دۆخی نەخوازراو و چاوەڕوانکراوی هەرێمی کوردستان، دەربڕینی نارەزایەتی دەربارەی هەر چەشنە گرفتێکی کۆمەڵایەتی بێت بێ گومان مافی کۆمەڵانی خەڵکی ئەم بەشەی کوردستانە لە هەمبەر چۆنییەتی بەرەو پێش چوونی هەر چی باشتری ئاستی بژیوی ژیانیان، دیارە بۆ ئەم مەبەستەش ئەم بەشە لە نیشتمانی کوردان کەم ئازار و مەینەتی و چەرمەسەری لە نەهامەتییەکانی ژیانیان نەچێژاوە، ئایا باکگراوەندی ئەم نارەزایەتییە، خەباتی دەیان و سەدان ساڵەی تێکۆشەرانی بزووتنەوەی رزگاریخوازی ئەم بەشەی کوردستانە؟ یاخۆ دوور کەوتنەوە لە پرەنسیبە سیاسی و ئەخلاقییەکان هۆکاری بە دی هێنانی ئەم دۆخە نەخوازراو و چاوەڕوانکراوەن؟

بە بڕوای من لەم دۆخەی ئێستای هەرێمی کوردستاندا باوەرمەند نەبوون بە رای کۆمەڵانی خەڵکی ئەم بەشە لە نیشتمان هەڵەیەکی کوشەندییە کە بێ گومان ئەو حیزب و لایەنانەی پێداگری لە سەر هزری دواکەوتوویی دەکەن هۆکاری سەرەکی دەبن بۆ لە ناوبردنی هێما پیرۆزەکان، وەک نموونە ، یەکێک لە هێما پیرۆزەکانی  نە تەنیا ئەم بەشە لە کوردستان  بەڵکوو سەرجەم بەشەکانی دیکەی کوردستانیش ناوی پیرۆزی پێشمەرگەیە، لەم دۆخەی ئێستای هەرێمی کوردستاندا ئەو ناوە پیرۆزە واتە پێشمەرگە بووتە جەلاد و عەسکەری بەعس و  گەنج و لاوی ئەم بەشە لە نیشتمان ئەکوژێت لە پێناو ئامانج و دەسکەوتی حیزبیدا.( هیچ تەحلیلێکی سیاسی هەڵناگرێت ئەم واقعە)

ئیتر ئێمەی کورد بە چ زمانێک و چ گوتارێک بتوانین کۆمەڵگای نێونەتەوەیی و جیهانی تێبگەیەنین کە  ترک و عەرەب و فارس هەوڵی تواندنەوەمان ئەدەن و لە هەمبەر هەر نارەزایەتییەکی کۆمەڵایەتی ئامان کوژن و بە پەتی سێدارە و ریزی فیشەکمان ئەسپێرن، ئایا بزووتنەوەی کورد کە خوازیاری رزگاری و دابینکردنی عەدالەتی کۆمەڵایەتی بوو، دوورە لەم کردەوانە؟، لە قەوسێکدا( بەرەو کام ئاراستە هەنگاو ئەنێن ئایا هەموو درووشمە ئینسانییەکان بوون بە قوربانی چەند بۆرییە نەوتێک و گوردرا بەرەو پێشێلکردنی مافی کۆمەڵانی خەڵکی بەش مەینەتی ئەم وڵاتە و کورسی دەسەلات بوو بە ئامانج)، گەورەترین سەرمایەی هەر نەتەوەیەک گەنج و لاوەکانییەتی، بەداخەوە گەنج و لاوی ئەم بەشە لە نیشتمان ،زێدی خۆیان پۆل پۆل جێدەهێڵن،  ئەوانەو دەیان و بگرە سەدان گلەیی و گازەندی تر، دیسانەوەش ئاواتەخوازی یەکریزیتانین، هیواخوازی سەرفەرازی و تۆمارکردنی شانازی نەتەوەییتانین، ئاواتمانە بە یەکەوە هەڵکەن و ریزەکانی خۆتان یەکخەن لە پێناو ئامانجە نەتەوەییەکانی ئەم بەشەی کوردستان، دیارە دەیان و بگرە زیاتریش تیز  وتێۆری سیاسی هەیە کە بتواندرێت لە گوتار و نوسراوەکاندا باسی لێوە بکرێت و بگونجێندرێت، مخابن دۆخی ئیستای هەرێم و توانایی سیاسی لایەنە سیاسییەکانی ئەم هەرێمە پێویستی بە کاتی زیاتر هەیە کە بە بلوغی سیاسی بگات و دەرک بەو واقعە بکات خەمی تاک و لایەنە سیاسییەکانی رۆژهەڵاتی کوردستان خەمی هەموو بەشەکانی کوردستانە و فیداکاری و شەهیدەکانی رۆژهەلاتی کوردستان لە هەموو بەشەکانی کوردستان سەلمێنەری ئەو راستییەن.

بزووتنەوی رۆژهەڵاتی کوردستان لە پشوویەکی درێژخایەندا دەرفەت و مەجالی باشی هەبوو بۆ ئەوەی بتوانێت پلانێکی تۆکمەدابڕێژێت سەبارەت بە چۆنییەتی و بەرەو پێش چوونی خەبات و تێکۆشانی خۆی لەو بەشی کوردستان،  پرۆژەیەکی مۆدێڕن و تێئۆرییە نوێیەکانی جولانەوەی رزگاریخوازی نەتەوەیی و مافەسەرەتاییەکان دەیانتوانی بە هەست کردنی ئاستی وشیاری و تیگەیشتنی کۆمەڵانی خەڵکی ئەو بەشە لە نیشتمان و تواناییەکانیان کە بێ گومان لە ئاستێکی بەرزدایە لە رۆژهەلاتی کوردستان و  بە کارهێنانیان لە پێناو مافە رەواکاندا گۆرانکاری جیاواز و جۆراوجۆر بە خۆیەوە ببینێت و خۆی لە ناو خەڵکی کورستان و خەڵکی کوردستان لە ناو خۆیدا ببینێتەوە، بەڵام مخابن دوور کەوتنەوە لە ئەسڵی خەبات واتە ویست و خواستی کۆمەڵانی خەڵک و، پشت بەستن و تێکەلاو بوون بە لایەنی جۆراوجۆر کە ئاکامەکەی لێکدابڕان و لێکترازانی لایەنە سیاسییەکان بوو،بزووتنەوەی رۆژهەڵاتی کوردستانی بەرەو قەیران بردوو بە هۆکارگەلێکی  دیار و نادیار خۆی لە ئەسڵ و ئەرکی خۆی دوور خستەوە و پاراستنی دەسکەوتەکانی باشووری کوردستان و پاریزگاری کردن لەو دەسکەوتانە یەکێک لە بیانووەکانی بزووتنەوەی رۆژهەڵاتی کوردستان بوو کە تا ئیستاش هیچ کاریگەری و دەسکەوتێکی بۆ بزووتنەوەی رۆژهەڵاتی کوردستان تیدا بە دی ناکرێت.

لەم چەند دەیەیەدا کە سەرکردایەتی بزووتنەوەی رۆژهەڵات سیاسەتی چاوەڕوانی و بیانووی پاراستنی دەسکەوتەکانی باشووری کوردستانی کردووەتە هەوێنی کاری سیاسی خۆی ئیتر ناتواندرێت حاشا لە راستییەکان بکرێت، نارەزایەتی و ویست و خواستی کۆمەڵانی خەڵکی باشوور باس لە شتی دیکە ئەکەن، کاتێک سەرکردایەتی و لایەنە سیاسییەکانی باشوور خۆیان ئەرزش و نرخی دەسکەوتەکانی خۆیان نازانن و ئامادەن لە پێناو دەسکەوتی حیزبیدا بیخەنە مەترسییەوە ئایا ئەرکی ئێمە وەک بزووتنەوەی رۆژهەڵات بۆ پاراستنی دەسکەوتەکانی باشووری کوردستا کۆتایی پێنایەت؟ ئایا پێویست ناکات بگەرێنەوە بۆ سەر ئەسڵ و خەت و مەشی سیاسی خۆمان و ئەرکەکانمان؟  ئایا ئەم دۆخەی باشووری کوردستان ناتوانێت هەوێنی عەقلییەتێکی خەباتی راستەقینە بێت لە رۆژهەڵاتی کوردستان.

لە کۆتاییدا  تێکنۆلۆژی و کۆشک و تەلاری هیچ وڵاتێک خزمەت بە بزووتنەوە و  گەنج و لاوی ولاتەکەی من ناکات کە پۆل پۆل وڵات و ئۆردووگاکانی بۆ چۆڵ ئەکەن و هەندەران و ئاوارەیی بە باشتر ئەزانن لە هەوڵ و تێکۆشان بۆ ئاوەدانی و سەرکەوتنی بزووتنەوەی رزگاریخواری نەتەوەیی، کە هیوادارم لایەنە سیاسییەکانی کوردستان بە تایبەتی رۆژهەڵاتی کوردستان خوێندنەوەیەکی جیاواز و تایبەت بکات لە هەمبەر یەک ریزی و تەبایی و کۆتایی بەو لیکدابرانانە بهێنن و بە یەک ریز و تەبایی وەرە و  ئاواتەکانی کۆمەڵانی خەڵکی کوردستان بهێنە دی و تیکەلاو بە ویست و خواستی کۆمەڵانی خەڵک بن، بریار و پاڵپشتی هەر وڵات و بزووتنەوەیەک کۆمەلانی خەڵکن ئەمە ئەسڵی خەباتە چ سیاسی بێت چ کۆمەڵایەتی یا خۆ رزگاری.