هێشتا لە بیرمە دەرهاوێشتەکانی دوای ڕاپەڕین  لە هەڵبژاردنەکانى 1992 کە پەرلەمان و حکومەتى هەرێمى لێکەوە، ئاسۆیەکى نوێی بەڕووى خەڵکى بەشمەینەت و ستەمدیدەى کۆمەڵانى خەڵکى ئەو  هەرێمە کردەوە کە هەمووان بە گەشبینیەوە بڕواننە داهاتوو.. لەوانە دەنگودۆی هێزى چەکداری جزبەکان  بەناوى هێزى یەکگرتووەوە لە ژێر چەتری وەزارەتێک بەناوى وەزارەتى پێشمەرگە یەک دەخرێ و لەو چەک و جبەخانەى ئەو فەیلەقانەى ڕژێم بەجێیان هێشت  و کەوتە دەست حزب و لایەنە سیاسیەکانى کوردستان،  هەرچی چەکێک هەیە بە سووک و قورسەوە  دەبەخشرێتە ئەو وەزارەتە ساوایە، بەمەیش بەشێکى کەمیان لێی دا و  ترسی شەڕی براکوژی ئەزموونى چەند ساڵەى رابردوو وای لە حزبەکان بەتایبەت حزبە زلهێزەکان کرد کە هێشتا تەم و مژی ئەو ڕابردوەیان نەڕەوێتەوە و لە ئامادەباشی خۆیاندا  هەموو چەکە قورسەکان ڕادەست نەکەنەوە.

هێزە یەکگرتووەکە ئەوەندە بە یەکگرتوویی نەمایەوە، ساڵێک و چەند مانگێکى بەسەر تێپەڕی، جارێکى تر شەڕی براکوژی یەخەى گرتین و هەر بەو چەکانەی سوپای عێراقی شەڕی یەکیان پێ کرد، ئەوەش چ جای سەرگەردان و ماڵوێرانى بۆ کوردستانیان، خەریک بوو خەونى لەمێژینەمان لەگۆڕنێ و لەو ساتەوە بووە خاکەکەمان بووە گۆڕەپانى دەستوەردانى وڵاتانى هەرێمى و لە هەر ئەگەرێکى دانیشتن و کۆبوونەوە و ڕێکەوتنى لایەنە پێک ناکۆکەکان، ئەو زلهێزە هەرێمیانە چالاکیەکانیان لە کوردستان سڕ دەکرد و  بێ دەنگیان دەنواند، چونکە دەزانن بە یەکگرتوویی بزوتنەوەى ڕزگاریخوازى کورد ئەوانە وا بەئاسانى ناتوانن حوکمڕانى ئەم هەرێمە بکەن و وا بەئاسانى ئەجێنداکانیان پیادە بکەن.

زۆر جار دەوترێ: مێژوو خۆی دوبارە دەکاتەوە، ئەگەر نێوماڵی کورد رێک نەخرێتەوە و وەزارەتى پێشمەرگە بە کردەوە وەزارەتى هەمووان نەبێت، مەبەستم لەو قسانە هیچ هێزێک لەدەرەوەى ئەو وەزارەتە نەجوڵدرێ و ئیعاز لە حیزبەوە وەرنەگرێ و بەنیشتمانى نەکرێ، ڕەنگە دووبارە بوونەوە سەرهەڵدانى هەر شەڕو شۆیەکى نەخوازراو، بەهەمان ڕبەى تەق تەق وەک نەوەدەکان ئەو چەکانەى ئەمریکا و ئەڵمانیاو هاوپەیمانان بە کوردى داوە( چەکە مۆدرێنەکان) ئەوە لەسەر یەکى تاقی بکەینەوە، لەو هەنگاوانەی پێویستە کاریبۆ بکرێ:

1-   وەزارەتى پێشمەرگە بە دامەزراوەیی بکرێ کە گوزارشت لەهەمووخەڵکى کوردستان بکات نەک چەند حزبێک و تەواو.

2-   ڕاکێشانى بەزۆرەملێیی (تەجنید)ی جاران بەپێی تەمەن و بەبێ چاوپۆشی هیچ کەسێک بۆ خزمەتى سەربازى بانگ بکرێن، ئەوەش زیاتر ئەو وەزارەتە بەرەو دامەزراوەیی و دام و دەگایەکى نیشتمانى دەبات.

3-   ئەو هەموو ناوەى لەم  و لەو نراوە (هێزە چەکدارەکان)، هەموویان بکرێنە یەک ناو و وەزارەتى پێشمەرگە سەرپەرشتیان بکات.

4-   بڕیارێکى ناوەندى هەبێت کە هەمووان پێیەوە پابەند بکات نەک بەهۆی  وەلای هێزێک بۆحزبەکەى بریاری لایەکەى تر ڕەت بکاتەوە.

5-   گۆڕینى دەم و چاوەکان و جێگرتنەوەیان بەکەسی بێ لایەن لەکاتێکدا حیساب بۆ قسە و  فەرمانەکانیان بکرێ.

6-   یەکگرتوویی هێزى پێشمەرگە لەژێر یەک چەتری کوردایەتى هیچ دوژمنێک ناتوانێ زەفەری پێ ببات، بەپێچەوانەوە هەر ئاڕاستەیەکى جیاواز وا دەکات ئەم وڵات و ئەو وڵات زۆر بە ئاسانى دەست لەکاروبارەکانى وەربدات و  دواجار ئاقیبەتمان خێر نابێت.

7-   نیەت،.. دیسان نیەت.. بوێری و کوردایەتى دەتوانێ ئەو پەرتەوازیە یەک بخات وەک چۆن هاوار دەکەین دەڵێین تا کورد ماڵی خۆی یەک نەخات ناتوانێ بەرامبەر تەحەدیەکان ببێتەوە، ئەوانەى کۆسپن لەبەردەم سەربەخۆیی و یەکڕیزى ماڵی کورد.