گەورەى هەمیشەیم:

لەم یەکدو ڕۆژەى  پێشودا فەرموتان ئەگەر دەوڵەتى کوردى لە دێیەکدا دروست ببێت ئەوا گەلى تورک چەکى دژ هەڵدەگرن ، من لە مەبەستى جەنابت تێدەگەم خۆشتان باش ئەزانن  کە منیش پیاوى دەوڵەتدارى نیم و ئەوەى بۆنى ئەوەى لێبێت بەرەنگارى بومەتەوە  , دەوڵەت بە قانون دروست ئەکرێت ئێوە بینیتان پەڕلەمانم بە چ دەردێک بردووە ، بەڵام ناکرێت منیش درۆشمێکم نە بێت بۆ هەڵخراندنى خەڵک و سۆزیان نەجوڵێنم .

منیش خزمەتێکى باشم بە گەلى تورک کردووە ، نەوتم بۆ پەنجا ساڵ فەراهەمکردووە و بەو نرخەى کە ئێوە لاتان پەسەندە ئەوا غازەکەشتان بۆ هەڕاج ئەکەم و چاوەڕێی بەرهەمى ترى ژێر زەوى بن .. شەڕى پەکەکەم بۆ کردن نیازموایە : بەهاوکارى براسوننە عەرەبەکانم لە موسڵ لە وناوچانە دەریانبکەم .. ئابڵوقەم خستۆتە سەر ڕۆژئاوا و خەنەکم دژیان لێداوە .. لە سایەو پەناى ئێوەدا  چاوم لە داعش خافڵ نەکردووە ، بێدڵییانم نەکردووە ، لە ئامێدى و سۆران باشترین خزمەتکارى هێزەکانى ئێوە م لەو ناوچانە  .

لێمببورن ئەگەر بڵێم ئەو خزمەتە بچوکانەم بەهەند وەربگرن چونکە ، ئەمجارە ئۆڤەرێکم خستۆتە بازاڕەوە سە بارەت بەدەوڵەتەکەم :   دوای کۆتایپێهێنان و بنەبڕکردنى دیاردەى جامرەشکردنى ئۆتۆمبێل یەکسەرو دەستبەجێ دەوڵەتە کوردییەکە لە قاو ئەدەم ، بۆ ئەمەش پیلانێکى تۆکمەم داڕشتووە ، بە پێى خاڵ وبەندى پیلانەکە ئەگەر جامى ڕەشى ئۆتۆمبیلەکان لانەبرا ئەوا ئەبێت ئەو کۆگاو دوکانانە دابخرێن کە لەزگەى رەش ئەفرۆشن , دڵنیابن ناهێڵم یەک کۆمپانیاى تورک زەرەرمەند بێت . 

خۆتان سیاسەتمەدارو ئەهلى دەوڵەتن .. بۆ بەد گومانن !؟ .. ئەبوایە مەبەستى منات زۆر لائاشکرابوایە .. هەمو دەوڵەتێک سیستەمێکى بەڕێوەبردنى هەیە یان کۆماریە یان پادشاییە زمان لەوە لاڵ تر بێت و بەبڕین بچێت ئەگەر وشەیەکم لەو بارەیەوە لەزار هەڵوەریبێت .. ئەوانە هیچیان نیە .

ئەوەى من ئەمەوێت دەوڵەت نیە ، دەوڵەتۆکەیە ، لە سلێمانى پێیدەڵێن جاش دەوڵەت ، تکاتان لێدەکەم و دامێنگیرتانم لێم تێبگەن ، ئەو دەوڵەتەى من لە هیچ فەرهەنگێکدا  بوونى نیە دەوڵەتۆکەیەکى بێ مەسرەفە چەند مانگ جارێک  چارەکە موچە ئەدرێت ، سنورەکانى  بۆ پێشوازى ئێوە ئاوەڵا و لە سەرپشتە  , ڕۆژى دەجار فڕۆکەى تورکیا بۆردەمان بکات ، نقەیەکى دبلۆماسیمان لێوە نایەت ، هەمو کوردستان ژێرەو ژور بێت ، بەڵام سەربازێکى تورک بە مەرگ نەگەیەنرێت ، خوا نەخواستە ئەگەر کارەساتێکى وەها قەوما پرسەنامەى بەرزانى ئامادەیە ، من هەتا ئێستا نەمهێشتووە هیچ کوردێک ژنەکەم  ببینێ کەواتە خانمى یەکەمیشمان نیە ، واتە شتێکە,  لەوانەیە و لەوانە نیە لە  ئەمارەتەکانى کەنداو بچێت . 

هەرچى پلەو پایەى دەوڵەتەکەیە بەسەر کورو کوڕەزاکانما دابەشى ئەکەم ، ئەوەشى کەمایەوە بۆ برازاکانم ئەوەى لەویش مایەوە بۆ حیزبە کوردستانیەکانن و ئەگەر لە بن کۆزەرەکەیدا شتۆکەیەک مایەوە بۆ خەڵکى بەشەرەفى کوردستان ، هەر بۆ ئەوەى کە نەڵین ئەم حکومەت و دەوڵەتە  پشت بەخەڵکى تەکنۆکرات نابە ستێت  ئێوەش لاى دۆستە ئەوروپیەکانتان ڕوگیر نەبن کە دۆستى وەکومنتان هەیە لەم نێوەدا مەجید ساڵحى گۆڕان ئەکەم بە وەزیرى ڕۆشنبیرى ، چونکە منى بەغاندى و ماندێلا شوبهاندبوو .

ئەوەى من شینى بۆ ئەکەم مەبەستمە  بڵێم خەباتى بۆ ئەکەم ، پاشەڕۆژى بنەماڵەکەمە بەهەموو کوردى نادەم و  واز لە کورسى ناهێنم ، لەوەش گرنگتر ئەگەر کارەکەم بۆ مەیسەربوو خوایکرد دڵتان نەرمبوو وە لوتفى خوا کەوتە دڵتانەوە  ئیشەکە ڕاییبوو , ئەوا مەکینەى پارە دروستکردنەکە لاى خۆمان ئەبێت ، بەگۆڕى نەمران چۆن داوابکەن بەچ ڕێژەیەک بەدڵى ئێوە ئەبێت .

 باوکم غەریقى ڕەحمەت بێت وتوویەتى قەت پشت لە توورک مەکەن ، نەک قەت پشتتان تێناکەم بەڵکو منیش ملکەچ و دەستەو نەزەرم لە ئاست مەقامى باڵاتان .. بەسەرۆک خێڵ ناوم ببەن یان لێپرسراوێک لە شیمالى عێراق ، چۆنتان لا پەسەندە ، ئیتر ئەوە سیماى ئەو دەوڵەتە یە کە جەنابتان نیگەرانن .. ونیگەرانى ناوێت ، بەهیوام  ئەو شەرەفەم پێببڕن  کە بەیاوەرى برایم تاتڵیسس و شڤان پەروەر بێمە حزورتان ، ئامان و سەد ئامان  ئەمجارە گاڵتە بە جامانە سورەکەم نەکەیت کاتەم ناسکە و کاوێژى ڕیفرنداۆم ئەکەم .

خوا بتانهێڵێت بۆگەلى تورک ولە سایەى ئێوەدا چاوەڕێى مەرحەمەتتانم

 

نۆکەرتان هەتا مردن

مەسعود مستەفا عبدالسلام

سەلاحەدین  -  سەرى ڕەش