ئەوەی لەکوردستانی باکوور ئەیبینین کەوا سەرکردەکانیان کێبڕکێیانە بەرەو زیندانەکان و بەگیانێکی(پێشەوا)ئاسا لەجیاتی میللەت ملی خۆیان ئەدەن لەداری دوژمن،ئەوانن هەرگیز نامرن و لەدڵیا ئەژین. ئەوان ئەگەرچی لەزیندانەکاندا تووند ئەکرێن کەچی کاریگەریان زۆر  زیاترە لەوەی کاتێ لەدەرەوەی ئەو کۆت و زنجیرانەن و بەپێچەوانەوە،زیندان وەك وێستگەیەکی تری خەبات وایەو درێژەدانە بە بەرخودان.

دەمیرتاش و هاوەڵەکانی ئەم جارە بەتەواوی ڕووی ئەردۆگان و ئیسلامیەکانی بۆ جیهان واڵا کرد و چی تر یەکگرتوەکان و قەراخیەکان ناتوانن پێمان بڵێن تورکیا برای کورد و موسڵمانانن. ناتوانن دوامان لێبکەن کاتەکانمان لەتورکیا بەسەر بەرین و ئەوێ چیتر ئەو بەهەشتە نیە کەوایان لێ کردبووین باوەڕمان پێکردبوون. تاڵەبانیەکان ناتوانن باوەڕمان پێبکەن کەوا تورکیا دوا ویستگەی ژیانمان بێت و لەوێ بیرەوەریەکانمان بنووسینەوە.بارزانیەکان چیتر ناتوانن داوامان لێ بکەن و قەندیل چۆڵ بکەین و لەپەرلەمانی تورکیا درێژە بەخەبات بدەین و مافی گەلەکەمان بەئاشتی وەربگرین. چیتر شڤانەکان و تاتڵسەکان ناتوانن بەدەنگەکانیان بمانخەڵەتێنن و وامان لێبکەین کەبەڕاستی لەتورکیا جل و بەرگی کوردی و زمانی کوردی گەلێ ئاساییەو چی تر بەتورکی شاخ ناوزەندمان ناکەن.

ئەو زیندانەی باکوور کوڕان و کیژانی مەرد و ئازاو چاونەترس دانیشتوانێت و لەوێوە داوای مافی مرۆڤ و داهاتویەك بۆ هەموان ئەکا.ئەو زیندانەی ئەوێ بەمەرگی خۆیان مێژووی گەلێکی ژێر دەستە ئەنووسێتەوەو سەرلەبەری مێژوو ئەخاتە بەردەم کۆمەڵی گومان و پرسیارو تێڕامان. لەوێوە دەستپێکێکی شۆڕش جارێکی تر لێ ئەداو دوژمن ئۆقرەی لێهەڵ ئەگیرێ. 

بەپێچەوانەوە ئەوڕۆ کوردستانی باشوور کراوە بەزیندانێکی گەورە بۆ گەلەکەی و سەرکردە نابەرپرسەکانی دهاتووی میلەتێکیان لەو زیندانەدا تەلبەند کردوە. ئەگەر چی میلەت بەناو ئازادە و لەدەرەوەی زیندانەکانە،لێ ژیان و چارەنووسی بەرەو تاریکایی و نەمان مل پێ ئەنرێ. سەکردە بەزۆر سەپاوەکانی باشوور چونکێ ئازا و ئازاد نێن هەریەکەو بە ڕەتڵێ جام ڕەش و بەهەزارەها تفەنگ بەشانیان بەناوی پێشمەرگە خستۆتە پاڵ خۆیان و وەك سەگ پاسیان پێ ئەکەن. ئەمان زیندانێکیان دروست کردوە کە لەدوو نهۆم پێك دێت. نهۆمی ژێرە بۆ میلەت،ئەوی دووەم بۆ خۆیان.