ئه‌گه‌ره‌کانی ڕووخانی ده‌سته‌ڵاتی پارتی و یه‌کێتیی
Saturday, 26/11/2016, 22:21
هه‌موو شتێکی باش به‌هاکه‌ی له قه‌باره‌که‌یدا نییه، به‌ڵکوو له بوونیه‌تیدایه، هه‌ر بۆیه مه‌رج نییه هه‌ر شتێک که گه‌وره بوو ئیدی باش بێت. ده‌سته‌ڵاتدارانی یه‌کێتیی و پارتی، هه‌ردووکیان به ناو حکومه‌تیی هه‌رێمی کوردستانیان پێکهێناوه له قه‌باره‌ی ده‌سته‌ڵاتی سیاسیی و ئه‌ندامانیاندا گه‌وره‌ن ، بە ناو تا چەند ساڵێک لەمەوپێشێش زۆرتریین جه‌ماوه‌ریشیان له خۆیان کۆکردبۆوه هۆکاره‌که‌شی ئه‌وه نییه، که چه‌ند گه‌وره و زه‌به‌لاح بن واتای ئه‌وه بێت دڵسۆزن و بۆ جه‌ماوه‌ر باشن، به‌ڵکوو هۆکاره‌که‌ی ده‌گه‌ڕێته‌وه بۆ ئه‌و کلتوورەی کوردیی تێدا شکێنراوە، کلتووره‌که‌ش بێگوومان له‌ژێر کاریگه‌رێتیی مێژووی ئێراق به گشتیی و داگیرکەراندا چه‌که‌ره‌ی کردووه.
به‌عس هه‌موو ته‌مه‌نی خۆی ئاماده کردبوو بۆ به جه‌ماوه‌رکردنی کۆمه‌ڵگا، هەروەها حکومەتە داگیرکەرەکانی دیکەش وەکو تورکیا و ئێران، کێشه‌ی گه‌وره‌ی هه‌موو کۆمه‌ڵگایه‌کیش ئه‌و کاته‌یه، که کۆمه‌ڵگا ده‌بێته جه‌ماوه‌ر. جاران باشووری کوردستان له چوار به‌ش سێ به‌شی بوو بوو به جه‌ماوه‌ر ئه‌و به‌شه‌شی، ئەمڕۆش ئەوەی کە بێدەنگ و ئازادانه ماوه‌ته‌وه یان ئه‌وه‌تا ڕایکردووه بۆ هه‌نده‌ران یان ئه‌وه‌تا ده‌ستی به کڵاوه‌که‌ی خۆیه‌وه گرتووه، تا "با" نه‌یبات، بێگوومان ئه‌‌مه‌ش له پێناوی پاراستنی ژیانیاندایە.
ئێمه وه‌ک کوردستانپۆست هیچ گله‌یییمان لهو کەسانە نییه، چونکه له قه‌یرانێکی ئاوهادا مرۆڤ پێویسته ژیانی خۆی بپارێزێت، ئه‌گه‌ر له تواناشیدا نه‌بوو ئه‌وا ناچار ده‌بێت وڵات به‌جێبهێڵێت و ڕووبکاته ئاواره‌ییی، بەڵام لێره بەدواوە هه‌ستی که‌سایه‌تیی ڕۆشنبیر ده‌چێته قۆناغی به‌رگریکردنه‌وه له پێناوی مانه‌وەی خۆی له ژیان، لێ ژیانێکی سه‌رکه‌شانه نه‌ک ژێرده‌ستانه و ملکه‌چ. لێره‌وه مرۆڤ سه‌نگه‌ر له ده‌سته‌ڵاتدارانی وڵات ده‌گرێت، لێره‌وه هه‌سته نه‌ته‌وایه‌تییه‌کان، هه‌سته مرۆڤدۆستییه‌کان، هه‌سته دیموکراتخوازه‌کان ... هتد باڵده‌گرن. لێره‌دا که‌سایه‌تیی ڕۆشنبیر هەست بە بەرپرسیارێتی دەکات و غه‌ریبێک نییه تەنیا وه‌ک نالیی هه‌میشه بۆ وڵات بگریی، به‌ڵکوو غه‌ریبێکه بیر له وڵات ده‌کاته‌وه، بیر له کێشه‌کانی ده‌کاته‌وه هه‌تا چاره‌یه‌کی بۆ بدۆزێته‌وه، بیر لهو ده‌سته‌ڵاته ده‌کاته‌وه، که وڵاتی بە دەست ئەم دەسەڵاتە کوردییە خستۆته کۆمه‌ڵێک کارەسات و قه‌یران و هه‌وڵی له‌ناوبردنی دهدات، ئاخر بۆیه غه‌ریبێکی گرینۆک هه‌میشه غه‌ریبێکی بێبه‌رهه‌مه و هه‌میشه ئاماده‌ی خۆبه‌ده‌سته‌وه‌دانه، وەکو زۆربەی ئەو رووناکبیرانەی کە ئیستا تەسلیمی دەسەڵات بوون، لێ غه‌ریبێکی هۆشیار قه‌ت ناگریی، به‌ڵکوو تووڕه ده‌بێت، ئه‌و خۆی نادات به‌ده‌سته‌وه، به‌ڵکوو هه‌وڵی له‌ناوبردنی ده‌سته‌ڵات دهدات، ئه‌و کێویی و یاخیی بووه، نه‌ک که‌ویی به‌رده‌رگای ده‌سته‌ڵات.
ده‌سته‌ڵاتی هه‌رێمی کوردستان له میانه‌ی ته‌مه‌نی خۆیدا بێجگه له سووکایه‌تییکردن به وڵات و هه‌تککردنی هاوڵاتیی زیاتر هیچ شتێکی تری به‌رهه‌م نه‌هێناوه، بێجگه له ڕووخانی وره‌ی نه‌ته‌وه‌ییی کورد هیچ شتێکی تری نه‌کردووه، بێجگه له که‌ویی کردنی کورد له ماڵی ئێراق و داگیرکەراندا هیچ شتێکی تری به‌رهه‌م نه‌هێناوه، بێجگه له دزیینی قووتی ده‌می هاوڵاتیان، هیچ کارێکیی مرۆڤانه‌یان نه‌کردووه، بێجگه له سووکایه‌تییکردن به تاک و بە کۆمه‌ڵ، هیچ پیاوه‌تییه‌کیان نه‌کردووه.
نه ده‌وڵه‌تی نوێی ئێراق نه تورکیا، نه ئێران نه سووریا ناتوانن و ناشیانه‌وێت هه‌رێمی کوردستان بڕووخێنن، چونکه دەیانەوێت خائین و ناپاکەکانی رابەرایەتیی ئەو میللەتە بکەن، دەشزانن هه‌زاره‌ها هه‌ژاری داماوی کورد هه‌یه به‌رگریی له خاکی نیشتیمان دەکات به‌بێ به‌رانبه‌ر، ئاماده‌ن لهو پێناوه‌دا بمرن، لێ ئه‌وه‌ی ده‌سته‌ڵاتیی پارتی و یه‌کێتیی له باشووری کوردستان ده‌ڕووخێنێت هه‌ر خودی ئه‌و هه‌ژارانه‌ی کوردستانن، هه‌ر ئه‌و کۆمه‌ڵگایه‌یه، که توانای ڕووخانی ده‌سته‌ڵاتی ئه‌و دوو حیزبه‌ی هه‌یه له هه‌رێمی کوردستانی، ئینجا ئیمڕۆ بێت یان سبه‌ینێ ئه‌و ڕۆژه دێته پێشمان.
ئه‌ڵمانه‌کان ده‌ڵێن کات هه‌موو شتێک چاره‌سه‌ر ده‌کات، ئه‌و ڕۆژه‌ش دێت کێشه‌ی نێوان کۆمه‌ڵ و ده‌سته‌ڵاتی کوردیی به ڕووخانی ده‌سته‌ڵاتی سه‌وز و زه‌رد کۆتایی پێبێت. شتێک نییه له باشووری کوردستان ناوی حکومه‌تی هه‌رێمی کوردستان بێت، لێ هه‌موومان ئه‌و ده‌سته‌ڵاته به‌و ناوه‌وه بانگ ده‌که‌ین. جه‌وهه‌ری ده‌سته‌ڵاتیی حکومه‌تی کوردیی له هه‌رێمی کوردستان بریتییه له دوو ده‌سته‌ڵاتی حیزبیی و چەند بنەماڵەیەکی دیکتاتۆر و ستەمکار، چەندین بەرپرسێکی چاوپرسی و خوێڕی و داوێنپیس و دز و هیچی تر ناوی خۆیان ناو بەرپرسەکانی" یه‌کێتیی و پارتی" ئه‌مانه‌ش له‌وه‌ته‌ی هه‌ن له‌پێناوی زۆرتریین سه‌رمایه و گه‌وره‌تریین ده‌سته‌ڵاتدا شه‌ڕیانه هیچ ڕۆژێکیش ئاماده نین به تۆزقاڵ لهو داوایه‌ی خۆیان دابه‌زنه خواره‌وه، که‌واته تێکۆشانی ئه‌مان تێکۆشانه له‌پێناوی ده‌سته‌ڵات و پاره‌دا نه‌ک ئازادیی و سه‌ربه‌خۆییی خاکی کوردستان.
تاڵه‌بانیی ده‌ڵێ: هیچ سه‌رکرده‌یه‌کی ڕاسته‌قیینه‌ی کورد داوای ده‌وڵه‌تێکی سه‌ربه‌خۆی کورد ناکات، چونکه ئه‌گه‌ری هێرشی تورکیا و سووریا و ئێراق لێمان ناگه‌ڕێ، ئه‌مه ئه‌رگۆمێنت و بیانووی پیاوی ترسنۆک و نۆکه‌ره، نه‌ک سه‌رکرده‌یه‌کی شۆڕشگێر و ئازادییخواز. سه‌رکرده‌یه‌کی ڕاسته‌قیینه‌ی شۆڕشگێر ده‌بێت ئاماده‌بێت لهو پێناوه‌دا بمرێت نه‌ک ببێته نۆکه‌ری دوژمنان و دوای ده‌سته‌ڵات و سه‌رمایه بکه‌وێت. سه‌رکرده‌یه‌کی وه‌ک جه‌لال تاڵه‌بانیی و هێرۆی ژنی و ده‌وڵه‌تۆکه‌که‌شی هه‌ر ده‌بێت له‌سه‌ر ده‌ستی کۆمه‌ڵ بڕووخێت، چونکه تورکیا و ئێران و ئێراق بگره ئه‌مریکاش هه‌رگیز له به‌رژه‌وه‌ندییاندا نییه ده‌سته‌ڵاتی بارزانیی و تاڵه‌بانیی له باشووردا له‌ناوبه‌رن، تاکه دژه‌به‌رێک، که ده‌یه‌وێت ئه‌م ده‌سته‌ڵاته له‌ناوبه‌رێت کۆمه‌ڵی کورد خۆیه‌تی چونکه ئه‌م ده‌سته‌ڵاته به‌هیچ شێوه‌یه‌ک کوردستانیی نییه و له‌به‌رژه‌وه‌ندیی کورد و ئازادیی کورددا کار ناکات.
بۆ کۆتایی، دروستبوونی رێکخراوێکی سیاسیی بۆ ئەمڕۆ پێویستییەکی مێژووییە، کە جەماوەری کورد لە خۆی کۆ بکاتەوە و ئەو دەسەڵاتە کوردییە بڕوخێنێت ، دادگایی خائین و سەرە ناپاکەکانی کورد بکات، دەبێت هەموو کار بۆ ئەوە بکەین، نەهێڵین هیچ بەرپرسێکی کۆن و نوێی ئەو حیزبانە بخزێنە نێو هەر جوڵانەوەیەکی سیاسیی و جەماوەریی، چونکە ئەوانە مێژوویان تەژییە لە ناپاکی و خیانەت، هەروەها دەبێت وانە لەو ئۆپۆزیسیۆنەش وەربگرین کە بۆ ماوەی حەوت ساڵ زیاتر چەواشەی خەڵکی کوردستانیان کرد، ئەمانیش بەشێک بوون لە دەسەڵاتی پارتیی و یەکێتیی.
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
