لە  ساڵی 1936  تا 1939،  لە نزیک 50  وڵاتەوە  گەنجانی  کۆمۆنیست و مارکسی و ئانارکیستی و ئازادیخواز سەفەری شۆرشیان کرد و چووونە ئیسپانیا  لیوا سورە نێونەتەوەییەکانیان پێک هێنا،  ئێستا لە کاردانەوەی ئەو هاوکارییە جیهانییە، چەپی  ئیسپانیا بۆتە ئیلهام بۆ لیواکانی دادپەروەری و ئازادی لە جیهاندا، نموونە رازیم(دەتوانین بە پۆڵەندی)  حیزبێکی دەستە خوشکی پۆدیمۆسە  لە پۆڵەندا، ماوەی رابردوو لە کاتێک کۆنگرەیان دەبەست، لاوەکان لە سەر کورسیەکانیان دابەزیبوونە سەر زەوی  بۆ گفتوگۆ گەرموگوڕەکانیان لاقیان لەبەردەم سەرکردەکانیان راکێشابوو بە دیار لاپتۆپەکانیانەوە گرمۆڵە ببون، نموونەیەکی باڵای رۆمانسی سیاسیان نمایش دەکرد،ئەوان  قودسیەتی نموونەی باڵای سیاسیەکانیان تێک شکاند، نمونەیەکی سیاسی سادەی پڕ لە یەکسانی سیاسەتکردنیان بەرهەم هێنا، حیزبی بێ وتە بێژو سەرۆک، خەرجکردنی بودجەی حیزبەکەیان بۆ لێقەوماوان، داواکاری نابێت موچەی پەرلەمانتار لە 3 جاری لانی کەمی کرێ زیاتر بێت، بەشداری هەموو ئەندامانی حیزب لە گفتوگۆکانی کۆنگرە لە رێگای تۆڕە کۆمەڵایەتییەکان،......، هەموو ئەمانە ئیلهامەکەی لەو کۆنگرە حیزبییە گشتیانەوە هات کە لە شەقامە پان و بەرینەکانی مەدریدو بەرشەلۆنە بە بەرچاوی خەڵک و کەناڵەکانی راگەیاندنەوە  ئەنجامدران.

نازانم هیچ کوردێک بەشداری  لیوا سورەکانی ئیسپانیایان کردووە یان نا ؟، ئەو شانازییە پشکێکی بەر کورد و پێک هاتەکانی دیکەی کوردستان دەکەوێت یان نا؟، وەلێ دەکرێت ئەورۆ بەشداری لە دەستکەوتە سیاسییەکانی چەپی ئیسپانی بکەین لە بواری خۆ رێکخستنی حیزبی و دیموکراسی راستەوخۆ لە ناو حیزبە دەستە خوشکەکانی ئیسپانیا، کە نەوەی بەتالیۆنە سورەکانی دوێنێن.

لە  سەروبەندێکدا  بیرنەر ساندەرز کاندیدی سۆسیالستخوای پۆستی سەرۆک  کۆماری ئەمەریکا  داوای سنور دانان بۆ بەخششەکان و گۆڕینی سستەمی دەنگدان لە ناو حیزبی دیموکرات دەکات بەوەی  کۆتایی بە دەنگدانی دەنگدەرانی تایبەتی باڵا بێت کە ژمارەیان نزیک 500 کەسە و 25%ی  دەنگدەران پێک دەهێنن، لە کاتێکدا کەس ئەوانی هەڵنەبژاردووەو  بەشێوەی بیروکراتیانە رەوتی دەنگدانەکان یەکلا دەکەنەوە، لە لایەکی دیکەوە، ۆڵ ستریت بە بەخششە زۆرو زەبەنەکانیان هەمیشە رۆڵیان هەبووە لە دیاریکردنی کورسی سەرۆک لە وڵاتدا،  لە لایەکی دیکەوە راپرسیەکان دەریدەخەن کە 71%ی هاووڵاتیانی ئەمەریکا  پێیان وایە  نا دادپەروەری هەیە لە هەڵبژاردنی  کاندیدەکان بۆ پۆستی  سەرۆک کۆماری وڵات لە ریزی دوو پارتە دەسەڵاتدارەکەی ئەمەریکا، زۆرینە  لە گەڵ  ئەوەن کاندیدان  راستەوخۆ  هەڵبژێردرێن، نەک بەم هەموو پرۆسە بیروکراتیەدا بڕوات، بۆیە ناکرێت ئەو پرسیارە  دوبارە بکەینەوە کە سەرمایەداری و سستەمەکەی ناتوانێت دیموکراسی  بێت وەک خۆی ئیدعا دەکات، بۆ دەبێت سەرۆک هەر لەم دوو پارتەوە بە نۆرە هەڵبژێردرێت؟، ئەمە تەواوی کایەی  دیموکراسیەتی بۆرژوازییەت دەخاتە ژێر پرسیارەوە.

 لای خۆشمان ئەوانەی ئیدعایان دەکرد، تەنها دوو خول خۆیان بۆ پۆستی سەرۆک پارتەکەیان کاندید دەکەن و گوایە  داهێنانیان کردووە لە ژیانی حیزبیدا، کە لە راستیدا زۆر لە دواوەن لە دیموکراسیەتی حیزبی، دەیان ساڵە  ژیانی حیزبی ئەم تەرزەی لە دیموکراسی ناوخۆیی حیزبی بەجێ هێشتووە،  کەچی لەوەندە کەمەش پەشیمان بوونەوە، ئەنجامدانی کۆنفرانس و کۆنگرە دوای 4 ساڵ  بە دەستکەوت دەفرۆشنەوە، لە کاتێک ئەمرۆ نەک ئەندامانی کۆنگرە بگرە سەرجەم ئەندامانی پارت لە ناو بەشێک زۆر لە پارتە سیاسییەکان بەشداری هەڵبژاردنی سەرۆکی حیزبە کەن و کۆنگرەی کراوە ئەنجامە دەن،  ئەوە ئەرکی چەپەکانە  نموونەیەکی باڵاتر لە دیموکراسی ناوخۆی حیزبی و  کۆمەڵایەتی پێشکەش بکات بە مرۆڤایەتی، چونکە  تەنها ئەوانن لە گەڵ دیموکراسیەتی راستەوخۆی سیاسی و ئابوریدان و  خەبات بۆ دیموکراتیەکی راستەوخۆی کۆمەڵایەتی و سۆسیالستی دەکەن،  لەم  چوار چێوەیەدا  دەبینین چەپی ئیسپانی نموونەیەکی باڵا لە بوونی دیموکراسی راستەوخۆ لە بڕیار و  هەڵبژاردنە ناوخۆیەکان پێشکەش دەکات.

5 ساڵ  لەمەوپێش  لە  گۆڕەپانەکانی مەدرید، گەنجان رژانە سەر شەقامەکان و داوای دیموکراسیەتی راستەوخۆو  دابەشکردنی دادپەروەرانەی سەروەت و سامانیان کرد، لە شارو شارۆچکەکانیش بەرەو روی ئەو پۆلیسانە بوونەوە کە دەیانەویست هاووڵاتیانی هەژار لە خانووەکان دەربکەن بەهۆی نەدانی قستی خانووەکانیانەوە، وردە وردە لە هەناوی ئەم بزووتنەوە ناڕەزایەتییەوە بزووتنەوەیەکی سیاسی بەرفراوان لە دایک بوو .

یەکێک لەو گەنجانە لەناو ئەو لەشکرە گەنجە لە دواییدا بەرجەستە بوو ، پێشکەشکارێکی تەلەفزیۆنی لێ هاتوو و کادیرێکی قوتابی شیوعی و مامۆستای زانستە سیاسییەکانی زانکۆ،  هەموو کات بڵندگۆ بە ملیەوە، شەقامەکانی ئیسپانیای بە پێیەکانی  تەی دەکرد بۆ گەیاندنی بانگەوازەکەی، بە بێدەنگی و بە سادەیی بڵندگۆکەی   بۆ قسەکەرانی رادەگرت تا پەیامەکانی خۆیان بگەیەنن، ئیتر ئەوانە بێکارێک بونایە، یان سیاسیەکی دیار، جیاوازی ناکرد،  ئەو گەنجە روح  سوک و خۆنەویستە ناوی بابلۆ ئیغلیسیاس بوو، دوایی  3 ساڵ  بووە یەکێک لە سەرکردەو ئەکتەرە  قسە رۆیشتووەکانی  ئەو وڵاتە،ئەمرۆ سەرکردایەتی 2 حکومەتی ناوچەیی لە شارە هەرە گەورەو پڕ حەشاماتەکانی وڵاتەکەی ئەویش  مەدریدی پایتەخت و بەرشەلۆنەیە دەکات و بێ ئۆکەی ئەو حکومەتی ناوەندیش پێک نایات .

لە  کۆبونەوەیەکی  بەرفراوان، لە ژینگەیەکی شۆرشگێڕانە  پڕ حەماسیدا بە بەشداری سەرکردەی پێشووی  حیزبی شیوعی  ئیسپانی خۆلیۆ ئەنگویتە، بابلۆ ئیغلیساس هەرچەندە  حیزبەکەی 550% زیاتری دەنگەکەی  لیستەکەی ئەوانی  هێناوەتەوە، وەلێ  بە قورگی پڕ  گریانەوە بەرەو پیری دەچێت و لە باوەشی  دەگرێت، چەپڵە بە دوایدا هۆڵەکە  دەلەرێنێتەوە، چەپَڵە لێدانێک هێزێکی زیاتر لەو چرکە ساتەوە دەبەخشێتە چەپ، لە ناو ئاپورای ئەو چەپڵە رێزانەوە لیستی یەکگرتووانە دەتوانین لە دایک دەبێت.

بەڵێ لە 9ی ئایار کۆبونەوەکە کرا، هاوپەیمانی (( یەکگرتووانە دەتوانین )) پێک هات، بەسەرکردایەتی سیاسیە گەنجەکە،  کە ناوەرۆکی بەرنامەکەی لە 50 خاڵدا خۆی  دەبینێتەوە، بەرنامەکە تژییە  لە دەستەواژەی خەبات بۆ دیموکراسی کۆمەڵایەتی، کەمکردنەوەی نایەکسانی، راپرسی و مافی چارەنووس، دەوڵەتی کۆماری....، جیاوازی ئەوان لە گەڵ پارتەکانی ئێمە ئەوەیە لە کاتی کەعەک دابەشکردنی حکومەت ئەو خاڵانە بڕیارە دەن نەک قەبارەی پارچە کەعەکەکەی وەریدەگرن .

 وشەی یەکەم بۆ ناوی هاوپەیمانیەتیەکە  لە یەکێتی چەپ (شیوعی- سەوز) ەوە هاتووە، دووەمیش لە پۆدیمۆس (دەتوانین) ەوە هاتووە، ئەوەی گرنگە چۆن  یەکگرتووانە دەتوانن لە دوای 26ی یۆنی   کاریگەرتر بن لەمڕۆ و ئەگەریش نەچوونە دەسەڵاتەوە ئەوا ئۆپۆزسیۆنی سەرەکی حکومەت بن، لە وڵاتێک چواەم هێزی ئابووری ئەوروپایە، داهاتی نەتەوەیی نزیکە لە داهاتی نەتەوەیی هەموو وڵاتانی عەرەبی ، کاریگەری ئۆپۆزسیۆنی بەهێز لە زۆر حالەتی سیاسیدا بە تایبەت لە وڵاتانی ئەوروپای رۆژئاوا کاریگەرترە لە دەسەڵات، چونکە دەتوانێت پەلکێشی حکومەت بکات بۆ ملکەچی بەرنامەکەی، یان هەنگاوەکانی ئەو سڕ بکات و جوڵەی لێبخات، وەک لە ئیسپانیا کرا.

بەم یەکگرتنە لیستی یەکگرتووانە  دەتوانین بەهۆی یاسای  هەڵبژاردنەوە دەتوانێت ژمارەی کورسیەکانی ئەگەر دەنگی رابردووش بهێننەوە، 18 کورسی  زیاتر لە جاری پێشوو کە 71 کورسییە بهێننەوە لە کۆی 350 کورسی پەرلەمانی وڵات، بەهۆی یاسای نا دیمکراسی هەڵبژاردن لە ئیسپانیا لە هەڵبژاردنی رابردوو ئەو کورسیانەیان لە دەست دا.

ئەم هاوپەیمانیەتیە لە 3 پارتی نیشتمانی(پۆدیمۆس، یەکێتی چەپ"شیوعی،سەوز"،پارتیEquo کە لە ریزی پارتە سەوزەکانی ئەوروپایە )  هاوکات 10 پارتی چەپی هەرێمی بە ناوەکانی  ((  (UPeC)، (CLIAS)، (Democracia Participativa)، (PUM+J) in Madrid، (Més) ، (ZEC) ، (Batzarre) ، (IzCa) ، (IAS)  )) و 4 هاوپەیمانی هەرێمی (((En Comú Podem) in Catalonia، Compromís–Podemos–EUPV (A la valenciana)، In Tide (Podemos–En Marea–Anova–EU) in Galicia، (Ahora Alto Aragón en Común) in Huesca)) پێک هاتووە.

 لە هەڵبژاردنی دیسەمبەری 2015 ەی  رابردوودا،  جگە لە هەرێمی باسک کە متمانەی خۆی بەخشیە هێزە نەتەوەییە ناوچەییەکە،  لە هەموو ناوچە نەتەوەییەکان دیکە،  هاووڵاتیان متمانەیان بە چەپەکان دا بە کەتەلۆنیاشەوە، لیستی چەپەکان پارتی یەکەمی هەرێمەکان بوون، ئەوانیش شێلگیرانە داکۆکیان لە مافی چارەنوسی ئەو گەلانە کرد و نەیان هێشت دەنگەکانیان بە فیڕۆ بڕوات، خاڵێک کە هۆکاری ئەوە بوو حکومەتی ئیتلافی  لە گەڵ پارتی سۆسیالست پێک نەیات، رازی نەبوونی بوو بە ئەنجامدانی  راپرسی وەک هەنگاو بەرەو بە پراتیک  کردنی مافی چارەی خۆنوسین لەو هەرێمانە.بۆرجوازی ئیسپانی دەتران پەتای کەتەلۆنیای  هەرێمەکانی  دیکەش بگرێتەوە.

لە  هەڵبژاردنی مانگی دیسەمبەری 2015ەدا ، پارتی گەلی دەسەڵاتداری راستگەرا 7،236،965 دەنگ،  کە دەیکردە 28،71%ی دەنگەکان و 123 کورسی هێنایەوە، پارتی سۆسیالستی کرێکاری 5،545،315 دەنگ، کە دەیکردە 22،00%ی دەنگەکان و  90 کورسی هێنایەوە، پۆدیمۆس 5،212،711 دەنگ، کە دەیکردە 20،68%ی دەنگەکان و 69 کورسی هێنایەوە، لیستی یەکێتی چەپ 926،783 دەنگ و 3،68%ی دەنگەکان و 2 کورسی هێنایەوە، (Més) 33،877 دەنگ و 0،13%ی دەنگەکان و هیچ کورسی هێنایەوە  ... .

 پۆدیمۆس و بەرەی چەپ و ماس خۆیان لە ریزی لیستی یەکگرتوانە  دەتوانینن، لەناو هێزە چەپە جدییەکان  تەنها پارتی کۆمۆنیستی گەلی ئیسپانی بەشدار نیە لە لیستەکە، کە لە هەڵبژاردنی رابردوودا  31179 دەنگ و 0،12%ی دەنگەکان و  هیچ کورسی هێناوەتەوە، دابڕانی لە لیستی هاوبەشی چەپەکان وێڕای کەمی دەنگەکانی وەلێ گرنگی مەعنەوی هەیە،  بەمەش لەم هەڵبژاردنەدا لیستەکە ناتوانێت کەڵک لە وزەی کادیر و هەڵسوڕاوانی و دەنگەکانی ببینێت، ئەمە وێڕای لە لای گروپێک پرسیار لەسەر رەوایەتی لیستەکە دروست دەکات وەک نوێنەرایەتی سەرجەم چەپی ئیسپانی .

لە هەڵبژاردنی رابردوو جگە لە دەنگی ئەو لایەنە هەرێمیانەی بەشداری کەمپەینی هەڵبژاردنی لایەنە بەشداربووەکانی پێکهێنەرەکانی لیستەکەیان کردبوو ، لیستەکە 6،173،371 دەنگی هێنابوەوە، واتا دووەم لیستی براوەی هەڵبژاردنەکە بوون، کە 1063594 دەنگ کەمتر لە لیستی پارتی گەلی دەسەڵاتداری راستگەرای هێناوەتەوە، وە 628056 دەنگ زیاتری لە براوەی دووەم کە پارتی سۆسیالستی کرێکارییەی هێناوەتەوە.

ئەم یەکگرتنە وێڕای ئەوەی چەپی ریشەیی دەکاتە هێزی دووەمی وڵات هاوکات هیوایەکی زیاتر دەدات بە چەپی جدی رۆڵی کاریگەرانەتر ببینێت و شوێن بە چەپی ناوەندی سازشکار (سۆسیالست) چۆڵ بکات لە نەخشەی سیاسی وڵات، هاوکات وەک ئیدعای سەرۆکایەتی چەپیش رەوایەتی  بۆ سۆسیالست نامێنێتەوە، بەڵکە لە دوای 26ی یۆنییەوە ئیتر سەرۆکایەتی چەپ بۆ یەکەمجار لیستی یەکگرتوانە  دەتوانین دەیکات لە ئیسپانیا .

هەردوو لایەنی سەرەکی پێکهێنەری لیستی یەکگرتوانە دەتوانین، پێش ئەنجامدانی هاوپەیمانیەتیەکە راپرسی گشتیان لە ریزی لایەنەکەی خۆیان ئەنجامداوە، بۆ ئەوەی سەرجەم ئەندامان بەشداری لە بڕیارەکان بکەن، ئەوان نەک تەنها بۆ ئەم هاوپەیمانیەتیە بەڵکە بۆ هەموو بڕیارە گرنگەکانی خۆیان، ئەوەی پەیوەست بە هەڵبژاردن و حوکمڕانی و هاوپەیمانییەوە هەیە،  تەنانەت بۆ پەسەند کردنی  بەرنامەی هەڵبژاردن و سەرجەم بڕیارو کاروبارە گەورەکان دەگەڕێنەوە بۆ راوەرگرتنی سەرجەم ئەندامان لە رێگای راپرسی گشتییەوە کە سەرجەم ئەندامان تێیدا بەشدار دەبن .

لیستی چەپی  یەکگرتوو، بۆ ئەنجامدانی هاوپەیمانی  لە گەڵ پۆدیمۆس، 20 هەزار ئەندامی  لە کۆی 71578 ئەندامی بەرەکە بەشداری دەنگدانەکەیان کرد، لە ئاکامدا  84،5%ی دەنگدەران دەنگیان بۆ هاوپەیمانیەتیەکە دا لە گەڵ پۆدیمۆس، 13،1% ەش دژ و 2،4%یش دەنگیان بە سپی دا.

ئەوەی شایانی باسە لە  هەڵبژاردنی  پێشووشدا، لیستی چەپی یەکگرتوو پێشنیاری هاوپەیمانیەتی کرد  لە گەڵ پۆدیمۆس، وەلێ ئەوان رەتیان کردەوە، تەنها لە هەندێک هەرێم وەک کەتەلۆنیاو گالیکا لیستی هاوبەشیان دروست کرد .

ئەلبەرتۆ غارسۆن وتە بێژی چەپی یەکگرتوو رایگەیاند ئێمە هەمیشە لە گەڵ لیستێکی چەپی  یەکگرتووین  لەسەر ئاستی نیشتمانی، لە هەڵبژاردنی پێشوو  حیزبی شیوعی داوای لیستی بەرەی گەلی یەکگرتووی کرد لە سەر ئاستی نیشتمانی، نەک تەنها دوو هەرێمی کەتەلۆنیا و غالیکیا، کە بە هۆی نەبوونی ئەو بەرەیەوە 18 کورسیان لە دەستدا. 

هەرچی پۆدیمۆسە، لە 14 بۆ 16ی نیسان راپرسی لە ریزی  ئەندامانیدا ئەنجامدا، کە 149513 ئەندام تیایدا بەشدار بوون لە کۆی 393538  ئەندام(لە ئێستادا 426927 ئەندامی هەیە) کە دەیکردە 37%ی کۆی ئەندامان،91،79%ی دەنگدەران پشتیوانیان لە پێک هێنانی حکومەتی گۆڕانکاری کرد لە گەڵ لیستی چەپی یەکگرتوو.

هاوکات88،23%ی ئەندامانی بەشدار بوو لە راپرسییەکە دژ  بە پشتیوانیکردنی حیزب بوون لە حکومەتی هاوپەیمانی سۆسیالست و سیدانۆسی راستگەرا.

ئەوەی شایانی باسە، لیستێکی 25 کەسی، کاندیدانی لیستی یەکگرتووانە دەتوانین دیاری دەکات، دواتر جارێکی دیکە لە راپرسی گشتیدا، بەرنامەی هەڵبژاردن و کاندیدەکان دەنگیان لەسەر دەدرێتەوە، وە هەموو کاندیدەکان لە ناوچەکانی خۆیان بە راپرسی ئەندامانی حیزبەکان دیاریدەکرێن.

ئەم تەرزە لە مومارەسەی  راستەوخۆی دیموکراسی ، تەنانەت لە ژیانی حیزبیش رەنگەداتەوە، بابلۆ ئیلیغساس لە 18 و 19 ی ئۆکتۆبەری 2014، بە دەنگدانی 55 هەزار ئەندام لە کۆی 100هەزار ئەندامی ئەوکاتی پۆدیمۆس لیستەکەی بە هێنانی 88،6%ی دەنگەکان بردیەوەو بووە کەسی  یەکەمی پارتەکەی .

لایەنێکی دیکە لە چەپی ئیسپانیا کە شایانی هەڵوێستە لەسەر کردنە،  لیستی یەکێتی گەلە لە کەتەلۆنیا ( Popular Unity Candidacy-cup ) کە لە ساڵی 1986 دامەزراوە، تەنها بەشداری هەڵبژاردنی  هەرێمی کەتەلۆنیا دەکات، لە هەڵبژاردنی ئیسپانیا بەهۆی باوەر بوونی بە سەربەخۆیی کەتەلۆنیاوە بەشداری ناکات،  ئەمانیش لە کۆبونەوەی  گشتی بڕیارەکانی خۆی دەدات، لە هەڵبژاردنی کەتەلۆنیا لە ساڵی 2012، بە بەشداری 650 ئەندام کۆبونەوەی گشتی ئەنجامدرا لە هەوایەکی ئازاددا ، بە رێژەی 77% بڕیاری دا بەشداری هەڵبژاردنەکە بکات.

لە 27ی دیسەمبەری 2015 دوا کات بوو بۆ پێک هێنانی حکومەتی کەتەلۆنی، هەفتەی پێشوتر لە  دەنگدانێکی گشتیدا، 1515 بە 1515 کوب نەیتوانی بڕیاری یەکلا کەرەوە بدات بۆ بەشداری یان پشتیوانی لە حکومەتی کەتەلۆنی بە سەرۆکایەتی سەرەک وەزیرانی  راستگەرای پێشوویکەتەلۆنیا  ئەرتۆر ماس،بەهۆی پەیڕەوکردنی سیاسەتی تەقەشوفی ئابورییەوە لە کابینەی پێشوو لە هەرێمی کەتەلۆنیا، بۆیە خەریک بوو دوبارە لە هەرێمەکە هەڵبژاردن بکرێتەوە، وەلێ لە دوا کاتدا ،بە جیاوازی دەنگێک بڕیاری پشتیوانی لە حکومەتی دا بە مەرجی گۆڕینی سەرۆک وەزیران و پشتیوانی کۆمەڵایەتی لە دەستەنگانی کەتەلۆنیا، بۆیە  لە 4 یەنایەر ماس گۆڕا بۆ ئەتۆنیۆ بانۆس ، ئەوجا  کوب دەنگی دا بە کابینەکە، لیستی پێکەوە لە پێناو بەڵێ 62 کورسی لە کۆی 135 کورسی لە پەرلەمانی هەرێمەکەی هێنابوەوە ، کە لە هاوپەیمانی چەپ و راستی نەتەوەیی کەتەلۆنی پێک دەهات، بێ بەشداری کوب نایتوانی حکومەتی هەرێمی پێک بهێنێت، کوب 10 کورسی هێنایەوە لە هەڵبژاردنی 26ی ئۆکتۆبەری 2015 ەدا ، رۆڵی مەلیکی  دەگێڕا لە یەکلاکردنەوەی پارسەنگی هێزەکان .

واتا کوب پشتیوانی لە حکومەتی کەتەلۆنی بەستەوە بە بەرنامە ئابوری و کۆمەڵایەتییەکانەوە، نەک پشتیوانییەکی کوێرانە  لە پرسە نەتەوەییەکان .

لە کۆی ئەوەی لێرەدا باسمان کردن لە ئەزموونی چەپی ئیسپانیاوە، دەشێت  کۆمەڵێک ئەزمون هەڵێنجین ببێتە رێنیشاندەر  بۆ چەپەکانی کوردستان، چەپی کوردستان پێویستە ئەزموونی چەپی جیهان بە بەشێک لە ئەزموونی خۆیان و دەستکەوت و پێشکەوتنەکانیان لە گۆڕەپانی تێکۆشان و ژیانی حیزبیدا بە دەستکەوتی خۆیان بزانن و خاوەندارێتی لێ بکەن، وەک چۆن قوتابخانە جیاجیاکانی بۆرجوازی کوردی دەیکەن.

1- گرنگە  چەپەکان لە لیستێکی بەرفراواندا کۆببنەوە، بۆ ئەمەش راپرسی لە ریزی ئەنداماندا بکرێت .

2- دەکرێت چەپەکان دەستپێشخەر بن لە دیموکراسی حیزبی، کاتی دیاریکردنی سکرتێر لە رێگای چەند ئەندامێکی کۆمیتەی ناوەندیەوە نەماوە.

3- بڕیارە گرنگەکانی حیزب دەکرێت لە رێگای راپرسی سەرجەم ئەندامانەوە بدرێت، نەک نوخبەیەکی بچوکی سەرکردایەتیەوە، بۆ ئەمەش بۆ بڕیارەکان بگەڕێنەوە بۆ راپرسی سەرجەم ئەندامان.

4- چەپەکان دەکرێت داکۆکیکەی سەرسەختی کەمایەتییە نەتەوەیی و ئاینییەکان بن لە کوردستان وەک هەمیشە وابووونە، لە کاتی هەڵبژاردن لیستی چەپی تایبەتیان بۆ پێک بهێنن.

5- پێویستە پشتیوانی لە حکومەتی سەربەخۆی کوردستان پەیوەست بێت بە سیاسەتی حکومەتەکەوە، بەرامبەر بە دیموکراسی و مافی مرۆڤ و مافی هەژاران.

6- چەپ ململانێی بۆرجوازی کوردستان لە سەرجەم هەڵبژاردنەکان بۆ هەموو پۆستەکان بکات، ئەلتەرناتیفی بۆ هەموو گوتار و کارەکانی هەبێت.

7- چەپەکان هێزی شێلگیری داکۆکی لە کوردستانێکی دیموکراتی کۆمەڵایەتی بن، کوێرانە نەکەونە  دوای وتارە نەتەوەییە بۆرجوازییەکان.

8- چەپەکان کار بۆ دیموکراسیەتی راستەوخۆی کۆمەڵایەتی سۆسیالستی بکەن بۆ ئایندەی کوردستان.