Friday, 25/09/2015, 4:26
تورکیا، لە پێش کۆتایی ساڵانی هەشتاکانی سەدەی رابردودا، سیاسەتە دەرکییەکانی خۆی لەگەڵ زلهێزەکاندا، دەوڵەتەکانی ناوچەوکەو وڵاتانی هاوسێیدا، لەسەر بیناغەی خۆپاراستن، خۆ دورگرتن، پاڵدان بەلایەنێک، پشتگوێخستن، خۆدزینەوە لە بوونی گرفتی نێوان وڵاتەکانی ناوچەکە، کێشەی کەمە نەتەوەکاندا دارشتبوو.
ئەزمونی ناوچەکە،سەلماندویەتی کە تورکیا سیاسەتی " دەست بە کڵاوی خۆتەوە بگرە با با نەیبات"ی پەیرەو دەکرد. بە درێژایی هەشت ساڵی جەنگی نێوان عیراق و ئێراندا، تورکیا بێ لایەن و دەستەوەستان سەیری ئەو جەنگەی کرد. لە کێشەی نێوان ئیسرائیل و سوریادا بەهەمان شێوە. گرفتی نێوان فەلەستین و ئیسرائیل. کێشەی سونەو شیعە. شەری ئەفغانستان. کێشەی ئیخوان لە میسر. گەشەکردنی کێشە ناوەخۆیەکانی عیراق. هەڵکشانی ناتەباییەکانی نێوان کوێت و سەدام، تا گەیشتە رادەییەک کە سەدام سنوری بەزاندو چووە نێو کوێتەوە، تورکیا هەر گوێێ خۆی لێخەواند. تاکۆتایی ساڵی هەشتاکان نزیکترین هاورێێ ئیسرائیل بوو، سودمەندترین وڵات بووە لە ناوچەکە لەو پەیوەندییەدا. گوێی رایەڵێکی باشی ئەمریکا بووە. تورکیا هەموو کاتێک لە ناوچەکەدا بەوە ناسراو بوو کە نزیکترین هاورێی ئەمریکاو ئیسرائیل بووە.
سیاسەتیی دەرکی تورکیا لە سەرەتای نەوەتەکاندا
لە کۆتایی ساڵی هەشتاکان و سەرەتایی نەوەتەکانی سەدەی رابردودا، جۆری مامەڵەکردنی تورکیا لەگەڵ رووداوەکانی رۆژهەڵاتی ناوەراستتدا گۆڕا، لە ئۆگۆستی ساڵی ١٩٩٠دا، کاتێک سەدام لە کتو پڕێکدا سنوری بەزاند و چووە ناو کوێتەوە، کە ئەمریکا بڕیاریدا بەشدار بێت لە جەنگی کەنداو، تورکیا بەبێ گوێدانە رای دەوڵەتانی عەرەب و موسڵمان، بەبێ یەک و دوو کردن، بڕیاریدا کۆسپ نەخاتە بەردەمی ئەمریکا لە بەکارهێنانی بنکەی ئینچرەلینک بۆ ئەنجامدانی هێرشە سەربازییەکانی ئەمریکا لەو شەرەدا.
لە دوو دەیەیی رابردودا، سیاسەت و ستراتیژییەتی پەیوەندییە دەرکییەکانی تورکیایی دژە کوردو مرۆڤاییەتی، لەگەڵ دونیا و دەوڵەتانی ئیقلیم، بەزەقی تێبێنی دەکریت کە ئاراستتەیەکی تری وەرگرتووە. لە ئاراستەی خۆپاراستن، پاڵدان بە لایەنێک، خۆدورگرتن، پشتگوێخستن گۆڕاوە بۆ هێرش کردن، خۆ تێهەڵقوڵتانددن لە کاروباری ناوەخۆی وڵاتانی دراوسێێ، چوونە هاڤرکێ و ڕکابەری کردن لەگەڵ سعودیە، ئیران، ئیسرائیل، بە مەبەستی بوون بە پۆلیس، چاودێر، سەرۆک و دەم ڕاست لە ناوچەی رۆژهەڵاتی ناوەراستدا.
گومان لەوەدا نییە، کە گۆڕینی ئاراستەیی سیاسەتیی دەرەکیی تورکیا، پەیوەستە بە گۆڕانی بارودۆخی ئەو وڵاتە و وڵاتانی درواسێی لە هەموو رویەکەوە بە تایبەتی لەروی ئابورییەوە. لە نێوان ساڵی ٢٠٠٩-٢٠١٠دا جیهان توشی داشکانێکی ئابوریی هات، بێگومان کاردانەوەی هەبوو لەسەر باری ئابوریی تورکیاش، بەڵام لەگەڵ ئەوەشدا لەو ساڵانەی دواییدا گەشەکردنی ئابوریی تورکیا بە زەقی تێبینی دەکرێت.
نەبوونی ئاساییش، شەری مەدنی لە سوریا، عیراق و بە گشتی لە رۆژهەڵاتی ناوەراستدا، کاردانەوەی هەبوو لەسەر زیاتر فرۆشتنی کاڵاو بەروبومی تورکی لە ناوچەکەدا. زۆررێک لە چاودێرانی سیاسیی و ئابوریی ناسان لەسەر ئاستی دنیادا، پێیان وایە یەکێک لە هۆکارە هەرەگرنگەکانی ئەو گەشەکردنە ئابورییە، دەگەرێتەوە بۆ ئەوەی کە تورکیا توانی لە رادە بەدەر سودمەند ببێت لە سەرچاوە سروشتیەکانی باشوری کوردستان بە تایبەتی لە نەوتەکەی. باشوری کوردستان بوو بە بازارێکی کارا بۆ ساغکردنەوەی هەموو جۆرە کاڵایەک و بەروبومێکی تورکیی.
دەتوانرێت بگوترێت بەبەراورد کردن لە نێوان تورکیاو ئەمریکادا، تورکیا زیاتر سودمەند بووە لە دەرامەتی باشوری وڵات، بەهۆی ئەوەی تورکیا بە پێچەوانەی ئەمریکا، بەبێ هیچ ماندووبونێک، بەبێ بەکارهێنانی سوپایی تورک، بەبێ بەکوشتدانی جەندرمەیەک، بەبێ خەرجیەک، بەبێ سەپانددنی هیچ مەرجێکی کورد، بەبێ خاوکردنەوەی سیاسەتە دوژمنایەتییەکەی بەرامبەر بە کورد و دۆزەکەی، دەرگای باشوری وڵاتی بۆ ئاواڵاکرا، بوو بە بڕیاردەر، قسە رۆیشتو لە باشوردا، لە سایەیی هەڵە ئاراستەکردنی سیاسەتیی دەرەکیی حکومەتی بنکە فرەوانی هەرێم. گومانی تێدا نییە کە بەهێزبوونی ئاستی ئابوریی بەهێزبوونی زیاتری سوپایی ئەو وڵاتەشی بەدواوە بووە.
ئەندامییەتی تورکیا لە ناتۆدا، پشتیوانی ئەوروپا، پەیوەندیی نزیکی ئەو وڵاتە لەگەڵ ئەمریکادا، بوونی شەری سارد لە نێوان رووسیاو ئەمریکادا، تێکچوونی بارودۆخی ئابوریی، سیاسیی لە رۆژهەڵاتی ناوەراستتدا، گەشەکردنی گرفت و ناکۆکییەکانی دونیایی عەرەبی، وڵاتانی موسڵمانی وەکو عیراق، سوریا، ئەفغنستان، میسر، لیبیا، یەمەن، گەشەکردنی کێشەی دینی و مەزهەبی نێو گەلانی رۆژهەڵاتی ناوەراست، لەدەرئەنجامدا ئەم هۆکارانە بوونەتە مایەیی ئەوەی کە تورکیا ئاستی سیاسیی، کۆمەڵاییەتی، رۆشەنبیریی ئابوریی سەربازیی خۆی بەبەراورد کردن لەگەڵ دەوڵەتەکانی ناوچەکەدا بەرزتر ببینێت، توشی لە خۆبایی بوون ببێت، خۆی لە ئاستی وڵاتە پێشکەوتوەکانی ئەوروپادا هەژمار بکات، نەک لە ئاست وڵاتانی رۆژهەڵاتی ناوراستدا، بەتایبەتی لەگەڵ ئەو میللەتانەی کە هێشتا لە قۆناغی رزگاری نیشتمانیدان، وەکو میللەتی کورد و دەچنە خانەی میللەتانی دونیایی سێیەم.
داڕشتنی ستراتیژیەتی نوێ
تورکیایی ئیمرۆ، خوازیارە ئیمپراتۆریەتی عوسمانی لە فۆرمێکی تردا بژێنێتەوە، ئەگەر جاران بۆی لوابێت بەهۆی ئەوەی کە حاکمی یەکەم بووە لە ناوچەکەدا، بە رێگەی راستەوخۆ، باج و سەرانەی وەرگرتبێت، سودمەند بووبێت لە سامانە سروشتییەکانی نەتەوەو وڵاتانی ژێر دەستی خۆی، بەفەرمی و شەرعی سوپا و جەندەرمەی بەکارهێنابێت بۆ زەلیل و بە کۆیلە کردنی نەتەوەکانی ژێر دەست، ئەوا ئیمرۆ تورکیای دژە کورد و مرۆڤاییەتی، دەیەوێت هەمان سیاسەت لە رۆژهەڵاتی ناوەراستدا پیادە بکات بەڵام لە فۆرم و قاوغێکی تردا.
لەو دیدەوە تورکیا، بۆ تێکدان، وێرانکردنی وڵاتانی دراوسێی و لاواز کردنیان، راستەوخۆ سوپایی تورکیی بەکارنەهێنا بۆ داگیر کردن و پانتاوکردنی دەستەڵاتەکانی لە ناوچەکەدا، هەر وەکو چۆن لە مێژووی دوور و نزیکدا ئەنجامی داوە، بەڵکو ستراتیژییەتێکی لە جۆرێکی تری داڕشتوە بۆ پێکانی مەبەست و ئامانجەکانی، کە لەگەڵ بارودۆخی ئێستایدا بگونجێت، هیچ لێپرسراویی یاسایی نێو دەوڵەتی یەقەو بەرۆکی نەگرێت.
ئەزمونی روداوەکانی ئەو دوایەی ناوچەکە بەتایبەتی لە سوریا و کوردستاندا، پەردەی لەسەر ستراتیژیەتی تورکیا لابرد، کە لە دوو خاڵی گرنگدا بەرجەستە دەکرێت،
ستراتیژیەتی تورکیا بۆ دژاییەتی کردنی کورد
بەهێزبوونی پێگەی تورکیا لە ناوچەکەدا، کاردانەوەی هەبووە لەسەر ستراتیژیەتی جۆری مامەڵەکردنی تورکیا لەگەڵ زلهێزەکاندا، هەوڵدان بۆ سەپانددنی مەرجەکانی، تا رادەیەکی باشییش بۆی چۆتە سەر. ئەزمونی دارشتنی سیاسەتی دەرەکیی تورکەکان، لە هەموو زروف و زەمانێکدا، بڕگەیەکی سەرەکییان بریتی بووە لە پلانێکی تۆکمە بۆ دوژمناییەتی کردنی میللەتی کورد و دۆزە ڕەواکەی. هەموو تواناییەکیان خستۆتە گڕ بۆ پێکانی ئەو مەبەستە، رویداوە کە دەستکەوتی مادیی زۆر گەورەیان کردوە بە قوربانی سەرخستنی ئەو پلانە.
لە جەنگی نێوان عیراق و ئەمریکدا لە ساڵی ٢٠٠٣دا، تورکیا لەگەڵ ئەمریکادا رێککەوتن لەسەر بەکارهێنانی بنکەی ئینچرەلینک، دامەزرانددنی بنکەیەکی کاتی بۆ ٦٢،٠٠٠ هەزار سەربازی ئەمریکی، بۆ چوونە ناوەوەی باشوری کوردستان، لە بەرامبەردا تورکیا ٦ بیلیۆن دۆلار وەربگرێت. هەر زوو تورکیا لەو رێککەوتنە پاشگەز بووەوە. یەکێک لە هۆیە هەرە سەرەکییەکانی تورکیا بۆ ئەو پشگەزبوونەوەیە ئەوە بوو، کە ئەمریکا لە باشوری کوردستاندا بڕیاری دا، نۆ فلای زۆن دروست بکات بۆ کوردەکان. تورکیا نیەگەران بوو لەو بڕیارە، چونکە بەرژەوەندیی کوردیی تیا بوو، ئەو ناوچەییە ئەو شوێنانەی دەگرتەوە کە بنکەو بارەگای پەکەکەی لێدامەزرابوو. لەدەرئەنجامی ئەو گۆڕانە لە ناوچەکەدا، هەر بە پەلە لە رێکەوتی ٢٠/٣/٢٠٠٣دا، پەرلەمانی تورکیا یاساییەکی دەرکرد، لەو یاساییەدا مافی دا بە سوپایی تورکیا کە سنور ببەزێنێت و بچێتە باشووری وڵات.
بەدرێژایی شەری داعش لە ناوچەکەدا تاوەکو ناوەراستی ساڵی ٢٠١٥ش، تورکیا رێگر بوو لەوەی ئەمریکا بنکەی یئینچرەلینک بەکاربهێنێت لەو شەرەدا. ئەوە لە کاتێکدایە کە تورکیا ئەندامی ناتۆیە، ئەو ئەندام بوونەی خاڵێکی بەهێزە لەوەی کە ئەمریکا متمانەی زیاتری بداتێ، وەکو دۆستێکی نزیک چاوەروانی زیاتری لێبکات. لە لایەکی ترەوە بەگوێرەی پەیرە و پرۆگرامی ناتۆ، یاسایی ژمارە پێنج، تورکیا هەقی ئەوەیە رێگری لە ئەمریکا بکات بۆ بەکارهێنانی ئەو بنکەیە، بەڵام تورکیا هەقی ئەوەی نابێت کە رێگر بێت لە هیج چالاکییەکی سەربازیی ئەگەر ئەندامانی ناتۆ رەزامەندییان لەسەر بێت، بەگوێرەی سەرچاوەی زۆری میدیایی ئەوروپی و جیهانی، زۆربەی هەرە زۆری وڵاتانی ئەندام بوو لە ناتۆدا، پێیان وابوو کە داعش مەترسی تەنیا لەسەر رۆهەڵاتی ناوەراستدا نییە، بەڵکو مەترسی لەسەر هەموو جیهان دروست کردوە بە تایبەتی لە سەر ئەوروپا دا بەحوکمی شوێنی جوغرافی. لەو تێروانینەوە پشتیوانیان لە هەڵوێستی ئەمریکادا کرد دژ بە داعش. لەگەڵ ئەوەشدا تورکیا رای خۆی فەرز کرد، مەرجی خۆی سەپاند، کە تەنیا ئەو کات دەهڵێت ئەمریکا ئەو بنکەکەیە بەکاربهێنێت، کە ئۆردوگان دەستی واڵا بێت لە لێدانی میللەتی کورد و پارتی کرێکارانی کوردستان، ئەنجامدانی هێرشی سەربازی بۆ سەر بنکە و بارەگاکانیان، دەربەردەرکردنی زیاتری میللەتی کورد لە ناوچەکەدا و کاوڵکردنی زیاتری کوردستان.
دامەزرانددنی بنکەی ئینچرەلینک لە نزیک شاری ئەدەنەی تورکیا، دەگەرێندرێتەوە بۆ دوو هۆی سەرەکی یەکەم، تورکیا ئەندامی ناتۆیە و خاوەن هێزێکی سەربازی بەهێزە لە ناوچەکەدا، دووەم شوێنی جوغرافیایی شیاوە. بەڵام ئەو دوو خاڵە ئەو گرنگییەیان نەماوە بۆ دنیایی ئیمرۆ، ئەزمونی شەر دژ بە داعش، سەلماندوییەتی بۆ ئەمریکا کە سەرەڕای ئەوەی تورکیا ئەندامی ناتۆیە، خاوەن سوپایەکی بەهێزە، بەڵام ئەمریکا رێگەی پێنەدرا لە بەکارهێنانی هەر دوو سەرچاوە لە کاتی تەنگەژەکاندا کە بەرژوەندییەکانی ئەمریکا کەوتە مەترسیوە، ئەم ئەزمونە دەریخست بۆ ئەمریکا کە تورکیا چیتر جێگەی متمانەی سەدا سەد نەماوە. وڵاتانی ناوچەکە، ئیسرائیل، کوردستان، سعودیە، قەتەر، ئێران هەموویان پەیوەندییان لەگەڵ ئەمریکدا نزیکە وە خوازیاری ئەوەن ببن بە هاورێێ پلە یەکی ئەمریکا، بەڵام تا ئیمرۆ ئەولەویە دراوە بە تورکیا، ئەمە یەکێکە لە هۆکارە هەرە گرنگەکان کە گەیشتۆتە ئاستێک تورکیا لە سەنتەری بەهێزیەوە دوان بدات، خۆی بکات بە پۆلیس بۆ چاودێری لەسەر ناوچەی رۆژهەڵاتی ناوڕاستدا، مەرجەکانی خۆی بسەپێنێت بەتایبەتی لە دوژمنایەتی کردنی میللەتی کورد لە هەر چوار پاڕچەدا، کە گرنگترین خاڵە لە سیاسەت و ستراتیژیەتی تورکیادا.
ئۆردوگان و کورد
ئۆردوگان، گەورەترین گرفتی قبوڵ نەکردنی ئەو راستییەیە کە کورد نەتەوەیەکی چل ملیۆنیە لە رۆژهەڵاتی ناوەراستدا. رێژەی لە ٢٠% لەکۆی سەرژمێری دانیشتوانی تورکیا پێکدەهێنێت. ئوردوگان توشی دەمارگیری دەبێت کاتێك باس لە مافی نەتەوەی کورد دەکرێت، نەک هەر لە تورکیا بەڵکو لە پارچەکانی تری کوردستانیش.
رۆژئاوای وڵات بەگوێرەی یاسایی نێودەوڵەتی دەکەوێتە نێو سنوری سوریا لە باکورەوە، هاوسنوری تورکیا لە باشورەوە، بەهۆی هاتنە پێشەوەی بارودۆخی سیاسیی لەو وڵاتەدا، هەلێک هاتۆتە پێش بۆ کورد کە بتوانێت هەندێک دەستەکەوتی سیاسیی بەدەست بهێنێت، وەکو خودموختاریەک و ناسانددنی وەکو هەرێمێک، ئەمە تەنیا لە چوارچێوەی بیرۆکە و ئەگەر دایە، بەڵام ئۆردوگانی نیگەران کردوە، بەو بۆنەیەوە لە رێکەوتی ٢٦/٦/٢٠١٥دا دەفەرمێت" ئێمە بە هیچ شێوەیەک رێگە نادەین کە هەرێمێکی سەربەخۆ لە باکوری سوریادا دروست بکرێت، کە دەکەوێتە سنوری باشوری وڵاتی ئێمە".
بە هەرێم کردنی رۆژئاوا، هەنگاوێکی باشە بۆ بەهێزکردنی کورد. لە ستراتیژیەتی تورکیادا هەر مەسەلەیەک، بیرۆکەیەک و ئەگەرێک ببێت بە هۆکاری بەهێزکردنی نەتەوەی کورد، مانای ئەوەیە کە لەبەرژەوەندیی یەک ریزی نەتەوەی تورکدا نییە، بەمەترسیەکی مەزنی لە قەڵەم دەدات.
سەرکەوتنی بیرۆکەی بەهەرێم کردنی کورد لە رۆئاوادا، رێگە خۆشکەر دەبێت بۆ ئەوەی کە نەتەوەی کور یەکبگرێت لەگەڵ بەشەکانی تری کوردستان، بە تایبەتی لەگەڵ باکوردا، کە پەکەکە وەکو هێزێکی ئۆپۆزسیۆنی باڵا دەست بوونی هەییە لە ناوچەکەدا، لەگەڵ یەپەگەدا لە ژێر یەک ئالا، یەک ئایدۆلۆژیا، یەک سەرکرددایەتی ئاراستە دەکرێن.
ئۆردوگان، ئەو ڕاستییە دەبێنێت کە سروشتی بزوتنەوەی کورد لە رۆژئاوا و باکوردا، جیاوازییەکی ئێجگار زۆری هەییە لەگەڵ بزوتنەوەکانی کە لە باشوردا هەبوونە، هەروها سەرکرددایەتی یەپەگەو پەکەکە هاوشێوەی سەرکردەکانی پارتەکانی نێو حکومەتی بنکە فرەوانی هەرێم نین، چاوەڕوانی ئەوەیان لێناکرێت ببن بە ئەڵقەلەگوێێ، بە کەیفی خۆی لغاویان بکات، کە لە ئەنجامدا ببێتە هۆی فەرزکردنی هەیبەت و سامی نەتەوەی کورد لە تورکیا و ناوچەکەدا. زلهێزەکانی دنیاش یارمەتی دەریان بن لە بەفەرمی ناسانددنی نەتەوەی کورد، بە سەرکردە و پارتەکانی بە کۆمەڵگایی نیونەتەوەی، نزیک بوونەوەی هەنگاوێک بۆ سەربەخۆی بوونی ئەو میللەتە.
ئۆردوگان دەفەرمێت " پرسێک نییە بە ناوی پرسیی کورد"، سەرکردە تورکەکان، کە هەڵگری ئەو جۆرە عەقڵییەتە بن، ئەو جۆرە بیرکردنەوەیان بە ئایدۆلۆژیا کردبێت بۆ پەروەردە کردنی تورک، ئەندام، لاینەگری و دۆستی پارتەکانیان، ئەوا گومانی تێدا نییە کە لەسەر ئاستی دەستەڵاتی سیاسیی و شەقامی تورکییادا بە شێوەیەکی گشتی، زۆر بەنزمی لە نەتەوەی کورددی ژێر دەست دەڕوانن، لەو ئاستەدا نایانبینن کە شایەنی سەربەخۆیی بوون بن، ئەوەیان پێ قبوڵ نابێت کە میللەتێک چەند سەد ساڵە ژێر دەستی ئەوان بووە ئیمرۆ ببێتە خاوەن کیانی سیاسیی سەربەخۆ. وڵاتەکەی، بەهرە و سامانە مرۆیەکانی بەکاربهێنێت بۆ دامەزرانددنی سوپاییەکی تۆکمە بۆ پاراستنی خۆی، کە لە ئەنجامدا پێگەی لە هەموو روویەکەوە بەهێز ببێت لە نێو کۆمەڵگایی نیو نەتەوەیدا، لە هەموو کۆرو کۆنفراسێکی نێونەتەوەی وەک هێزێکی کارێگەر لە یەک ئاستدا بەرامبەریان بگرێت.
دەرئەنجامی باس
مێژویی نەتەوەی کورد سەلماندویەتی، ئەگەر رۆشەنبیران، دڵسۆزانی میللەتی کورد و نەتەوەیی کورد بەگشتی، پێیان وابێت بە دروستکردنی رێکخراوی ناوچەیی، دامەزرانددنی پارتی سیاسیی لێکترازاو، ژیانەوە و شکۆمەند کردنی ئەزمونی سەرنەکەوتوی سەرکردە کوردەکانی رابردو، زیندوکردنەوەی ناوی خێزان و بنەماڵەیی، دەتوانن بیناغەی ئەزمونێکی سەرکەوتو بینا بکەن، ئەوا بێگومان شکەستی ئەو جۆرە رێکخراوانە پێش وەخت وەکو رۆژی روناک دیارە، یان میللەتی کورد چاوی لەوە بێت لە وڵاتانی ئیران، تورکیا، عیراق و سوریا حوکمی دیموکراتی بەرقەرار بێت، ئینجا سەرکردەیی ئەو وڵاتانە بەزەییان بە کورد بێتەوە، لە رێگەی پەرلەمان و گفتوگۆدا ددان بنێن بە مافە ڕەواکانی، یان لەرێگەی پارتێکی هەڵگری بیرو باوەری ئیسلامیی، ئومەمی، مرۆڤاییەتیی، کۆمۆنیستی بەتەما بێت هێزی مرۆڤاییەتیی، هێزی چینی کرێکار، هێزی ئومەی ئیسلامیی دەگاتە ئەو ئاستە کە سەربەخۆیی و سەرفرازی بۆ میللەتی کورد مسۆگەر بکات، لە واقعیی دونیایی ئەورۆردا، ئەمانە خەونێکن هەرگیز نایەنە دی.
لە بارو دۆخی ئیمرۆی دنیاو کوردستاندا، سەرکردایەتیەکی نیشتمانپەرەوەر، دڵسۆز و بەتوانا، پارتێکی سیاسیی پێشرەو، هەڵگری ئایدۆلۆژیایی نەتەوەیی، پەروەردەکردنی میللەت بە گیانی بەرخوردان و خەباتی درێژ خایەن، کۆبونەوە لە ژێر یەک ئاڵا و سەرکردایەتی تاکە رێگەی رزگار بوونی میللەتی کوردە.
سەرچاوە:
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
