ماڵئاوا سەبەبکاری کۆستەکانمان!

ماڵئاوا ئەندازیارەکەی حکومەتە گەندەڵ و پاشەڵپیسەکەی هەرێم!

ماڵئاوا ئەی پارێزەری ئەنفالچیەکان و تاریق ڕەمەزانەکان و فایلدارەکان!

ماڵئاوا باوکی هەزاران ملیۆنێر و بەرهەمهێنی ملیۆنەها سک هەڵگوشیوی برسێتی!
تۆی پارێزەری بکوژی کاوە گەرمیانی و متقنەکەر لەئاست کوشتنی سەردەشت، کە لەناو بیلبیلەی چاوەکانمان ئەپارێزین!

ئێمەی کوێلە و ڕاهاتوو لەسەر کڕنۆش بۆ ستەمکار لە دوای تۆ چۆن قەرار بگرین!؟
بە کێدا هەڵبدەین و بۆ کێ هەلەکەسەما  بکەین!؟

ئەی تۆ دەرهێنەرێکی شارەزا و باوکی سەدان کۆمبارسی وەکوو مەلا بەختیارەکان و کۆسرەتەکان و بەرهەمەکان نەبوویت و ئێمەش جەمهوری چەپڵەلێدەری شانۆگەریی "کوردایەتی بەتامی خانووەقوڕەکان" نەبووین؟

مامە نازانم ئاگاداری یان نا، ئازاد جوندیانی و عارف ڕوشدی، کە تۆی ئەندازیاری دیموکراسیەکەمان بەبێ هەڵبژارن و بە تۆپزیی کردتن بەئەندامی سەرکردایەتی!؟ دوایی بەئیلهام لە پیاچوونەوە تیۆرییە قووڵەکانی جەنابت خۆیان حەواڵە دایەوە بۆ لای کوڕەکەی باوکی مێژوویی کورد!

مامە بێخەم بنوو ئاواتەکانت لە ووڵاتی شەهید و خوێن و ئەنفالدا! وا چرۆ دەکەن.

نۆکانەکەتان... سەرباری هەزاران ئەزمە و گرفتی ئابووریی و گوزەران قازانجی ڕوو لە سەرە! دەست نیشاندەرە زیرەکەکانی خۆت تازە هێڵی ناردنی نەوتیان لە گەڵ داعشیشدا کردۆتەوە!
ئێستا کۆسرەتی جیگری یەکەمت، یەکەمین بازرگانە بە دەرمان و دەوای میللەتەکەمانەوە و لە تۆوە فێری ووتنەوەی عیبارەتی "کۆمەڵانی خەڵکی کوردستان"یش بووە.!

دەردی دڵ زۆرن مامەگیان لەم کۆتەڵی مەرگەتا باسی بکەم .

بمبوورە لە کورتیی مەقال لە مەقامدا. 

من ئەم گەلە قارەمانە بناسم هەرگیز تۆ لەبیر ناکەن و لە مەرگیشدا هەر کڕنۆشت بۆ ئەبەن!

ئارام بنوو ووڵات لە دەستی پیاوی ئەمیندایە لە سایەی ڕێباز و کاروانی کوردایەتییەکەی تۆ.!