه‌مینه‌ی سروشتی خۆی بره‌خسێنێت و قۆناغی پاش ریفراندۆم ده‌ست پێبكات. له‌م كاته‌شدا هه‌موو ته‌كتیكێك حه‌ڵاڵه به قسه‌ی راگه‌یاندن و فێلی بچوك و ته‌نانه‌ت په‌یمانی درۆی ناره‌سمیشه‌وه، له‌پێناو هێوركردنه‌وه و نه‌هێشتنی هه‌ر ئه‌گه‌رێك بۆ ئه‌وه‌ی دۆستان و خه‌ڵكی پالپشت زه‌ره‌ر نه‌كه‌ن . به‌ڵام خاڵی یه‌كلاییكه‌روه‌ی به‌هێزبونمان نه‌هێشتنی دروستكردنی درزی نێوخۆییه به‌ده‌ستی دوژمنانی ده‌وروبه‌ر كه خه‌ته‌رترین شته له‌سه‌ر پرسه‌كه و دوارۆژ و مێژووش ره‌حم به هیچ كه‌س و لایه‌نێك ناكات له‌به‌ر به‌رژه‌وه‌ندی ته‌سك بچێته ژیرباری هه‌ڵوێست و داواكاری دوژمنانه‌وه.
ته‌ماشای كه‌ته‌لۆنیا بكه‌ن كه بارودۆخی كۆمه‌ڵایه‌تی و سیاسی و رۆشنبیری و راده‌ی تێگه‌یشتنی خه‌ڵك له پرسه‌كان و باری ئابووری چۆنه و كاردانه‌وه‌كانی ئه‌سپانیاش بخوێنینه‌وه و به چاوی خۆتان ببینن كه مامه‌ڵه‌ی كه‌ته‌لۆنیا له‌گه‌ڵ پرسه‌كه چه‌ند به عه‌قڵانی ده‌روات و هه‌موو به‌ره‌ی سه‌ربه‌خۆییخواز له یه‌ك سه‌نگه‌ردا پشتگیری یه‌كلاییكردنه‌وه‌ی دۆزه‌كه‌یانن و پاڵپشتی هه‌ڵوێستی سه‌رۆكی هه‌رێمه‌كه ده‌كه‌ن كه تا ئه‌مرۆ به‌جوانی ته‌نانه‌ت ته‌كتیك به ده‌ربرینی وشه‌كانیشیه‌وه ده‌كات نه‌ك هه‌ڵوێسته‌كانی و، وای كردووه كه هیچ خاڵێكی لاوازی یاسایی و سیاسی نه‌دات به‌ده‌ست مه‌دریده‌وه .
ده‌رسێكی زۆر گه‌وره‌ی ئۆپۆزسیۆن و نه‌یارانی نێوخۆی كه‌ته‌لۆنیا بۆ سه‌ربه‌خۆیی ئه‌وه‌یان بۆ جیهان سه‌لماند كه چه‌ند عاقڵانه ره‌فتاریان كرد و له‌پێش سازدانی ریفراندۆم هیچ جوڵه‌یه‌كیان نه‌كرد و له پاش پرۆسه‌كه به پاڵپشتی و زیاده‌رۆیی مه‌دریدیش رژانه سه‌رجاده و به‌دوور له هه‌ڵپژان و به‌ریه‌ككه‌وتن راوبۆچونی خۆیان له دوای ئه‌نجامدانی پرۆسه‌كه ده‌ربری و پێش ئه‌وه‌ش خه‌تی سوری به‌رژه‌وه‌ندی كه‌ته‌لۆنیایان له‌به‌رچاو گرت، هیوادارم ئه‌مه په‌ندێك بێت بۆ ئۆپۆزسیۆنی خۆمان و له‌كاتی هه‌ستیاردا وه‌ك خۆی مامه‌ڵه له‌گه‌ڵ پرسی گه‌لی كوردستاندا بكه‌ین .
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
