هەر نووسەرێ، یان خاوەن پەیجێکی ناو تۆڕە کۆمەڵایەتییەکان، ئەگەر بییەوێت دەستخۆشیی و ئافەرین وەربگرێت، ئەوا دەتوانێت دژی پارتیی و بنەماڵەی بارزانی بە چەند دێڕێک، یان بە بڵاوکردنەوەی کلیپی ڤیدیۆیەک زۆرترین دەستخۆشیی و ئافەرین و لایک وەربگرێت، بۆیە پەڕلەمەنتار و ئەندامانی پارتەکانی تریش، کە بەشێکن لە دەسەڵاتی مافیای کوردی و دەزانن پارتی حاکمیانە، ئەمانیش لەسەر ئەم مۆدێلە نوێیە رەخنە لە پارتیی و بنەماڵەی بارزانیی دەگرن، خۆیان لای خەڵکی شیرین دەکەن.

رەخنەی توند بە چەکوش، داهێنانی کوردستانپۆستە، کە پێش ١٥ ساڵ چەکوشی رەخنەی وەشاند و توانی ئەو دز و مافیا و داوێنپیس و سیخوڕانە بە گەلی کورد بناسێنێت، هەڵبەت مێژووی بەرپرس و مافیاکانی کورد، هەموویان وەک مێژووی بنەماڵەی بارزانییە، تەنیا ئەو جیاوازییە نەبێت، کە بنەمالەی بارزانی هەرچییەک بێت، لە خیانەتکردندا درۆ ناکەن و بەئاشکرا خیانەت و ناپاکی بە گەلەی کورد دەکەن، بەڵام پارتەکانی تر بەتایبەتی بنەمالەی تالەبانی و برایم ئەحمەد بە جۆرێکی شاراوە خیانەت و دزیی دەکەن.
کاریگەریی رەخنەکانی کوردستانپۆست لەسەر بنەماڵە و پارتەکانی باشوور لەو کاتەدا قورسایی خۆی هەبوو، هچیان تێدا نەهێشتبووەوە، تا کەسی دیکە قسەی زیاتری لەسەر بکات، ئەوەی ئەمڕۆ دەگووترێ، دووبارە و سێ بارەکردنەوەی ئەوانەی رابردوون، شتێکی نوێیان تێدا نییە نەگووترابێت، باسەکان لە ناو دزیی و فەسادیی و خیانەت و مێژووی تاڵی رابردووی ئەم دز و فاسیدانەدا کۆبوونەتەوە و دێن و دەچن، لێ ئەمڕۆ نووسەرانی هەلپەرست و میدیای بەناو ئەهلیی، کە سێبەری راگەیاندنی دەسەڵاتی مافیایە، دەیانەوێت لە نرخی رەخنەی بەرەی ناڕازیی و ئۆپۆزیسیۆن کەم بکەنەوە، لەگەڵ چەند نووسەرێکی دەربار و پەرلەمەنتارە ساختەکارەکان، لە دەوریان کۆبوونەتەوە، خۆیان وەک دژی پارتیی و بنەماڵەی بارزانی پیشان دەدەن.

لەم نووسینەدا دەمەوێت قسە لەسەر چەند رۆژنامەنووس و نووسەرێک بکەم، کە لە پاڵ یەکێتیی و گۆڕان و حیزبۆکەکانی تردا، خۆیان وەکو رەخنەگر نمایش دەکەن، گوایە لە بەرەی خەڵکن و دژی پارتی و بنەماڵەی بارزانیی هەڵویستیان وەرگرتووە. لێرەوە منیش وەک نووسەرێکی کوردستانپۆست و رۆژنامەنووسێکی سەربەخۆ بەو بەڵگانەوە، کە لەبەردەتمدایە و لە سەرچاوەی نزیک بە خۆیان لە نێو خودی نێو دەسەڵاتیش وەرمگرتوون، ئەم باسەی پێدەوڵەمەند بکەم و دەمەوێت رووی راستەقینەی ئەمانە هەڵبماڵم، ئەوەی هانیشی دام بۆ نووسینی ئەم بابەتە، باسکردنی رۆڵی میدیای ساختەکارە، ناسراو بە ئەهلی. ئەهلی واتە جەماوەری، گوایە لەبەرەی خەڵکن و پەیوەندیی بە دەسەڵات و حیزبەکانەوە نییە، بەم نووسینە دەمەوێت پێچەوانەکەی بسەلمێنم .

هەڵبەت ئەوەی، کە بەرپرسێک و دەسەڵاتدارێکی ئەم پارتانەی لە کەسانی شەریف و خاوەن موڕاڵ و باشی پێ جیادەکرێتەوە چەند تایبەتمەندییەکە لەوانە: (دزیی و بێشەرمی، دەستپیسی و داوێپیسی، خیانەت و سیخوڕی، دوو روویی و درۆزنی)، هەموو ئەمانە لەناو زۆربەی میدیا ئەهلییەکانیشدا بوونیان هەیە، چونکە ئەمانیش پەروەردەی قوتابخانەی خیانەت و فەسادیین.

کاوە گەرمیانی، سەردەشت عوسمان، سۆرانی مامە حەمە و ویداد....هتد، وەک شەهیدانی قەڵەم  ناسراون. ئەمانە بوونەتە سیمبوڵی بەرەورووبوونەوەی دەسەلاتی فاسیدی کوردیی، بەوەی لەسەر راستگۆیی و پەیامی قەڵەم، دەسەڵات تیرۆری کردوون، بۆ رێزگرتن لە هەڵویستی جوانیان، کە لە پێناوییدا ژیانی خۆیان تیادانا، کارێکی جوانەساڵانە یاد بکرێنەوە، ئەمە نەک تەنیا ئەرکی رۆژنامەگەرییە، بەڵکو وەک ئەرکی ئەخلاقیش دەبێت بەجێ بهێنرێت، چونکە لەو رێگایەوە بەشێک لە پێناسەی دەسەڵاتی کوردی پێدەکرێت. ئەحمەد میرە کە خاوەنی سایت و گۆڤاری لڤینە، پێچەوانەی پەیامی سۆرانی مامە حەمە کار دەکات، ناوی سۆران بۆ خۆی بەکار دەهێنێت، بازرگانی پێوە دەکات. خەڵات بە بەرپرس و پیاوەکانی دەسەڵات دەدات، لە نمونەی عیماد ئەحمەد، لە رێگای دەستپیس و بێشەرمێکی وەک عەقید شاناز خەڵات بە کەسە جوانەکان دەدات، وەک ئەوەی مەسعود عەبدولخالق، تا ئەویش وەکو خۆیان ناشرین و گوماناوی بکەن.

- ئەحمەد میرە، خەڵاتی سۆرانی مامە حەمە بە هەموو هاوڕێ و هاوپیشە پۆخڵەکانی وەک خۆشی دەدات، لەوانە کەمال رەئوف.

- ئێمە کاتێک باس لە تاوان و تیرۆرکردنی رۆژنامەنووس، یان هەر کەسێکی دیکە لەباشوور دەکەین، مەبەستمان تەنیا لە پارت و دام دەزگا و بەرپرسەکان نییە، کە ئەو رۆژنامەنووسانەیان تیرۆرکردووە، بەڵکو مەبەستیشمان لە خودی ئەو دەسەڵات و سیستەمەشە، کە ئەو تاوانبارانەی دروست کردووە و رێگای پێداون ئەم پیاوکوژانە بەو کارە هەڵبسبتن، لێپێچینەوەیان لەگەڵدا ناکەن و داڵدەیان دەدەن. کاتێک سەردەشت عوسمان تیرۆردەکرێت تەنیا پارتیی تیرۆری ناکات، بەڵکو یەکێتیی و هەموو پارتەکانی تریش تاوانبارن، چونکە پێکەوە دەسەڵاتی ئیداریی و سیاسیی و حکومەت بەڕێوە دەبەن، ئەوان ئەو دەسەڵاتە رەهایەیان بە پارتیی و بە بنەماڵەی بارزانی داوە، لەبەر ئەمانە کاتێک مەسعود بارزانی داوا لە تالەبانی دەکات، کەیسی تیرکرۆردنی سۆرانی مامە حەمە لە کەرکوک دابخات، تالەبانیش بە قسەی دەکات، پارتی کارێکی پێچەوانەی یەکێتی نەکردووە، پێچەوانەی کاری  یەکێتی بێت، یەکێتیش هاوشێوەی پارتی هەمان رەفتاری کردووە، ئەوەتا کاوە گەرمیانیی تیرۆردەکات، ئەمەش ئەوە دەسەلمێنێت، کە دەسەڵاتەکە کە ئەو پارتانەی تێدا کۆبۆتەوە  بۆ خۆی پیاوکوژە و کوشتن و دزیی و خیانەت بۆ یەکتر تێدەپەڕێنن و تاوانی یەکتر سپی دەکەنەوە.
کاوە گەرمیانی کە لەناو ماڵی خۆیدا تەقەی لێدەکرێت و لە باوەشی دایکیدا گیان لە دەست دەدات، دەستی تاوان بۆئەندامێکی مەکتەبی سیاسیی ئەو حیزبە (مەحمود سەنگاوی) رادەکێشرێت، ئەگەر بەڵگەی یاساییش لەسەر سەنگاوی نەبێت، لێ تاوانەکە دەبێتە موڵکی یەکێتی، شانازی برایم ئەحمەدیش، ئەندامێکی دەستڕۆیشتووی ناو یەکێتیی و کەسێکی ناو بنەماڵەی ئەو تاوانبارانەیە، بەشێکە لە میکانیزمی بەڕێوەبردنی خیانەت و دەستپیسیی و پیسخۆریی، کەچی لڤین و ئەحمەد میرە، لە رێگای شانازەوە خەڵاتی سۆران دابەش دەکات، هەروەها خەڵات بە ئەندامێکی ئەو حیزبە تیرۆریستەش دەدات، کە عیماد ئەحمەدە! قوربانیەکانی رۆژی ١٧ شوبات، کە پارتیی و یەکێتیی بە جووتە تەقەیان لە خەڵکی سڤیل دەکرد، نەک ئەم دوو حیزبە، بەڵکو گۆڕان و کۆمەڵ و یەکگرتووش تێیدا تاوانبارن، چونکە لەناو کابینەی حکومەتی تیرۆریستەکاندا حکومەت بەڕێوە دەبەن و لێی بێدەنگ بوون.

بۆ ناساندنی سایت و گۆڤاری لڤین ، دەبێت لە ناساندنی خاوەن و کارمەندەکانیانەوە دەست پێبکەین:

- لە سەردەمی بەعسدا، هەرکەسێک لایەنگیریی بۆ بەعس نەبوایە و کاری بۆیان نەکردبایە، هیچ پۆست و کاری پێنەدەدرا. پارتیی و یەکێتییش هەر وەک بەعس دەکەن، بۆیە راگری زانکۆ، بەڕێوەبەری قوتابخانە و دائیرە فەرمییەکان، دەبێت سەر بە پارتیی و یەکێتی بن، گەرنا ئەوا لە پۆستەکانیان دووریان دەخەنەوە. ئەحمەد میرە، کە زمانی ئینگلیزی نازانێت، کەچی وەک خوێندکارێکی ماجستەر وەرگیرا، ئیستا بۆتە راگر (عمید)ی بەشی کوردیی لە زانکۆی هەڵەبجە.
- ئەحمەد میرە و رەحمان غەریب و نەبەز گۆران، بەردەوام هاتوچۆی (دارا)ی بەڕێوەبەری  کاروباری هێرۆ دەکەن، رێنمایی لێوەردەگرن. پارەی تایبەتیان بۆ بڕاوەتەوە.
- هەر هەواڵ و قسە و چالاکییەک، کە کوڕەکانی تالەبانی (قوباد، پاڤێل) هەیانبێت، ئەمان بە ترشوخوێکردنەوە بڵاوی دەکەنەوە. نووسینەکانی شاناز بە بایەخپێدانەوە لە لڤین، شارپریس و سپی نیوز .. بڵاودەکرێنەوە.

- موحەمەد هەورامی  کادیری پێشکەوتوی دەزگای زانیاریی و سەرنووسەری گۆڤار و سایتی لڤینە لەهەمان کاتدا سەرنووسەر و سەرپەرشتیاری چوار ماڵپەڕ و گۆڤاری دیکەی سەر بە دەزگای زانیارییە، بە پیاوی لاهوری شێخ جەنگی ناسراوە.