ئەگەر نرخى نەوت هەروا بەو نزمیە بمێنێتەوە کە لە دەورو بەرى 35 دۆلاردایە ئەوا نەوتى هەرێمى کوردستان تەنانەت بەشى پشکى کۆمپانیاکانیش ناکات !

وەک ئەحمەدى حاجى ڕەشید بڕیار دەرى لیژنەى دارایى لە پەرلەمانى عێراق لە تۆڕى کۆمەڵایەتى فەیس بوک نوسیویەتى ، ئەگەر نرخى بەرمیلى نەوتى برێند 36 دۆلار بێت ، ئەوا نرخى نەوتى عێراق نزیکەى 29 دلار دەکات ، وە تێچوى هەر بەرمیلێکیش بۆ کۆمپانیاکان نزیکەى 20 دۆلار بێت ئەوا وەک بەرێزیان وتیان عێراق بۆهەر بەرمیلێک نەوتى فرۆشراو تەنها 9 دۆلارى بۆ دەمێنێتەوە، خەرمان بەرەکەت.

      ئینجا بابێینە سەر داهاتى ئەو نەوتەى لەسایەى سەرۆکەکانمانەوە لە کۆن و ئێستاشدا بووە بە نەفرەت بۆ کورد، ئەگەر بەرمیلى نەوتى عێراق 29 دۆلار بکات ، بێگومان نرخى نەوتى هەرێم بەوتەى بەرپرسان خۆیان 10 دۆلار کەمتر دەکات ، ئەویش بە بەهانەى ئەوەى کە ئێمە وڵاتى سەربەخۆ نیین و هەرێمین، ئێ باشە 29 دۆلار 10 دۆلاریشى لێدەرکەیت ئەوە تەنها 19 دۆلار دەمێنێتەوە ، وەک لەسەرەتاوە وتمان تێچوى هەر بەرمیلێکیش بۆ کۆمپانیاکانى دەرهێنان و گواستنەوە 20 دۆلار لەسەریان دەکەوێت ، ئەگەر بەو حسابەبێت هەرێمى کوردستان بۆهەر بەرمیلێک نزیکەى 1 دۆلار قەرزارى کۆمپانیاکان دەبێت! لە هەمانکاتدا بەغدا بەنیازە وەک ساڵان پێشوو  پشکى هەرێم بە کەموکوڕى ناتەواوى بنێرێت و لەم کەین و بەینەشدا دەرکەوتوە کە حکومەتى هەرێم نزیکەى 20 ملیار دۆلار قەرزارە ، وەک بەرپرسان خۆیان دەڵێن حکومەت بەتەماى قەرزى زیاتریشە لە دەرەوە.

ئیتر لەو شتەى کە ناوى نەوتى هەرێمى کوردستان و بودجەى بەغدا و قەرزەکانى لاى حکومەتیشە ئاو بێنە و دەست بشۆ، بێگومان قەرزەکانى دەرەوەش ساڵانە ئەگەر لەکاتى خۆیدا نەدرایەوە ئەوا سووى دەچێتە سەر و زیادەکات.

ئەوە با ڕەوشى نەخوازراوى ناوخۆمان لەو لاوە بوەستێت ، کەهیچ کام لە لایەنەکان دانویان بەیەکەوە ناکوڵێت و حکومەت و پەرلەمانیش لەکار کەوتوون.

ئیتر کێ دەتوانێت تروسکاییەک هیوا و ئومێد بەم گەلە بەدبەخت و بەش مەینەتە بدات؟